1-3. (a) Akoz nou kapab asire ki nou kapab vin zanmi Bondye? (b) Lo lekel nou pou diskite dan sa lartik?

 DAN Labib, trwa fwa Abraam i ganny apele zanmi Bondye. (2 Kronik 20:7; Izai 41:8; Zak 2:23) I sa sel dimoun ki direkteman ganny apele zanmi Bondye dan Labib. Eski sa i vedir ki Abraam i sel imen ki’n deza vin zanmi Zeova? Non. Labib i montre ki nou tou nou kapab ganny sa privilez pour vin zanmi Bondye.

² Parol Bondye i ranpli avek bokou legzanp bann msye ek madanm fidel ki ti annan lafreyer pour Zeova, annan lafwa dan li e vin son bon zanmi. (Lir Psonm 25:14.) ^[1] (Vwar lezot not.) Zot ti form parti sa “gro nyaz temwen” ki Pol ti koz lo la. Zot tou zot ti zanmi Bondye.​—Ebre 12:1.

³ Annou port en pli gran latansyon lo trwa parmi sa bann zanmi Zeova dan Labib: (1) Rit, sa zenn vev fidel sorti Moab, (2) Izkiya, en lerwa Zida ki ti fidel ek  (3) Mari, manman Zezi ki ti annan limilite. Ki nou kapab aprann avek lafason ki sakenn parmi zot ti vin zanmi avek Bondye?

4, 5. Ki desizyon Rit ti bezwen fer e akoz i ti sitan difisil? (Vwar portre lo paz 9.)

⁴ Naomi ek son de belfiy Rit ek Orpa, ti pe fer sa gran traze sorti Moab pour al Izrael. Lo semen pour al laba, Orpa ti deside pour retourn kot li Moab. Me Naomi ti determinen pour retourn Izrael, landrwa kot i ti’n ne. Me li Rit, ki i ti deside fer? I ti bezwen fer en desizyon vreman difisil. Eski i ti pou retourn kot son fanmir Moab oubyen eski i ti pou reste avek son belmer Naomi e al Betleenm?​—Rit 1:1-8, 14.

⁵ Fanmir Rit ti reste Moab. I ti’n kapab retourn kot zot e i tre probab ki zot ti pou’n pran swen avek li. I ti konn bann dimoun, zot langaz ek kiltir. Naomi pa ti kapab promet Rit tousala laba Betleenm. An plis, Naomi ti per ki i pa ti pou kapab ganny en msye ouswa en lakaz pour Rit. Alor Naomi ti dir li retourn Moab. Parey nou’n aprann, Orpa ti “retourn kot son pep ek son bann bondye.” (Rit 1:9-15) Me Rit ti deside pour pa retourn kot son pep ek zot bann fo bondye.

6. (a) Ki desizyon saz Rit ti pran? (b) Akoz Boaz ti dir ki Rit in rod refiz anba lezel Zeova?

⁶ I paret ki Rit ti’n aprann konn Zeova atraver son msye oubyen atraver Naomi. I ti aprann ki Zeova pa parey sa bann bondye ki zot ti servi Moab. I ti kontan Zeova e i ti konnen ki Zeova i merit son lanmour ek ladorasyon. Alor Rit ti fer en desizyon saz. I ti dir Naomi: “Ou pep pou vin mon pep e ou Bondye mon Bondye.” (Rit 1:16) Ler nou mazin sa lanmour ki Rit ti annan pour Naomi, sirman sa i tous nou leker. Me sa ki pli enpresyonan i sa lanmour ki Rit ti annan pour Zeova. Sa ti osi enpresyonn Boaz, ki pli tar ti felisit li pour ‘rod refiz anba lezel Zeova.’ (Lir Rit 2:12.) ^[2] (Vwar lezot not.) Bann parol ki Boaz ti servi i kapab fer nou mazin fason ki en pti zwazo i rod proteksyon anba lezel son paran. (Psonm 36:7; 91:1-4) Pareyman, avek lanmour, Zeova ti protez Rit e rekonpans li pour son lafwa. Rit ti napa okenn rezon pour regret son desizyon.

7. Kwa ki kapab ed bann ki ezite dedye zot lavi avek Zeova?

⁷ Bokou dimoun i aprann konn Zeova me zot deside pour pa fer li vin zot refiz. Zot ezite dedye zot lavi avek li e batize. Si ou santi koumsa, demann ou lekor kwa ki pe anpes ou batize. Tou dimoun i servi en bondye. (Zozye 24:15) Servi sa vre Bondye ti pou sa desizyon pli saz. Ler ou dedye ou lavi avek Zeova, ou montre ki ou annan lafwa ki i pou vin en refiz pour ou. I pou ed ou servi li malgre okenn problenm ki ou kapab annan zis parey i ti fer pour Rit.

