1-2. (a) Akoz en kantite dimoun ozordi i vwar li difisil pour annan konfyans dan bann ki annan lotorite? (b) Ki nou pou vwar dan sa lartik?

OZORDI en kantite dimoun i vwar li difisil pour annan konfyans dan bann dimoun ki annan lotorite. Zot in vwar ki souvandfwa bann gouvernman ek lalwa i protez bann dimoun ki ris e bann dimoun ki annan pouvwar me zot pa vreman ed bann dimoun ki pov. Labib i dir: “Dimoun i domin lezot dimoun pour zot prop maler.” (Ekle. 8:9, NWT) Osi, serten sef relizye i fer en kantite keksoz mal. Sa in fer ki serten dimoun i nepli annan konfyans dan Bondye. Alor, ler nou fer letid Labib avek en dimoun, nou bezwen ed li pour devlop konfyans dan Zeova ek bann ki i’n apwente pour diriz son lorganizasyon lo later.

² Me pa zis bann dimoun ki pe etidye Labib ki bezwen devlop konfyans dan Zeova ek son lorganizasyon. Menm si nou’n servi Zeova pour plizyer lannen, nou devret toultan annan konfyans ki fason fer Zeova i toultan bon. Me parfwa serten sityasyon i arive ki kapab fer li difisil pour kontinyen annan konfyans dan Zeova. Dan sa lartik, nou pou vwar trwa sityasyon kot sa i kapab arive. (1) Ler nou lir serten resi dan Labib, (2) ler nou ganny lenstriksyon sorti kot lorganizasyon Zeova e (3) ler nou pou fer fas avek bann difikilte dan lavenir.

3. Ki mannyer serten resi dan Labib i kapab fer li difisil pour nou annan konfyans dan Zeova?

 ³ Anmezir nou lir Parol Bondye, i kapab ki nou annan bann kestyon konsernan lafason ki Zeova ti tret serten dimoun e konsernan serten desizyon ki Zeova ti fer.  Par egzanp, dan liv Nonm, nou lir ki Zeova ti donn lord pour touy en Izraelit ki ti pe anmas dibwa zour Saba. Dan dezyenm liv Samyel, nou aprann ki plizyer lannen pli tar, Zeova ti pardonn Lerwa David menm si i ti’n komet adilter ek mert. (Nom. 15:32, 35; 2 Sam. 12:9, 13) Petet nou kapab demande: ‘Akoz Zeova ti pardonn David pour mert ek adilter me i ti fer touy sa zonm ki ti’n fer en keksoz ki pa ti paret sitan grav?’ Pour reponn sa kestyon, annou vwar trwa keksoz ki nou devret gard antet anmezir nou lir Labib.

4. Ki mannyer Zenez 18:20, 21 ek Deterononm 10:17, i fer nou annan plis konfyans dan bann zizman Zeova?

⁴Labib pa toultan donn tou lenformasyon lo en resi. Par egzanp, nou konnen ki David ti repantir senserman pour sa ki i ti’n fer. (Ps. 51:2-4) Me ki nou pou dir lo sa zonm ki ti kas lalwa Saba? Ki kalite dimoun i ti ete? Eski i ti regrete pour sa ki i ti’n fer? Eski i ti’n dezobei lalwa Zeova dan lepase? Eski i ti’n inyor oubyen pa aksepte bann lavertisman ki i ti’n gannyen oparavan? Labib pa dir. Me nou kapab asire ki Zeova “pa zanmen enzis.” (Det. 32:4, NWT) Zeova i fer desizyon baze lo bann levidans me pa baze lo sa ki lezot i dir, dapre prezidis ouswa okenn keksoz ki kapab anpes en dimoun vwar en sityasyon parey i ete. (Lir Zenez 18:20, 21, NWT; Deterononm 10:17, NWT.) Pli nou aprann konsernan Zeova ek son bann standar nou pou annan plis konfyans dan son bann zizman. Menm si serten resi Labib i fer nou demann bann kestyon ki nou pa kapab reponn la konmela, nou konn ase konsernan nou Bondye pour nou asire ki “tou sa ki Zeova i fer i drwat.”​—Ps. 145:17, NWT.

5. Ki mannyer nou lenperfeksyon i fer nou pa ziz en sityasyon byen? (Vwar osi sa bwat “ Nou enparfe alor nou pa kapab ziz byen.”)

