1-2. Ki bann sityasyon ki kapab fer nou plere?

 NOU tou nou plere parfwa. Petet nou plere akoz nou zwaye. Par egzanp, i kapab ki ou ti plere ler en keksoz spesyal ti arive parey ler ou zanfan ti ne. Oubyen ou ti plere ler ou ti mazin en keksoz ki fer ou kontan ouswa ler ou ti vwar en zanmi ki ou pa’n vwar pour plizyer lannen.

² Me souvan nou plere parski nou sagren oubyen parski nou pe soufer. Par egzanp, i kapab ki nou plere ler en dimoun ki nou annan konfyans ladan i dezapwent nou. Petet nou plere parski nou pe soufer pour en kantite letan akoz en maladi oubyen akoz en dimoun ki nou kontan in mor. Parfwa nou kapab santi parey profet Zeremi ti santi ler bann Babilonnyen ti detrir Zerizalenm. Zeremi ti dir: “Larm i koule dan mon lizye parey larivyer . . . Larm pe kontinyen koule dan mon lizye.”—Lam. 3:48, 49.

3. Ki mannyer Zeova i santi ler i vwar son bann serviter pe soufer? (Izai 63:9)

³ Zeova i konnen ki kantite fwa nou’n plere akoz bann sityasyon difisil ki nou fer fas avek. Labib i asir nou ki Zeova i konnen sak fwa ki enn ant nou i soufer e i tann nou ler nou demann li led. (Ps. 34:15) Me Zeova pa zis vwar e tann nou. I nou Papa e i kontan nou en kantite. Alor ler i vwar nou plere, i vreman sagren e deswit i vin ed nou.—Lir Izai 63:9.

4. Ki legzanp dan Labib nou pou vwar e ki nou pou aprann lo Zeova?

⁴ Dan son Parol, Zeova i dir nou ki mannyer i ti santi ler son bann serviter ti plere e ki mannyer i ti ed zot. Nou kapab vwar sa atraver legzanp Ana, David ek Lerwa Ezekya.  Kwa ki ti fer zot plere? Ki Zeova ti fer pour ed zot? Ki mannyer zot legzanp i kapab rekonfort nou ler nou plere akoz nou sagren, akoz nou’n ganny trai oubyen akoz nou santi ki nou napa lespwar?

LER NOU PLERE AKOZ NOU SAGREN

5. Ki mannyer sityasyon Ana ti fer li santi?

⁵ Ana ti fer fas avek plizyer problenm ki ti fer li vreman sagren e fer li plere. Enn bann difikilte ki i ti fer fas avek, i lefet ki son msye ti annan en lot madanm ki i ti’n marye avek. Sa lot madanm ti apel Penina e i ti kriyel anver Ana. An plis ki sa, Ana ti napa zanfan tandis ki Penina ti annan plizyer zanfan. (1 Sam. 1:1, 2) Penina ti kontinyen boufonn Ana parski i ti napa zanfan. Ki mannyer ou ti pou santi si ou ti dan en sityasyon koumsa? Sa sityasyon ti sitan fatig Ana ki “i ti plere e i pa ti manze” e i ti “vreman sagren.”—1 Sam. 1:6, 7, 10.

6. Ki Ana ti fer pour li ganny rekonforte?

⁶ Ki Ana ti fer pour santi li pli byen? En keksoz ki ti ed li, i ler i ti al ador Zeova kot tabernak. Laba, petet ler i ti o bor larantre lakour tabernak, “i ti konmans priy Zeova e i ti zis plere.” I ti sipliy Zeova: “Gete ki kantite mon pe soufer . . . [e] rapel mwan.” (1 Sam. 1:10b, 11) Dan lapriyer, Ana ti dir Zeova ki mannyer i ti pe santi e sa ki i ti pe mazinen. Ler Zeova ti vwar Ana pe plere, sa ti fer li osi sagren. Zeova ti kontan Ana en kantite e i ti anvi rekonfort li.

