1. Ki mannyer bann dimoun dan letan Labib ti konsider dipen?

 POUR bann dimoun dan letan Labib, dipen ti enn bann manze pli enportan. (Zen. 14:18; Lik 4:4) I ti telman enportan ki parfwa Labib ti servi sa mo “dipen” pour koz lo manze an zeneral. (Mat. 6:11; Akt 20:7, vwar not letid dan nwtsty-E.) Dipen ti osi en keksoz enportan dan de mirak ki Zezi ti fer. (Mat. 16:9, 10) Nou kapab lir konsernan enn sa bann mirak dan Zan sapit 6. Anmezir nou etidye sa resi, nou pou vwar sa ki nou kapab aprann.

2. Ki ti arive ki ti fer en kantite dimoun bezwen en keksoz pour manze?

² Apre ki bann zapot Zezi ti’n pas bokou letan pe anons sa bon nouvel, zot ti fatige. Alor, zot ti anbark dan en kannot ansanm avek Zezi pour al lot kote Lanmer Galile pour zot repoze. (Mark 6:7, 30-32; Lik 9:10) Zot ti ariv dan en landrwa trankil o bor Betsayda. Pa bokou letan apre, plizyer milye dimoun ti vin dan sa landrwa pour vwar Zezi. Zezi pa ti inyor zot. I ti pran letan pour ansenny zot konsernan Rwayonm e i ti geri bann ki malad. Vi ki tar ti pe fer, bann disip ti mazinen ki mannyer tou sa bann dimoun ti pou ganny keksoz pour manze. Petet serten sa bann dimoun ti annan en ptigin manze avek zot me laplipar dimoun ti pou bezwen al aste manze dan bann vilaz. (Mat. 14:15; Zan 6:4, 5) Ki Zezi ti pou fer?

ZEZI TI FER MIRAK POUR DONN DIPEN

3. Ki Zezi ti demann son bann zapot pour fer pour sa lafoul dimoun? (Vwar portre.)

³ Zezi ti dir son bann zapot: “Sa bann dimoun pa bezwen ale, zot, donn zot en keksoz pour manze.” (Mat.  14:16) Me sa ti paret enposib parski i ti annan apepre 5,000 zonm e si bann madanm ek bann zanfan i ganny enkli ansanm, i kapab ki an tou i ti annan apepre 15,000 dimoun. (Mat. 14:21) Andre ti dir: “I annan en pti garson la ki annan senk dipen lorz ek de pti pwason. Me sa pou ase pour tou sa dimoun?” (Zan 6:9) Dipen ki ti’n ganny fer avek lorz ti en keksoz ki dimoun ti abitye manze e i kapab ki sa pti pwason ti’n ganny sale e met sek. Me sa kantite dipen ek pwason ki sa pti garson ti annan pa ti pou ase pour sa kantite dimoun manze.

4. Ki nou aprann dan Zan 6:11-13? (Vwar portre.)

⁴ Zezi ti anvi demontre lospitalite anver sa bann dimoun alor i ti demann zot pour asiz ater dan zerb par group. (Mark 6:39, 40; lir Zan 6:11-13.) Apre sa, Zezi ti remersye son Papa pour sa dipen ek sa pwason. Ler i ti fer sa, i ti montre ki Bondye ki’n donn zot sa manze e ki i ti rekonesan pour sa manze. I enportan pour nou swiv legzanp Zezi par fer lapriyer avan en repa, ki swa nou tousel oubyen nou parmi lezot dimoun. Apre sa, Zezi ti fer son bann disip partaz manze avek bann dimoun e zot ti manze ziska ki zot vant ti plen. I ti sitan annan en kantite manze, ki bann dimoun pa ti kapab manz tou sa ki ti annan e Zezi pa ti anvi ki bann manze ki reste i ganny zete. Alor i ti fer son bann disip anmas tou manze ki ti’n reste pour ki i kapab ganny servi pli tar. Zezi pa ti fer gaspiyaz e sa i en bon legzanp pour nou. Si ou en paran, ou kapab servi sa resi pour ansenny ou zanfan lo  akoz i enportan pour fer lapriyer avan manze, pour demontre lospitalite e pour partaz sa ki zot annan zis parey Zezi ti fer.

