LARTIK LETID 7
KANTIK 15 Loue Garson Bondye!
Ki byenfe nou gannyen avek lefet ki Zeova i pardonn nou?
“Ou vreman pardonnen.”—PS. 130:4.
TOPIK
Nou pou vwar serten legzanp dan Labib ki dekrir lafason ki Zeova i pardonn nou. Sa lartik pou ed nou pour demontre plis lapresyasyon pour lefet ki Zeova i pardonn nou.
1. Akoz i difisil pour konnen ki en dimoun pe esey dir ler i dir ki in pardonn ou?
I TRE probab ki ou santi ou vreman soulaze ler ou tann en dimoun dir: “Mon pardonn ou.” Sa parol i kapab rekonfortan sirtou si ou konnen ki ou’n dir oubyen fer en keksoz ki’n bles santiman sa dimoun. Me ki i vedir ler en dimoun i dir: “Mon pardonn ou”? Petet sa dimoun pe dir ki zot ankor bon zanmi. Oubyen petet sa dimoun pe dir ki i pa anvi koz lo sa ki’n arive ankor me ki zot lanmitye nepli parey avan. Ler en dimoun i dir ou ki in pardonn ou, sa i kapab vedir diferan keksoz.
2. Ki mannyer Labib i dekrir lafason ki Zeova i pardonnen? (Vwar not.)
2 Lafason ki Zeova i pardonn nou i vreman diferan avek lafason ki nou pardonn kanmarad. I napa personn ki kapab pardonn parey Zeova i pardonnen. En psalmis ti dir sa parol konsernan Zeova: “Ou vreman pardonnen, pour ki dimoun i admir ou.” a (Ps. 130:4) Ler Zeova i pardonnen, i “vreman pardonnen.” I sa enn ki montre nou ki savedir pour vreman pardonnen. Dan serten verse dan Lekritir Ebre, bann ekriven Labib ti servi en mo pour dekrir lafason ki Zeova i pardonnen e zot pa’n zanmen servi sa menm mo pour dekrir lafason ki dimoun i pardonnen.
3. Ki mannyer lafason ki Zeova i pardonnen i diferan avek lafason ki imen i pardonn kanmarad? (Izai 55:6, 7)
3 Ler Zeova i pardonn en dimoun, i efas pese sa dimoun konpletman. Sa i fer ki sa dimoun i kapab reganny en bon lanmitye avek Zeova. Nou vreman rekonesan ki Zeova i zenere e i toultan pare pour pardonn nou konpletman.—Lir Izai 55:6, 7.
4. Ki mannyer Zeova i ed nou pour konpran lafason ki i pardonnen?
4 Si lafason ki Zeova i pardonnen i diferan avek lafason ki nou pardonnen, ki mannyer, nou konman bann imen enparfe, nou kapab konpran lafason ki Zeova i pardonnen? Zeova i servi bann zoli legzanp pour ed nou konpran lafason ki i pardonn nou. Dan sa lartik, nou pou vwar serten sa bann legzanp. Sa bann legzanp pou montre nou ki ler nou repantir, Zeova i retir nou bann pese e an menm tan i permet nou pour revin son zanmi. Anmezir ki nou vwar sa bann legzanp, nou pou devlop lanmour ek lapresyasyon pour nou Papa, ki montre nou dan diferan fason ki i’n pardonn nou.
ZEOVA I RETIR NOU PESE
5. Ki i arive ler Zeova i pardonn nou pese?
5 Dan Labib, souvan pese i ganny konpare avek bann fardo ki lour. Lerwa David ti dir sa parol konsernan son bann pese. I ti dir: “Mon bann fot in ariv pli o ki mon latet. Zot parey en fardo ki tro bokou pour mwan siporte.” (Ps. 38:4) Me Zeova i pardonn pese bann dimoun ki repantir. (Ps. 25:18; 32:5) Sa mo Ebre ki’n ganny tradwir “pardonn” i vedir “lev anler” oubyen “anmennen.” Alor ler Zeova i pardonn nou pese, i konmsi i tir sa fardo ki lo nou zepol e i anmenn li lwen avek nou.
