1-2. Ki mannyer bann paran i devret reazir ler zot zanfan i demann zot kestyon konsernan Bondye ek Labib?

 EN KANTITE dimoun pou dakor ki fer grandi zanfan i enplik en kantite travay. Si ou en paran, nou felisit ou parski ou pe travay dir pour ed ou zanfan pour annan en lafwa for. (Det. 6:6, 7) Anmezir ou zanfan i grandi, petet i kapab konmans demann bann kestyon konsernan nou krwayans, par egzanp, i kapab demande akoz Labib i dir ki serten keksoz i mal.

² Petet o konmansman, sa bann kestyon pou fer ou enkyet. Ou kapab krwar ki ou zanfan pe demann sa bann kestyon parski i pa krwar dan Bondye e i pa krwar sa ki Labib i dir. Me an realite, anmezir ki en zanfan pe grandi i bezwen demann bann kestyon pour li kapab devlop son prop lafwa. (1 Kor. 13:11) Ou napa okenn rezon pour per. Vwar sa bann kestyon konman en loportinite pour ed ou zanfan pour reflesir byen pour li kapab devlop en lafwa for dan Bondye ek Labib.

3. Ki nou pou vwar dan sa lartik?

³ Dan sa lartik, nou pou vwar ki mannyer bann paran i kapab ed zot zanfan (1) pour devlop zot prop lafwa, (2) pour apresye bann standar ki dan Labib e (3) pour defann zot krwayans. Anmezir nou fer sa, nou pou vwar akoz i byen pour bann zanfan demann kestyon e bann aktivite ki ou kapab fer avek ou zanfan ki pou donn ou sa loportinite pour koz avek li konsernan nou krwayans.

ED OU ZANFAN POUR DEVLOP SON PROP LAFWA

4. Ki serten kestyon en zanfan i kapab demande e akoz?

⁴ Bann paran Kretyen i realize ki lafwa i pa en keksoz ki zot kapab donn zot zanfan zis akoz zot, zot annan. Ou pa’n ne avek lafwa dan Zeova e i menm parey pour ou zanfan. Anmezir ki en zanfan i grandi, i kapab demann bann kestyon parey: ‘Ki mannyer mon konnen ki Bondye i egziste? Eski  mon kapab vreman krwar sa ki Labib i dir?’ Anfet Labib i ankouraz nou pour servi nou “abilite pour reflesir” e pour “verifye tou keksoz.” (Rom. 12:1; 1 Tesa. 5:21) Me ki mannyer ou kapab ed ou zanfan pour devlop plis lafwa?

5. Ki mannyer paran i kapab ed zot zanfan pour devlop plis lafwa dan sa ki Labib i dir? (Romen 12:2)

⁵ Ankouraz ou zanfan pour li menm li fer sir ki sa ki Labib i dir i vre. (Lir Romen 12:2.) Ler ou zanfan i demann bann kestyon, pran sa konman en loportinite pour montre li ki mannyer pour trouv bann larepons, par servi nou bann zouti resers. Par egzanp, zot kapab servi Watch Tower Publications Index ek Liv resers pour Temwen Zeova. Dan Liv resers, i kapab al anba topik “Labib” e apre anba soutit, “Enspire par Bondye” pour vwar levidans ki Labib pa zis en bon liv ki’n ganny ekrir par zonm. O kontrer ki i “parol Bondye.” (1 Tesa. 2:13) Par egzanp, i kapab fer resers konsernan Niniv ki ti en lavil Asiriyen ki ti egziste dan letan lontan. Dan lepase, serten dimoun ki kritik Labib ti dir ki lavil Niniv pa’n zanmen egziste. Ver lannen 1850, bann eksper ti trouv bann debri lavil Niniv anba later e sa i montre ki sa ki Labib i dir i vre. (Zef. 2:13-15) Pour plis lenformasyon konsernan lafason ki destriksyon lavil Niniv ti akonpli bann profesi Labib, petet i kapab vwar sa lartik “Eski ou ti konnen?” ki dan Latour Veyer Novanm 2021. Ler ou zanfan i konpar sa ki i aprann dan nou bann piblikasyon avek sa ki i aprann dan bann ansiklopedi ek lezot liv referans, sa pou ed ou zanfan pour devlop plis lafwa dan sa ki Labib i dir.

6. Ki mannyer bann paran i kapab ed zot zanfan pour reflesir lo akoz sa ki Labib i dir, i vre? Donn en legzanp. (Vwar portre.)