5. Ki mannyer bann dimoun ti reakte anver sa ki Zezi ti fer sa zour e ki Zezi ti fer apre sa?

⁵ Bann dimoun ti enpresyonnen avek lafason ki Zezi ti ansennyen e avek bann mirak ki i ti fer. Zot ti konnen ki Moiz ti’n dir ki Bondye ti pou anvoy en profet spesyal. Alor i kapab ki zot ti’n mazinen ki Zezi ti sa profet. (Det. 18:15-18) Petet zot ti’n mazinen ki Zezi ti pou en bon dirizan e ki i ti pou menm kapab donn manze tou dimoun an Izrael. Alor sa bann dimoun ti anvi “fer [Zezi] vin lerwa pardfors.” (Zan 6:14, 15) Si Zezi ti les zot fer li vin lerwa, i ti pou pe partisip dan bann zafer politik ansanm avek bann Zwif, ki sa letan ti pe ganny dirize par bann Romen. Me Zezi pa ti pou fer sa. Ki Zezi ti fer? Labib i dir ki Zezi ti ‘al lo montanny li tousel.’ Alor, menm si lezot ti met presyon lo li, i pa ti partisip dan politik. Sa i en leson vreman enportan pour nou.

6. Ki mannyer nou kapab montre ki nou anvi swiv legzanp Zezi? (Vwar portre.)

⁶ Byensir, dimoun pa pou demann nou pour fer mirak pour donn zot manze, pour geri bann malad oubyen pour vin zot dirizan. Me zot kapab esey konvenk  nou pour vote oubyen pour siport en dimoun ki zot krwar pou kapab amelyor keksoz. Me legzanp Zezi i kler. Zezi ti refize pour partisip dan bann zafer politik e pli tar i ti menm dir: “Mon Rwayonm pa form parti sa lemonn.” (Zan 17:14; 18:36) Bann Kretyen ozordi i bezwen annan menm fason panse avek Zezi e swiv son legzanp. Parey Zezi, nou siport Rwayonm Bondye, nou koz avek lezot lo sa Rwayonm e nou priye pour sa Rwayonm vini. (Mat. 6:10) Aprezan annou vwar lezot keksoz ki nou kapab aprann avek sa resi konsernan ler Zezi ti fer mirak pour donn bann dimoun dipen.

SINIFIKASYON SA MIRAK

7. Ki Zezi ek son bann zapot ti fer? (Zan 6:16-20)

⁷ Apre ki Zezi ti’n donn manze sa lafoul dimoun, i ti fer son bann zapot pran kannot pour retourn Kapernaoum e Zezi ti al dan montanny pour anpese ki lafoul i fer li vin lerwa. (Lir Zan 6:16-20.) Ler bann zapot ti pe ale dan kannot, en gro tanpet ti deklare e i ti annan gro divan ek laroul. Apre, Zezi ti vin kot zot e i ti pe mars lo delo. I ti envit zapot Pyer pour mars lo delo li osi. (Mat. 14:22-31) Me dek ki Zezi ti antre dan kannot, divan ti kalmi. Bann disip ti etonnen e zot ti dir: “Ou vreman Garson Bondye.” a (Mat. 14:33) Menm si zot ti’n dir sa, zot pa ti konpran ki mannyer sa mirak ti relye avek sa ki Zezi ti’n fer pli boner ler i ti donn manze en lafoul dimoun. Remark sa ki Mark ti dir konsernan sa sityasyon. I ti dir: “[Bann zapot] ti vreman etonnen, parski zot pa ti’n konpran sinifikasyon mirak ki i ti’n fer avek dipen e zot ti kontinyen vwar li difisil pour konpran.” (Mark 6:50-52) Bann disip pa ti konpran ki Zeova ti’n donn Zezi pouvwar pour fer bokou plis ki zis fer mirak pour donn dipen. Me pa bokou letan apre sa, Zezi ti koz lo sa mirak konsernan dipen e sa ki i ti dir i ansenny nou en lot leson.