⁵Pa toultan ki nou kapab ziz byen parski nou enparfe. Bondye in fer nou dan son resanblans e nou annan sa abilite pour demontre son bann kalite. (Zen. 1:26) Alor nou vreman anvi vwar dimoun ganny trete dan en fason ki zis. Me vi ki nou enparfe, nou kapab pa ziz en sityasyon byen, menm si nou krwar ki nou annan tou lenformasyon. Par egzanp, rapel ki mannyer Zonas pa ti dakor avek desizyon Zeova pour pran pitye pour bann dimoun Niniv. (Zon. 3:10–4:1) Me mazin sa  ki ti arive. Plis ki 120,000 dimoun dan lavil Niniv ti repantir e ganny sove. Parey nou vwar, Zonas ki ti’n mal ziz bann dimoun me non pa Zeova.

6. Akoz Zeova pa bezwen eksplik nou rezon ki i fer bann desizyon?

⁶Zeova pa oblize eksplik nou akoz i fer en desizyon. Dan lepase, Zeova in les son bann serviter dir ki mannyer zot santi konsernan bann desizyon ki i ti’n fer ouswa ki i ti pe al fer. (Zen. 18:25; Zon. 4:2, 3) Parfwa i ti eksplike akoz i’n fer en desizyon. (Zon. 4:10, 11) Me Zeova pa oblize eksplik nou akoz i fer bann desizyon. Vi ki i nou Kreater, i pa bezwen nou laprouvasyon avan ouswa apre ki i’n fer en keksoz.​—Iza. 40:13, 14; 55:9.

7. Kwa ki kapab difisil pour nou e akoz?

⁷ San dout, nou dakor ki Zeova i toultan fer sa ki byen. Me nou kapab vwar li difisil pour annan konfyans dan bann zonm ki i’n apwente pour diriz son lorganizasyon. Petet nou kapab demande si sa bann zonm ki annan serten lotorite dan lorganizasyon Zeova, pe azir dapre standar Zeova ouswa dapre zot prop standar. I kapab ki serten dimoun dan letan Labib ti mazin koumsa. Mazin sa bann legzanp ki’n ganny mansyonnen dan  paragraf 3. I kapab ki en fanmir sa zonm ki ti kas lalwa Saba, ti mazinen si Moiz ti vreman koz avek Zeova avan ki sa zonm ti ganny kondannen amor. I kapab osi ki en zanmi Ouriya sa Itit, ki son madanm ti’n komet adilter avek David, ti krwar ki David ti’n servi son pouvwar konman lerwa pour pa ganny sa pinisyon ki i merite. Alor nou pa kapab dir ki nou annan konfyans dan Zeova, si nou napa konfyans dan bann zonm ki i’n apwente pour diriz son lorganizasyon. Zeova i annan konfyans dan sa bann zonm e nou osi nou devret annan konfyans dan zot.

8. Ki mannyer sa ki ganny dir dan Akt 16:4, 5, i montre ki kongregasyon ozordi i fonksyonn parey kongregasyon dan premye syek?

⁸ Ozordi, Zeova i diriz sa parti son lorganizasyon ki lo later atraver “sa lesklav fidel e pridan.” (Mat. 24:45) Parey konsey direkter dan premye syek, sa lesklav i diriz pep Bondye ki partou dan lemonn e zot donn lenstriksyon bann ansyen dan bann kongregasyon. (Lir Akt 16:4, 5.) Bann ansyen apre i fer sir ki zot pe swiv sa bann lenstriksyon ler zot pe dirize dan bann kongregasyon. Nou montre ki nou annan konfyans dan fason fer Zeova, par obei lenstriksyon ki nou gannyen sorti kot lorganizasyon Zeova ek bann ansyen.

9. Kan ki i kapab difisil pour nou siport desizyon bann ansyen e akoz?

⁹ Parfwa, nou kapab vwar li difisil pour siport desizyon ki bann ansyen i fer. Par egzanp, pandan sa bann dernyen lannen plizyer kongregasyon in zwenn ansanm e sa in fer ki serten kongregasyon in tonm anba en lot rezyon. Dan serten ka, bann ansyen in demann bann proklanmater pour sanz kongregasyon pour ki sa bann lasal Rwayonm i kapab ganny servi o maksimonm. Si nou ganny demande pour zwenn en nouvo kongregasyon, nou kapab vwar li difisil pour kit nou fanmir ek zanmi. Eski bann ansyen i ganny lenstriksyon sorti kot Bondye pour zot konnen kote pour anvoy sak proklanmater? Non. Sa i kapab fer li pli difisil pour nou swiv sa lenstriksyon ki nou gannyen. Me Zeova i annan konfyans ki bann ansyen i kapab  fer sa bann desizyon. Alor nou osi nou bezwen annan konfyans dan zot. *

10. Dapre Ebre 13:17, akoz nou devret siport bann ansyen?

¹⁰ Akoz nou devret siport desizyon bann ansyen menm ler sa desizyon ki zot in fer i pa enn ki ou ti ava kontan? Ler nou siport zot desizyon, nou ed pep Bondye pour reste ini ansanm. (Efe. 4:2, 3) Ler tou dimoun i siport desizyon ki konsey ansyen i fer, kongregasyon i vin deplizanpli pli for. (Lir Ebre 13:17.) Pli enportan ankor, nou montre Zeova ki nou annan konfyans dan li par siport bann ki i annan konfyans ladan e ki i’n apwente pour pran swen avek nou.​—Akt 20:28.