⁶ Ed ou zanfan pour reflesir lo akoz sa ki Labib i dir, i vre. Paran i annan diferan loportinite pour koz avek zot zanfan konsernan Labib oubyen konsernan zot lafwa dan Bondye. Zot kapab fer sa ler zot vizit en mize, en zarden botanik oubyen ler zot al en legzibisyon kot en biro brans Temwen Zeova. Par egzanp, ou kapab montre ou zanfan en lobze oubyen fer li lir konsernan en levennman dan lepase ki relye avek en keksoz ki dan Labib. Sa i kapab ed ou zanfan pour vwar ki sa ki Labib i dir i vre. Petet ou kapab ansenny ou zanfan konsernan sa Moabite Stone ki en ros ki annan 3,000 an e ki annan non Zeova lo la. Sa Moabite Stone i dan mize Louvre ki Pari, Lafrans. I osi annan en kopi sa Moabite Stone dan en legzibisyon ki annan pour tit “The Bible and the Divine Name” dan biro prensip Temwen Zeova ki Warwick, New York. Sa Moabite  Stone i montre ki Lerwa Mesa ki ti lerwa Moab ti rebel kont Izrael. Sa i an armoni avek sa ki Labib i dir. (2 Rwa. 3:4, 5) Ler ou zanfan i vwar laprev pour li menm ki sa ki Labib i dir i vre e egzakt, sa pou fer son lafwa vin pli for.—Konpar 2 Kronik 9:6.

7-8. (a) Ki nou kapab aprann avek bann zoli pattern ki nou vwar dan lanatir? Donn en legzanp. (Vwar portre.) (b) Ki kestyon ou kapab demann ou zanfan pour ed li annan plis konfyans ki i annan en Kreater?

⁷ Ankouraz ou zanfan pour reflesir lo bann keksoz dan lanatir. Ler ou pe marse dan lafore oubyen ou pe travay dan ou zarden, ed ou zanfan pour vwar bann pattern oubyen laform ki egziste dan kreasyon ki ganny repete. Akoz i byen pour ou fer sa? Sa bann laform i montre ki i annan en personnaz entelizan e saz ki’n fer tousala. Par egzanp, pour plizyer lannen bann syantis in etidye bann keksoz dan kreasyon ki annan laform spiral. En syantis ki apel Nicola Fameli i eksplike ki ler ou kont lakantite spiral ki i annan dan en lobze dan lanatir, ou vwar sa menm seri nimero ki i annan dan tou lobze ki annan sa laform spiral. Sa seri nimero i apel Fibonacci sequence. Nou kapab vwar laform spiral dan plizyer keksoz par egzanp dan laform serten galaksi, en kokiy (nautilus shell), bann fey e dan fler tournsol. a

⁸ Kot lekol, ou zanfan pou aprann plis konsernan bann lezot laform oubyen pattern ki i annan dan lanatir. Par egzanp, dan laplipar pye dibwa i annan en pattern ki ganny repete. Tron sa pye dibwa i separe pour form bann brans e apre sa brans i separe pour vin bann pli pti brans. Sa kalite pattern i apel en fractal. Sa kalite pattern i osi dan lezot keksoz dan lanatir. Lekel ki’n kree sa bann zoli pattern? Ler ou zanfan i reflesir lo bann keksoz merveye ki Zeova in kree, i tre probab ki sa pou ed li pour devlop plis konfyans ki Bondye in kree tou keksoz. (Ebr. 3:4) Anmezir ki ou zanfan i grandi, ou pou osi bezwen ed li konpran akoz i enportan pour obeir bann lord Bondye. Pour fer sa, ou kapab demann li sa kestyon, “Si Bondye ki’n kree nou, eski ou pa krwar i konn sa pli bon fason ki nou devret viv pour nou ere?” Apre sa, ou kapab eksplik li ki Bondye in donn nou Labib pour montre nou ki mannyer nou kapab ere.

ED OU ZANFAN POUR APRESYE BANN STANDAR KI DAN LABIB

9. Akoz ou zanfan i kapab demann kestyon konsernan bann standar ki dan Labib?

⁹ Si ou zanfan pe demann bann kestyon konsernan bann keksoz ki Labib i dir i mal, esey rode akoz i pe demann sa bann kestyon. Eski i akoz i pa krwar ki sa ki Labib i  dir i vre oubyen eski i zis pa konnen ki mannyer pour eksplik son krwayans avek lezot? Nenport ki rezon ki i annan, ou kapab ed ou zanfan pour konpran akoz ki i bon pour obeir lord Zeova. Pour ou fer sa, ou kapab etidye sa liv Viv ere pour touzour! avek li. b

