1-2. Lekel ki kapab ed en etidyan Labib pour progrese ziska batenm?

EN SER ki apel Amy e ki reste Fiji, i dir: “Mon ti kontan sa ki mon ti pe aprann dan mon letid Labib. Mon ti konnen ki sa i laverite. Me ler mon ti konmans pas letan avek bann frer ek ser, sa ti ed mwan pour fer bann sanzman e batize.” Leksperyans Amy i montre nou en keksoz enportan: Ler en etidyan Labib i ganny led avek lezot dan kongregasyon, i tre probab ki sa pou ed li progrese ziska batenm.

² Tou proklanmater i kapab ed bann nouvo pour form parti kongregasyon. (Efe. 4:16) En pionye ki apel Leilani e ki reste Vanuatu i dir: “I annan en koze ki dir: ‘I pran en kominote pour elve en zanfan.’ Mon krwar ki sa i osi aplik pour fer disip. I pran en kongregasyon pour ed en dimoun vin dan laverite.” Sa ki Leilani i dir i montre ki manm fanmir, zanmi e ansenyan kot lekol i kapab ed en zanfan grandi pour vin en adilt. Zot fer sa ler zot ankouraz sa zanfan e ansenny li bann leson enportan. Pareyman, bann frer ek ser dan kongregasyon, i kapab donn konsey, ankouraz e vin en bon legzanp pour bann etidyan Labib. Sa i kapab ed zot pour progrese ziska batenm.​—Prov. 15:22.

3. Ki nou kapab aprann avek sa ki Ana, Dorin ek Leilani ti dir?

³ Akoz en proklanmater ki pe fer en letid Labib i devret kontan ler lezot proklanmater i ed sa etidyan? Remark sa ki Ana, en pionye spesyal ki reste Moldova, i dir: “En etidyan Labib i bezwen bokou led e i pou difisil pour en ansenyan ed sa etidyan li tousel.” En frer ki apel Dorin, ki en pionye  spesyal Moldova, i dir: “Souvandfwa, lezot proklanmater i dir en keksoz ki mwan mon pa’n zanmen mazin lo la e sa ki zot dir i tous leker sa etidyan.” Leilani i donn en lot rezon akoz nou devret kontan ler lezot i ed nou. I dir: “Ler en etidyan Labib i santi lanmour ek lentere ki bann frer ek ser i annan pour li, sa i ed li pour realize ki nou vreman pep Zeova.”​—Zan 13:35.

4. Ki nou pou diskite dan sa lartik?

⁴ Petet ou kapab demann ou lekor: ‘Ki mwan mon kapab fer pour ed en etidyan Labib pour progrese menm si mon pa sa enn ki pe fer son letid?’ Aprezan, annou vwar ki nou kapab fer ler en proklanmater i demann nou pour al avek li en letid e ki nou kapab fer ler sa etidyan Labib i konmans vin renyon. Nou pou osi vwar ki mannyer bann ansyen i kapab ed en etidyan Labib pour progrese ziska batenm.

5. Ki ou devret fer ler ou ganny envite pour asiste en letid Labib?

⁵ Pandan en letid Labib, i prensipalman responsabilite sa ansenyan pour ed sa etidyan konpran Parol Bondye. Si sa ansenyan i demann ou pour asiste letid avek li, ou la pour siport li. (Ekle. 4:9, 10, NWT) Me ki ou kapab fer pour vin en bon led pandan sa letid?

6. Ler ou pe al asiste en letid Labib, ki mannyer ou kapab aplik sa prensip ki trouve dan Proverb 20:18?

⁶ Prepare avan sa letid Labib. Ou kapab demann sa ansenyan serten keksoz lo sa etidyan. (Lir Proverb 20:18.) Ou kapab demande: “Ki ou konnen lo sa etidyan Labib? Ki leson zot pe etidye? Ki ou anvi sa etidyan i aprann dan sa leson? Eski i annan okenn keksoz ki mon devret dir oubyen pa dir pandan sa letid ouswa ki mon devret fer oubyen pa fer pandan sa letid? Ki mannyer mon kapab ankouraz sa etidyan pour progrese?” Byensir, sa ansenyan pa pou donn ou bann lenformasyon konfidansyel konsernan sa etidyan. Me sa ki i dir ou, i kapab itil. En misyonner ki apel Joy, i koz lo sa bann keksoz avek bann ki akonpanny li lo son letid Labib. Joy i dir: “Sa lenformasyon i ed mon konpanyon pour anvi ed sa etidyan e pour konnen ki i pou dir pandan sa letid.”

