1. Ki bann kestyon en ser ki pe mazin pour marye i devret demann son lekor?

TOU Kretyen i anba lotorite Zezi Kri, ki en sef parfe. Me ler en madanm Kretyen i marye, en msye enparfe ki vin son sef. Sa i pa toultan fasil. Alor ler en ser pe mazin pour marye avek en frer, i devret demann son lekor: ‘Ki mannyer mon konnen ki sa frer pou vin en bon sef fanmir? Eski son servis pour Zeova i sa keksoz pli enportan dan son lavi? Si non, kwa ki fer mwan krwar ki i pou sa dimoun ki pou ed nou annan en bon lanmitye avek Zeova?’ Byensir, en ser osi i devret demann son lekor: ‘Ki bann kalite ki mwan, mon annan ki pou ede dan mon maryaz? Eski mon en dimoun ki annan pasyans e ki demontre zenerozite? Eski mon annan en bon lanmitye avek Zeova?’ (Ekle. 4:9, 12, NWT) Si en madanm i fer bann bon desizyon avan i marye, sa i kapab ed li annan en lavi maryaz ki ere.

2. Ki nou pou vwar dan sa lartik?

² Plizyer milyon ser Kretyen in kit en bon legzanp par lafason ki zot in aksepte lotorite zot msye. Zot merit ganny felisite! Nou byen kontan pour servi Zeova ansanm avek sa bann madanm fidel. Dan sa lartik, nou pou reponn trwa kestyon: (1) Ki serten problenm bann madanm i fer fas avek? (2) Akoz en madanm i swazir pour obei son msye? (3) Ki bann msye ek madanm Kretyen i kapab aprann konsernan lobeisans ek lafason ki zot kapab respekte lotorite atraver legzanp Zezi, Abigail e Mari, madanm Zozef?

3. Akoz tou koup marye i fer fas avek problenm?

³ Maryaz i en kado parfe sorti kot Bondye, me dimoun i enparfe. (1 Zan 1:8) I pour sa rezon ki Parol Bondye i averti bann koup marye ki zot “pou ganny problenm dan zot lavi.” (1 Kor. 7:28) Annou vwar serten problenm ki bann madanm i kapab fer fas avek.

4. Akoz en madanm i kapab santi ki i pe abes son lekor ler i aksepte lotorite son msye?

⁴ Parfwa, lafason ki en madanm in grandi, i kapab fer li santi ki si i aksepte lotorite son msye i pe abes son lekor. En ser ki apel Marisol e ki reste Leta-z-ini i dir: “Kot mon’n grandi, bann madanm in toultan ganny dir ki zot devret egal avek bann msye dan tou keksoz. Mon konnen ki Zeova in donn lotorite bann msye e i’n dir ki bann madanm i devret obei zot msye me i’n osi dir ki bann msye i merit annan respe pour zot madanm. Me parfwa i difisil pour mwan respekte lotorite mon msye parski lemonn i dir ki mon pa bezwen fer li.”

5. Ki move pwennvi serten msye i annan lo madanm?

⁵ I annan bann madanm ki’n marye avek bann msye ki krwar ki bann madanm i enferyer. En ser ki apel Ivon, ki reste Sid Lanmerik i dir: “Dan sa landrwa kot mon reste, bann msye i manz avan bann madanm. Bann pti fiy i bezwen kwi manze e netwaye. Tandis ki bann pti garson, zot manman ek zot ser ki fer tou keksoz pour zot e zot ganny dir ki zot bann ‘lerwa kot lakour.’” En ser ki apel Yingling, ki reste Lazi, i dir: “Dan mon langaz, i annan en koze ki dir ki bann madanm pa bezwen entelizan oubyen annan abilite. Zot rol i pour fer tou louvraz lakour e zot napa drwa donn zot lopinyon zot msye.” En msye ki swiv sa bann tradisyon, i fer lavi son madanm difisil, i pa swiv legzanp Zezi e i pa fer plezir Zeova.​—Efe. 5:28, 29; 1 Pyer 3:7.

