1. Kwa ki kapab enfliyans lafason ki en msye i tret son madanm ek zanfan?

KI SA mo “sef” i vedir pour ou? Serten zonm i les son kiltir oubyen lafason ki i’n grandi, enfliyans lafason ki i tret son madanm ek zanfan. En ser ki apel Yanita e ki reste Lerop i dir: “Kot mon reste, dimoun i krwar ki bann madanm i enferyer e zot devret ganny vwar konman bann servant.” En frer ki apel Luke e ki reste Leta-z-ini i dir: “Serten papa i ansenny zot bann garson ki bann madanm i devret reste trankil. I pa enportan sa ki en madanm i dir e alor bann msye pa bezwen ekout sa ki zot dir.” Me Zeova pa anvi ki bann msye i tret zot madanm dan sa fason. (Konpar Mark 7:13.) Alor, ki mannyer en msye i kapab aprann pour vin en bon sef fanmir?

2. Ki en sef fanmir i bezwen konnen e akoz?

² Pour en msye vin en bon sef fanmir i bezwen premyerman konpran kwa ki Zeova i anvi i fer. I osi bezwen konnen akoz Zeova in donn serten dimoun lotorite lo lezot e ki mannyer i kapab swiv legzanp Zeova ek Zezi. Akoz i enportan pour en zonm konn sa bann keksoz? Parski Zeova in donn bann sef fanmir serten lotorite e i ekspekte ki zot servi sa lotorite ki zot annan byen.​—Lik 12:48b.

3. Dapre 1 Korentyen 11:3, ki nou aprann konsernan lotorite?

³ Lir 1 Korentyen 11:3. Sa verse i dekri lafason ki Zeova in organiz son fanmir dan lesyel e lo later. Vi ki Zeova i “sef,” i annan tou lotorite. I’n fer laranzman pour donn serten, lotorite lo lezot. Sa bann ki annan lotorite i bezwen rann kont avek li pour lafason zot servi zot lotorite.  (Rom. 14:10; Efe. 3:14, 15) Zeova in donn Zezi lotorite lo kongregasyon me Zezi i bezwen rann kont avek Zeova pour lafason ki i tret nou. (1 Kor. 15:27) Zeova in osi donn en msye lotorite lo son madanm ek son zanfan. Me sa msye i bezwen rann kont avek Zeova ek Zezi pour lafason ki i tret son fanmir.​—1 Pyer 3:7.

4. Ki lotorite Zeova ek Zezi i annan?

⁴ Zeova i Sef son fanmir dan lesyel e lo later, i annan sa lotorite pour fer bann lalwa lo ki mannyer son bann zanfan i devret azir e i osi kapab fer sir ki zot obei sa bann lalwa. (Iza. 33:22, NWT) Konman sef kongregasyon, Zezi osi i annan drwa pour fer lalwa e pour fer sir ki nou swiv sa bann lalwa.​—Gal. 6:2; Kol. 1:18-20.

5. Ki lotorite en sef fanmir i annan e ki limit son lotorite i annan?

⁵ Zis parey Zeova ek Zezi, en sef fanmir i annan sa lotorite pour fer desizyon pour son fanmir. (Rom. 7:2; Efe. 6:4) Me son lotorite i annan limit. Par egzanp, son bann lareg i devret baze lo bann prensip ki trouve dan Parol Bondye. (Prov. 3:5, 6) En sef fanmir napa drwa pour fer lareg pour bann ki pa form parti son fanmir. (Rom. 14:4) Osi ler son bann garson ek fiy i grandi e kit lakour, zot kontinyen annan respe pour li me i nepli zot sef.​—Mat. 19:5.

6. Akoz Zeova ti fer laranzman pour serten annan lotorite?

⁶ Zeova ti fer laranzman pour serten annan lotorite akoz i kontan son fanmir. Sa i en kado sorti kot li. Sa laranzman i fer li posib pour annan lord ek lape dan fanmir Zeova. (1 Kor. 14:33, 40) Si i pa ti kler lekel ki annan lotorite, i ti pou annan dezord dan fanmir Zeova e personn pa ti pou ere. Par egzanp, personn pa ti pou konnen lekel ki pou fer desizyon final e lekel ki pou fer sa ki’n ganny deside.

