Mon papa ek mon manman ti bann gran Katolik. Me ler zot ti aprann ki Labib i dir ki non Bondye i Zeova, zot ti vin bann Temwen Zeova devoue. Mon papa ti aret fer bann pti stati Zezi. O kontrer, i ti servi son bann abilite konman en sarpantye pour fer en Lasal Rwayonm dan nou lakour e sa ti fer ki nou ti reste par lao Lasal Rwayonm. Sa ti premye Lasal Rwayonm San Juan del Monte, ki en distrik Manila, kapital Filipin.

Mon ti ne an 1952 e apre sa, mon paran ti etidye Labib avek mwan parey zot ti pe fer avek mon kat frer ek mon trwa ser. Anmezir mon ti grandi, mon papa ti ankouraz mwan pour lir en sapit Labib sak zour e i ti etidye plizyer piblikasyon avek mwan. Tanzantan, mon paran ti envit sirveyan rezyonal ek reprezantan biro brans pour vin reste kot nou. Sa ti fer mon fanmir vreman kontan e nou ti ganny ankouraze avek leksperyans sa bann frer. Zot leksperyans ti motiv nou pour met nou servis pour Zeova konman sa keksoz pli enportan.

Mon paran ti fidel avek Zeova e mon’n aprann en kantite avek zot legzanp. Apre ki mon manman ti mor akoz en maladi, mwan ek mon papa, nou ti konmans fer pionye an 1971. Me an 1973 ler mon ti annan 20 an, mon papa ti mor. Lanmor mon paran ti fer mwan vreman sagren e mon ti santi mwan mon tousel. Me sa lespwar ki dan Labib ki “sir e ferm” ti ed mwan pour reste kalm, pozitif e reste pros avek Zeova. (Ebr. 6:19) Pa bokou letan apre lanmor mon papa, mon ti aksepte pour fer pionye spesyal lo en zil ki apel Coron. Sa zil ti dan provens Palawan e i ti izole.

Mon ti annan 21 an ler mon ti ariv Coron. Vi ki mon ti’n toultan reste dan lavil, mon ti sirprann pour vwar ki lo sa zil ti napa bokou elektrisite, delo oubyen transpor. Menm si i ti annan detrwa frer, mon ti napa en konpanyon pour fer pionye avek e parfwa mon ti bezwen fer predikasyon mwan tousel. Pour sa premye mwan, mon ti mank mon fanmir  ek zanmi en kantite. Pandan lannwit, mon ti get zetwal dan lesyel e mon ti plere. Mon ti anvi kit mon servis e retourn dan lakour.

Pandan sa bann moman, mon ti devid mon leker avek Zeova dan lapriyer. Mon ti rapel bann pwen ankourazan ki mon ti’n lir dan Labib e dan bann piblikasyon. Souvandfwa, mon ti mazin Psonm 19:14. Mon ti realize ki Zeova ti pou vin “mon Ros e mon Sover” si mon medit lo bann keksoz ki fer li plezir parey son plan ek son bann kalite. Sa lartik Latour Veyer ki annan pour tit “You Are Never Alone” a ti ed mwan en kantite. Mon ti lir sa lartik plizyer fwa. Dan sa bann moman, i ti konmsi nou ti zis nou de Zeova e sa ti bann moman spesyal kot mon ti kapab priye, etidye e medite.

Pa bokou letan apre ki mon ti’n ariv Coron, mon ti ganny apwente konman ansyen. Vi ki mon ti sa sel ansyen, tou le semenn mon ti konmans kondwir Lekol Minister Teokratik, Renyon Servis, Letid Liv Kongregasyon ek letid Latour Veyer. Mon ti osi fer diskour piblik tou le semenn. En keksoz ki mon ti asire i ki aprezan mon ti nepli annan letan pour santi mwan mon tousel.

