1. Akoz nou ganny konsey e akoz nou tou nou bezwen konsey?

NOU tou nou bezwen konsey tanzantan. Dan serten ka, nou kapab demann konsey avek en dimoun matir ki nou annan respe pour li. Dan lezot ka, en frer oubyen en ser ki enkyet pour nou, i kapab dir nou ki nou pe konmans “pran en move semen” ki kapab fer nou fer en keksoz ki nou pou regrete. (Gal. 6:1) Oubyen nou kapab ganny konsey atraver disiplin ki nou gannyen apre ki nou’n fer en fot grav. Nenport ki konsey ki nou gannyen, nou devret ekout sa konsey, akoz i bon pour nou e i kapab sov nou lavi.​—Prov. 6:23.

2. Dapre Proverb 12:15, akoz nou devret ekout konsey?

² Nou verse tenm pour sa lartik i ankouraz nou pour “ekout parol bann saz.” (Prov. 22:17, NWT) Napa personn ki konn tou keksoz. I toultan annan en dimoun ki annan plis konnesans ouswa leksperyans ki nou. (Lir Proverb 12:15, NWT.) Alor, ler nou ekout konsey, sa i montre ki nou annan limilite. I osi montre ki nou konn nou bann limit e ki nou realize ki nou bezwen led pour atenn nou bann lobzektif. Zeova ti enspir Lerwa Salomon pour ekri: “Letan i annan en kantite konseye, bann proze i reisi.”​—Prov. 15:22, NWT.

3. Dan ki fason nou kapab ganny konsey?

³ Nou kapab ganny konsey direk ouswa dan lezot fason. Ki mannyer nou ganny konsey dan lezot fason? Nou kapab lir en keksoz dan Labib oubyen dan enn nou bann piblikasyon ki fer nou reflesir lo sa ki nou pe fer. Sa ki nou lir, i motiv nou pour sanz nou fason panse ek nou aksyon. (Ebr. 4:12) Ki mannyer nou ganny konsey direk? En ansyen oubyen en lot Kretyen matir i kapab dir nou konsernan en keksoz ki nou bezwen travay lo la. Si en dimoun i sitan kontan nou ki i pare pour donn nou en konsey ki sorti dan Labib, nou devret demontre nou lapresyasyon par  ekout son konsey e fer nou mye pour aplik sa konsey.

4. Dapre Eklezyast 7:9, ki nou pa devret fer ler nou ganny konsey?

⁴ Nou kapab vwar li difisil pour ekout e aplik konsey direk. Nou kapab menm ofanse. Akoz? Menm si nou admet ki nou enparfe, i kapab difisil pour aksepte konsey ler en dimoun i dir nou konsernan en defo ki nou annan. (Lir Eklezyast 7:9, NWT.) Nou kapab esey rod leskiz. Nou kapab kestyonn motivasyon sa dimoun ouswa ofanse avek lafason ki i’n konsey nou. Nou kapab menm kritik sa dimoun ki’n konsey nou e demann nou lekor, ‘Eski i annan drwa pour konsey mwan? I annan son prop defo.’ Si nou pa kontan sa konsey, nou kapab inyor sa konsey ouswa demann en lot dimoun pour konsey nou parski nou swete ki sa dimoun pou dir nou sa ki nou anvi tande.

5. Ki nou pou vwar dan sa lartik?

⁵ Dan sa lartik, nou pou vwar serten dimoun dan Labib ki pa ti aksepte konsey e serten ki ti aksepte konsey. Nou pou osi vwar kwa ki pou ed nou pour aksepte konsey e ki byenfe nou pou gannyen ler nou aksepte konsey.

