POUR plizyer lannen, bann dimoun ki kritik Labib ti dir ki Lerwa Belsazar, ki ganny mansyonnen dan liv Danyel, pa’n zanmen egziste. (Dan. 5:1) Zot ti krwar sa, akoz bann arkeolog pa ti’n zanmen trouv okenn levidans konsernan li. Par kont, sa ti sanze an 1854. Akoz?

An 1854, en anbasader sorti Grannbretanny ki apel J. G. Taylor ti vizit bann debri dan ansyen lavil Our, ki konmela i dan sid Irak. Dan sa lavil, i ti dekouver plizyer lobze ki ti’n ganny fer avek larzil dan en gran latour. Sak sa bann lobze i mezir apepre 10 santimet longer avek bann lekritir cuneiform lo la. Lo enn sa bann lobze, i annan en lapriyer ki demande ki Lerwa Nabonid ki ti lerwa Babilonn ek son premye garson Belsazar i viv lontan. Menm bann ki kritik Labib i dakor ki sa dekouvert i prouve ki Belsazar ti vreman egziste.

Par kont, Labib i dir ki Belsazar ti egziste e i osi dir ki i ti en lerwa. Me bann ki kritik Labib ti ankor doute si sa ki Labib i dir i vre. Par egzanp, ver 1875 en syantis Angle ki apel William Talbot ti ekri ki serten i dir ki “Bel-sar-ussur [Belsazar] ti lerwa ansanm avek son papa, Nabonid. Me i napa okenn levidans ki montre sa.”

Me keksoz ti vin pli kler ler bann lekritir lo lezot lobze ti montre ki parfwa, Lerwa Nabonid, papa Belsazar pa ti Babilonn pour plizyer lannen. Ki ti arive ler Lerwa Nabonid pa ti la? Encyclopaedia Britannica i dir: “Ler Nabonid ti al an egzil, i ti kit son tronn ek laplipar son larme avek Belsazar.” Alor Belsazar ti diriz Babilonn ler son papa pa ti la. Alan Millard, en arkeolog e spesyalis langaz ti dir ki i apropriye pour “liv Danyel apel Belsazar ‘lerwa.’”

Byensir, pour bann serviter Bondye, levidans ki liv Danyel i diny konfyans e enspire par Bondye i trouve dan Labib li menm.​—2 Tim. 3:16.