8-9. Akoz sa lafoul ti pe rod Zezi? (Zan 6:26, 27)

⁸ Sa lafoul ki Zezi ti’n donn zot manze ti pe konsantre lo satisfer zot bann bezwen fizik ek zot prop dezir. Ki mannyer zot ti fer sa? Son lannmen, sa lafoul ti al dan sa landrwa kot Zezi ti’n donn zot manze me Zezi ek son bann zapot pa ti laba. Alor sa bann dimoun ti anbark dan bann kannot ki ti’n sorti Tiberyad e zot ti al Kapernaoum pour rod Zezi. (Zan 6:22-24) Eski zot ti fer sa akoz zot ti anvi aprann plis konsernan Rwayonm? Non. Zot ti anvi ki Zezi i donn zot plis dipen. Ki mannyer nou konn sa?

⁹ Remark sa ki ti arive ler sa lafoul ti zwenn Zezi ler Zezi ti pros avek Kapernaoum. Zezi ti dir zot ki zot pe rod li zis akoz zot anvi manze. Menm si zot “in manz dipen ziska zot in rasazye,” Zezi ti dir zot ki sa manze, ti “manze ki gate.” I ti ankouraz zot pour travay pour “manze ki pa gate e ki donn lavi eternel.” (Lir Zan 6:26, 27.) Zezi ti dir ki son Papa ti pou donn sa kalite manze. I kapab ki bann dimoun ti sirprann ler zot ti tande ki i annan manze ki kapab fer zot viv pour touzour. Ki kalite manze ki ti pou kapab fer sa e ki mannyer bann ki ti pe ekout Zezi ti pou kapab ganny sa manze?

10. Ki bann dimoun ti bezwen fer pour ganny lavi eternel?

¹⁰ Sa bann Zwif ti anvi konnen ki zot ti bezwen fer pour zot kapab ganny sa  kalite manze. I kapab ki zot ti pe mazin bann keksoz ki Lalwa Moiz ti demann zot pour fer. Me Zezi ti dir zot: “La sa ki Bondye i demande, demontre lafwa dan sa enn ki i’n anvoye.” (Zan 6:28, 29) Zot ti bezwen demontre lafwa dan sa enn ki Bondye in anvoye pour zot kapab “ganny lavi eternel.” Anfet, Zezi ti’n deza koz lo sa size oparavan. (Zan 3:16-18, 36) Pli tar, i ti dir plis keksoz lo ki mannyer nou kapab ganny lavi eternel.—Zan 17:3.

11. Ki mannyer bann Zwif ti montre ki zot ti zis anvi manze ki ranpli vant? (Psonm 78:24, 25)

¹¹ Sa bann Zwif pa ti krwar ki zot ti bezwen demontre lafwa dan Zezi. Zot ti demann li: “Ki siny ou pou fer pour ki nou kapab vwar e krwar ou?” (Zan 6:30) Zot ti dir ki dan letan Moiz, zot zanset ti ganny lamann ki ti parey dipen. (Nee. 9:15; lir Psonm 78:24, 25.) I kler ki zot ti pe mazin zis manze ki ranpli vant. Apre ler Zezi ti koz konsernan “sa vre dipen ki sorti dan lesyel,” ki ti diferan avek lamann parski i ti kapab donn zot lavi eternel, zot pa ti ni menm demann li plis leksplikasyon. (Zan 6:32) Zot ti pe sitan konsantre lo zot bezwen fizik ki zot pa ti pe ekout sa ki Zezi ti pe esey ansenny zot konsernan ki mannyer pour ganny lavi eternel. Ki nou kapab aprann avek sa resi?

KWA KI DEVRET PLI ENPORTAN POUR NOU?

12. Ki mannyer Zezi ti montre kwa ki pli enportan?

¹² Annou vwar en keksoz enportan ki nou kapab aprann dan Zan sapit 6. Sa keksoz ki devret pli enportan pour nou i nou lanmitye avek Zeova e pour obeir li. Zezi ti montre sa ler Satan ti pe esey tant li. (Mat. 4:3, 4) Dan Sermon lo Montanny, Zezi ti montre ki i enportan pour nou rekonnet ki nou bezwen gidans Bondye. (Mat. 5:3) Alor nou kapab demann nou lekor: ‘Eski mon fason viv i montre ki mon lanmitye avek Zeova i pli enportan ki satisfer mon bann dezir fizik?’