6. Ki bann madanm i bezwen fer pour zot annan en relasyon personnel avek Zeova?

⁶ Parey i’n ganny mansyonnen dan sa lartik avan, Zeova i ekspekte ki bann msye Kretyen i donn zot fanmir sa ki zot bezwen pour viv e ed zot annan en bon lanmitye avek Li. (1 Tim. 5:8) Par kont, bann ser ki’n marye i devret fer letan sak zour pour lir Parol Bondye, pour reflesir lo la e pour fer lapriyer senser avek Zeova. Sa i kapab difisil. Bann madanm i vreman okipe, alor zot kapab santi ki zot napa ase letan oubyen lenerzi pour fer sa bann keksoz. Me i vreman enportan ki zot pran letan pour fer li. Akoz? Parski Zeova i anvi ki nou tou nou devlop e gard en relasyon personnel avek li.​—Akt 17:27.

7. Kwa ki pou fer li pli fasil pour en madanm respekte e obei son msye?

⁷ I normal pour en madanm fer bokou zefor pour aksepte lotorite son msye ki enparfe. Par kont, i pou pli fasil pour en madanm desarz son responsabilite ki Zeova in donn li, si i konpran e aksepte bann rezon dan Labib lo akoz i devret respekte e obei son msye.

8. Dapre Efezyen 5:22-24, akoz en madanm Kretyen i swazir pour aksepte lotorite son msye?

⁸ En madanm Kretyen i swazir pour aksepte lotorite son msye parski sanmenm sa ki Zeova in demann li pour fer. (Lir Efezyen 5:22-24.) I annan konfyans dan  son Papa ki dan lesyel. I konnen ki Zeova i kontan li e I pa pou demann li pour fer en keksoz ki pa bon pour li.​—Det. 6:24; 1 Zan 5:3.

9. Ki i arive ler en madanm i obei Zeova par aksepte lotorite son msye?

⁹ Lemonn i fer bann madanm krwar ki zot pe abes zot lekor ler zot aksepte lotorite zot msye e i ankouraz zot pour pa swiv bann standar Zeova. Byensir, bann ki promot sa bann nide pa konn nou Bondye ki kontan nou. Zeova pa pou zanmen donn son bann fiy ki i kontan, en lord ki pou abes zot. En ser ki fer bokou zefor pour obei Zeova par aksepte lotorite son msye, i ede pour ki i annan lape dan son fanmir. (Ps. 119:165) Sa i anmenn byenfe pour li, son msye e osi son zanfan.

10. Ki leson nou aprann avek sa ki Carol i dir?

¹⁰ En madanm ki aksepte lotorite son msye enparfe i montre ki i kontan e i annan respe pour Zeova, sa Enn ki’n donn serten, lotorite lo lezot. Carol, ki reste Sid Lanmerik, i dir: “Mon konnen ki mon msye pou fer fot. Mon osi konnen ki lafason mon tret li ler i fer sa bann fot, i montre ki kantite mon lanmitye avek Zeova i enportan pour mwan. Alor mon esey aksepte lotorite mon msye parski mon anvi fer plezir mon Papa ki dan lesyel.”

11. Kwa ki ed en ser ki apel Aneese pour pardonnen e ki nou kapab aprann avek sa ki i ti dir?

¹¹ I kapab difisil pour en madanm demontre respe e aksepte lotorite son msye si i santi ki son msye pa enterese avek son bann santiman ek lenkyetid. Me remark sa ki en ser marye ki apel Aneese i fer ler sa i arive avek li. I dir: “Mon esey pa pran lakoler. Mon gard antet ki nou tou nou fer fot. Mon anvi pardonn volonterman parey Zeova i fer. Ler mon pardonnen, mon reganny mon lape lespri.” (Ps. 86:5) Ler en madanm i pare pour pardonnen, i pou pli fasil pour li aksepte lotorite son msye.

12. Ki bann legzanp i annan dan Labib?

¹² Serten i kapab santi ki en dimoun ki aksepte lotorite i en dimoun feb. Me sa  pa vre ditou. Dan Labib i annan legzanp bann dimoun ki ti aksepte lotorite, ki ti annan bokou kouraz. Annou vwar ki nou kapab aprann avek Zezi, Abigail ek Mari.

