1. Ki Zezi ti dir son bann disip konsernan kan ki lafen pou arive e ki i ti demann zot pour fer?

 DETRWA zour avan Zezi i mor, kat parmi son bann disip ti demann li: “Ki siny ki pou montre . . . ki lafen sa lemonn i pros pour arive?” (Mat. 24:3) I tre probab ki bann disip ti pe demande ki mannyer zot ti pou konnen kan ki Zerizalenm ek son tanp ti pou ganny detrir. Ler Zezi ti reponn zot, i pa ti koz zis lo destriksyon Zerizalenm ek son tanp me i ti osi koz lo “lafen sa lemonn” ki nou pe viv ladan la konmela. Ler Zezi ti pe koz konsernan kan ki lafen pou arive, i ti dir: “Konsernan sa zour ouswa sa ler, personn pa konnen kan i pou arive, ni bann lanz dan lesyel, ni Garson, me zis Papa ki konnen.” Apre sa i ti demann tou son bann disip pour “reste eveye” e pour “kontinyen veye.”​—Mark 13:32-37.

2. Akoz i ti enportan pour bann Kretyen Zwif dan premye syek kontinyen veye?

² Bann Kretyen Zwif dan premye syek ti bezwen kontinyen veye pour zot sov zot lavi. Zezi ti dir son bann disip ki zot bezwen veye pour zot konnen kan ki Zerizalenm ek son tanp ti pou ganny detrir. I ti dir: “Ler zot vwar Zerizalenm antoure avek bann kan larme, alor konnen ki son destriksyon in aprose.” Ler zot ti pou vwar sa, zot ti pou bezwen obei sa lavertisman Zezi e “konmans sov dan montanny.” (Lik 21:20, 21) Bann ki ti ekout sa lavertisman ti sirviv ler bann Romen ti detri Zerizalenm.

3. Ki nou pou vwar dan sa lartik?

³ Ozordi, nou pe viv dan sa letan kot sa move lemonn i pros pour ganny detrir. Alor, nou osi nou bezwen  kontinyen rezonn byen e kontinyen veye. Dan sa lartik, nou pou vwar ki mannyer nou kapab kontinyen rezonn byen anmezir ki nou obzerv sa ki pe arive dan lemonn. Nou pou osi vwar ki mannyer nou kapab vey byen nou lekor e ki mannyer nou kapab servi byen sa letan ki reste.

4. Akoz nou devret enterese pour vwar ki mannyer sa ki pe arive dan lemonn pe akonpli profesi Labib?

⁴ I annan bann bon rezon akoz nou enterese pour vwar ki mannyer sa ki pe arive dan lemonn pe akonpli profesi Labib. Par egzanp, Zezi ti dir nou konsernan bann keksoz ki pou arive ki pou ed nou konnen kan ki lafen sa move lemonn i pros pour arive. (Mat. 24:3-14) Zapot Pyer ti ankouraz nou pour port latansyon lo bann profesi ki pe ganny akonplir pour ki nou lafwa i reste for. (2 Pyer 1:19-21) Sa dernyen liv dan Labib i konmans avek sa bann parol: “En revelasyon sorti kot Zezi Kri, ki Bondye ti donn li pour montre son bann lesklav bann keksoz ki bezwen arive byento.” (Rev. 1:1) Sa i fer ki nou port latansyon lo bann keksoz ki pe arive dan lemonn e nou anvi konnen ki mannyer sa bann keksoz ki pe arive pe akonpli profesi Labib. I kapab ki nou anvi koz lo sa ki pe arive dan lemonn avek lezot.

5. Ki nou devret evite fer me ki nou devret fer? (Vwar portre.)

⁵ Ler nou pe diskit lo bann profesi Labib, nou devret evite donn nou lopinyon personnel lo sa ki nou, nou krwar pou arive. Akoz? Parski nou pa pou anvi dir en keksoz ki kapab fer divizyon dan kongregasyon. Par egzanp, nou kapab tann bann dirizan lemonn pe koz lo ki mannyer zot kapab rezourd en konfli e anmenn lape ek sekirite. Dan plas dir ki nou krwar ki sa ki bann dirizan lemonn in dir pe akonpli sa profesi ki dan 1 Tesalonisyen 5:3, nou bezwen kontinyen reste azour avek bann dernyen lenformasyon ki’n ganny pibliye. Ler nou bann konversasyon i baze lo bann piblikasyon ki lorganizasyon Zeova in pibliye, nou ed kongregasyon pour reste “ini dan menm . . . lopinyon.”​—1 Kor. 1:10; 4:6.

