ESKI ou’n deza santi ki ou ou tousel pe fer fas avek en problenm? Nou pe viv dan “en letan vreman difisil” ki kapab fer nou dekouraze e fer nou santi ki nou tousel parski nou napa personn pour koz avek. (2 Tim. 3:1) Me nou pa bezwen fer fas avek nou problenm nou tousel parski i annan dimoun ki kapab ed nou. Labib i montre ki bann vre zanmi i kapab ed nou ler nou “pas dan problenm.”—Prov. 17:17.

Ler zapot Pol ti fer son bann vwayaz misyonner, i ti vwayaz avek serten son bann zanmi e zot ti ed li en kantite. (Kol. 4:7-11) Ler i ti dan prizon Ronm, son bann zanmi ti fer bann keksoz ki i pa ti kapab fer. Par egzanp, Epafrodit ti anmenn bann keksoz ki bann frer ek ser dan lavil Filip ti’n anvoye pour Pol. (Fili. 4:18) Tisik ti anmenn bann let ki Pol ti’n ekri pour bann kongregasyon kot sa bann kongregasyon. (Kol. 4:7; vwar not letid.) Avek sipor son bann zanmi, Pol ti kapab ankouraz bann kongregasyon menm ler i ti en prizonnyen dan son prop lakour e ler i ti dan prizon. Ki mannyer ou osi ou kapab vin en vre zanmi?

Dan nou letan, i annan legzanp bann frer ek ser ki montre akoz i enportan pour vin en vre zanmi. Annou vwar leksperyans Elisabet e lafason ki en ser ti montre ki i en vre zanmi pour li. Elisabet i en pionye ordiner e i reste Lespanny. Apre ki dokter ti dir ki manman Elisabet ti annan en kanser ki ti pou touy li, sa ser ti anvoy Elisabet plizyer mesaz ankourazan ki baze lo bann verse Labib. Elisabet i dir: “Son bann mesaz ti montre mwan ki mon pa ti tousel e sa ti donn mwan sa lafors ki mon ti bezwen pour fer sa ki mon ti bezwen fer.”—Prov. 18:24.

Nou kapab ranforsi nou lanmitye avek nou bann frer ek ser par siport zot dan bann aktivite spirityel. Par egzanp, si ou annan en transpor, eski ou kapab ofer pour anmenn en frer oubyen ser aze kot renyon ouswa dan predikasyon? Si ou fer sa, i tre probab ki zot pou kapab ankouraz kanmarad. (Rom. 1:12) Me malerezman, serten Kretyen pa kapab kit zot lakour. Ki mannyer nou kapab vin en vre zanmi pour zot?

Serten Kretyen pa kapab asiste renyon akoz zot annan bann problenm lasante oubyen akoz zot sirkonstans. Annou vwar leksperyans David ki ti annan kanser. Pour apepre sis mwan, David ti ganny tretman pour kanser e pandan sa letan, li ek son madanm Lidia, ti bezwen asiste renyon atraver enternet.

Ki mannyer zot bann zanmi dan kongregasyon ti ed zot? Apre sak renyon, serten frer ek ser ki ti  kot Lasal Rwayonm ti fer zefor pour koz avek David ek Lidia atraver video konferans. Osi, ler David ek Lidia ti reponn pandan renyon, bann frer ek ser ti anvoy zot bann mesaz ankourazan apre renyon. Ki mannyer sa ti fer David ek Lidia santi? David ek Lidia ti santi ki bann frer ek ser i kontan zot.

Eski nou kapab fer laranzman pour fer predikasyon avek en frer oubyen ser ki pa kapab kit son lakour? Si nou fer bann pti azisteman dan nou progranm e nou travay avek zot dan predikasyon, nou pou kapab montre zot ki nou pa’n oubliy zot. (Prov. 3:27) Petet ou kapab fer laranzman pour fer predikasyon atraver let oubyen par telefonn. Petet bann ki pa kapab kit zot lakour i kapab asiste renyon predikasyon atraver video konferans. David ek Lidia ti vreman apresye sa laranzman. David i dir: “Sa moman ki nou ti pase avek nou group predikasyon pour fer en pti diskisyon ek lapriyer, ti vreman ankouraz nou.” Petet tanzantan ou kapab anmenn en etidyan Labib kot lakour sa frer oubyen ser pour fer son letid. Me fer sir ki ou demann sa frer oubyen ser permisyon avan.

Ler nou fer predikasyon ansanm avek bann frer ek ser ki pa kapab kit zot lakour, nou ganny loportinite pour vwar zot bann zoli kalite e sa i fer nou vin zot zanmi. Par egzanp, ler ou fer predikasyon avek sa bann frer ek ser e ou vwar lafason ki zot servi Parol Bondye pour tous leker dimoun, sa i fer ou vin pli pros avek zot. Ou kapab fer plis zanmi ler ou ed bann frer ek ser dan predikasyon e kot Lasal Rwayonm.—2 Kor. 6:13.

Ler Pol ti pas dan problenm, son zanmi Tit ti vin vwar li e sa ti ed Pol pour santi li pli byen. (2 Kor. 7:5-7) Legzanp Tit i ed nou konpran ki nou kapab rekonfort lezot par bann parol ankourazan e osi par pas letan avek zot e fer keksoz pour ed zot.—1 Zan 3:18.

Nou bann frer ek ser Larisi in kit en bon legzanp lo lafason ki nou kapab siport kanmarad. Annou vwar leksperyans Sergey ek son madanm Tatyana. Apre ki lapolis ti’n fouy dan zot lakaz, zot ti ganny anmennen kot stasyon lapolis pour ganny kestyonnen. Tatyana ti ganny large premye e i ti retourn kot lakour. Sergey i dir: “Dek ki [Tatyana] ti ariv kot lakour, en ser ki ti annan bokou kouraz ti vin vizit li. Nou bann lezot zanmi ti vini pour ed nou remet lord dan nou apartman.”

Sergey i osi dir: “Mon’n toultan kontan Proverb 17:17, ki dir: ‘En vre zanmi i toultan demontre lanmour e i en frer ler ou pas dan problenm.’ Sa bann parol in vin pli reel pour mwan pandan bann moman kot nou ti ganny persekite e nou ti bezwen led nou bann zanmi. Zeova in donn mwan bann zanmi ki annan kouraz e ki’n la pour nou.” a

Pandan bann moman difisil, nou bezwen led nou bann zanmi. Nou pou bezwen zot plis ankor pandan gran ladetres. Alor, depi la konmela annou fer tou sa ki nou kapab pour vin en vre zanmi pour lezot!—1 Pyer 4:7, 8.