7. Ki mannyer Ana ti santi apre ki i ti’n koz avek Zeova konsernan son problenm?

⁷ Apre ki Ana ti’n dir Zeova egzakteman ki mannyer i santi, Granpret Eli ti reasir li ki Zeova pou reponn son lapriyer. Ki mannyer Ana ti santi apre sa? Labib i dir: “Sa madanm ti ale, i ti manze e i ti nepli tris.” (1 Sam. 1:17, 18) Menm si son sityasyon pa ti’n amelyore, Ana ti santi li pli kalm. I ti annan konfyans ki Zeova i konpran son santiman ek son problenm e ki i ti pou ed li. I sanmenm ki Zeova ti fer. I ti konpran santiman Ana, i ti ekout son lapriyer e pli tar i ti permet li pour annan zanfan.—1 Sam. 1:19, 20; 2:21.

8-9. Dapre Ebre 10:24, 25, akoz nou devret fer tou sa ki nou kapab pour asiste renyon? (Vwar portre.)

⁸ Ki nou aprann? Eski ou pe fer fas avek en sityasyon difisil ki fer ou plere? Petet ou sagren akoz en manm ou fanmir oubyen enn ou zanmi in mor. Dan bann moman koumsa, i kapab ki ou anvi tousel e sa i normal. Zis parey Ana ti ganny rekonforte e ankouraze ler i ti al kot tabernak, ou osi ou kapab ganny  rekonforte ler ou asiste renyon menm si ou fatige e sagren. (Lir Ebre 10:24, 25.) Pandan renyon, nou tann bann verse ki kapab rekonfort nou. Sa i en fason ki Zeova i ed nou pour aret mazin bann keksoz ki fer nou sagren. Sa i fer ki nou santi nou pli byen menm si nou sityasyon pa amelyore deswit.

⁹ Kot Lasal Rwayonm, nou pas letan avek nou bann frer ek ser, zot ankouraz nou e zot montre nou ki kantite zot kontan nou e sa i fer nou santi nou pli byen. (1 Tesa. 5:11, 14) Annou vwar lafason ki en frer ki en pionye spesyal ti santi apre ki son madanm ti mor. I dir: “Parfwa mon asize mwan tousel e mon zis plere. Me ler mon al renyon, mon ganny sa lankourazman ki mon bezwen. Bann frer ek ser i dir mwan bann parol ankourazan e zot larepons pandan renyon i vreman rekonfortan. Parfwa mon santi mwan vreman enkyet me ler mon ariv renyon, mon toultan santi mwan pli byen.” Ler nou kot Lasal Rwayonm, Zeova i kapab servi nou bann frer ek ser pour ed nou.

10. Ki mannyer nou kapab swiv legzanp Ana ler nou vreman sagren?

¹⁰ Ana ti osi santi li pli byen apre ki i ti’n priy Zeova e dir Zeova ki mannyer i santi. Ou osi ou kapab ‘larg tou ou traka lo Zeova’ e asire ki i pou ekout ou e i pou ed ou. (1 Pyer 5:7) Annou vwar sa ki en ser ti dir apre ki bann voler ti’n touy son msye. I dir: “Mon ti sitan sagren ki mon ti krwar mon pa ti pou zanmen ere ankor. Me sak fwa ki mon ti priy mon Papa Zeova, ki kontan mwan en kantite, mon ti santi mwan pli byen. Parfwa mon pa ti konnen ki pour dir me i ti konpran mwan. Ler mon ti vreman sagren e enkyet, mon ti demann li pour donn mwan lape lespri. Deswit apre sa, mon ti santi mwan pli kalm e mon ti kapab fer sa ki mon ti annan pour fer sa zour.” Ler ou priy Zeova e ou dir li kwa ki fer ou sagren, Zeova osi i sagren e i konpran egzakteman ki mannyer ou santi. Menm si ou sityasyon pa sanze, Zeova i kapab rekonfort ou e ed ou santi ou pli byen. (Ps. 94:19; Fili. 4:6, 7) I pou vwar ki ou pe kontinyen reste fidel e i pou rekonpans ou.—Ebr. 11:6.