“Pardonn” (Ps. 32:5)
6. Ki zistans Zeova i anmenn nou pese?
6 Labib i servi en lot legzanp pour montre zistans ki Zeova i anmenn nou pese lwen avek nou. Psonm 103:12 i dir: “I’n met nou bann pese lwen avek nou parey soley leve i lwen avek soley kouse.” Soley leve pa zanmen dan menm landrwa ki soley kouse. Andotmo, Zeova i anmenn nou pese vreman lwen avek nou, en zistans ki nou pa kapab imazinen. Sa i asir nou ki Zeova i pardonn nou konpletman.
“Parey soley leve i lwen avek soley kouse” (Ps. 103:12)
7. Dapre Labib, ki Zeova i fer avek nou pese? (Mika 7:18, 19)
7 Menm si dan en sans Zeova i pran nou pese e i anmenn lwen avek nou, eski i gard sa pese avek li? Non. Lerwa Ezekya ti dir sa lo Zeova: “Ou’n zet tou mon bann pese deryer ou ledo.” Oubyen parey not pour sa verse i dir: “Ou’n tir tou mon bann pese devan ou lizye.” (Iza. 38:9, 17; not.) Sa legzanp i montre nou ki Zeova i zet pese bann ki’n repantir e i pa get sa bann pese ankor. Sa bout dan sa verse i osi kapab ganny tradwir konman: “Ou’n konsider mon pese konmsi zot pa’n arive.” Labib i servi en lot legzanp pour met plis lanfaz lo sa pwen. Sa legzanp i dan Mika 7:18, 19. (Lir.) Sa bann verse i dir ki Zeova i zet nou pese dan fon lanmer. Dan letan lontan, ler en keksoz ti tonm dan fon lanmer, i ti enposib pour en dimoun al anmas sa keksoz.
“Ou’n zet tou mon bann pese deryer ou ledo” (Iza. 38:17)
“Ou pou zet tou zot pese dan fon lanmer” (Mik. 7:19)
8. Ki nou’n aprann ziska aprezan?
8 Atraver sa bann legzanp ki nou’n vwar, nou’n aprann ki ler Zeova i pardonn nou, i retir nou pese konpletman pour ki nou nepli santi nou koupab. David ti dir: “Ere sa bann ki zot move aksyon i ganny pardonnen e ki zot pese i ganny kouver, ere sa dimoun ki Zeova pa pran kont son pese ditou.” (Rom. 4:7, 8) Sa i lafason ki Zeova i pardonnen.
ZEOVA I EFAS NOU PESE
9. Ki legzanp Zeova i servi pour montre ki i pardonn nou konpletman?
9 Atraver sa ranson, Zeova i kapab efas pese bann dimoun ki’n repantir. Annou vwar ki mannyer Labib i dekrir sa ki Zeova i fer. Dan Labib nou lir ki Zeova i lav nou avek nou bann pese. Sa i fer ki nou ganny pirifye. (Ps. 51:7; Iza. 4:4; Zer. 33:8) Zeova i dir ki mannyer sa i marse: “Menm si zot bann pese i rouz, zot pou vin blan parey lanez. Menm si zot rouz parey latwal ki kouler rouz fonse, zot pou vin parey lalenn.” (Iza. 1:18) I vreman difisil pour tir en tas rouz lo en bout latwal. Zeova i servi sa legzanp pour asir nou ki nou bann pese i kapab ganny lave e ganny efase konpletman.
“Menm si zot bann pese i rouz, zot pou vin blan parey lanez” (Iza. 1:18)
10. Ki en lot legzanp Zeova i servi pour montre nou lafason ki i pardonn nou konpletman?
10 Parey nou’n vwar dan sa lartik avan, pese i kapab ganny konpare avek “det.” (Mat. 6:12; Lik 11:4) Alor, sak fwa nou fer pese kont Zeova, i konmsi nou det i ogmante. Sa i fer ki nou annan en gro det anver Zeova. Me ler Zeova i pardonn nou, i konmsi i kennsel sa det ki nou drwa li. I pa demann nou pour peye pour sa bann pese ki in fini pardonnen. Zis parey en dimoun i soulaze ler son det i ganny kennsel, nou osi nou santi nou soulaze ler Zeova i pardonn nou.