6. Ki nou aprann avek lafason ki Lerwa Reoboam ti reazir ler i ti ganny konsey?

⁶ Annou vwar legzanp Reoboam. Ler i ti vin lerwa Izrael, pep Izrael ti vin demann li pour tir en pe sa fardo ki son papa Salomon ti’n met lo zot. I ti demann bann zonm aze ki mannyer i ti pou reponn pep Izrael e sa ti en bon desizyon. Bann zonm aze ti dir li, ki si i fer sa ki pep Izrael in demande, zot pou toultan siport li. (1 Rwa. 12:3-7) I paret ki Reoboam pa ti dakor avek sa konsey. Alor i ti demann konsey bann zenn ki ti’n grandi ansanm avek li. I tre probab ki sa bann zenn ti dan zot 40 an, alor i bezwen ki zot ti annan serten leksperyans. (2 Kron. 12:13) Me safwasi, zot pa ti donn Reoboam en bon konsey. Zot ti konsey li pour met plis fardo lo sa pep. (1 Rwa. 12:8-11) Reoboam ti ganny de diferan konsey, alor i ti’n kapab demann Zeova ki konsey i devret swiv. O kontrer, i ti swiv konsey ki i ti pli kontan e i ti fer sa ki sa bann zenn ti dir li. Sa desizyon ti anmenn move konsekans pour Reoboam e pour pep Izrael. Pareyman, i kapab ki parfwa nou ganny konsey ki nou pa anvi tande. Kantmenm sa, si sa konsey i baze lo Parol Bondye, nou devret aksepte.

7. Ki nou aprann avek sa ki ti arive avek Lerwa Ouzya?

⁷Lerwa Ouzya pa ti aksepte konsey. I ti antre dan en landrwa dan tanp kot zis bann pret ki ti annan drwa pour antre, pour li ofer lansan. Bann pret Zeova ti dir li: “I pa apropriye pour ou Ouzya, pour bril lansan pour Zeova! Zis bann pret ki devret bril lansan.” Ki mannyer Ouzya ti reazir? “Ouzya . . . ti pran en gran lakoler.” Si i ti’n aksepte sa konsey e kit tanp deswit, petet Zeova ti pou’n pardonn li. Me akoz i pa ti aksepte sa konsey? I kler ki i ti krwar ki konman lerwa, i ti annan drwa pour fer sa ki i anvi. Me Zeova pa ti vwar keksoz koumsa. Vi ki Ouzya ti’n fer keksoz ki i ti napa drwa fer, Zeova ti donn li lalep e i “ti ganny lalep ziska zour son lanmor.” (2 Kron. 26:16-21, NWT) Sa ki ti arive avek Ouzya i montre ki nenport ki privilez nou annan, si nou pa aksepte konsey ki sorti dan Labib, nou pou perdi laprouvasyon Zeova.

8. Ki mannyer Zob ti reazir ler i ti ganny konsey?

⁸ Labib pa zis koz lo bann ki pa ti ekout konsey. I osi koz lo bann ki ti ganny beni akoz zot ti ekout konsey. Annou vwar legzanp Zob. Menm si i ti kontan Bondye e i ti anvi fer Li plezir, i ti enparfe. Ler Zob ti anba bokou presyon, i ti dir bann keksoz ki montre ki i ti annan en move pwennvi. Sa ti fer ki Eliyou ek Zeova ti donn li bann konsey direk. Ki mannyer Zob ti reazir? I ti demontre limilite e i ti aksepte konsey. I ti dir: “Mon’n koze me san konpran. . . . Mon retir sa ki mon’n dir e mon repantir dan lapousyer ek lasann.” Zeova ti beni Zob akoz i ti demontre limilite.​—Zob 42:3-6, 12-17, NWT.

9. Ki mannyer Moiz ti reazir ler i ti ganny konsey e akoz Moiz i en bon legzanp pour nou?

⁹Moiz ti aksepte konsey apre ki i ti’n fer en fot grav e sa i en legzanp pour nou. En fwa, i ti ankoler e i pa ti onor Zeova. Sa ti fer ki Moiz pa ti kapab antre dan Later Promiz. (Nom. 20:1-13) Ler Moiz ti eksprim son dezapwentman konsernan sa desizyon, Zeova ti dir li: “Pa zanmen koz avek mwan ankor lo sa size.” (Det. 3:23-27, NWT) Moiz pa ti ankoler. O kontrer, i ti aksepte desizyon Zeova e Zeova ti kontinyen servi li pour diriz pep Izrael. (Det. 4:1) Zob ek Moiz ti aksepte konsey e zot bann bon legzanp pour nou swiv. Zob ti sanz son pwennvi e i pa ti rod leskiz. Moiz ti montre ki i ti aksepte konsey ki Zeova ti’n donn li par reste fidel menm apre ki i ti perdi sa privilez ki i ti vreman kontan.

