Mon paran ti aprann konn Zeova dan bann lannen 1920, avan zot ti marye. Mon ti ne an 1939. Ler mon ti ankor en zanfan, nou ti reste Langleter e mon ti asiste renyon avek mon paran. Pli tar mon ti zwenn Lekol Minister Teokratik. Mon ankor rapel ler mon ti partisip dan lekol pour premye fwa. Mon ti bezwen debout lo en bwat pour mwan kapab vwar lodyans. Mon ti annan si-z-an e mon ti per ler mon ti vwar zot.

Pour al predikasyon, mon papa ti ekri en pti prezantasyon lo en bout papye pour mwan. Mon ti annan wit an ler mon ti al kot en lakour mwan tousel pour premye fwa. Mon ti kontan ler sa met lakour ti lir mon prezantasyon e deswit i ti aksepte sa liv “Let God Be True”! Mon ti taye pour al rakont mon papa. Mon ti kontan pour al predikasyon e partisipe dan renyon e sa ti fer mwan anvi servi Zeova a plen tan.

Apre ki mon papa ti’n pran en labonnman Latour Veyer pour mwan, mon ti kontan Labib plis ankor. Sa bann magazin ti vin atraver lapos e dek ki mon ti gannyen, mon ti lir. Mon ti devlop plis konfyans dan Zeova e pli tar mon ti dedye mon lavi avek li.

An 1950, mwan ek mon fanmir ti asiste en lasanble ki ti annan pour tit “Theocracy’s Increase,” ki ti ganny fer New York. Tenm pour son Zedi le 3 Out ti “Missionary Day.” Sa zour, Frer Carey Barber, ki pli tar ti servi lo Konsey Direkter, ti fer diskour batenm. Ler i ti demann bann kandida batenm sa de kestyon a lafen son diskour, mon ti debout e dir “Wi!” Mon ti annan 11 an me mon ti realize ki mon ti’n pran en desizyon enportan. Mon ti per pour al dan delo akoz mon pa ti ankor  konn naze. Mon tonton ti al avek mwan kot basen naze e i ti asir mwan ki tou keksoz pour al byen. En frer ti batiz mwan e en lot ti tir mwan dan basen. I ti pas sitan vit ki mon lipye pa ti ni menm tous dan fon sa basen. Depi sa zour, Zeova in kontinyen gid mwan lo mon semen.

Ler mon ti fini lekol, mon ti anvi fer pionye me mon bann ansenyan ti ankouraz mwan pour al liniversite. Mon ti les zot met presyon lo mwan e mon ti al liniversite. Mon ti vitman realize ki mon pa ti pou kapab kontinyen reste fidel e an menm tan konsantre lo mon letid. Alor, mon ti deside pour kit liniversite. Mon ti priy Zeova konsernan sa e mon ti ekri en let pour mon bann ansenyan. Dan mon let, mon ti zantiman eksplik zot ki mon ti pou kit liniversite a lafen mon premye lannen. Mon ti met tou mon konfyans dan Zeova e deswit mon ti konmans fer pionye.

An Zilyet 1957, mon ti konmans fer pionye dan lavil Wellingborough. Mon ti demann bann frer dan Betel Lonn pour rekomann en frer ki en pionye eksperyanse, pour mwan kapab travay avek dan predikasyon. Alor zot ti rekomann Frer Bert Vaisey. Frer Vaisey ti ansenny mwan bokou keksoz. I ti en proklanmater devoue e i ti ed mwan pour annan en bon progranm pour predikasyon. Dan kongregasyon, i ti annan mwan, Frer Vaisey ek sis ser aze. Ler mon ti prepar e partisip dan tou renyon, sa ti donn mwan loportinite pour devlop plis konfyans dan Zeova e pour demontre mon lafwa.

Vi ki mon ti refize partisip dan servis militer, mon ti bezwen al dan prizon pour en pti pe letan. Ler mon ti sorti dan prizon, mon ti zwenn Barbara, ki ti en pionye spesyal. An 1959, nou ti marye e nou ti pare pour al servi nenport landrwa kot nou ti ganny demande. O konmansman, nou ti servi dan distrik Lancashire ki dan nor was Langleter. Apre an Zanvye 1961, mon ti ganny envite pour asiste Lekol Minister Rwayonm dan Betel Lonn, ki ti dire pour en mwan. A lafen sa lekol, mon ti sirprann parski mon ti’n ganny apwente konman sirveyan rezyonal. Pour de semenn, mon ti ganny formasyon avek en sirveyan rezyonal eksperyanse ki ti dan lavil Birmingham e Barbara ti kapab vin avek mwan. Apre sa de semenn, nou ti konmans nou servis dan distrik Lancashire ek Cheshire.

An Out 1962, ler nou ti lo vakans, nou ti ganny en let sorti kot biro brans Langleter. Dan sa let, i ti annan bann form laplikasyon pour Lekol Gilead. Apre ki nou ti’n priy lo la, nou de Barbara, nou ti ranpli nou form. Biro brans ti’n demann nou pour pa tarde pour retourn nou bann form e sanmenm sa ki nou ti fer. Senk mwan pli tar, nou ti al Brooklyn, New York pour asiste 38 tyenm laklas Lekol  Gilead. Pandan sa dis mwan ki nou ti dan sa lekol, nou ti etidye Labib o profon.