LER NOU PLERE AKOZ NOU’N GANNY TRAI

11. Ki mannyer David ti santi ler lezot pa ti tret li byen?

¹¹ David ti fer fas avek plizyer sityasyon difisil ki ti fer li plere. I ti annan en kantite dimoun ki ti ay li menm serten son bann fanmir ek zanmi pa ti fidel avek li e zot ti esey fer li ditor. (1 Sam. 19:10, 11; 2 Sam. 15:10-14, 30) Pandan en moman difisil, David ti dir: “Mon’n fatige plennyen. Mon lili i mouye avek mon larm lannwit antye. Mon sofa i tou tranpe akoz mon zis plere.” Akoz David ti santi koumsa? I ti dir ki i ti santi koumsa “akoz tou sa bann ki pe opoz [li].” (Ps. 6:6, 7) Bann dimoun pa ti tret David byen e sa ti fer li pler en kantite.

12. Dapre Psonm 56:8, ki David ti asire?

¹² Menm si David ti fer fas avek en kantite problenm, i ti asire ki Zeova i kontan li. I ti dir: “Zeova pou tande ler mon pe plere.” (Ps. 6:8) En lot fwa, David ti ekri en keksoz enteresan e sa i ganny trouve dan Psonm 56:8. (Lir.) Ler nou lir sa bann parol, nou konpran ki Zeova i kontan nou en kantite e ki i enterese avek lafason  ki nou santi. David ti dir ki i konmsi Zeova pe met son larm dan en boutey oubyen pe ekri son larm dan en liv. David ti asire ki Zeova ti vwar e rapel son soufrans. David ti asire ki son Papa ki dan lesyel ki kontan li, i konn son bann problenm e i konn lafason ki bann problenm ti pe fer David santi.

13. Ler lezot i dezapwent nou, ki nou devret gard antet? (Vwar portre.)

¹³ Ki nou aprann? Eski ou annan en leker brize parski en dimoun ki ou annan konfyans ladan in dezapwent ou oubyen in trai ou? Eski ou annan en leker brize parski sa dimoun ki ou ti pe plàn pour marye avek in kit ou oubyen ou konzwen in abandonn ou? Oubyen petet en dimoun ki ou kontan in aret servi Zeova? En frer ki son madanm ti komet adilter e abandonn li, i dir: “Mon ti soke e mon pa ti oule krwar ki sa ti’n arive avek mwan. Mon ti sagren, ankoler e mon ti santi ki mon pa vo nanryen.” Si en dimoun in trai ou oubyen dezapwent ou, gard antet ki Zeova pa pou zanmen abandonn ou. Sa fason panse pou rekonfort ou. Sa frer ti dir: “Mon’n realize ki dimoun pa pou toultan fidel avek ou me ou kapab toultan depan lo Zeova. Nenport kwa ki arive, Zeova pou toultan la. I pa pou zanmen abandonn bann ki fidel avek li.” (Ps. 37:28) Osi, rapel ki Zeova i kontan ou plis ki okenn imen i kontan ou. Menm si i fermal ler en dimoun i trai ou, sa pa pou sanz sa kantite lanmour ki Zeova i annan pour ou. Ou presye pour li. (Rom. 8:38, 39) Sa ki ou devret gard antet i ki: Nenport fason ki en dimoun in tret ou, ou Papa ki dan lesyel i kontan ou.

14. Ki Psonm 34:18 i asir nou?

¹⁴ Si ou’n ganny trai, sa ki David i dir dan Psonm 34:18 i kapab rekonfort ou. (Lir.) En liv referans i dir ki sa lekspresyon “bann ki dekouraze,” i kapab pe refer avek “bann ki pa krwar ki i annan bon keksoz ki pou arive.” Ki mannyer Zeova i santi anver bann ki santi koumsa? Zeova i parey en papa oubyen en manman ki may e rekonfort en zanfan ki pe plere. I “pros avek” nou. Ler nou pe soufer parski en dimoun in trai nou oubyen abandonn nou, Zeova i konnen ki mannyer nou pe santi e i pou ed nou deswit. I vreman anvi rekonfort nou si nou annan en leker brize e si nou krwar ki nou pa vo nanryen. I donn nou lespwar e sa i ed nou andire ler nou fer fas avek problenm.—Iza. 65:17.