10. (a) Dapre Proverb 4:10-13, ki byenfe nou gannyen ler nou aksepte konsey? (b) Ki mannyer serten in vwar konsey ki zot in gannyen?

¹⁰ Ler nou swiv legzanp bann zonm fidel parey Zob ek Moiz, nou ganny bann byenfe. (Lir Proverb 4:10-13, NWT.) En kantite nou bann frer ek ser in swiv legzanp bann serviter fidel dan lepase e zot in aksepte konsey. Remark sa ki en frer ki apel Emmanuel, ki reste Kongo, i dir konsernan konsey ki i ti gannyen: “Bann frer matir dan mon kongregasyon ti vwar ki mon ti pe al gat mon lanmitye avek Zeova e zot ti esey ed mwan. Mon ti aplik zot konsey e sa ti ed mwan pour evit en kantite problenm.” * En pionye Kanada ki apel Megan i dir konsernan bann konsey ki i ti gannyen: “I pa’n toultan sa ki mon ti anvi tande me i sa ki mon ti bezwen tande.” En frer ki sorti Kroasi ki apel Marko i dir: “Mon ti perdi en privilez. Me ler mon mazin sa letan, mon realize ki sa konsey ki mon ti gannyen ti ed mwan pour ranforsi mon lanmitye avek Zeova ankor.”

11. Ki Frer Karl Klein ti dir konsernan aksepte konsey?

¹¹ Frer Karl Klein i en lot dimoun ki ti ganny bann byenfe ler i ti aksepte konsey. Frer Klein ti en manm Konsey Direkter. Dan son biografi, Frer Klein i mansyonn en fwa ler i ti ganny konsey avek Frer Joseph Rutherford, ki ti enn son bon zanmi. Frer Klein i admet ki o konmansman i pa ti reazir byen anver sa konsey. I ti dir: “En lot fwa ki Frer Rutherford ti vwar mwan, i ti dir mwan an souriyan, ‘Bonzour Karl!’ Me vi ki sa ki i ti’n dir mwan ti ankor lo mon leker, mon ti zis dir li en pti bonzour. I ti reponn, ‘Karl, fer atansyon! Dyab pe esey atrap ou!’ Mon ti reponn byen kanmi, ‘Mon pa ankoler avek ou Frer Rutherford.’ Me i ti konnen ki mon ankor ankoler avek li. Alor i ti dir mwan menm keksoz ankor, ‘Mon konpran. Zis  fer atansyon. Dyab pe esey atrap ou.’ I ti annan rezon. Ler nou gard rankin avek en frer, sirtou si sa frer i dir nou en keksoz ki i annan drwa pour dir . . . , i pou fasil pour Dyab atrap nou.” * (Efe. 4:25-27) Frer Klein ti aksepte konsey ki Frer Rutherford ti’n donn li e zot ti reste de bon zanmi.

12. Ki mannyer ler nou annan limilite, sa i kapab ed nou pour aksepte konsey? (Psonm 141:5)

¹² Kwa ki kapab ed nou pour aksepte konsey? Nou bezwen annan limilite e rapel ki nou enparfe e ki parfwa nou fer bann keksoz ki bet. Parey nou’n vwar pli boner, Zob ti annan en move pwennvi. Me pli tar, i ti sanz son fason panse e Zeova ti beni li. Akoz? Parski Zob ti annan limilite. I ti montre ki i ti annan limilite par aksepte konsey ki Eliou ti donn li menm si Eliou ti bokou pli zenn ki li. (Zob 32:6, 7) Ler nou annan limilite, sa pou osi ed nou pour aplik konsey menm ler nou santi ki sa konsey pa aplik pour nou oubyen ler sa enn ki pe donn nou sa konsey i pli zenn ki nou. En ansyen ki reste Kanada i dir: “Vi ki nou pa vwar nou lekor parey lezot i vwar nou, i vreman difisil pour nou fer progre si personn pa donn nou konsey.” Nou tou nou bezwen devlop plis bann laspe fri lespri sen e pour amelyor lafason ki nou anons e ansenny sa bon nouvel.​—Lir Psonm 141:5, NWT.