7. Akoz ou bezwen prepare si ou’n ganny envite pour asiste en letid Labib?

⁷ Si ou ganny envite pour asiste en letid Labib, i ti pou byen si ou kapab prepar sa leson ki pou ganny diskite. (Ezra 7:10, NWT) Dorin, sa frer ki’n ganny mansyonnen pli boner, i dir: “Mon kontan ler mon konpanyon i prepare pour letid. Ler i fer sa, i kapab fer bann komanter ki itil.” An plis,  sa etidyan pou remarke ki zot tou le de zot in prepare e sa pou en bon legzanp pour li. Menm si ou pa kapab prepar byen pour sa letid, ou kapab pas en pe letan pour rod bann pwen enportan dan sa leson.

8. Ki ou kapab fer pour fer sir ki ou lapriyer pandan en letid Labib i spesifik?

⁸ I vreman enportan pour fer lapriyer pandan en letid. Alor mazin davans ki ou pou dir si ou ganny demande pour fer lapriyer. Si ou fer sa, i tre probab ki ou lapriyer pou pli spesifik. (Ps. 141:2, NWT) Hanae, en madanm ki reste Zapon, i ankor rapel lapriyer ki en ser ti fer ler i ti asiste son letid. I dir: “Mon ti remarke ki i ti annan en lanmitye pros avek Zeova e mon ti anvi vin parey li. Mon ti osi santi son lanmour ler i ti mansyonn mon non dan son lapriyer.”

9. Dapre Zak 1:19, ki mannyer ou kapab vin en bon konpanyon dan en letid Labib?

⁹ Ed sa ansenyan pandan letid. En pionye spesyal Nizerya, ki apel Omamuyovbi i dir: “En bon konpanyon i ekout byen pandan letid. Sa konpanyon i fer bann bon komanter me i pa koz tro bokou akoz i realize ki sa ansenyan ki pe kondwir letid.” Alor, kan ki ou devret koze e ki ou devret dir? (Prov. 25:11) Ekout byen ler sa ansenyan ek sa etidyan pe koze. (Lir Zak 1:19.) Koumsa ou pou kapab ede si i neseser. Byensir, ou bezwen reflesir byen avan ou koze. Par egzanp, ou pa pou koz tro bokou. Ou pa pou enteronp sa ansenyan ler i pe eksplik en keksoz e ou pa konmans koz lo en lot topik. Me avek en pti komanter, legzanp oubyen kestyon, ou kapab ede pour fer sa pwen ki pe ganny diskite pli kler pour sa etidyan. Parfwa ou kapab santi ki ou napa bokou keksoz pour dir lo sa size. Me si ou felisit sa etidyan e demontre lentere dan li, ou pou kapab ed li progrese.

10. Ki mannyer ou leksperyans i kapab ed en etidyan Labib?

¹⁰ Partaz ou leksperyans avek zot. Si ou krwar i pou ed sa etidyan, ou kapab an bref rakont sa etidyan ki mannyer ou’n aprann laverite, ki mannyer ou’n sirmont en problenm oubyen ki mannyer Zeova in ed ou dan ou lavi. (Ps. 78:4, 7) Ou leksperyans i kapab sanmenm ki sa etidyan ti bezwen tande. I kapab fer son lafwa vin pli for oubyen ankouraz li pour kontinyen progrese ziska batenm. I kapab fer li vwar ki mannyer pour sirmont en problenm ki i pe fer fas avek. (1 Pyer 5:9) Gabriel, ki reste Brezil e ki aprezan i en pionye i rapel kwa ki ti ed li ler i ti pe etidye Labib. I dir: “Ler mon ti tann leksperyans bann frer, mon ti aprann ki Zeova i konn bann problenm ki nou fer fas avek. Si zot in kapab sirmont zot problenm, mwan osi mon pou kapab.”

11-12. Akoz nou devret byen akeyir en etidyan Labib ki pe asiste renyon?

¹¹ Pour en etidyan Labib progrese ziska batenm, i bezwen asiste renyon regilyerman. Sa pou ed li. (Ebr. 10:24, 25) I tre probab ki sa ansenyan pou envit li pour asiste son premye renyon. Ler i asiste renyon, nou tou nou kapab ankouraz li pour kontinyen vin Lasal Rwayonm. Ki mannyer nou kapab fer sa?

