1-2. Ki en frer ti aprann konsernan donn konsey?

PLIZYER lannen pase, de ansyen ti vizit en ser ki ti’n mank renyon pour en serten letan. Enn parmi sa de ansyen ti montre sa ser serten verse Labib konsernan asiste renyon. Sa ansyen ti krwar ki sa vizit ti’n ankouraz sa ser. Me ler zot ti pe ale, sa ser ti dir: “Zot napa en nide ki mon pe pas ladan.” Sa de frer ti’n donn sa ser konsey san esey rode ki problenm sa ser i annan. Sa ti fer ki sa ser pa ti santi ki sa konsey ti’n ed li.

² Sa ansyen ki ti montre sa ser bann verse i dir: “Ler sa ser ti dir sa parol, mon ti krwar ki sa ser ti pe mank respe pour nou. Me apre mon ti realize ki mon ti’n reflesir lo bann verse ki mon ti pou servi avek li olye mazin mon ser avan. Mon ti’n devret rode ki i pe pas ladan e ki mannyer mon ti kapab ed li.” Sa ansyen ti aprann en leson enportan avek sa ki ti arive. Ozordi, i en berze ki konpran santiman lezot e ki kontan pour ede.

3. Lekel dan kongregasyon ki kapab donn konsey?

 ³ Konman bann berze, bann ansyen i annan sa responsabilite pour donn konsey ler i neseser. Me i annan sityasyon kot petet lezot dan kongregasyon ki bezwen donn konsey. Par egzanp, en frer oubyen en ser i kapab donn en zanmi konsey baze lo Labib. (Ps. 141:5; Prov. 25:12) Ouswa en ser pli aze i kapab “konsey bann madanm pli zenn” konsernan bann keksoz parey i ganny mansyonnen dan Tit 2:3-5. Souvandfwa, bann paran osi i bezwen donn konsey zot bann zanfan. Alor menm si sa lartik i sirtou pour bann ansyen, nou tou nou kapab ganny bann byenfe ler nou vwar bann fason ki nou kapab donn bann konsey ki pratik, ki ankourazan e ki “fer leker kontan.”​—Prov. 27:9, NWT.

4. Ki nou pou diskite dan sa lartik?

 ⁴ Dan sa lartik, nou pou diskit lo sa kat kestyon swivan: (1) Akoz ou pe donn sa konsey? (2) Eski i vreman neseser pour donn sa konsey? (3) Lekel ki devret donn sa konsey? (4) Ki mannyer ou kapab donn bann bon konsey?

5. Akoz i pou pli fasil pour en dimoun aksepte konsey en ansyen si sa ansyen i demontre lanmour ler i pe donn konsey? (1 Korentyen 13:4, 7)

⁵ Bann ansyen i kontan zot bann frer ek ser. Parfwa zot demontre sa lanmour ler zot donn konsey en dimoun ki pe pran en move semen. (Gal. 6:1) Avan en ansyen i koz avek sa dimoun, i ti pou byen si sa ansyen i reflesir lo serten keksoz ki zapot Pol ti dir konsernan lanmour. Pol ti dir: “Lanmour i pasyan e i bon. . . . I siport tou keksoz, i krwar tou, i toultan annan lespwar e i andir tou keksoz.” (Lir 1 Korentyen 13:4, 7.) Ler en ansyen i medit lo sa bann verse Labib, sa pou ed li pour fer sir ki i demontre lanmour ler i pe donn en konsey. Si sa dimoun ki pe ganny konsey i santi ki sa ansyen i kontan li, i tre probab ki i pou aksepte sa konsey.​—Rom. 12:10.

6. Ki bon legzanp zapot Pol in kite?

⁶ Zapot Pol ti en bon ansyen e i’n kit en bon legzanp. Par egzanp, Pol ti donn bann frer ek ser Tesalonik konsey ler zot ti bezwen. Me avan ki Pol ti donn zot konsey, i ti felisit zot pour zot travay fidel, zot travay dir ki zot fer avek lanmour e zot landirans. I ti osi mazin lo sa ki zot ti pe pas atraver e i ti dir zot ki i konnen ki zot lavi pa ti fasil e ki zot ti pe andir persekisyon fidelman. (1 Tesa. 1:3; 2 Tesa. 1:4) I ti menm dir zot ki zot ti bann bon legzanp pour lezot Kretyen. (1 Tesa. 1:8, 9) Sa bann frer ek ser ti vreman kontan ki Pol ti’n felisit zot. I ti napa okenn dout ki Pol ti kontan zot en kantite. I pour sa rezon ki dan sa de let ki Pol ti ekri bann Tesalonisyen i ti kapab donn zot bann bon konsey.​—1 Tesa. 4:1, 3-5, 11; 2 Tesa. 3:11, 12.

7. Kwa ki kapab fer en dimoun pa reakte byen ler i ganny en konsey?

⁷ Ki i kapab arive si nou pa donn konsey dan en bon fason? En ansyen eksperyanse i dir: “Serten dimoun pa reakte byen ler zot ganny konsey. I pa akoz i annan en keksoz mal avek sa konsey me akoz sa dimoun pa’n demontre lanmour ler i’n donn sa konsey.” Ki nou kapab aprann avek sa? I pli fasil pour aksepte konsey ler i ganny donnen avek lanmour me pa ler i ganny donnen avek lakoler.