8. Ki lanvironnman Izkiya ti grandi ladan?

⁸ Izkiya ti grandi dan en lanvironnman ki konpletman diferan avek Rit. I ti form parti nasyon Izrael ki ti’n dedye avek Bondye. Me pa tou Izraelit ki ti reste fidel. Lerwa Aaz, papa Izkiya,  ti en move lerwa. I ti mank respe pour tanp Zeova e i ti enfliyans lezot dimoun pour ador lezot bondye. Aaz ti menm bril serten frer Izkiya vivan konman sakrifis pour bann fo bondye. Lanfans Izkiya ti terib!​—2 Lerwa 16:2-4, 10-17; 2 Kronik 28:1-3.

9, 10. (a) Akoz Izkiya ti’n kapab fasilman dezapwente? (b) Akoz nou pa devret dezapwente avek Bondye? (c) Akoz nou pa devret krwar ki nou lanfans ki determin kalite dimoun nou pou vini?

⁹ Move legzanp Aaz ti’n kapab fer son garson Izkiya dezapwente oubyen ankoler avek Zeova. Ozordi, serten ki’n bezwen andir bann difikilte ki pa nanryen konpare avek sa ki Izkiya ti’n pas atraver, i krwar ki zot annan rezon pour “ankoler avek Zeova” oubyen dezapwente avek son lorganizasyon. (Proverb 19:3) Lezot i santi ki zot move lanfans i kapab fer zot anmenn en move lavi oubyen fer menm fot avek zot paran. (Ezekyel 18:2, 3) Me eski sa i vre?

¹⁰ Lavi Izkiya i montre ki sa pa leka. I pa zanmen annan en bon rezon pour ankoler avek Zeova. Zeova pa fer bann move keksoz arive avek dimoun. (Zob 34:10) I vre ki bann paran i kapab montre zot zanfan pour fer sa ki byen ouswa sa ki mal. (Proverb 22:6; Kolosyen 3:21) Me sa pa vedir ki nou lanfans pou determin ki kalite dimoun nou pou vini. Akoz nou dir sa? Parski Bondye in donn nou sa liberte pour swazir, swa pour fer sa ki bon ouswa sa ki move. (Deterononm 30:19) Ki mannyer Izkiya ti servi son liberte?

11. Akoz Izkiya ti enn parmi bann pli bon lerwa Zida?

¹¹ Menm si papa Izkiya ti enn parmi bann pli move lerwa Zida, Izkiya li ti vin enn parmi bann pli bon lerwa. (Lir 2 Lerwa 18:5, 6.) ^[3] (Vwar lezot not.) I ti deside pour pa swiv move legzanp son papa. O kontrer, i ti deside pour ekout bann profet Zeova atantivman, tel parey Izai, Mika ek Osea. I ti port byen latansyon lo bann konsey ek koreksyon ki i ti gannyen. Sa ti pous li pour rezourd bokou problenm ki son papa ti’n fer. I ti pirifye tanp, demann  Bondye pour pardonn pese bann dimoun e detri bann zidol partou dan sa pei. (2 Kronik 29:1-11, 18-24; 31:1) Pli tar ler lerwa Asiryen, Senakerib, ti menase pour atak Zerizalenm, Izkiya ti demontre bokou kouraz ek lafwa. I ti annan konfyans ki Zeova ti pou protez zot e i ti ankouraz son pep. (2 Kronik 32:7, 8) En letan, Izkiya ti vin fyer, me ler Zeova ti koriz li, i ti abes son lekor. (2 Kronik 32:24-26) Pa i kler ki Izkiya i en bon legzanp pour nou imite! I pa ti les son lanfans gat son lavi. O kontrer, i ti montre ki i ti zanmi Zeova.

12. Parey Izkiya, ki mannyer bokou ozordi in montre ki zot zanmi avek Bondye?

¹² Ozordi sa lemonn i kriyel, napa lanmour e bokou zanfan i grandi san lanmour ek lafeksyon zot paran. (2 Timote 3:1-5) Menm si bokou Kretyen ozordi ti annan en move lanfans, zot in swazir pour vin zanmi avek Zeova. Parey Izkiya, zot montre ki zot lanfans pa neseserman determin sa kalite dimoun zot pou vini a lavenir. Bondye in donn nou sa liberte pour swazir e nou kapab swazir pour servi e onor li zis parey Izkiya ti fer.

13, 14. Akoz responsabilite Mari ti’n kapab paret tro difisil, me ki i ti dir lanz Gabriyel?