Mon ti ganny bann bon rezilta dan predikasyon Coron e serten mon bann etidyan Labib ti batize. Me i ti osi annan bann difikilte. Parfwa mon ti bezwen marse pour en lanmwatye lazournen pour mwan ariv dan teritwar e mon pa ti konnen kote mon pou dormi ler mon ariv dan sa teritwar. Teritwar kongregasyon ti enkli lezot pti zil. Menm si mon pa ti konn naze, souvandfwa, mon ti vwayaz dan movetan lo lanmer pour ariv lo sa bann zil. Pandan sa bann difikilte, Zeova ti protez mwan e pran swen avek mwan. Pli tar, mon ti realize ki Zeova ti pe prepar mwan pour bann keksoz pli difisil ki mon ti pou pas ladan ler mon ti pou ganny anvoye dan en lot servis.

An 1978, mon ti ganny anvoye pour al servi Papua New Guinea, ki en pei ki nor avek Lostrali. Papua New Guinea i en pei ki annan en kantite montanny e i apepre menm grander avek Lespanny. Mon ti sirprann pour aprann ki sa trwa milyon dimoun ki reste laba ti koz plis ki 800 langaz. Laplipar dimoun ti koz Melanesian Pidgin ki laplipar dimoun i konnen konman Tok Pisin.

Pour en serten letan, mon ti pe servi dan en kongregasyon Angle ki sitye Port Moresby ki kapital Papua New Guinea. Me apre mon ti ganny anvoye dan en kongregasyon Tok Pisin e mon ti asiste en laklas pour ed mwan aprann sa langaz. Mon ti aplik sa ki mon ti aprann dan predikasyon e sa ti ed mwan pour aprann sa langaz pli vit. I pa ti pran bokou letan pour mwan kapab fer diskour piblik an Tok Pisin. Me mwens ki enn an apre ki mon ti’n ariv Papua New Guinea, mon ti vreman sirprann ler mon ti ganny demande pour al servi konman sirveyan rezyonal pour bann kongregasyon Tok Pisin dan plizyer landrwa.

Vi ki bann kongregasyon ti lwen avek kanmarad, mon ti bezwen organiz en kantite lasanble rezyonal e vwayaz bokou. O konmansman, mon ti santi mwan vreman tousel parski mon ti dan en nouvo pei kot dimoun ti koz en lot langaz e zot ti annan en lot koutim ki mon pa ti abitye avek. Sa teritwar ti annan bokou montanny e traze ti difisil e sa ti fer ki mon ti bezwen rod en lot mwayen pour vizit  sa bann kongregasyon. Alor mon ti bezwen pran avyon preski tou le semenn. Parfwa, i ti annan zis mwan konman pasaze dan en vye pti avyon. Sa bann vwayaz ti fer mwan per zis parey ler mon ti vwayaz par bato.

Pa bokou dimoun ki ti annan telefonn alor mon ti kominik avek bann kongregasyon par let. Souvandfwa, mon ti ariv avan ki mon let ti arive e mon ti bezwen demann dimoun dan sa landrwa kote bann Temwen Zeova i ete. Me sak fwa ki mon ti vwar bann frer ek ser, zot ti byen akeyir mwan e sa ti fer mwan rapel akoz ki mon ti pe fer tou sa zefor. Mon ti vwar lafason ki Zeova ti pran swen avek mwan dan bokou fason e mon lanmitye avek li ti vin pli for.

Ler mon ti asiste mon premye renyon lo en zil ki apel Bougainville, en koup ti apros mwan an souriyan e demann mwan: “Eski ou rapel nou?” Mon ti mazin zot parski mon ti pres avek zot ler mon ti’n fek ariv Port Moresby. Mon ti konmans en letid Labib avek zot apre mon ti demann en frer pour kontinyen fer zot letid. Aprezan, sa koup ti’n batize. Sa ti enn bann benediksyon ki Zeova ti donn mwan pandan sa trwa-z-an ki mon ti servi Papua New Guinea.

An 1978, avan mon ti kit Coron, mon ti zwenn Adel. I ti en ser vreman zantiy ki ti pare pour met lentere lezot avan sa ki pour li. I ti pe fer servis pionye ordiner e anmenn tan fer grandi son de zanfan ki ti apel Samuel ek Shirley. I ti pe osi pran swen avek son manman aze. An Me 1981, mon ti retourn Filipin pour marye avek Adel. Apre nou maryaz, nou ti fer pionye ordiner e pran swen avek nou fanmir ansanm.