13. Ki mannyer nou devret vwar bann konsey ki nou gannyen?

¹³Vwar bann konsey ki nou gannyen konman en fason ki Zeova i demontre son lanmour pour nou. Zeova i anvi sa ki pli bon pour nou. (Prov. 4:20-22) I demontre son lanmour pour nou ler i donn nou konsey atraver son Parol, en piblikasyon baze lo Labib ouswa atraver en frer oubyen en ser matir. Parey Ebre 12:9, 10 i dir: “I disiplin nou pour nou prop dibyen.”

14. Ki nou devret konsantre lo la ler nou ganny konsey?

¹⁴Konsantre lo sa konsey me pa lo lafason ki sa konsey in ganny donnen. Parfwa nou kapab santi ki sa konsey ki nou’n gannyen pa’n ganny donnen dan en bon fason. Byensir, nenport dimoun ki pe donn en konsey, i devret esey fer li pli fasil pour sa dimoun aksepte sa konsey. * (Gal. 6:1) Me si nou sa dimoun ki pe ganny konsey, nou devret reflesir lo sa  konsey menm si nou krwar ki sa dimoun ki’n donn nou sa konsey ti’n kapab donn li dan en pli bon fason. Nou kapab demann nou lekor, ‘Menm si mon pa kontan lafason ki sa konsey in ganny donnen, eski i annan en keksoz ki mon kapab aprann avek sa konsey? Eski mon kapab inyor defo sa dimoun ki’n donn mwan sa konsey e aprann avek sa konsey?’ I ti pou saz si nou ti rod fason pour ganny byenfe dan nenport ki konsey ki nou gannyen.​—Prov. 15:31.

15. Akoz nou devret demann konsey?

¹⁵ Labib i ankouraz nou pour demann konsey. Proverb 13:10 (NWT) i dir: “Lasazes i pour bann ki demann konsey.” Sa parol i vre. Souvandfwa, bann ki demann konsey olye esper en dimoun pour vin donn zot konsey, i pli saz ki bann ki pa demann konsey. Alor, pran sa linisyativ pour demann konsey.

16. Dan ki sityasyon nou kapab demann konsey?

¹⁶ Kan ki nou kapab demann konsey avek en frer oubyen en ser? Annou vwar serten sityasyon. (1) En ser i demann en proklanmater eksperyanse pour akonpanny li lo en letid Labib e pli tar i demann sa ser ki mannyer i kapab vin en pli bon ansenyan. (2) En ser selibater ti pou kontan aste detrwa lenz, alor i demann en ser matir son lopinyon lo serten lenz ki i’n swazir. (3) En frer pe al fer son premye diskour piblik, i demann en orater eksperyanse pour ekout li ler i pe fer son diskour e donn li konsey lo ki mannyer i kapab amelyore. Menm en frer ki’n fer diskour pour plizyer lannen, i kapab demann konsey avek bann orater eksperyanse e apre i aplik sa konsey ki i gannyen.

17. Ki nou pou fer pour nou ganny bann byenfe atraver konsey ki nou gannyen?

¹⁷ Dan bann semenn oubyen mwan ki pe vini, nou tou nou pou ganny konsey, ki swa direk oubyen dan lezot fason. Ler sa i arive, rapel bann pwen ki nou’n diskite dan sa lartik. Annan limilite. Konsantre lo sa konsey me pa lo lafason ki i ganny donnen. Aplik sa konsey ki ou gannyen. Napa personn ki’n ne avek lasazes. Me ler nou “ekout konsey e aksepte disiplin,” Parol Bondye i promet ki nou “pou saz.”​—Prov. 19:20, NWT.