8. Ki en ansyen i devret demann son lekor ler i pe deside si i pou donn en dimoun konsey?

⁸ Bann ansyen pa devret taye pour donn konsey. Avan en ansyen i donn konsey, i devret demann son lekor,‘Eski mon vreman bezwen dir en keksoz? Eski mon asire ki sa ki sa dimoun pe fer i mal? Eski Labib i dir ki sa ki sa dimoun pe fer i mal? Oubyen eski i pe zis fer en keksoz ki mwan mon pa ti pou fer?’ En ansyen ki saz i evite “koz tro vitman.” (Prov. 29:20, NWT) Si sa ansyen pa asire si i bezwen donn en dimoun konsey, i kapab koz avek en lot ansyen pour gete si sa dimoun pe vreman fer en keksoz ki al kont sa ki Labib i dir e si i bezwen ganny konsey.​—2 Tim. 3:16, 17.

9. Ki nou aprann avek Pol konsernan fason pour donn konsey en dimoun lo son fason sanze ek laparans? (1 Timote 2:9, 10)

 ⁹ Annou vwar en legzanp. Meton en ansyen pa tro dakor avek laparans ek fason sanze en frer oubyen en ser. Sa ansyen i kapab demann son lekor, ‘Eski i pe kas en prensip Labib?’ Vi ki sa ansyen pa anvi donn en konsey zis dapre son prop lopinyon, i kapab demann lopinyon en lot ansyen oubyen en proklanmater matir. Ansanm, zot kapab vwar konsey ki zapot Pol ti donnen lo fason sanze ek laparans. (Lir 1 Timote 2:9, 10.) Pol pa ti koz an detay konsernan laparans oubyen lafason ki en dimoun i devret sanze. I pa ti donn en lalis konsernan kwa ki en dimoun i devret mete oubyen kwa ki i pa devret mete. Me i ti dir ki en Kretyen i devret sanz dan en fason ki apropriye, respektab e rezonnab. I ti konnen ki en Kretyen i kapab met sa ki i anvi tan ki sa ki i mete pa al kont bann prensip Labib. Alor, ler bann ansyen pe deside si zot bezwen donn konsey en dimoun, zot bezwen gete si laparans ek fason sanze sa dimoun i modes e rezonnab.

10. Kwa ki pou ed nou respekte desizyon lezot?

¹⁰ I enportan pour gard antet ki de Kretyen i kapab fer diferan desizyon konsernan en sityasyon. Me sa pa vedir ki enn i byen e lot i mal. Nou pa devret esey fors nou bann frer ek ser pour fer sa ki nou, nou krwar i byen.​—Rom. 14:10.

11-12. Si en dimoun i bezwen ganny konsey, ki en ansyen i bezwen demann son lekor e akoz?

¹¹ Si i kler ki en dimoun i bezwen konsey, alor sa ansyen i bezwen demann son lekor en lot kestyon, ‘Lekel ki devret donn sa konsey?’ Avan ki en ansyen i donn konsey en ser ki’n marye ouswa en zanfan ki anba laz, sa ansyen pou koz avek sa sef fanmir ki petet pou anvi donn sa konsey li menm. * Oubyen sa sef fanmir ti pou kontan la ler sa ansyen i donn sa konsey. Parey in ganny mansyonnen dan  paragraf 3, parfwa i kapab pli bon pour en ser ki pli aze pour konsey en ser ki pli zenn.

¹² I annan en lot keksoz ki en ansyen i devret reflesir lo la. En ansyen i kapab demann son lekor, ‘Eski mwan ki devret donn sa konsey oubyen i ti pou pli bon pour en lot dimoun donn sa konsey?’ Par egzanp, i kapab pli fasil pour en dimoun ki santi li pa vo nanryen pour ekout konsey en ansyen ki’n deza pas dan menm keksoz. Petet sa ansyen ki’n deza pas dan sa menm sityasyon, pou pli  byen konpran santiman sa dimoun e sa dimoun pou pli byen aksepte sa ki sa ansyen pe dir li. Par kont, tou ansyen i annan sa responsabilite pour ankouraz zot bann frer ek ser pour fer bann sanzman ki Labib i demann nou pour fer. Alor, sa ki pli enportan, i ki sa konsey i ganny donnen menm si sa ansyen ki donn sa konsey pa’n zanmen pas dan sa sityasyon.

13-14. Akoz i enportan pour en ansyen ekoute?

¹³Ou bezwen pare pour ekoute. Ler en ansyen pe prepare pour donn konsey, i devret demann son lekor, ‘Ki mon konnen lo sityasyon sa dimoun? Ki pe arive dan son lavi? Eski i annan problenm ki mon pa konnen ki i pe pas ladan? Ki i vreman bezwen la konmela?’