“Pardonn nou nou bann pese” (Mat. 6:12)
11. Ki i vedir ler Labib i dir ki nou pese i “ganny efase”? (Akt 3:19)
11 Zeova pa zis kennsel nou bann det oubyen nou bann pese me i osi efas zot. (Lir Akt 3:19.) Imazin sa. Meton ou drwa en dimoun e sa dimoun i kennsel sa det. I fer sa par fer en laliny lo sa sonm larzan ki ou drwa. Kantmenm sa, ou ankor kapab vwar sa sonm larzan ki ou drwa anba sa laliny. Me ler en keksoz i ganny efase, sa i diferan. Pour nou kapab konpran sa legzanp, nou bezwen rapel ki sa kalite lank ki ti ganny servi dan letan lontan ti kapab fasilman ganny efase avek delo. En dimoun ti kapab servi en leponz mouye pour efas sa ki’n ganny ekrir. Alor ler en det ti “ganny efase,” sa i vedir ki i ti disparet konpletman e dimoun pa ti kapab vwar sa lekritir ki ti la avan. I ti konmsi sa det pa ti zanmen egziste. Pa nou vreman rekonesan ki ler Zeova i pardonn nou pese, i konmsi nou pa’n zanmen fer sa bann pese!—Ps. 51:9.
“Pour ki zot pese i ganny efase” (Akt 3:19)
12. Ki nou aprann avek sa legzanp konsernan en gro nyaz?
12 Zeova i servi en lot legzanp pour ed nou konpran lafason ki i efas nou pese. I dir: “Mon pou efas ou bann fot konmsi en nyaz in kouver zot e mon pou efas ou bann pese konmsi en gro nyaz in kouver zot.” (Iza. 44:22) Ler Zeova i pardonn nou, i konmsi i servi en gro nyaz pour kasyet nou pese pour ki nou pa vwar sa bann pese e pour ki li osi i pa vwar.
“Mon pou efas ou bann fot konmsi en nyaz in kouver zot” (Iza. 44:22)
13. Ki mannyer nou santi ler Zeova i pardonn nou pese?
13 Ki mannyer sa bann legzanp i fer nou santi? Ler Zeova i pardonn nou pese, nou pa devret kontinyen santi nou koupab pour nou bann pese pour larestan nou lavi. Sakrifis Zezi in kennsel nou bann det konpletman. Pour Zeova, i konmsi nou pa’n zanmen fer sa pese. Ler nou repantir, i koumsa ki Zeova i pardonn nou pese.
ZEOVA I AKSEPTE NOU ANKOR KONMAN SON ZANMI PROS
Ler nou Papa ki dan lesyel i pardonn nou, sa i fer li posib pour nou annan en bon lanmitye avek li (Vwar paragraf 14)
14. Akoz nou kapab annan konfyans ki ler Zeova i pardonn nou, in vreman pardonn nou? (Vwar portre.)
14 Ler Zeova i pardonn nou, nou kapab asire ki in revin nou zanmi. Vi ki Zeova in pardonn nou konpletman, nou pa bezwen kontinyen santi nou koupab. Nou pa bezwen per ki Zeova pe gard rankin e ki i pe rod fason pour pini nou. Zeova pa pou zanmen fer sa. Ler Zeova i dir ki in pardonn nou, nou kapab annan konfyans dan li. Zeova ti dir profet Zeremi: “Mon pou pardonn zot fot e mon pou nepli rapel zot pese.” (Zer. 31:34) Pol ti refer avek sa bann parol ler i ti dir: “Mon pou nepli rapel zot pese.” (Ebr. 8:12) Me ki sa i vedir?
“Mon pou nepli rapel zot pese” (Zer. 31:34)
15. Dan ki sans ki Zeova i nepli rapel nou bann pese?
15 Dan Labib, sa lekspresyon “rapel” oubyen “mazin” pa toultan refer avek ler en dimoun pe mazin en keksoz ki’n arive dan lepase. Me i osi kapab refer avek ler en dimoun i fer en keksoz. Sa kriminel ki ti lo poto o bor Zezi ti dir: “Zezi, mazin mwan ler ou vin Lerwa.” (Lik 23:42, 43) I ti pe demann Zezi pour fer en keksoz pour li ler Zezi i vin lerwa. Sa ki Zezi ti dir sa kriminel ti montre ki Zezi ti pou resisit sa kriminel. Alor ler Zeova i dir ki i nepli rapel nou bann pese, sa i vedir ki in pardonn nou e ki dan lavenir i pa pou fer nanryen pour pini nou pour sa bann pese.