7. Dapre Efezyen 5:25, 28, ki mannyer Zeova i anvi bann msye i tret zot madanm?

⁷ Si i bon pour bann zonm annan lotorite dan fanmir, akoz i annan sitan en kantite madanm ki santi ki zot msye i tret zot dan en fason kriyel e i kontrol zot? Sa i akoz en kantite msye i inyor bann standar Zeova pour lafanmir e zot swazir pour swiv bann koutim ouswa tradisyon. I kapab osi ki zot pa tret zot madanm byen parski zot anvi satisfer zot bann dezir egois. Par egzanp, en msye i kapab domin lo son madanm zis pour montre ki i pli enportan ki son madanm oubyen pour montre lezot ki i en “vre zonm.” Petet i mazinen ki i pa pou kapab fors son madanm pour kontan li me i kapab fer son madanm per li. I kapab servi sa lafreyer pour kontrol son madanm. * I mal pour bann msye mazin koumsa e fer sa bann keksoz. Zot pa respekte bann madanm parey i fodre e sa ki zot fer i lekontrer avek sa ki Zeova i anvi.​—Lir Efezyen 5:25, 28.

8. Ki mannyer en msye i kapab aprann pour vin en bon sef fanmir?

⁸ En msye i kapab aprann pour vin en bon sef fanmir par swiv lafason ki Zeova ek Zezi i servi zot lotorite. Nou pou diskit lo de kalite ki Zeova ek Zezi i  demontre e apre nou pou vwar ki mannyer en sef fanmir i kapab demontre sa bann menm kalite anver son madanm ek zanfan.

9. Ki mannyer Zeova i demontre limilite?

⁹ Limilite. Zeova i pli saz ki nou tou me kantmenm sa i ekout lopinyon son bann serviter. (Zen. 18:23, 24, 32) I ti permet bann ki anba son lotorite pour donn zot sizesyon. (1 Rwa. 22:19-22) Zeova i parfe, me i pa ekspekte ki nou parfe. O kontrer i ed bann imen enparfe ki servi li pour reisi. (Ps. 113:6, 7, NWT) Anfet, Labib in menm dekri Zeova konman en “led.” (Ps. 27:9; Ebr. 13:6) Lerwa David ti dir ki i ti kapab akonpli bann gran travay ki i ti’n ganny donnen pour fer zis akoz Zeova i annan limilite e i ti ed li.​—2 Sam. 22:36, NWT.

10. Ki mannyer Zezi ti demonte limilite?

¹⁰ Annou vwar legzanp Zezi. Menm si Zezi ti Senyer e Ansenyan son bann disip, i ti lav zot lipye. Akoz Zeova in fer sa resi ganny ekrir dan Labib? I’n fer sa pour donn tou dimoun, enkli bann sef fanmir, en legzanp pour swiv. Zezi li menm ti dir: “Mon’n kit en legzanp pour zot, pour ki parey mon’n fer avek zot, zot osi zot devret fer parey.” (Zan 13:12-17) Menm si Zezi ti annan bokou lotorite, i pa ti ekspekte ki lezot i servi li. O kontrer i ti servi lezot.​—Mat. 20:28.

11. Ki en sef fanmir i kapab aprann konsernan limilite avek legzanp Zeova ek Zezi?

¹¹ Leson pour nou. Si en sef fanmir i annan limilite, i pou demontre li dan diferan fason. Par egzanp, i pa ekspekte ki son madanm ek zanfan i parfe. I ekout lopinyon son madanm ek son zanfan, menm ler zot pa dakor avek son lopinyon. En ser ki apel Marley e ki reste Leta-z-ini i dir: “Parfwa mwan ek mon msye nou annan diferan lopinyon. Me mon konnen ki mon enportan pour li e i annan respe pour mwan parski i demann mwan mon lopinyon e i reflesir lo la avan i pran en desizyon.” An plis ki sa, en msye ki annan limilite, i pare pour fer bann louvraz lakour menm si dimoun dan sa landrwa kot zot reste i panse ki sa i louvraz bann madanm. Sa i kapab en defi.  Akoz? En ser ki apel Rachel i dir: “Dan sa pei kot mon sorti, si en msye i ed son madanm lav zafer sal oubyen netway lakaz, bann vwazen oubyen fanmir pou demande si i en ‘vre zonm.’ Zot pou krwar ki i napa kontrol lo son madanm.” Menm si dimoun dan landrwa kot ou reste i mazin koumsa, rapel ki Zezi ti lav lipye son bann disip menm si sa ti ganny vwar konman travay en lesklav. En bon sef fanmir pa pou fer keksoz pour enpresyonn lezot me sa ki enportan pour li i ki son madanm ek zanfan i ere. Apard ki annan limilite, ki lezot kalite en bon sef fanmir i bezwen annan?