13. Akoz Zezi i aksepte lotorite son Papa? Eksplike.

¹³ Zezi i aksepte lotorite Zeova, pa akoz i bet oubyen napa abilite. Son fason ansennyen ti senp, kler e sa i prouve ki i byen entelizan. (Zan 7:45, 46) Zeova ti konnen ki Zezi i annan abilite e i ti les Zezi travay ansanm avek li, ler I ti pe kree tou keksoz dan lesyel e lo later. (Prov. 8:30, NWT; Ebr. 1:2-4) Osi, apre ki Zeova ti resisit Zezi, Zeova ti donn Zezi “tou lotorite dan lesyel e lo later.” (Mat. 28:18) Menm si Zezi i annan bokou abilite, i kontinyen depan lo Zeova pour ganny gidans. Akoz? Parski i kontan son Papa.​—Zan 14:31.

14. Ki en msye i kapab aprann avek (a) lafason ki Zeova i vwar bann madanm? (b) sa ki Proverb 31 i dir?

¹⁴ Sa ki bann msye i kapab aprann. Menm si Zeova i dir ki bann madanm i devret aksepte lotorite zot msye, I pa konsider bann madanm pli enferyer ki zot msye. Zeova in montre sa par swazir bann madanm osi byen ki msye pour diriz ansanm avek Zezi dan lesyel. (Gal. 3:26-29) Zeova in montre ki i annan konfyans dan son Garson ler i ti donn li lotorite. Pareyman, en msye ki saz pou donn son madanm serten lotorite. Labib i dekri sa ki en madanm debouryer i kapab fer. Par egzanp, i kapab diriz travay ki ganny fer kot lakour, aste e revann later e fer biznes. (Lir Proverb 31:15, 16, 18.) I pa en lesklav ki napa drwa donn son lopinyon. O kontrer, son msye i annan konfyans dan li e i ekout son bann nide. (Lir Proverb 31:11, 26, 27, NWT.) * Ler en zonm i demontre sa kalite respe anver son madanm, son madanm pou ere e i pou obei li.

15. Ki bann madanm i kapab aprann avek legzanp Zezi?

¹⁵ Sa ki bann madanm i kapab aprann. Menm si Zezi ti fer bann gran keksoz, i pa santi ki i pe abes li ler i aksepte lotorite Zeova. (1 Kor. 15:28; Fili. 2:5, 6) Par egzanp, en madanm debouryer ki swiv Zezi, pa pou santi li enferyer ler i aksepte lotorite son msye. I pou siport son msye pa zis akoz i kontan son msye me akoz i kontan e annan respe pour Zeova.

16. Dapre 1 Samyel 25:3, 23-28, ki difikilte Abigail ti fer fas avek? (Vwar portre lo kouvertir.)

¹⁶ Abigail ti annan en msye ki apel Nabal. I ti en zonm egois, arogan e ki pa ti rekonesan. Si Abigail ti anvi fini avek zot maryaz, i ti’n kapab les David avek son bann zonm touy son msye. Me i pa ti fer sa. O kontrer, i ti fer sa ki i ti kapab pour protez Nabal ek bann dimoun dan son lakour. Mazinen ki kantite kouraz Abigail ti annan pour li apros 400 zonm arme e koz avek David avek bokou respe. I ti menm pare pour demann leskiz pour sa ki son msye ti’n fer. (Lir 1 Samyel 25:3, 23-28.) David ti realize ki Zeova in servi en madanm ki annan bokou kouraz pour donn li konsey pour anpes li fer en gro fot.

17. Ki bann msye i kapab aprann konsernan sa resi dan Labib lo David ek Abigail?

¹⁷ Sa ki bann msye i kapab aprann. Abigail ti en madanm saz. David ti azir avek  lasazes ler i ti ekout son konsey e sa ti fer ki i pa ti touy dimoun inosan. Pareyman, en msye ki saz pou reflesir byen lo lopinyon son madanm avan i pran en desizyon enportan. Petet pwennvi son madanm pou anpes li fer en move desizyon.