11. Kwa ki kapab ed nou pour annan plis konfyans dan bann lenstriksyon ki nou gannyen avek bann ansyen?

¹¹ Pour nou annan plis konfyans dan bann lenstriksyon ki nou gannyen avek bann ansyen, gard antet ki zot priye pour ganny lespri sen ler zot pe diskit konsernan bann keksoz ki annan pour fer avek kongregasyon. Zot osi pran kont bann prensip Labib ki aplikab pour sa sityasyon e zot swiv bann direktiv ki lorganizasyon Zeova i donnen. Zot vreman anvi fer Zeova plezir e donn son pep sa pli bon swen posib. Sa bann zonm fidel i konnen ki zot pou rann kont avek Bondye pour lafason ki zot pran swen avek son pep. (1 Pyer 5:2, 3) Mazin sa: Dan en lemonn kot i annan divizyon akoz ras, larelizyon ek politik, pep Zeova i ador sa sel vre Bondye ansanm dan linite. Sa i posib zis akoz Zeova in beni son lorganizasyon.

12. Ki bann ansyen i bezwen reflesir lo la ler zot pe rode si en dimoun in repantir?

¹² Zeova in konfye bann ansyen en responsabilite vreman enportan pour gard kongregasyon prop. Si en Kretyen i fer en pese grav, Zeova i ekspekte ki bann ansyen i rode si sa dimoun i kapab reste dan kongregasyon. Enn bann keksoz ki zot bezwen rode i si sa dimoun i regrete pour sa ki i’n fer. I kapab dir ki i’n regrete me eski i vreman ay sa ki i’n fer? Eski i determinen pour pa fer ankor sa pese? Si en rezon akoz i ti fer sa pese, i akoz i ti annan move frekantasyon, eski i pare pour aret frekant sa bann dimoun? Bann ansyen i priy Zeova, zot konsider tou bann lenformasyon e sa ki Labib i dir. Zot osi egzamin lafason ki sa dimoun ki’n fer sa pese i santi konsernan sa ki i’n fer. Apre, bann ansyen i deside si sa dimoun i kapab reste dan kongregasyon. Dan serten ka, sa dimoun i bezwen ganny ekskli dan kongregasyon.​—1 Kor. 5:11-13.

13. Ki nou kapab mazinen si enn nou zanmi pros oubyen en manm nou fanmir i ganny ekskli dan kongregasyon?

¹³ Kan ki nou kapab vwar li difisil pour annan konfyans dan bann ansyen? Si sa dimoun ki’n ganny ekskli dan kongregasyon i pa enn nou zanmi pros oubyen en manm nou fanmir, i kapab fasil pour nou aksepte desizyon bann ansyen. Me petet nou pa pou santi parey si sa dimoun ki’n ganny ekskli dan kongregasyon i enn nou zanmi pros. Nou kapab mazinen ki bann ansyen pa’n pran an kont tou bann lenformasyon oubyen nou kapab demande si sa desizyon ki bann ansyen in fer, i sanmenm desizyon ki Zeova ti pou fer. Me kwa ki kapab ed nou pour annan sa bon pwennvi anver sa desizyon?

14. Kwa ki kapab ed nou si bann ansyen i deside pour ekskli enn nou zanmi oubyen fanmir?

 ¹⁴ Nou devret rapel ki ler en dimoun i ganny ekskli dan kongregasyon sa i form parti laranzman Zeova e i anmenn byenfe pour kongregasyon e i kapab ed sa dimoun. Si en dimoun ki pa repantir pa ganny tire dan kongregasyon, i kapab enfliyans lezot pour fer pese. (Gal. 5:9) Osi, sa dimoun i kapab pa rekonnet ki sa ki in fer i vreman grav e i kapab pa vwar rezon pour sanz son fason panse ek aksyon, pour li kapab ganny laprouvasyon Zeova. (Ekle. 8:11, NWT) Nou kapab asire ki ler bann ansyen pe deside si en dimoun i devret ganny ekskli dan kongregasyon, zot pran sa responsabilite vreman serye. Parey bann ziz dan ansyen Izrael, bann ansyen i realize ki “zot pa pe ziz pour zonm me pour Zeova.”​—2 Kron. 19:6, 7, NWT.