 LER NOU PLERE AKOZ NOU SANTI KI NOU NAPA LESPWAR

15. Ki sityasyon Ezekya ti fer fas avek ki ti fer li plere?

¹⁵ Ler Lerwa Ezekya ki ti lerwa Zida, ti annan 39 an, i ti aprann ki i ti annan en maladi grav. Profet Izai ki ti vin dir Ezekya sa mesaz sorti kot Zeova e i ti dir ki Ezekya ti pou mor akoz sa maladi. (2 Rwa. 20:1) I ti paret ki i ti napa okenn lespwar pour Ezekya. Sa mesaz ti fer Ezekya telman sagren ki i ti pler en kantite. I ti sipliy Zeova pour ed li.—2 Rwa. 20:2, 3.

16. Ki mannyer Zeova ti reazir ler i ti tann lapriyer Ezekya?

¹⁶ Ler Zeova ti tann lapriyer Ezekya e i ti vwar son larm, i ti pran pitye pour li e i ti dir: “Mon’n tann ou lapriyer. Mon’n vwar ou larm. Mon pe geri ou.” Atraver profet Izai, Zeova ti promet ki i ti pou fer Ezekya viv pli lontan e i pou sov Zerizalenm dan lanmen bann Asiriyen.—2 Rwa. 20:4-6.

17. Ki mannyer Zeova i rekonfort nou ler nou annan en maladi grav? (Psonm 41:3) (Vwar portre.)

¹⁷ Ki nou aprann? Eski ou annan en maladi grav e i paret ki ou napa okenn lespwar? Dir Zeova ki mannyer ou pe santi menm si ou pe plere ler ou pe priye. Labib i asir nou ki Zeova, sa “Papa ki pran lapenn e ki donn rekonfor dan tou sityasyon” pou rekonfort nou dan tou nou bann problenm. (2 Kor. 1:3, 4) Ozordi nou pa ekspekte ki Zeova pou rezourd tou nou problenm me nou kapab asire ki i pou ed nou. (Lir Psonm 41:3.) Zeova i servi son lespri sen pour donn nou lafors, lasazes ek lape lespri pour nou kapab andire. (Prov. 18:14; Fili. 4:13) I osi rekonfort nou par promet nou ki dan lavenir personn pa pou malad.—Iza. 33:24.

18. Ki verse ki’n rekonfort ou ler ou’n fer fas avek en sityasyon ki vreman difisil? (Vwar bwat “ Bann parol ki kapab rekonfort nou ler nou plere.”)

¹⁸ Sa ki Zeova ti dir Ezekya ti rekonfort li. Nou osi nou kapab ganny sa rekonfor ki nou bezwen dan Parol Bondye. Zeova in fer sir ki dan Labib i annan bann parol ki kapab rekonfort nou e ed nou ler nou fer fas avek bann sityasyon difisil. (Rom. 15:4) Ler en ser ki reste dan Was Lafrik ti ganny dir ki i ganny kanser, i ti plere souvan. I dir: “En verse ki ti vreman rekonfort mwan i Izai 26:3. Souvandfwa nou napa kontrol lo bann problenm ki nou fer fas avek me sa verse i asir mwan ki Zeova i kapab donn nou sa lape lespri ki pou ed nou reste kalm e andire ler nou fer fas avek problenm.” Eski i annan en verse ki sirtou ankouraz ou ler ou pe fer  fas avek en problenm ki vreman difisil e ki paret napa en solisyon?

19. Ki pou arive dan lavenir?

¹⁹ Lafen sa lemonn i pros e nou ekspekte ki nou pou fer fas avek plis problenm ki fer nou soufer e plere. Parey nou’n vwar avek legzanp Ana, David ek Lerwa Ezekya, Zeova i vwar ler nou pe plere e sa i fer li vreman sagren. Nou larm i vreman presye pour Zeova. Alor ler nou fer fas avek bann sityasyon ki difisil, nou bezwen dir Zeova ki mannyer nou santi dan lapriyer. Nou bezwen reste pros avek nou bann frer ek ser dan kongregasyon parski zot kontan nou. Annou kontinyen lir Labib pour Zeova kapab rekonfort nou. Nou kapab asire ki si nou reste fidel e nou andire, Zeova pou rekonpans nou. Sa i vedir ki dan lavenir i pou akonpli sa zoli promes, setadir ki i pou eswiy tou larm ki nou’n plere ki swa akoz nou sagren, akoz nou’n ganny trai oubyen akoz nou’n santi ki nou napa lespwar. (Rev. 21:4) Sa letan nou pou plere akoz nou dan lazwa.