1. Donn en rezon akoz fanmir Zeova i ini.

NOU kontan pour form parti fanmir Zeova. Dan nou fanmir, i annan lape ek linite. En rezon ki i koumsa i akoz nou tou nou fer nou mye pour demontre respe pour bann ki Zeova in donn serten lotorite. Anfet, ler nou konpran byen sa laranzman ki Zeova in fer, pour donn serten, lotorite lo lezot, sa pou fer nou pli ini.

2. Ki kestyon nou pou reponn dan sa lartik?

² Dan sa lartik, nou pou vwar lekel ki annan lotorite dan kongregasyon. Nou pou osi reponn sa bann kestyon swivan: Ki rol bann ser i annan dan kongregasyon? Eski i vre ki tou bann frer i sef tou bann ser? Eski sa lotorite ki bann ansyen i annan lo bann frer ek ser i menm lotorite ki en sef fanmir i annan lo son madanm ek zanfan? Premyerman, annou diskit lo ki mannyer nou devret vwar nou bann ser.

3. Ki mannyer nou kapab apresye travay ki nou bann ser i fer plis ankor?

³ Nou apresye nou bann ser ki travay dir pour pran swen avek zot fanmir, pour anons sa bon nouvel e pour ed lezot dan kongregasyon. Nou pou apresye zot plis ankor si nou reflesir lo lafason ki Zeova ek Zezi i vwar zot. Nou pou osi aprann ki mannyer pour tret bann madanm avek lafason ki zapot Pol ti tret zot.

4. Ki mannyer Labib i montre ki Zeova i apresye bann madanm osi byen ki bann msye?

⁴ Labib i montre ki Zeova i apresye bann madanm osi byen ki bann msye. Par egzanp, Labib i montre ki dan  premye syek, Zeova ti donn bann madanm ek msye lespri sen pour ki zot kapab fer bann mirak tel parey, koz dan diferan langaz. (Akt 2:1-4, 15-18) Tou le de, bann madanm ek bann msye in ganny swazir par lespri sen e zot pou diriz ansanm avek Zezi dan lesyel. (Gal. 3:26-29) Bann madanm osi byen ki bann msye pou viv dan paradi lo later pour touzour. (Rev. 7:9, 10, 13-15) Zot tou le de, zot annan sa responsabilite pour anons sa bon nouvel. (Mat. 28:19, 20) Par egzanp, liv Akt i koz lo en ser ki ti apel Prisil. Prisil ansanm avek son msye Akila, ti eksplik laverite klerman avek en zonm byen edike ki ti apel Apolos.​—Akt 18:24-26.

5. Ki mannyer Lik 10:38, 39, 42, i montre ki Zezi ti demontre respe pour bann madanm?

⁵ Zezi ti demontre respe pour bann madanm. I pa ti fer parey bann Farizyen, ki ti krwar ki bann madanm ti pli enferyer ki bann zonm. Zot pa ti koz avek bann madanm an piblik e zot pa ti zanmen koz lo Lekritir avek bann madanm. O kontrer, i ti diskit lo bann laverite enportan avek bann madanm e osi avek bann zonm. * (Lir Lik 10:38, 39, 42.) I ti osi les bann madanm akonpanny li ler i ti pe anons sa bon nouvel partou. (Lik 8:1-3) Osi, Zezi ti donn bann madanm sa privilez pour al dir bann zapot ki i’n resisite.​—Zan 20:16-18.

6. Ki mannyer zapot Pol ti montre ki i ti annan respe pour bann madanm?

⁶ Zapot Pol ti fer Timote rapel ki i bezwen onor bann madanm. I ti dir Timote tret “bann madanm aze parey bann manman” e “bann zenn madanm parey bann ser.” (1 Tim. 5:1, 2) Menm si Pol ti fer en kantite pour ed Timote annan en lafwa for, i ti rekonnet ki i ti manman ek granmanman Timote ki ti premye pour ansenny Timote “lekritir sen.” (2 Tim. 1:5; 3:14, 15) Dan let ki Pol ti ekri pour bann Kretyen Ronm, i ti osi mansyonn non bann ser. Pol ti remark travay ki sa bann ser ti pe fer e i ti osi dir zot ki i apresye zot travay.​—Rom. 16:1-4, 6, 12; Fili. 4:3.

