TOU dimoun i anvi ere. Me nou pe viv dan bann dernyen zour e tou dimoun i annan bann problenm ki “vreman difisil” pour siporte. (2 Timote 3:1) Serten i perdi zot lazwa akoz zot ganny trete dan en fason enzis, akoz zot perdi zot travay ouswa akoz zot perdi en dimoun ki zot kontan dan lanmor. Lezot i perdi zot lazwa akoz en lot keksoz i arive ki fer zot enkyet oubyen tris. Menm bann adorater Zeova i kapab dekouraze e gradyelman perdi zot lazwa. Si sa in ariv avek ou, ki mannyer ou kapab reganny ou lazwa?

Avan reponn sa kestyon, nou bezwen konpran kisisa vre lazwa e ki mannyer serten dimoun in gard zot lazwa menm ler zot ti dan difikilte. Apre sa, nou pou vwar ki mannyer nou kapab gard e ogmant nou lazwa.

Ler ou riye, sa pa vedir ki ou dan lazwa. Zis mazin sa: En dimoun sou i kapab riy en kantite, me ler i desoule i aret riye e i vwar ki i ankor annan bokou problenm. Sa riye ti zis tanporer, i pa ti vre lazwa.​—Proverb 14:13.

De lot kote, lazwa i sa santiman for ki nou annan dan nou leker ler nou ganny oubyen ekspekte en bon keksoz. Annan lazwa i vedir ki nou ere pa zis ler nou sityasyon i bon, me osi ler i move. (1 Tesalonisyen 1:6) Anfet, menm ler nou tris akoz en serten keksoz nou kapab annan lazwa. Par egzanp, bann zapot ti ganny bate akoz zot ti pe pres lo Zezi. Me zot “ti kit Sannedren byen kontan akoz zot ti’n ganny konsidere diny pour ganny maltrete o non Zezi.” (Akt 5:41) Zot pa ti kontan akoz zot ti’n ganny bate me akoz zot ti’n kapab reste fidel avek Bondye.

Lazwa pa en kalite ki nou ne avek oubyen ki vin natirelman. Akoz non? Parski vre lazwa i en laspe fri lespri sen Bondye. Lespri sen Bondye i ed nou devlop “sa nouvo personnalite” ki enkli lazwa. (Efezyen 4:24; Galat 5:22) Ler nou annan lazwa, i pou pli fasil pour fer fas avek nou bann difikilte.

Zeova ti anvi vwar bann bon keksoz arive lo later e non pa sa bann move keksoz ki nou vwar ozordi. Me menm si dimoun i fer bann move keksoz, Zeova pa perdi son lazwa. Labib i dir: “Pwisans ek lazwa i la kot i ete.” (1 Kronik 16:27) Deplis, bann bon keksoz ki bann serviter Zeova i fer i rann son leker ere.​—Proverb 27:11.

Nou imit oubyen esey vin parey Zeova ler nou pa perdi nou lazwa ler keksoz pa ariv parey nou ti pe ekspekte. Dan plas enkyet, nou kapab konsantre lo bann bon keksoz ki nou annan la konmela e esper  avek pasyans pour bann pli bon keksoz a lavenir. *​—Vwar not.

Dan Labib i annan en kantite legzanp bann dimoun ki ti gard zot lazwa menm ler zot ti annan bokou problenm. Abraam ti gard son lazwa menm ler son lavi ti an danze e ler lezot ti fer problenm avek li. (Zenez 12:10-20; 14:8-16; 16:4, 5; 20:1-18; 21:8, 9) Ki mannyer i ti fer sa? I ti mazin lo son lespwar pour viv dan nouvo lemonn anba dominasyon Mesi. (Zenez 22:15-18; Ebre 11:10) Zezi ti dir: “Zot papa Abraam ti telman anvi vwar sa letan kot mon ti pou vini e i ti rezoui.” (Zan 8:56) Nou imit Abraam ler nou kontinyen mazin lo sa lazwa ki nou pou gannyen a lavenir.​—Romen 8:21.

Pol ek Silas osi ti annan en lafwa for e zot ti gard zot lazwa menm si zot ti pas atraver bokou difikilte. Par egzanp, apre ki zot ti’n ganny byen bate e zete dan prizon, zot “ti pe priye e sant kantik pour loue Bondye.” (Akt 16:23-25) Zot ti kapab andir zot soufrans parski zot ti kontinyen mazin lo promes Bondye pour lavenir. Zot ti konnen ki zot ti pe soufer akoz zot ti disip Kris e sa osi ti donn zot lazwa. Nou imit Pol ek Silas ler nou mazin lo bann bon rezilta ki nou gannyen ler nou pe servi Bondye fidelman.​—Filipyen 1:12-14.

Ozordi osi i annan bokou legzanp bann frer ek ser ki’n gard zot lazwa malgre bann difikilte ki zot pas ladan. Par egzanp, an Novanm 2013, Siklonn Haiyan ti detri lakour plis ki 1,000 fanmir Temwen Zeova Filipin. George, ki reste dan lavil Tacloban e ki son lakaz ti konpletman ganny detrir ti dir: “Malgre tou sa ki’n arive, bann frer ek ser i ere. I difisil pour mwan eksprim sa lazwa ki nou santi.” Si nou mazin lo sa ki Zeova in fer pour nou e kontinyen demontre rekonesans anver li, nou pou gard nou lazwa menm ler nou annan bann gro difikilte. Ki lezot keksoz ki Zeova i donn nou ki donn nou bann rezon pour nou zwaye?