10. Ki mannyer ou kapab ed ou zanfan pour reflesir lo son lanmitye avek Zeova?

¹⁰ Ed ou zanfan pour apresye son lanmitye avek Zeova. Anmezir ou etidye Labib avek ou zanfan, servi bann kestyon ek portre ki dan sa liv Viv ere pour touzour! pour konnen ki mannyer i santi konsernan diferan topik. (Prov. 20:5) Par egzanp, leson 8 i dir ki Zeova i parey en zanmi ki donn nou bann rapel ki kapab protez nou e ed nou. Apre ki zot in diskit lo 1 Zan 5:3, ou kapab demann li, “Ler nou konnen ki Zeova i en bon zanmi pour nou, ki mannyer nou devret santi konsernan bann keksoz ki i demann nou pour fer?” Sa kestyon i kapab paret senp me sa kestyon i kapab ed ou zanfan pour konpran ki Zeova in donn nou bann lord parski i kontan nou.—Iza. 48:17, 18.

11. Ki mannyer ou kapab ed ou zanfan pour anvi aplik bann prensip Labib? (Proverb 2:10, 11)

¹¹ Koz avek ou zanfan konsernan bann byenfe ki nou gannyen ler nou aplik bann prensip Labib. Pandan ki ou pe lir Labib oubyen teks pour lazournen ansanm avek ou zanfan, koz avek li konsernan ki mannyer bann prensip Labib in ed zot fanmir. Par egzanp, eski ou zanfan i vwar bann byenfe ki nou gannyen ler nou travay dir e nou onnet? (Ebr. 13:18) Petet ou osi kapab koz avek li lo ki mannyer ler nou aplik bann prensip Labib, sa i ed nou pour pli an bonn sante e zwaye. (Prov. 14:29, 30) Ler ou koz lo bann prensip avek ou zanfan, i tre probab ki sa pou fer li pli anvi aplik sa bann prensip.—Lir Proverb 2:10, 11.

12. Ki mannyer en papa i ed son garson pour vwar byenfe ki nou gannyen ler nou aplik bann prensip Labib?

¹² En papa ki apel Steve, ki reste Lafrans i eksplike ki mannyer li ek son madanm i ed zot garson Ethan, ki en adolesan pour vwar ki Zeova in donn nou bann lalwa akoz i kontan nou. Steve i dir: “Nou demann li bann kestyon parey, ‘Akoz Zeova i anvi ki nou aplik sa prensip? Ki mannyer sa i montre ki i kontan nou? Ki pou arive si nou pa aplik sa prensip?’” Bann konversasyon koumsa in ed Ethan pour annan konfyans ki sa ki Zeova i dir, i byen. Steve i osi dir: “Nou lobzektif i pour ed Ethan vwar ki dan Labib i annan bann konsey ki pli saz ki lasazes imen.”

13. Ki mannyer bann paran i kapab ansenny zot zanfan pour aplik bann prensip Labib? Donn en legzanp.

¹³ Ansenny ou zanfan pour aplik bann prensip Labib. Par egzanp, ou kapab fer sa ler ou zanfan i ganny demande pour lir en liv spesifik konman en proze kot lekol. Bann dimoun dan sa liv i kapab fer bann keksoz ki Zeova i dir i mal. Par egzanp zot kapab fer bann keksoz imoral e zot vyolan. Sa bann liv i ganny ekrir dan en fason ki fer sa lekter anvi swiv legzanp sa bann dimoun. Ou kapab ankouraz ou zanfan pour reflesir lo ki mannyer Zeova i santi ler dimoun i dir oubyen fer sa bann keksoz ki sa bann dimoun dan sa liv pe fer. (Prov. 22:24, 25; 1 Kor. 15:33; Fili. 4:8) Sa i kapab ed ou zanfan pour li rann en temwannyaz avek son ansenyan ek bann  lezot etidyan pandan ki zot diskit lo sa liv dan laklas.

ANSENNY OU ZANFAN POUR LI KAPAB DEFANN SON KRWAYANS

14. Ki topik ki kapab difisil pour en zenn koz lo la e akoz?

¹⁴ Parfwa bann zenn i per pour defann zot krwayans. Par egzanp, zot kapab per pour eksplike akoz ki zot pa krwar dan evolisyon. Zot ansenyan i kapab koz lo evolisyon konman en keksoz ki’n vreman arive. Si ou en paran, ki mannyer ou kapab ed ou zanfan pour li pli asire ki sa ki i krwar ladan i vre?