Menm si mon ti annan en fanmir, an 1983, mon ti ganny apwente ankor konman en pionye spesyal e mon ti ganny demande pour al servi Linapacan Island dan provens Palawan. Nou fanmir ti al reste dan en landrwa izole kot ti napa Temwen Zeova. Apepre enn an apre, manman Adel ti mor. Kantmenm sa, nou ti reste bizi dan predikasyon e sa ti ed nou fer fas avek sagrinasyon. Nou ti konmans en kantite letid Labib avek bann dimoun e sa ti fer ki pa bokou letan apre, nou ti bezwen en pti Lasal Rwayonm. Alor nou ti konstri enn nou menm. Trwa-z-an apre ki nou ti’n ariv Linapacan, nou ti kontan pour vwar 110 dimoun asiste Memoryal e pli tar, en kantite parmi zot ti batize.

An 1986, mon ti ganny demande pour al servi lo zil Culion. Lo sa zil, i ti annan en kominote bann dimoun ki ganny lalep. Apre sa, Adel osi ti ganny apwente konman en pionye spesyal. O konmansman, nou ti per pour pres avek bann dimoun ki ti’n ganny defigire avek lalep. Me bann proklanmater dan sa landrwa ti asir nou ki sa bann dimoun ti’n ganny tretman pour sa maladi e ki zot ti nepli kapab enfekte lezot dimoun avek sa maladi. Serten zot ti asiste renyon ki ti ganny fer dan lakour en ser. I pa ti pran nou bokou letan pour nou santi nou konfortab pour anons sa bon nouvel avek zot. Sa bann dimoun ti santi ki Bondye ek lezot ti’n rezet zot e nou ti vreman kontan pour koz avek zot lo sa lespwar ki Labib i donnen. I ti osi en plezir pour vwar bann dimoun ki ti vreman malad  trouv lazwa ler zot aprann ki en zour zot pou kapab annan en lasante parfe.—Lik 5:12, 13.

Ki mannyer nou bann zanfan ti adapte ler nou ti reste Culion? Nou de Adel, nou ti envit de zenn ser ki ti reste Coron pour vin reste Culion zot osi, pour nou bann zanfan kapab annan bann bon frekantasyon. Samuel, Shirley ek sa de zenn ser ti pas bann bon moman dan predikasyon pour ed dimoun aprann laverite e fer letid Labib avek bann zanfan pandan ki nou de Adel, nou ti fer letid avek paran sa bann zanfan. Anfet, i annan en fwa ki nou ti pe fer letid avek 11 fanmir. I pa ti pran bokou letan pour nou konmans fer bann letid Labib avek bann dimoun ki ti anvi vin pros avek Zeova e sa ti fer ki nou ti kapab form en pti kongregasyon.

O konmansman, mon ti sa sel ansyen dan sa teritwar. Alor, biro brans ti demann mwan pour fer bann renyon tou le semenn pour sa wit proklanmater ki ti reste Culion e apre pour fer menm keksoz pour sa nef proklanmater ki ti reste dan en vilaz ki ti apel Marily. Nou ti bezwen vwayaz trwa erdtan dan bato pour ariv sa vilaz e apre renyon dan sa vilaz, nou ti marse pour plizyer erdtan dan montanny pour al fer bann letid Labib dan en lot vilaz ki ti apel Halsey.

Avek letan, en kantite dimoun ti aksepte laverite Marily ek Halsey e sa ti fer ki nou ti konstri bann Lasal Rwayonm dan sa de landrwa. Zis parey i ti arive Linapacan, bann frer ek ser e osi bann dimoun ki ti enterese ti donn laplipar bann materyo konstriksyon e zot ti fer laplipar travay konstriksyon. Sa Lasal Rwayonm ki ti ganny konstri Marily ti kapab pran 200 dimoun e i ti kapab fasilman ganny agrandi pour pran plis dimoun. Sa ti fer ki nou ti kapab fer lasanble laba.