Sa pli bon rezon pour nou zwaye i nou relasyon avek Zeova. Nou konn Lerwa liniver. I nou Papa, Bondye ek Zanmi!​—Psonm 71:17, 18.

Nou osi rekonesan ki Zeova in donn nou lavi e sa abilite pour rezoui lavi. (Eklezyast 3:12, 13) Vi ki Zeova in atir nou ver li, nou kapab konpran sa ki i anvi pour nou e nou konnen ki mannyer pour viv nou lavi. (Kolosyen 1:9, 10) Par kont, laplipar dimoun pa konpran bi lavi. Pour met lanfaz lo sa diferans, Pol ti ekri: “‘Sa ki lizye pa’n vwar e zorey pa’n tande e sa ki dimoun pa’n mazin dan zot leker, sanmenm sa bann keksoz ki Bondye in prepare pour sa bann ki kontan li.’ Parski se avek nou ki Bondye in revel sa bann keksoz gras a son lespri sen.” (1 Korentyen 2:9, 10) Ler nou konpran lavolonte Zeova ek son plan, sa i donn nou lazwa.

Zeova in menm fer plis ankor pour nou. I’n fer li posib pour nou pese ganny pardonnen. (1 Zan 2:12) I donn nou lespwar pour viv dan nouvo lemonn ki pros pour vini. (Romen 12:12) Menm la konmela, Zeova i donn nou en kantite zanmi e nou ador li ansanm avek zot. (Psonm 133:1) Zeova i osi protez nou kont Satan ek bann demon. (Psonm 91:11) Si nou kontinyen mazin lo sa bann keksoz merveye ki Zeova in donn nou, nou pou annan plis lazwa.​—Filipyen 4:4.

Eski en Kretyen ki deza annan lazwa i kapab ganny plis lazwa ankor? Zezi ti dir:  “Mon’n dir zot tousala, pour ki zot ava annan menm lazwa ki mwan e ki zot lazwa i ava vreman gran.” (Zan 15:11) Sa i montre ki nou touzour kapab ganny plis lazwa. Nou kapab konpar nou lazwa avek en dife. Si nou anvi en dife i vin pli so, nou bezwen met plis dibwa dan sa dife. Rapel: Lespri sen i ed nou pour annan lazwa. Alor si nou anvi plis lazwa, nou bezwen kontinyen demann Bondye lespri sen atraver nou lapriyer. Labib ti ganny enspire par lespri sen, alor nou devret osi kontinyen medit lo sa ki nou lir.​—Psonm 1:1, 2; Lik 11:13.

En lot keksoz ki pou donn nou plis lazwa i ler nou reste okipe avek bann keksoz ki fer Zeova plezir. (Psonm 35:27; 112:1) Akoz? Labib i dir ki nou ti ganny kree pour “annan respe pour Bondye e obei son komannman. La sa ki tou et imen i devre fer.” (Eklezyast 12:13) Nou’n ganny kree dan en fason pour fer lavolonte Bondye. Alor ler nou servi Zeova, nou pou vreman rezouir nou lavi. *​—Vwar not.

Anmezir ki nou lazwa i ogmante, nou pou ganny plizyer lezot byenfe. Par egzanp, Zeova pou pran plis plezir dan nou anmezir ki nou kontinyen servi li dan lazwa menm ler nou annan problenm. (Deterononm 16:15; 1 Tesalonisyen 5:16-18) Osi, parski nou annan vre lazwa, nou pa pou vwar keksoz materyel konman sa keksoz pli enportan dan lavi. O kontrer, nou pou esey fer plis sakrifis pour Rwayonm Bondye. (Matye 13:44) Ler nou vwar bann bon keksoz ki arive ler nou fer plis pour Zeova, nou pou ganny plis lazwa, nou pou santi nou pli byen e nou pou fer lezot ere.​—Akt 20:35; Filipyen 1:3-5.

Osi, i tre probab ki pli nou annan lazwa pli nou pou an bonn sante. Labib i dir: “En leker zwaye i en bon remed.” (Proverb 17:22) En serser ki ti fer letid lo lasante kot Liniversite Nebraska, Leta-z-ini, ti dir en keksoz ki annakor avek Labib: “Si ou ere e satisfe avek ou lavi la konmela, i annan plis sans ki ou pou an bonn sante dan lavenir.”

Alor, menm si nou pe viv dan en letan ki fer nou strese, nou kapab ganny vre lazwa ler nou ganny lespri sen atraver nou lapriyer, letid ek meditasyon lo Parol Bondye. Nou pou osi ganny plis lazwa ler nou mazin lo sa bann bon keksoz ki Zeova i donn nou la konmela, si nou imit lafwa lezot e si nou esey fer lavolonte Bondye. Alor, nou pou kapab eksperyans sa ki ganny dekrir dan Psonm 64:10 ki dir: “Dimoun ki zis! Rezoui dan [Zeova]. Pran li pour labri!”