12. Ki lanmour i pous Zeova ek Zezi pour fer?

¹² Lanmour. Tou sa ki Zeova i fer i akoz i kontan nou. (1 Zan 4:7, 8) I donn nou son Parol ek son lorganizasyon pour montre ki i kontan nou e ki i anvi nou vin son zanmi. I osi fer nou santi ki i enterese avek nou. Zeova i pran swen avek nou bezwen materyel par “donn nou annabondans tou keksoz ki nou kontan.” (1 Tim. 6:17) Ler nou fer fot, i koriz nou me i pa aret kontan nou. Vi ki Zeova i kontan nou, i’n ofer son Garson konman en ranson pour nou. Zezi osi i telman kontan nou ki ti pare pour donn son lavi pour nou. (Zan 3:16; 15:13) Napa nanryen ki kapab anpes Zeova ek Zezi kontan bann ki fidel avek zot!​—Zan 13:1; Rom. 8:35, 38, 39.

13. Akoz i enportan pour en sef fanmir demontre lanmour pour son fanmir? (Vwar sa bwat “ Ki mannyer en msye ki fek marye i kapab ganny respe son madanm?”)

¹³ Leson pour nou. Tou sa ki en sef fanmir i fer i devret ganny motive par lanmour. Akoz sa i enportan? Zapot Zan i dir: “Sa enn ki pa kontan son frer [oubyen son fanmir] ki i kapab vwar, pa kapab kontan Bondye ki i pa kapab vwar.” (1 Zan 4:11, 20) En msye ki kontan son fanmir e ki anvi swiv legzanp Zeova ek Zezi pou ed son fanmir annan en bon lanmitye avek Zeova, i pou demontre  lafeksyon pour son fanmir e i pou donn son fanmir sa ki zot bezwen pour viv. (1 Tim. 5:8) I pou ansenny e disiplin son zanfan. I pou osi kontinyen aprann fer bann desizyon ki onor Zeova e ki pou benefisye son fanmir. Aprezan, nou pou diskit lo sak sa bann keksoz e nou pou vwar ki mannyer en sef fanmir i kapab swiv legzanp Zeova ek Zezi.

14. Ki mannyer en sef fanmir i ed son fanmir pour vin pros avek Zeova?

¹⁴ Ed son fanmir pour annan en bon lanmitye avek Zeova. Zezi ti montre ki i parey son Papa akoz i ti ed son bann disip pour gard zot lafwa for. (Mat. 5:3, 6; Mark 6:34) Pareyman, sa keksoz pli enportan pour en sef fanmir i pour ed son fanmir vin pli pros avek Zeova. (Det. 6:6-9) I fer sa par fer sir ki li ek son fanmir, i lir Parol Bondye, asiste renyon e anons sa bon nouvel. I osi fer sir ki zot vin e reste bon zanmi avek Zeova.

15. Ki mannyer en sef fanmir i montre son fanmir ki i annan lafeksyon pour zot?

¹⁵ Demontre lafeksyon pour son fanmir. Zeova ti montre Zezi ki i kontan li e i ti fer sa devan lezot. (Mat. 3:17) Zezi ti souvan montre ki i kontan son bann disip par sa ki i ti dir e fer. Son bann disip osi ti dir li ki zot kontan li. (Zan 15:9, 12, 13; 21:16) En sef fanmir i kapab montre son madanm ek son zanfan ki i kontan zot par sa ki i fer. Par egzanp, ler i etidye Labib ansanm avek zot. I devret osi dir zot ki i kontan zot e i apresye zot. Ler i apropriye, i devret felisit zot devan lezot dimoun.​—Prov. 31:28, 29.