¹⁴ Sa prensip dan Zak 1:19 i sirtou aplik pour bann ki donn konsey. Zak ti ekri: “En dimoun i devret pare pour ekoute, me i devret pran letan avan koze e avan pran lakoler.” En ansyen i kapab krwar ki i konn tou keksoz lo en sityasyon me eski i vreman konn tou keksoz? Proverb 18:13 (NWT) i dir: “Ler en dimoun i reponn vitman avan i tann lenformasyon ki egzakt, sa i bet e i en imilyasyon.” I ti pou byen pour rod lenformasyon avek sa dimoun menm. Alor sa ansyen i devret ekoute avan i koze. Rapel sa leson ki sa ansyen ki’n ganny mansyonnen o konmansman sa lartik in aprann. I ti realize ki avan ki i koz lo sa ki i ti’n prepare, i ti’n devret demann sa ser bann kestyon parey: “Ki pe arive dan ou lavi?” “Ki mon kapab fer pour ed ou?” Si bann ansyen i pran letan pour rod lenformasyon konsernan en sityasyon, i tre probab ki zot pou kapab ed e ankouraz zot bann frer ek ser.

15. Ki mannyer bann ansyen i kapab aplik sa prensip ki dan Proverb 27:23?

¹⁵Ou bezwen aprann konn ou bann frer ek ser. Parey i’n ganny mansyonnen o konmansman sa lartik, pour ou kapab donn bann bon konsey, ou pa devret zis lir detrwa verse oubyen donn detrwa sizesyon. Nou bann frer ek ser i bezwen santi ki nou kontan zot, ki nou konpran zot e ki nou anvi ed zot. (Lir Proverb 27:23, NWT.) Bann ansyen i devret fer zot mye pour annan en bon lanmitye avek zot bann frer ek ser.

16. Kwa ki pou ed bann ansyen donn bann bon konsey?

¹⁶ Bann ansyen pa anvi ki zot bann frer ek ser i krwar ki zot vin koz avek zot, zis ler zot bezwen donn en konsey. O kontrer, bann ansyen i koz avek zot bann frer ek ser regilyerman e ler zot pas dan problenm, bann ansyen i montre ki zot kontan zot. En ansyen eksperyanse ti  dir: “Si ou fer sa, ou pou vin zot zanmi. Koumsa i pou pli fasil pour donn zot konsey ler zot bezwen.” Sa pou fer li pli fasil pour sa dimoun aksepte konsey.

17. Kan ki en ansyen i sirtou bezwen annan pasyans ek labonte?

¹⁷Ou bezwen annan pasyans ek labonte. Ou bezwen annan pasyans ek labonte sirtou ler en dimoun pa anvi aplik sa ki Labib i dir deswit. En ansyen pa devret ankoler si en frer oubyen en ser pa aksepte oubyen aplik sa konsey ki i’n donnen deswit. Labib i dir sa lo Zezi: “I pa pou kraz en zon ki’n kase e i pa pou tenny en lanmes ki pros pour tennyen.” (Mat. 12:20) Alor, ler en ansyen i fer son lapriyer li tousel, i kapab demann Zeova pour ed sa dimoun ki bezwen konsey. I osi kapab demann Zeova pour ed sa dimoun konpran akoz i bezwen sa konsey e pour ed sa dimoun aplik sa konsey. Petet sa frer oubyen sa ser ki’n ganny konsey, i bezwen letan pour reflesir lo sa konsey. Si en ansyen i annan pasyans ek labonte, i pou pli fasil pour en frer oubyen en ser ekout son konsey. Byensir, bann ansyen i devret toultan donn bann konsey ki sorti dan Parol Bondye.

18. (a) Ki nou devret rapel ler nou pe donn konsey? (b) Dapre sa portre dan sa bwat, ki sa paran pe diskit lo la?

¹⁸Ou bezwen aprann avek ou bann fot. Vi ki nou enparfe, nou pa pou toultan kapab aplik sa bann konsey ki dan sa lartik. (Zak 3:2) Nou pou fer fot me ler sa i arive, nou devret esey aprann avek nou bann fot. Si nou bann frer ek ser i santi ki nou kontan zot, i tre probab ki i pou pli fasil pour zot pardonn nou ler en keksoz ki nou dir oubyen fer i ofans zot.​—Vwar osi sa bwat “ Sa ki bann paran i bezwen gard antet.”

19. Ki mannyer nou kapab fer leker nou bann frer ek ser kontan?

¹⁹ Parey nou’n vwar, i pa fasil pour donn bann bon konsey. Nou enparfe e  sa bann ki nou donn konsey i enparfe zot osi. Gard antet sa ki nou’n diskite dan sa lartik. Fer sir ki ou annan bann bon rezon pour donn en konsey. Osi, fer sir ki sa dimoun i bezwen sa konsey e ki ou sa pli bon dimoun pour donn sa konsey. Avan ki ou donn en konsey, demann sa dimoun bann kestyon e ekout byen pour ou kapab konpran ki i pe pas ladan. Esey vwar keksoz parey li i vwar. Ou bezwen zantiy e annan en bon lanmitye avek bann frer ek ser. Gard antet ki nou lobzektif i pa pou zis donn bann bon konsey me pour donn bann konsey ki “fer leker kontan.”​—Prov. 27:9, NWT.