Dan Lekol Gilead, nou ti aprann en kantite keksoz lo Parol Bondye, lo Son lorganizasyon e osi lo nou bann frer ek ser dan lemonn antye. Sa letan mon ti annan 24 an e Barbara ti annan 23 an. Nou ti aprann bokou keksoz avek lezot etidyan ki ti dan nou laklas. Tou le zour, mon ti annan sa privilez pour travay ansanm avek Frer Fred Rusk, ki ti enn nou bann formater. Enn bann leson enportan ki mon ti aprann avek li, i pour toultan fer sir ki bann konsey ki ganny donnen i baze lo Labib. Serten frer ki ti fer diskour pandan sa lekol ti bann frer eksperyanse parey Nathan Knorr, Frederick Franz ek Karl Klein. Nou ti aprann en kantite avek legzanp Frer A. Macmillan ki ti annan bokou limilite. Dan son diskour, Frer Macmillan ti ansenny nou lo lafason ki Zeova ti ed son pep ant 1914 ziska boner 1919, kan bann frer dan lorganizasyon ti pas atraver bann moman difisil.

Ver lafen sa lekol, Frer Knorr ti dir nou de Barbara ki nou ti pou ganny anvoye Bouroundi, Lafrik. Nou ti degaze pour al dan bibliotek Betel pour get dan Yearbook pour konnen konbyen proklanmater i ti annan Bouroundi sa letan. Nou ti sirprann parski nou pa ti vwar okenn par ki kantite proklanmater i annan Bouroundi. Nou ti vreman enkyet! Nou ti pe al Lafrik, en kontinan ki nou pa ti konn bokou lo la, dan en landrwa kot predikasyon pa ti ankor ganny fer. Me apre ki nou ti’n priye, nou ti santi nou pli kalm.

Dan nou nouvo servis, tou keksoz ti diferan, sa i enkli klima, kiltir ek langaz. Nou ti bezwen aprann koz Franse. Nou ti osi bezwen rod en landrwa pour reste. De zour apre ki nou ti’n arive, Harry Arnott ki ti ansanm avek nou dan Lekol Gilead, ti vizit nou ler i ti pe retourn dan son servis Zanmbya. I ti ed nou trouv en apartman e sa ti vin nou premye lakaz misyonner. Pa bokou letan apre, bann zofisye gouvernman ki pa ti konn nanryen lo Temwen Zeova, ti konmans opoz nou. Zis konman nou ti konmans kontan nou servis, bann zofisye gouvernman ti dir nou ki si nou ti napa en permi travay, nou pa ti pou kapab reste. Malerezman, nou ti bezwen al dan en lot pei, safwasi Uganda.

 Nou ti per pour al Uganda san en viza. Me nou ti annan konfyans dan Zeova. En frer Kanadyen ki ti pe servi Uganda ti eksplik nou sityasyon avek en zofisye imigrasyon e sa zofisye ti dir ki nou kapab reste pour detrwa mwan ziska ki nou ganny nou permi pour reste dan sa pei. Sa ti prouve ki Zeova ti pe ed nou.

Lavi Uganda, ti vreman diferan avek Bouroundi. Laba, sa travay predikasyon ti’n fini konmans ganny fer, menm si i ti annan zis 28 Temwen Zeova dan pei antye. I ti annan bokou dimoun ki ti koz Angle dan nou teritwar. Me nou ti realize ki nou ti bezwen aprann enn bann langaz sa pei pour nou kapab ed bann dimoun ki enterese, pour progrese. Nou ti konmans anons sa bon nouvel dan rezyon Kampala. Laba, laplipar dimoun ti koz Luganda, alor nou ti deside pour aprann sa langaz. I ti pran plizyer lannen pour nou kapab koz sa langaz byen me ler nou ti konn koz sa langaz, sa ti ed nou pour pli efikas dan predikasyon. Nou ti konmans konpran pli byen sa ki nou bann etidyan Labib ti bezwen aprann. Ler zot ti vwar ki nou ti vreman enterese avek zot, zot ti dir nou ki mannyer zot ti santi konsernan sa ki zot ti pe aprann.

Nou ti vreman kontan pour ed bann dimoun aprann konn laverite e nou ti ganny plis lazwa ler nou ti ganny demande pour servi konman sirveyan rezyonal dan sa pei. Biro brans Kenya ti demann nou pour al partou dan Uganda pour rod bann landrwa kot zot kapab anvoy bann pionye spesyal. Plizyer fwa bann dimoun ti demontre lospitalite anver nou menm si zot pa ti’n zanmen zwenn Temwen Zeova oparavan. Zot ti akey nou e zot ti menm prepar bann repa pour nou.

Apre sa, nou ti al lo en lot vwayaz. Mon ti kit Kampala e vwayaz de zour dan tren ziska Mombassa, Kenya. Apre, mon ti pran bato pour al Sesel, en group zil dan Losean Endyen. An 1965 ziska 1972, Barbara ti al avek mwan sak fwa mon ti al vizit Sesel. O konmansman, i ti annan zis de proklanmater laba. Pli tar, zot ti vin en group e apre sa en kongregasyon. Mon ti osi al vizit bann frer ek ser Leritre, Letyopi ek Soudan.