An 1993, ler bann zanfan ti’n gran, mon ti ganny apwente konman sirveyan rezyonal e nou de Adel, nou ti konmans vizit bann kongregasyon Filipin. Lannen 2000, mon ti asiste Lekol Formasyon Ministeryel pour mwan kapab ganny formasyon pour vin en formater pour sa lekol. Mon ti santi ki mon pa ti kalifye pour vin en formater me Adel ti toultan ankouraz mwan. I ti fer mwan rapel ki Zeova ti pou donn mwan sa lafors pour fer sa  nouvo servis. (Fili. 4:13) Adel ti konnen ki sa i vre parski i ti pe kontinyen fer son servis menm si i ti annan bann problenm lasante.

An 2006, dan bann letan kot mon ti en formater pour Lekol Formasyon Ministeryel, dokter ti dir nou ki Adel ti ganny maladi Parkinson. Nou ti soke pour tann sa! Ler mon ti sizere ki nou aret nou servis pour mwan kapab pran swen avek li, Adel ti dir mwan: “Silvouple, rod en dokter ki kapab ed mwan avek sa maladi e mon konnen ki Zeova pou ed nou kontinyen nou servis.” Pour sa prosenn si-z-an, Adel ti kontinyen dan son servis pour Zeova san ki i ti konplent. Ler i ti nepli kapab marse, i ti fer predikasyon dan son wiltyer. Ler i ti preski pa kapab koze, i ti reponn zis enn oubyen de mo pandan renyon. En kantite frer ek ser ti anvoy Adel bann mesaz pour eksprim zot lapresyasyon pour son zoli legzanp e lafason ki i ti kontinyen andire. Zot ti fer sa ziska ki i ti mor an 2013. Mon ti’n pas plis ki 30 an avek Adel, ki ti en madanm ki ti fidel e ki ti kontan mwan me apre ki i ti mor, mon ti konmans santi mwan vreman sagren e tousel ankor.

Adel ti anvi mon kontinyen dan mon servis e mon ti fer sanmenm. Mon ti reste bizi e sa ti ed mwan pour pa tro santi mwan mon tousel. Depi 2014 ziska 2017, mon ti ganny demande pour vizit bann kongregasyon ki koz Tagalog ki dan bann pei kot travay predikasyon i enterdi. Apre sa, mon ti vizit bann kongregasyon ki koz Tagalog ki Taywann, Leta-z-ini ek Kanada. An 2019, mon ti en formater pour bann laklas Lekol pour bann predikater Rwayonm ki ti an Angle e sa bann lekol ti ganny fer Lenn e Taylenn. Mon’n trouv lazwa dan tou sa bann servis. Mon pli zwaye ler mon bizi dan servis Zeova.

Dan sak servis ki mon’n fer, mon’n vin pli pros avek bann frer ek ser ki mon’n zwenn e i toultan difisil pour kit zot. Dan bann moman koumsa, mon’n aprann pour annan konfyans dan Zeova. Souvan, mon’n vwar ki Zeova i pran swen avek mwan e sa in ed mwan pour pare pour aksepte okenn sanzman ki arive. Aprezan, mon en pionye spesyal dan pei Filipin. Mon konfortab dan mon nouvo kongregasyon e bann frer ek ser in vin parey en fanmir ki kontan mwan e ki pran swen avek mwan. Mon osi fyer pour vwar ki Samuel ek Shirley pe swiv legzanp zot manman e zot pe kontinyen demontre lafwa dan Zeova.—3 Zan 4.

Mon’n fer fas avek bokou difikilte, sa i enkli get mon madanm soufer e mor akoz en maladi terib. Mon’n osi bezwen adapte avek bann nouvo sirkonstans. Kantmenm sa, mon’n vwar ki Zeova “pa lwen avek sakenn ant nou.” (Akt 17:27) Lanmen Zeova “pa tro kourt” pour ed son bann serviter e pour donn zot lafors menm si zot dan bann landrwa ki izole. (Iza. 59:1) Zeova ki mon Ros in toultan avek mwan tou dilon mon lavi e mon vreman rekonesan anver li. Mon pa’n zanmen tousel.