18. Ki bann madanm i kapab aprann avek legzanp Abigail?

¹⁸ Sa ki bann madanm i kapab aprann. En madanm ki kontan e ki annan respe pour Zeova, i kapab annan en bon lefe lo son fanmir, menm si son msye pa servi Zeova oubyen pa viv dapre Son bann standar. I pa pou rod fason pour termin son maryaz. O kontrer, par demontre respe e aksepte lotorite son msye, petet i pou motiv son msye pour aprann konn Zeova. (1 Pyer 3:1, 2) Me menm si sa msye pa deside pour servi Zeova, Zeova pou kontan pour vwar ki sa madanm i obei son msye e in fidel anver Zeova.

19. Kan ki en madanm pa pou obei son msye?

¹⁹ Menm si en madanm Kretyen i aksepte lotorite son msye, i pa pou siport son msye si i demann li pour kas bann lalwa oubyen bann prensip Labib. Par egzanp, meton en msye ki pa Temwen Zeova i demann son madanm ki en ser, pour koz lalang, vole oubyen fer lezot keksoz ki kont prensip Bondye. Tou Kretyen, enkli bann ser marye, i bezwen obei Zeova premye. Si en ser i ganny demande pour kas bann prensip Labib, i devret refize. I devret eksplike dan en fason zantiy e ferm akoz i pa pou fer sa ki i pe demann li pour fer.​—Akt 5:29.

20. Ki mannyer nou konnen ki Mari ti annan en bon lanmitye avek Zeova?

²⁰ Mari ti annan en bon lanmitye avek Zeova. I kler ki i ti konn byen Lekritir. Plis ki 20 fwa, Mari ti fer referans avek Lekritir Ebre ler i ti pe koz avek Elizabet, manman Zan ki batize. (Lik 1:46-55) Zis mazinen: Menm si Mari ti’n fiyanse avek Zozef, Zeova pa ti aparet avek Zozef avan. Sa lanz ti koz avek Mari premye e dir li ki i pou donn nesans Garson Bondye. (Lik 1:26-33) Zeova ti konn Mari byen e i ti annan konfyans ki Mari ti pou kontan e pran swen avek son Garson. San  dout, Mari ti kontinyen annan en bon lanmitye avek Zeova menm apre ki Zezi ti’n mor e ganny resisite pour al dan lesyel.​—Akt 1:14.

21. Ki bann msye i kapab aprann avek sa ki Labib i dir lo Mari?

²¹ Sa ki bann msye i kapab aprann. En msye ki saz i kontan ler son madanm i konn byen Lekritir. I pa ankoler avek son madanm e krwar ki son madanm i anvi vin sef fanmir. I realize ki si son madanm i konn byen Labib ek bann prensip, i pou kapab ed son fanmir. Byensir, menm si sa madanm i pli edike ki son msye, i responsabilite sa msye pour ed son fanmir ador Zeova. Par egzanp, i responsabilite sa msye pour fer ladorasyon fanmir.​—Efe. 6:4.

22. Ki bann madanm i kapab aprann avek Mari?

²² Sa ki bann madanm i kapab aprann. En madanm i devret aksepte lotorite son msye me i son responsabilite pour fer son lafwa for. (Gal. 6:5) Alor, i devret fer letan pour fer son prop letid personnel e pour medite. Sa pou ed li kontan e annan respe pour Zeova e an menm tan aksepte lotorite son msye.

23. Ki mannyer en madanm ki aksepte lotorite son msye, i anmenn byenfe pour li menm, son fanmir ek kongregasyon?

²³ Bann madanm ki aksepte lotorite zot msye akoz zot kontan Zeova, pou pli ere ki bann madanm ki rezet sa laranzman ki Zeova in fer, pour donn serten, lotorite lo lezot. Zot osi en bon legzanp pour bann zenn garson ek bann zenn fiy. Zot osi ede pour annan en bon latmosfer pa zis dan fanmir me osi dan kongregasyon. (Tit 2:3-5) Ozordi, laplipar serviter fidel Zeova i bann madanm. (Ps. 68:11) Nou tou, ki swa msye oubyen madanm, nou kapab anmenn lazwa dan kongregasyon. Dan sa lot lartik, nou pou vwar ki mannyer sakenn parmi nou i kapab fer sa.