7. Ki kestyon nou pou reponn aprezan?

⁷ Parey nou’n vwar dan bann paragraf avan, Labib pa dir ki bann ser i pli enferyer ki bann frer. Nou bann ser i zenere e zot kontan lezot. Zot fer en kantite dan kongregasyon. Bann ansyen i depan lo zot led pour gard lape ek linite dan kongregasyon. Me nou ankor bezwen reponn sa bann kestyon swivan: Akoz Zeova i demande ki parfwa en ser i kouver son latet? Vi ki zis bann frer ki ganny apwente konman ansyen ek serviter kongregasyon, eski sa i vedir ki tou bann frer i sef tou bann ser dan kongregasyon?

8. Dapre Efezyen 5:23, eski tou bann frer i sef tou bann ser? Eksplike.

⁸ Eski tou bann frer i sef tou bann ser? Larepons i non! (Lir Efezyen 5:23.) Dan fanmir, en msye i sef son madanm. En garson ki’n batize pa sef son manman. (Efe. 6:1, 2) Dan kongregasyon, bann ansyen i annan serten lotorite lo bann frer ek ser. (1 Tesa. 5:12; Ebr. 13:17) Bann madanm selibater ki nepli reste avek zot papa ek zot manman i kontinyen demontre respe pour zot paran e pour bann ansyen. Par kont, parey bann frer dan kongregasyon, bann ser i annan en sel sef e sa i Zezi.

9. Akoz parfwa bann ser i bezwen kouver zot latet?

 ⁹ Zeova in apwent bann zonm pour diriz sa travay lansennyman ek ladorasyon dan kongregasyon e i pa’n donn bann madanm sa menm lotorite. (1 Tim. 2:12) Akoz sa? Zeova in fer sa pour menm rezon ki i’n apwent Zezi konman sef bann zonm, pour fer ki kongregasyon i kontinyen reste organize. Me si i arive ki en ser i bezwen fer en travay ki normalman ganny fer par en frer, Zeova i ekspekte ki sa ser i kouver son latet. * (1 Kor. 11:4-7) Zeova i demann bann ser pour fer sa pour montre ki zot annan respe pour son bann standar, me pa pour fer zot santi ki zot enferyer. Aprezan, nou pou reponn sa kestyon: Ki lotorite bann sef fanmir ek bann ansyen i annan?

10. Akoz parfwa en ansyen i kapab anvi met bann lalwa pour kongregasyon?

¹⁰ Bann ansyen i kontan Kris e zot kontan bann “mouton” ki Zeova ek Zezi in donn zot pour pran swen avek. (Zan 21:15-17) Vi ki en ansyen i kontan bann frer ek ser dan kongregasyon, i kapab krwar ki i parey en papa pour zot. Alor en ansyen i kapab krwar ki si en sef fanmir i annan drwa fer bann lalwa pour protez son fanmir, li osi i kapab met bann lalwa ki i krwar pou protez bann mouton Bondye. Bann frer ek ser i kapab donn bann ansyen lenpresyon ki zot kapab fer sa, par demann bann ansyen pour fer desizyon pour zot. Me eski bann ansyen dan kongregasyon ek bann sef fanmir i annan menm lotorite?

11. Dan ki fason lotorite ki en sef fanmir i annan i parey lotorite ki bann ansyen i annan?

 ¹¹ Pol ti endike ki dan serten fason, lotorite ki en sef fanmir i annan i parey lotorite ki bann ansyen i annan. (1 Tim. 3:4, 5) Par egzanp, Zeova i oule ki bann manm fanmir i obei zot sef fanmir. (Kol. 3:20) I osi oule ki bann frer ek ser dan kongregasyon i obei bann ansyen. Zeova i ekspekte ki bann sef fanmir ek bann ansyen i ansenny bann ki anba zot responsabilite pour kontan Zeova. Zot osi fer sir ki sa bann ki anba zot responsabilite i santi ki lezot i kontan zot. Parey bann sef fanmir i ed zot fanmir ler zot dan problenm, bann ansyen i fer sir ki zot ed bann frer ek ser dan kongregasyon ler zot dan problenm. (Zak 2:15-17) Osi, Zeova i ekspekte ki bann ansyen ek bann sef fanmir i ed bann ki anba zot responsabilite pour obei Son bann lalwa. Zeova i osi averti zot: “Pa bezwen al pli lwen ki sa ki’n ganny ekrir” dan Labib.​—1 Kor. 4:6.