6. Ki nou kapab aprann dan 2 Pyer 3:11-13?

⁶ Lir 2 Pyer 3:11-13. Zapot Pyer i ed nou reflesir lo akoz nou devret etidye bann profesi Labib. I ankouraz nou pour “toultan gard antet zour Zeova.” Akoz? Pa akoz nou anvi konn “sa zour ek sa ler” ki Zeova pou konmans lager Armagedon. Me parski nou anvi servi sa letan ki reste pour fer sir ki nou “annan en kondwit sen” e ki nou pe fer “bann aksyon ki demontre ki [nou] annan en devosyon pour Bondye.” (Mat. 24:36; Lik 12:40) Andotmo, nou anvi annan en bon kondwit e fer sir ki tou sa ki nou fer pour Zeova, nou fer akoz nou kontan li en kantite. Pour nou kapab kontinyen fer sa, nou bezwen vey byen nou lekor.

7. Ki mannyer nou montre ki nou pe vey byen nou lekor? (Lik 21:34)

⁷ Zezi ti demann son bann disip pour port latansyon lo sa ki pe arive dan lemonn  e osi pour vey zot prop lekor. Nou konpran sa atraver sa lavertisman ki Zezi ti donnen dan Lik 21:34. (Lir.) Zezi ti dir: “Me zot, fer byen atansyon.” En dimoun ki fer byen atansyon oubyen ki vey byen son lekor, i vey bann danze ki kapab gat son lanmitye avek Zeova e i esey evit sa bann danze. Sa pou ed li reste dan lanmour Bondye.​—Prov. 22:3; Zid 20, 21.

8. Ki zapot Pol ti dir bann Kretyen?

⁸ Zapot Pol ti dir bann Kretyen ki zot bezwen vey byen zot lekor. Par egzanp, i ti dir bann Kretyen dan lavil Efez: “Kontinyen vey byen ki mannyer zot viv, pa viv parey dimoun bet me parey dimoun saz.” (Efe. 5:15, 16) Satan pe toultan esey gat nou lanmitye avek Zeova. Alor Labib i konsey nou pour “kontinyen esey konpran kisisa lavolonte Zeova,” pour ki nou kapab protez nou lekor kont tou bann latak Satan.​—Efe. 5:17.

9. Ki mannyer nou kapab esey konn lavolonte Zeova?

⁹ Labib pa koz lo tou danze ki kapab gat nou lanmitye avek Zeova. Souvandfwa, nou bezwen fer bann desizyon lo bann keksoz ki Labib pa koz lo la direkteman. Pour nou kapab fer bann desizyon ki saz, nou bezwen esey konpran “kisisa lavolonte Zeova.” Nou kapab fer sa par etidye Parol Bondye regilyerman e medit lo la. Pli nou konpran lavolonte Zeova e nou esey annan “fason panse Kris,” pli nou pou azir “parey dimoun saz.” (1 Kor. 2:14-16) Nou pou fer bann bon desizyon menm ler nou napa bann lalwa spesifik ki dir nou ki pour fer. Parfwa i fasil pour vwar bann danze ki nou bezwen evite me parfwa i pa fasil.

10. Ki serten danze ki nou bezwen evite?

¹⁰ Bann danze ki nou bezwen evite i enkli flirting, bwar tro bokou, manz tro bokou, dir bann keksoz ki bles santiman lezot, move frekantasyon, get bann divertisman ki vyolan, pornografi ek bann keksoz en pe parey. (Ps. 101:3) Nou lennmi, Dyab, pe toultan rod loportinite pour gat nou lanmitye avek Zeova. (1 Pyer 5:8) Si nou pa fer atansyon, Satan i kapab enfliyans nou fason panse ek nou santiman e nou kapab konmans vin groker, malonnet, voras, annan laenn, orgeye e gard rankin. (Gal. 5:19-21) I kapab ki o konmansman sa bann santiman pa for. Me si nou pa azir deswit e fer tou sa ki nou kapab pour tir sa bann santiman, zot pou kontinyen pouse parey en plant anpwazonnen e i pou vin en problenm pour nou.​—Zak 1:14, 15.