15. Kwa ki kapab ed en zenn pour pli asire ki sa ki i krwar ladan i vre?

¹⁵ Ed ou zanfan pour pli asire ki sa ki i krwar ladan i vre. Ou zanfan pa devret onte parski i krwar ki i annan en Kreater. (2 Tim. 1:8) Akoz? Parski menm serten syantis pa krwar ki bann keksoz ki vivan in vin par azar. Sa bann syantis i vwar levidans ki i annan en personnaz entelizan ki’n kree tou bann keksoz vivan. Alor menm si bann lekol partou dan lemonn i ansennyen ki lavi in vin par evolisyon, sa bann syantis pa krwar dan sa teori. En keksoz ki kapab ed ou zanfan pour pli asire ki sa ki i krwar ladan i vre, i par rode kwa ki’n konvenk bann frer ek ser ki i annan en Kreater. c

16. Ki mannyer paran i kapab ed zot zanfan pour eksplik lezot akoz i krwar ki i annan en Kreater? (1 Pyer 3:15) (Vwar portre.)

¹⁶ Ed ou zanfan pour eksplik lezot akoz i krwar ki i annan en Kreater. (Lir 1 Pyer 3:15.) Petet ansanm avek ou zanfan, zot kapab vwar bann lartik dan sa seri “Young People Ask—Creation or Evolution?” ki lo jw.org an Angle. Ou zanfan i kapab swazir en leksplikasyon ki i santi i kapab servi pour ed lezot konpran ki i annan en Kreater. Apre sa, ou avek ou zanfan, zot kapab practice sa ki ou zanfan pour dir. Fer li rapel ki i pa neseser pour li argimant avek son bann kanmarad lekol. Si serten i pare pour koz plis lo sa size, ankouraz li pour gard son leksplikasyon senp e lozik. Par egzanp, en kanmarad lekol i kapab dir: “Mon krwar zis dan sa ki mon vwar e mon pa’n zanmen vwar Bondye.” En zenn i kapab reponn e dir: “Imazin ou pe marse dan bwa kot napa dimoun ki reste e ou vwar en pwi  ki annan delo ladan. Ki ou pou mazinen? I bezwen ki en dimoun ki’n fouy sa pwi. I menm parey avek nou plannet ek tou sa ki vivan. I bezwen annan en personnaz ki’n kree zot.”

17. Ki mannyer bann paran i kapab ankouraz zot zanfan pour rod loportinite pour koz avek lezot lo bann laverite ki dan Labib? Donn en legzanp.

¹⁷ Ankouraz ou zanfan pour rod bann loportinite pour koz avek lezot lo bann laverite ki dan Labib. (Rom. 10:10) Ou kapab konpar sa zefor ki en zanfan i fer pour koz avek lezot lo Labib avek sa zefor ki en dimoun i fer pour zwe en lenstriman lanmizik. O konmansman, sa dimoun ki pe aprann zwe en lenstriman lanmizik i zwe bann sanson ki fasil. Avek letan, i vwar li pli fasil pour zwe lanmizik. I menm parey pour en zenn. O konmansman, i kapab servi en lapros ki senp pour li koz lo son lafwa. Par egzanp, i kapab demann en kanmarad lekol: “Eski ou ti konnen ki souvan bann enzenyer i kopi sa ki zot vwar dan lanatir? Les mwan montre ou en video enteresan.” Apre ki i’n montre en video dan sa seri Was It Designed? petet i kapab demande: “Si en syantis i ganny felisite pour en keksoz ki in kopye dan lanatir, lekel ki devret ganny felisite pour sa keksoz ki sa syantis in kopye?” En lapros senp koumsa i kapab ase pour fer sa kanmarad lekol anvi aprann plis lo Zeova.

KONTINYEN ED OU ZANFAN POUR DEVLOP PLIS LAFWA

18. Ki mannyer bann paran i kapab kontinyen ed zot zanfan pour devlop plis lafwa dan Bondye?

¹⁸ Nou viv dan en lemonn kot laplipar dimoun napa lafwa dan Zeova. (2 Pyer 3:3) Alor paran anmezir ou etidye Labib avek ou zanfan, ankouraz li pour etidye bann topik ki pou ed li annan plis respe pour Parol Bondye ek bann standar Bondye. Ed ou zanfan pour reflesir plis e pour devlop plis lafwa dan Zeova par koz lo bann keksoz ki Zeova in kree. Ed li pour konpran bann profesi Labib ki’n ganny akonplir. Pli enportan, priy avek ou zanfan e pour ou zanfan. Ler ou fer sa, ou kapab asire ki Zeova pour rekonpans ou pour sa ki ou fer pour ed ou zanfan devlop plis lafwa.—2 Kron. 15:7.