Sityasyon politik ti sanze Uganda ler en group solda ti pran kontrol gouvernman. Bann lannen ki ti swiv ti vreman difisil e mon ti aprann ki i pli bon pour swiv sa konsey Labib ki dir: “Rann sa ki pour Sezar avek Sezar.” (Mark 12:17) A en serten moman, tou etranze ki ti pe reste Uganda, ti bezwen al anrezistre kot stasyon lapolis ki pli pre avek zot lakour. Deswit nou ti obei. Detrwa zour pli tar, ler mon ti dan lavil Kampala avek en lot misyonner, lapolis ti aret nou. Nou ti vreman per. Zot ti dir ki nou ti bann espyon e zot ti anmenn nou dan kordgard santral. Nou ti eksplik zot ki nou ti bann misyonner ki kontan lape. Nou ti dir zot ki nou ti’n deza anrezistre avek lapolis me zot pa ti ekout nou. Zot ti anmenn nou kot sa stasyon lapolis ki ti pli pre avek kot nou ti pe reste. Nou ti vreman soulaze ler sa gard ki nou ti’n anrezistre avek pli boner ti rekonnet nou e i ti dir sa gard ki ti’n aret nou pour larg nou.

Sa letan, nou ti enkyet sak fwa nou ti ariv kot bann solda ti’n blok semen, parski  parfwa sa bann solda ti sou. Sak fwa sa ti arive, nou ti priye e nou ti santi nou kalm ler zot ti les nou pase sen e sof. Malerezman, an 1973, tou bann misyonner etranze ti ganny demande pour kit Uganda.

Ankor enn fwa, nou ti ganny en nouvo servis. Safwasi nou ti ganny anvoye KotdIvwar, ki dan les Lafrik. Sa ti en gran sanzman pour nou. Nou ti bezwen adapte avek en nouvo kiltir e rekonmans koz Franse tou lazournen. Nou ti osi bezwen adapte avek bann misyonner ki sorti dan diferan pei. Ankor enn fwa, nou ti vwar ki mannyer Zeova ti ed nou ler bann ki ti annan leker senser ti vitman aksepte sa bon nouvel. Nou tou, nou ti vwar ki ler nou met konfyans dan Zeova, Zeova i gid nou lo nou semen.

En sel kou apre sa, dokter ti dir Barbara ki i ganny kanser. Menm si, plizyer fwa nou ti retourn Lerop pour fer son tretman, an 1983 nou ti realize ki nou ti pou nepli kapab kontinyen nou servis Lafrik. Sa ti en dezapwentman pour nou!

Ler nou ti pe servi dan Betel Lonn, Barbara ti vin pli malad e apre i ti mor. Lafanmir Betel ti donn mwan bokou sipor. I ti annan en koup ki ti ed mwan adapte e ki ti ed mwan pour kontinyen met mon konfyans dan Zeova. Pli tar, mon ti zwenn en ser ki apel Ann, ki ti en volonter dan Betel e ki ti deza en pionye spesyal. I ti kontan Zeova en kantite. An 1989, nou ti marye e depi sa nou pe servi dan Betel Lonn.

An 1995 ziska 2018, mon’n servi konman reprezantan biro prensipal Temwen Zeova (ki avan ti apel sirveyan zòn) e mon’n vizit apepre 60 pei. Dan sak sa bann vizit, mon ti vwar ki mannyer Zeova i pran swen avek son pep malgre nenport keksoz ki arive avek zot.

An 2017, mon ti retourn Lafrik lo enn sa bann vizit. Mon ti vreman kontan pour anmenn Ann, Bouroundi avek mwan pour premye fwa. Nou tou le de, nou ti sirprann pour vwar sa kantite dimoun ki’n vin dan laverite. Dan sa landrwa kot mon ti pres kazankaz an 1964, ozordi i annan en zoli Betel. Aprezan i annan plis ki 15,500 proklanmater dan sa pei.

Ler mon ti vwar progranm bann landrwa ki mon ti pou vizite an 2018, mon ti vreman kontan. Parmi bann pei ki mon ti pou vizite i KotdIvwar. Ler nou ti ariv Abidjan, ki pli gran lavil sa pei, mon ti santi konmsi mon’n retourn dan lakour. Ler mon ti get lo lalis telefonn bann frer ki travay dan Betel, mon ti remarke ki sa frer ki reste dan sa lasanm zis akote mwan, ti apel Frer Sossou. Mon rapel ki i ti sirveyan lavil ler mon ti Abidjan. Me i pa ti li sa. I ti son garson.

Zeova in gard son promes. Bann keksoz difisil ki’n arive dan mon lavi in montre mwan ki ler nou met nou konfyans dan Zeova, i pou gid nou lo nou semen. Aprezan, mon anvi kontinyen swiv sa semen ki pe vin deplizanpli kler, ziska dan nouvo lemonn.​—Prov. 4:18.