12-13. Dapre Romen 7:2, dan ki fason lotorite ki en sef fanmir i annan i diferan avek lotorite ki en ansyen i annan?

¹² Lotorite ki en ansyen i annan i vreman diferan avek lotorite ki en sef fanmir i annan. Par egzanp, Zeova in apwent  bann ansyen pour azir parey bann ziz e i’n donn zot sa responsabilite pour retir okenn dimoun ki pa repantir dan kongregasyon.​—1 Kor. 5:11-13.

¹³ De lot kote, Zeova in donn bann sef fanmir serten lotorite ki i pa’n donn avek bann ansyen. Zeova in donn en sef fanmir sa lotorite pour fer bann lalwa pour son fanmir e pour fer sir ki zot swiv sa bann lalwa. (Lir Romen 7:2.) Par egzanp, en sef fanmir i annan sa drwa pour deside keler son zanfan pou antre dan lakour aswar. I osi annan sa lotorite pour disiplin son zanfan si zot pa obei sa lalwa. (Efe. 6:1) Byensir, avan ki en sef fanmir ki kontan son fanmir i fer en desizyon, i diskit avek son madanm parski zot “en sel.” *​—Mat. 19:6.

14. (a) Dapre Mark 10:45, akoz i apropriye pour Zeova apwent Zezi konman sef kongregasyon? (b) Ki responsabilite Konsey Direkter i annan? (Vwar sa bwat “ Ki responsabilite Konsey Direkter i annan?”)

¹⁴ Atraver ranson, Zeova in aste lavi tou dimoun dan kongregasyon. I’n osi aste lavi tou lezot dimoun ki met zot lafwa dan Zezi. (Lir Mark 10:45; Akt 20:28; 1 Kor. 15:21, 22) Alor, i apropriye pour Zeova apwent Zezi konman sef kongregasyon parski i’n sakrifye son lavi pour nou. I pour sa rezon ki Zezi i annan sa lotorite pour fer bann lalwa konsernan sa ki bann dimoun, bann fanmir ek kongregasyon i devret fer. I osi annan sa lotorite pour fer sir ki nou obei sa bann lalwa. (Gal. 6:2) Me Zezi pa zis fer bann  lalwa. I pran swen avek nou e i kontan sakenn ant nou.​—Efe. 5:29.

15-16. Ki ou aprann avek sa ki en ser ki apel Marley ek en frer ki apel Benjamin i dir?

¹⁵ Bann ser i demontre respe pour Kris ler zot swiv bann gidans ki ganny donnen par bann zonm ki Kris in apwente pour pran swen avek zot. En ser ki apel Marley e ki reste Leta-z-ini i dir: “Konman en madanm marye e en ser dan kongregasyon, mon annan en rol pour zwe e mon vreman apresye mon rol. Mon bezwen kontinyen fer bokou zefor pour respekte sa lotorite ki Zeova in donn mon msye ek bann ansyen dan kongregasyon. Me mon msye ek bann frer dan kongregasyon in fer sa pli fasil pour mwan akoz zot demontre respe pour mwan e zot demontre lapresyasyon pour sa ki mon fer.” Bokou ser i dakor avek sa ki Marley i dir.

¹⁶ Ler bann frer i demontre respe pour bann ser, zot montre ki zot konpran sa laranzman ki Zeova in fer pour donn bann msye ek bann ansyen serten lotorite. En frer ki apel Benjamin e ki reste Langleter i dir: “Mon’n aprann en kantite avek komanter ki bann ser i fer dan bann renyon. Mon’n osi aprann avek zot bann sizesyon lo ki mannyer pour etidye e vin pli efikas dan predikasyon. Mon krwar sa travay ki zot fer i vreman enportan.”

17. Akoz nou devret demontre respe pour sa laranzman ki Zeova in fer pour donn lezot serten lotorite?

¹⁷ Ler tou msye, madanm, sef fanmir ek ansyen i konpran e demontre respe pour sa laranzman ki Zeova in fer pour donn Zezi, bann ansyen ek bann sef fanmir serten lotorite, i pou annan lape dan kongregasyon. Pli enportan ankor, nou loue Zeova, nou Papa ki dan lesyel, ki kontan nou.​—Ps. 150:6.