16. Kwa ankor ki en sef fanmir i bezwen fer e ki i devret evite fer?

¹⁶ Donn son fanmir sa ki zot bezwen pour viv. Zeova ti fer sir ki bann Izraelit ti annan tou sa ki zot bezwen menm ler i ti pe pini zot akoz zot ti dezobei li. (Det. 2:7; 29:5) Ozordi, i osi fer sir ki nou annan sa ki nou bezwen pour viv. (Mat. 6:31-33; 7:11) Pareyman, Zezi ti donn manze bann dimoun ki ti pe swiv li. (Mat. 14:17-20) I ti osi geri en kantite dimoun ki ti malad. (Mat. 4:24) Pour en sef fanmir fer plezir Zeova, i bezwen fer sir ki son fanmir i ganny sa ki zot bezwen pour viv. Par kont, i annan en keksoz ki i bezwen evite fer. I pa devret pas tro bokou letan dan travay ki sa i anpes li demontre lafeksyon pour son fanmir e i pa arive ed son fanmir pour annan en bon lanmitye avek Zeova.

17. Ki mannyer Zeova ek Zezi i ansenny e disiplin nou?

¹⁷ Ansenny e disiplin son zanfan. Zeova i ansenny e disiplin nou parski i anvi ed nou. (Ebr. 12:7-9) Zezi i ansenny e disiplin bann ki anba son lotorite parey son  Papa. (Zan 15:14, 15) I donn bann konsey ferm avek labonte. (Mat. 20:24-28) I konnen ki nou enparfe e ki nou souvan fer fot.​—Mat. 26:41.

18. Ki en bon sef fanmir i devret gard antet?

¹⁸ En sef fanmir ki swiv legzanp Zeova ek Zezi i gard antet ki son madanm ek zanfan i enparfe. I pa “pran lakoler” avek son madanm ek zanfan. (Kol. 3:19) O kontrer i aplik sa prensip ki dan Galat 6:1 e i esey redres zot “avek ladouser” akoz i rapel ki li osi i enparfe. Parey Zezi, i realize ki sa pli bon fason pour ansenny zot i atraver son legzanp.​—1 Pyer 2:21.

19-20. Ler en sef fanmir i fer desizyon, ki mannyer i kapab swiv legzanp Zeova ek Zezi?

¹⁹ Fer bann desizyon ki onor Zeova e ki benefisye son fanmir. Zeova i fer bann desizyon ki benefisye lezot. Par egzanp, i ti deside kree lavi pa pour son prop byenfe me i ti anvi ki nou osi nou rezouir lavi. Personn pa ti pou kapab fors Zeova pour li anvoy son Garson pour mor pour nou pese. I ti fer sa parski i ti anvi ed nou. Zezi osi ti fer bann desizyon ki ti ed lezot. (Rom. 15:3) Par egzanp, ler i ti vreman fatige olye repoze i ti ansenny en lafoul dimoun.​—Mark 6:31-34.

²⁰ En bon sef fanmir i konnen ki i difisil pour pran bann bon desizyon pour son fanmir e i pran sa responsabilite o serye. I evite pran bann desizyon san en bon rezon oubyen baze lo lafason ki i pe santi a sa moman. O kontrer i les Zeova montre li ki mannyer pour pran bann bon desizyon. * (Prov. 2:6, 7, NWT) Dan sa fason, i met lentere lezot avan sa ki pour li.​—Fili. 2:4.

21. Ki nou pou diskite dan sa lartik ki swiv?

²¹ Zeova in donn bann sef fanmir en gro responsabilite. I ekspekte ki zot fer zot mye pour desarz byen sa responsabilite. Me si en msye i fer son mye pour swiv legzanp Zeova ek Zezi, i pou vin en bon sef fanmir. Si son madanm i desarz son responsabilite dan fanmir, zot maryaz pou ere. Ki mannyer en madanm i devret vwar responsabilite ki son msye i annan konman sef fanmir e ki difikilte sa madanm i kapab rankontre? Nou pou vwar larepons sa bann kestyon dan sa lartik ki swiv.