11. Ki en danze ki pa sitan evidan ki nou bezwen evite e akoz?

¹¹ I annan bann danze ki pa sitan evidan ki nou bezwen evite. Annou vwar en legzanp. Meton ou travay avek en dimoun ki pa Temwen Zeova. Ou anvi ki i annan en bon lenpresyon lo Temwen Zeova, alor ou zantiy e ou pare pour ed li. Petet parfwa ou menm al dezennen ansanm avek li. Avek letan, ou fer sa pli souvan. Parfwa sa dimoun i koz lo bann keksoz imoral. O konmansman ou pa kontan me ou pa dir nanryen. Avek letan ou konmans abitye avek sa kalite konversasyon e sa i nepli fatig ou. Me en zour, sa koleg travay i envit ou pour al pran en pti drink apre travay e ou aksepte. Avek letan, ou konmans mazin parey li. I pa pou pran bokou letan pour ou fer sa ki ou koleg travay i fer. Byensir,  nou zantiy e nou annan respe pour tou dimoun me nou bezwen gard antet ki bann dimoun ki nou pas letan avek, i annan en lenfliyans lo nou. (1 Kor. 15:33) Si nou fer sa ki Zezi ti ankouraz nou pour fer e nou vey byen nou lekor, nou pou evite frekant bann ki pa viv dapre bann standar Zeova. (2 Kor. 6:15) Nou pou vwar danze e nou pou kapab evit li.

12. Ki travay bann disip Zezi ti pou fer anmezir ki zot pe esper lafen sa move lemonn?

¹² Zezi ti anvi ki son bann disip i reste okipe anmezir ki zot esper lafen arive. Zezi ti donn zot en travay pour fer. I ti donn zot lord pour anons sa bon nouvel “Zerizalenm, partou dan Zide ek Samari e ziska dan bann landrwa pli elwannyen lo later.” (Akt 1:6-8) Sa ti en gran travay! Ler bann disip ti fer tou sa ki zot ti kapab pour anons sa bon nouvel avek lezot, zot ti servi byen zot letan.

13. Akoz nou bezwen servi byen nou letan? (Kolosyen 4:5)

¹³ Lir Kolosyen 4:5. Pour nou kapab vey byen nou lekor, nou bezwen reflesir lo lafason ki nou servi nou letan. Bann “levennman san ekspekte” i kapab arive avek nenport parmi  nou. (Ekle. 9:11) Nou kapab mor san ekspekte.

14-15. Ki mannyer nou kapab servi byen nou letan? (Ebre 6:11, 12) (Vwar portre.)

¹⁴ Nou kapab servi byen nou letan ler nou fer lavolonte Zeova e vin pli pros avek li. (Zan 14:21) Nou bezwen “reste ferm, solid, toultan annan bokou keksoz pour fer dan travay Senyer.” (1 Kor. 15:58) Koumsa nou pou napa okenn regre ki swa lafen i arive oubyen nou pros pour mor.​—Mat. 24:13; Rom. 14:8.

¹⁵ Ozordi, Zezi pe kontinyen diriz son bann disip anmezir zot anons sa bon nouvel konsernan Rwayonm Bondye partou lo later. Zezi in gard son promes. Dan nou renyon e atraver nou bann piblikasyon, Zezi i montre nou ki mannyer pour anons sa bon nouvel. I osi donn nou tou sa ki nou bezwen pour nou kapab fer sa travay. (Mat. 28:18-20) Nou fer sa ki Zezi i ekspekte avek nou par travay dir dan predikasyon e kontinyen veye anmezir ki nou esper Zeova met en lafen avek sa move lemonn. Ler ou aplik sa konsey ki dan Ebre 6:11, 12, ou pou gard ou lespwar “ziska lafen.”​—Lir.

16. Ki nou determinen pour fer?

¹⁶ Zeova in fini deside kan ki i pou detri sa move lemonn. Ler sa i arive, Zeova pou akonpli tou bann profesi ki dan son Parol. Me parfwa nou kapab mazinen ki lafen i tarde pour arive. Me zour Zeova “pa pou an retar!” (Aba. 2:3) Alor annou determinen pour “kontinyen veye ziska ki Zeova i azir” e “kontinyen esper Bondye [nou] sover avek pasyans.”​—Mik. 7:7.