16. Ki mannyer Labib i dekrir sa liberte ki nou gannyen ler Zeova i pardonn nou?
16 Labib i servi en lot legzanp pour ed nou konpran lafason ki nou santi ler Zeova i pardonn nou. Ler Zeova i pardonn nou, nou santi nou lib. Labib i dir ki vi ki nou enparfe, nou “lesklav pese.” Me ler Zeova i pardonn nou, nou parey bann lesklav ki’n “ganny libere avek pese.” (Rom. 6:17, 18; Rev. 1:5) Ler nou konnen ki Zeova in pardonn nou, nou kapab zwaye parey en lesklav ki’n ganny libere.
“Zot in ganny libere avek pese” (Rom. 6:18)
17. Ki mannyer ler Zeova i pardonn nou, sa i anmenn gerizon pour nou? (Izai 53:5)
17 Lir Izai 53:5. Sa dernyen legzanp ki nou pou vwar i konpar nou avek bann dimoun ki annan en maladi grav. Gras a sa ranson ki Zeova in peye atraver son Garson, Zeova in geri nou. (1 Pyer 2:24) Ler nou fer pese, nou gat sa lanmitye ki nou annan avek Zeova. Sa ranson i fer li posib pour Zeova pardonn nou e sa i fer ki nou kapab reganny nou lanmitye avek Zeova. Zis parey en dimoun i zwaye apre ki in ganny geri avek en maladi grav, nou osi nou zwaye ler nou ganny geri spirityelman, setadir ler nou reganny nou lanmitye avek Zeova e nou reganny son laprouvasyon.
“Nou ti ganny geri akoz son bann blesir” (Iza. 53:5)
LEFET KI ZEOVA I PARDONN NOU, KI SA I VEDIR POUR NOU?
18. Ki nou’n aprann avek bann legzanp dan Labib ki koz lo lafason ki Zeova i pardonn nou? (Vwar bwat “Lafason ki Zeova i pardonn nou.”)
18 Ki nou’n aprann avek bann legzanp dan Labib ki koz lo lafason ki Zeova i pardonn nou? Ler Zeova i pardonn nou pese, i konmsi nou pa’n zanmen fer sa pese e nou kapab asire ki dan lavenir, Zeova pa pou pini nou pour sa pese. Sa i fer ki nou kapab annan en bon lanmitye avek nou Papa ki dan lesyel. Me an menm tan, nou bezwen gard antet ki ler Zeova i pardonn nou, sa i en kado. Zeova i pardonn nou akoz i kontan nou e akoz son labonte ekstraordiner e pa akoz nou merite ganny pardonnen.—Rom. 3:24.
19. (a) Akoz nou devret rekonesan? (Romen 4:8) (b) Ki nou pou vwar dan sa lartik ki swiv?
19 Lir Romen 4:8. Nou tou nou devret rekonesan ki Zeova i sa Bondye ki “vreman pardonnen.” (Ps. 130:4) Me pour ki Zeova i kapab pardonn nou, nou bezwen fer en keksoz enportan. Zezi ti dir: “Si zot pa pardonn fot lezot, zot Papa osi pa pou pardonn zot.” (Mat. 6:14, 15) Alor i enportan ki nou swiv legzanp Zeova e pardonn lezot. Me ki mannyer ou kapab fer sa? Nou pou vwar sa dan sa lartik ki swiv.
KANTIK 46 Mersi Zeova
a Dan langaz Ebre ki ti ganny servi dan letan ki Labib ti ganny ekrir, dan sa verse i ti annan sa lekspresyon “sa pardon,” ki montre ki zis Zeova ki kapab vreman pardonnen e ki lafason ki lezot i pardonnen i diferan avek sa ki pour Zeova. En kantite tradiksyon Labib pa montre sa diferans.