15. Akoz plis ki zanmen oparavan nou bezwen annan konfyans dan Zeova?

¹⁵ Lafen sa move lemonn i vreman pros. Alor plis ki zanmen oparavan nou bezwen annan konfyans dan fason fer Zeova. Akoz? I kapab ki pandan gran ladetres, nou pou ganny bann lenstriksyon ki pou paret drol, difisil pour konpran ouswa pa fer sans. Byensir, Zeova pa pou koz avek nou personnelman. I tre probab ki i pou donn lenstriksyon atraver son lorganizasyon. Pandan gran ladetres, i pa pou sa moman pour annan dout konsernan bann lenstriksyon ouswa pour demande, ‘Eski sa lenstriksyon i sorti kot Zeova oubyen eski i pwennvi bann frer ki pe dirize?’ Eski ou pou annan konfyans dan Zeova ek son lorganizasyon pandan sa letan enportan? Lafason ki ou vwar bann lenstriksyon sorti kot lorganizasyon Bondye la konmela, pou ed ou reponn sa kestyon. Si ou annan konfyans dan bann lenstriksyon ki ou gannyen ozordi e ou obei, i tre probab ki ou pou fer parey pandan gran ladetres.​—Lik 16:10.

16. Dan lavenir, kwa ki kapab fer li difisil pour annan konfyans dan bann zizman Zeova?

¹⁶ I annan en lot keksoz ki nou bezwen reflesir lo la. Sa i lafason ki nou pou reazir anver bann zizman ki Zeova pou fer a lafen sa move lemonn. Ozordi, nou annan lespwar ki en kantite dimoun ki pa pe servi Zeova, enkli nou fanmir, pou deside servi Zeova avan lafen i arive. Me pandan Armagedon, Zeova pou servi Zezi, ki I’n apwente konman ziz, pour fer desizyon final konsernan lavenir bann ki pa pe servi  li. (Mat. 25:31-33; 2 Tesa. 1:7-9) I pa pou depan lo nou pour deside anver lekel ki Zeova pou pran pitye. (Mat. 25:34, 41, 46) Eski nou pou annan konfyans dan zizman Zeova oubyen eski nou pou aret servi li parski nou pa dakor avek son desizyon? I kler ki nou bezwen annan plis konfyans dan Zeova la konmela pour ki dan lavenir nou annan en konfyans total dan li.

17. Ki byenfe nou pou gannyen akoz zizman Zeova a lafen sa move lemonn?

¹⁷ Imazin lafason ki nou pou santi dan nouvo lemonn, ler nou pou vwar sa ki zizman Zeova in akonpli. Fo larelizyon pou nepli egziste, i pou nepli annan bann biznes oubyen gouvernman egois ki’n abiz e fer dimoun soufer tou dilon listwar imen. Nou pou nepli malad, vin vye e dimoun pou nepli mor. Pour mil an, Satan ek son bann demon pou nepli anbet dimoun. Tou bann move keksoz ki’n arive akoz zot in rebele, pou nepli egziste. (Rev. 20:2, 3) Ler nou pou vwar tousala, nou pou vreman rekonesan ki nou’n annan konfyans dan fason fer Zeova!

18. Dapre Nonm 11:4-6 ek 21:5, ki leson nou kapab aprann avek sa ki bann Izraelit ti fer?

¹⁸ Eski dan nouvo lemonn i pou annan keksoz ki kapab fer li difisil pour annan konfyans dan fason fer Zeova? Annou vwar sa ki ti arive pa bokou letan apre ki bann Izraelit ti ganny libere dan lesklavaz Lezip. Serten ti konmans konplent parski zot ti mank bann keksoz ki zot ti manze Lezip e zot pa ti apresye sa lamann ki Zeova ti donn zot. (Lir Nonm 11:4-6; 21:5, NWT.) Eski i kapab ki nou pou annan menm fason panse apre gran ladetres? Nou pa konnen ki kantite travay nou pou bezwen fer pour netway later e pour ptitapti fer li vin en paradi. I tre probab ki pou annan en kantite travay pour fer e ki o konmansman keksoz pa pou fasil. Eski nou pou konplent konsernan sa ki Zeova pou donn nou sa letan? Me en keksoz nou kapab asire: Si nou rekonesan pour bann keksoz ki Zeova i donn nou la konmela, nou pou pli rekonesan pour bann keksoz ki i pou donn nou sa letan.

19. Ki nou’n aprann dan sa lartik?

¹⁹ Nou bezwen konvenki ki fason fer Zeova i toultan bon. Nou osi bezwen annan konfyans dan bann ki Zeova i annan konfyans e ki i’n apwente pour diriz son lorganizasyon. Pa zanmen oubliy sa ki Zeova ti dir atraver profet Izai: “Zot pou annan lafors si zot reste kalm e annan konfyans.”​—Iza. 30:15, NWT.