¹³ Bokou lannen apre lepok Izkiya, Mari, en zenn fiy ki ti annan limilite e ki ti en bon zanmi avek Zeova, ti ganny en responsabilite vreman enportan. I ti pou ansent, donn nesans Garson Bondye e elve li! I bezwen ki Zeova ti kontan Mari e annan konfyans dan li pour donn li en sitan gran loner. Me ki mannyer i ti reazir ler i ti fek tann sa?

¹⁴ Souvan, nou koz konsernan sa gran loner ki Mari ti gannyen. Me kwa ki ti’n kapab trakas li? Rapel ki lanz Gabriyel ti dir ki i ti pou ansent san ki i annan relasyon seksyel avek en msye. Me lanz Gabriyel pa ti ofer pour eksplik sa avek son fanmir ek vwazen. Ki zot ti pou mazinen? Ki mannyer i ti pou kapab konvenk Zozef ki i pa ti’n tronp li? Par lao tousala, i ti annan sa gran responsabilite pour elve Garson Bondye konman en imen! Nou pa konn tou sa ki ti trakas Mari, me selman nou konn sa ki i ti dir apre ki lanz Gabriyel ti koz avek li. I ti dir: “Mwan, mon servant [“Zeova,” NW], ki i ariv mwan parey ou’n dir mwan.”​—Lik 1:26-38.

15. Akoz lafwa Mari i remarkab?

¹⁵ Lafwa Mari i vreman remarkab! I  ti pare pour fer nenport kwa, zis parey en servant. I ti annan konfyans ki Zeova ti pou pran swen avek li e protez li. Ki mannyer Mari ti kapab annan en lafwa sitan for? Nou pa ne avek lafwa. Me nou kapab ganny lafwa si nou devlop li e demann Bondye pour beni nou bann zefor. (Galat 5:22; Efezyen 2:8) Mari ti fer bokou zefor pour ranforsi son lafwa. Ki mannyer nou konnen? Annou vwar lafason ki i ti ekoute e sa ki i ti dir.

16. Kwa ki montre ki Mari ti kontan ekoute?

¹⁶ Lafason ki Mari ti ekoute. Labib i dir ki nou “devre pare pou ekoute, me pran letan avan koze.” (Zak 1:19) Mari ti kontan ekoute. Labib i montre ki Mari ti port byen latansyon lo bann keksoz ki i ti tande, espesyalman bann keksoz ki i ti aprann lo Zeova. I ti pran letan pour medit lo sa bann keksoz enportan. En legzanp i ler Zezi ti ne e bann berze ti rakont Mari sa ki en lanz ti’n dir zot. Pli tar, ler Zezi ti annan 12 an, i ti dir en keksoz ki ti enpresyonn Mari. Dan tou le de ka, Mari ti ekoute, rapel e reflesir byen lo sa ki i ti’n tande.​—Lir Lik 2:16-19, 49, 51.

17. Ki nou aprann lo Mari atraver sa ki i ti dir?

¹⁷ Sa ki Mari ti dir. Labib pa dir bokou lo sa ki Mari ti dir. Dan Lik 1:46-55 i sa bout kot Mari i koz plis. Sa bann parol i montre ki Mari ti konn byen Lekritir Ebre. Ki mannyer sa? Sa ki Mari ti dir ti parey avek lapriyer Ana, manman Samyel. (1 Samyel 2:1-10) I paret ki Mari ti sit Lekritir apepre 20 fwa ler i ti pe koze. I kler ki i ti kontan koz konsernan laverite ki i ti’n aprann avek son pli bon Zanmi Zeova.

18. Dan ki fason nou kapab imit lafwa Mari?

¹⁸ Parey Mari, nou osi nou kapab ganny serten responsabilite avek Zeova ki nou panse i tro difisil pour nou. Annou imit son legzanp, avek limilite aksepte sa responsabilite e annan konfyans ki Zeova pou ed nou. Nou osi kapab imit lafwa Mari ler nou ekout Zeova atantivman e medit lo sa ki nou’n aprann lo li ek son plan. Alor nou pou kapab koz avek lezot lo sa ki nou’n aprann avek lazwa.​—Psonm 77:11, 12; Lik 8:18; Romen 10:15.

19. Ki nou kapab asire anmezir ki nou imit legzanp bann dimoun dan Labib ki ti annan lafwa remarkab?

¹⁹ I kler ki Rit, Izkiya ek Mari ti bann zanmi Zeova, zis parey Abraam. Zot ti form parti sa “gro nyaz temwen” ki ti osi annan sa privilez pour vin zanmi Bondye. Annou kontinyen imit sa bann legzanp lafwa remarkab. (Ebre 6:11, 12) Si nou fer sa, nou kapab esper avek pasyans sa rekonpans pour vin zanmi Zeova pour touzour!