13. (a) Akoz i pa mal pour apresye manze? (b) Ki Pol ti averti nou? (1 Korentyen 10:6, 7, 11)

¹³ I pa mal pour priy konsernan bann keksoz ki nou bezwen e pour kontan sa bann keksoz. (Lik 11:3) Labib i dir ki i bon pour en dimoun “manze, bwar e i kontan akoz i’n travay dir” e ki sa i “sorti kot sa vre Bondye.” (Ekle. 2:24; 8:15; Zak 1:17) Me nou bezwen fer atansyon ki bann keksoz materyel pa vin sa keksoz pli enportan dan nou lavi. Zapot Pol ti koz konsernan sa ler i ti ekri bann Kretyen ki ti viv dan sa letan kot Zerizalenm ek son tanp ti pou ganny detrir. I ti koz lo bann keksoz ki ti’n arive avek bann Izraelit dan lepase, enkli sa ki ti arive ler zot ti pros kot Montanny Sinai. I ti dir bann Kretyen ki zot pa devret annan “bann move dezir pour fer sa ki mal parey [bann Izraelit].” (Lir 1 Korentyen 10:6, 7, 11.) Zeova ti fer mirak e i ti donn bann Izraelit manze me bann Izraelit ti annan bann dezir egois e sa ti fer zot maler. (Nom. 11:4-6, 31-34) Osi ler bann Izraelit ti ador sa pti bef annor, zot ti montre ki manze, bwar e pas en bon moman ti pli enportan ki obeir Zeova. (Egz. 32:4-6) Pol ti koz lo sa bann legzanp pour avertir bann Kretyen ki ti pe viv dan sa letan kot Zerizalenm ek son tanp ti pou ganny detrir. Sa ti arive lannen 70. Nou osi nou pe viv dan letan lafen e sa lemonn i pros pour ganny detrir. Alor i enportan ki nou pran bann konsey ki Pol ti donnen o serye.

14. Ki Labib i dir konsernan manze ki i pou annan dan nouvo lemonn?

 ¹⁴ Ler Zezi ti ansenny nou pour priy konsernan “nou dipen ki nou bezwen pour ozordi,” i ti osi koz lo en letan kot lavolonte Bondye pou ganny fer “lo later parey dan lesyel.” (Mat. 6:9-11) Ki sa i fer ou mazinen? Labib i montre ki Bondye i anvi ki lo later i annan bann bon manze. Izai 25:6-8 i dir ki ler Rwayonm Bondye pou diriz lo later, i pou annan en kantite bon manze pour dimoun manze. Osi Psonm 72:16 i dir: “Manze pou annabondans lo later e lo latet bann montanny.” Eski ou pe esper sa letan kot ou pou kapab kwi ou pla prefere oubyen kwi en keksoz ki ou pa’n zanmen fer oparavan? Osi ou pou kapab manz fri dan ou prop plantasyon rezen. (Iza. 65:21, 22) Tou dimoun lo later pou kapab fer sa.

15. Ki bann ki pou resisite pou aprann? (Zan 6:35)

¹⁵ Lir Zan 6:35. Dan lavenir, ki pou arive avek bann ki ti manz sa dipen ek sa pwason ki Zezi ti donnen? Menm si en kantite parmi zot pa ti demontre lafwa dan Zezi, i kapab ki zot pou ganny resisite e nou pou ganny sans zwenn zot. (Zan 5:28, 29) Sa bann dimoun pou bezwen aprann ki Zezi ti pe esey dir ler i ti dir: “Mwan menm sa dipen lavi. Sa ki vin kot mwan pa pou zanmen lafen ankor.” Zot pou bezwen devlop lafwa e krwar ki Zezi in sakrifye son lavi pour zot. Sa letan, bann ki’n ganny resisite e bann zanfan ki ne dan nouvo lemonn pou aprann laverite konsernan Zeova ek son plan. Nou pou vreman kontan pour partisip dan sa travay lansennyman. Ler nou fer sa, sa pou fer nou pli zwaye ki okenn bon manze ki nou pou manze dan nouvo lemonn.

16. Ki nou pou vwar dan sa lartik ki swiv?

¹⁶ Dan sa lartik, nou’n vwar en bout sa resi dan Zan sapit 6. Me Zezi ti annan plis keksoz pour ansennyen konsernan “lavi eternel.” Bann Zwif ki Zezi ti pe koz avek ti bezwen ekout atantivman sa ki i ti pe dir e nou osi nou bezwen fer parey. Dan sa lartik ki swiv, nou pou kontinyen etidye Zan sapit 6.