¹² Akeyir sa etidyan byen. (Rom. 15:7) Si nou akeyir sa etidyan byen kot Lasal Rwayonm, i tre probab ki i pou anvi kontinyen asiste renyon. Fer sa etidyan santi li konfortab ler ou akeyir li e entrodwir li avek lezot. Koz avek li parski i kapab ki son ansenyan pa ankor arive oubyen i pe fer en lot keksoz dan kongregasyon. Ekout byen sa ki sa etidyan i dir e demontre lentere personnel dan li. Ki mannyer en bon lakey i kapab ed sa etidyan? Annou vwar legzanp Dmitrii, ki’n batize detrwa lannen pase e ki aprezan pe servi konman serviter kongregasyon. Ler i mazin sa premye renyon ki i ti asiste, i dir: “En frer ti vwar mwan pe debout an deor Lasal Rwayonm e zantiman i ti antre ansanm avek mwan dan Lasal Rwayonm. Mon ti vreman sirprann parski en kantite dimoun ti vin akeyir mwan. Mon ti sitan kontan ki mon ti swete ki i annan renyon toulezour. Zanmen mon’n deza eksperyans en keksoz koumsa avan.”

13. Ki mannyer ou bon legzanp i kapab ed en etidyan Labib?

¹³ Vin en bon legzanp. Ou bon legzanp i kapab ed en etidyan Labib pour asire ki nou bann vre Kretyen. (Mat. 5:16) En frer ki apel Vitalii, ki aprezan pe servi konman pionye Moldova i dir: “Mon ti obzerv lafason ki lezot dan kongregasyon ti viv, zot fason panse e lafason ki zot ti konport zot. Sa ti fer mwan asire ki Temwen Zeova i sa vre larelizyon.”

14. Ki mannyer ou legzanp i kapab ed en dimoun pour kontinyen progrese?

¹⁴ Avan ki en etidyan i kapab batize, i bezwen aplik sa ki i pe aprann. Me sa i pa toultan fasil. Me ler sa etidyan i vwar bann byenfe ou’n gannyen ler ou’n aplik bann prensip Labib, sa i kapab ankouraz li pour swiv ou legzanp. (1 Kor. 11:1) Annou vwar leksperyans Hanae, ki’n ganny mansyonnen pli boner. Hanae i dir: “Bann frer ek ser ti deza pe fer sa ki mon ti pe aprann. Mon ti vwar ki mannyer mon kapab ankouraz lezot, pardonn zot e demontre lanmour anver zot. Zot ti toultan dir bann bon keksoz lo lezot. Mon ti anvi fer parey zot.”

15. Ki mannyer Proverb 27:17 i ed nou pour vwar akoz nou devret fer zanmi avek en etidyan Labib ki pe kontinyen asiste renyon?

 ¹⁵ Vin zanmi sa etidyan. Anmezir ki sa etidyan i kontinyen asiste renyon, kontinyen demontre lentere personnel dan li. (Fili. 2:4) Petet ou kapab esey aprann konn li pli byen. Ou kapab dir li, ki ou kontan pour vwar bann sanzman ki i’n fer. Ou kapab osi demann li konsernan son letid Labib, son fanmir ek son travay. Fer atansyon ki ou pa demann li bann kestyon ki tro personnel. Bann konversasyon koumsa i kapab fer zot devlop en lanmitye. Ler ou vin zanmi avek en etidyan, ou kapab ed li progrese ziska batenm. (Lir Proverb 27:17, NWT.) * Aprezan Hanae pe servi konman en pionye ordiner. Hanae i mazin ler i ti fek konmans asiste renyon e i dir: “Anmezir ki mon ti konmans fer zanmi dan kongregasyon, mon ti konmans vin enpasyan pour al renyon e mon ti asiste renyon menm ler mon ti fatige. Mon ti kontan pas letan avek mon bann nouvo zanmi e sa ti ed mwan pour aret frekant bann dimoun ki pa ador Zeova. Mon ti anvi vin pli pros avek Zeova e avek bann frer ek ser. Alor mon ti deside pour batize.”

16. Ki lezot keksoz nou kapab fer pour ed en etidyan Labib santi ki i form parti kongregasyon?

¹⁶ Anmezir ki sa etidyan i progrese e fer bann sanzman, ed li pour santi ki i form parti kongregasyon. Ou kapab fer sa ler ou demontre lospitalite. (Ebr. 13:2) Denis ki reste Moldova i rapel ler i ti ankor pe etidye e i dir: “Plizyer fwa mwan ek mon madanm, nou ti ganny envite pour pas letan avek bann frer ek ser. Zot ti rakont nou ki mannyer Zeova in ed zot. Sa ti ankouraz nou. Sa bann moman ti fer nou konvenki ki nou anvi servi Zeova e ki si nou ti fer sa nou ti pou annan en lavi ere.” Ler sa etidyan Labib i vin en proklanmater, ou osi kapab envit li pour vin avek ou dan predikasyon. Diego, en proklanmater ki reste Brezil i dir: “En kantite frer ti envit mwan pour al predikasyon avek zot. Sa ti sa pli bon fason pour aprann konn zot byen. Anmezir mon ti fer sa, mon ti aprann en kantite keksoz e mon ti santi mwan pli pros avek Zeova ek Zezi.”

17. Ki mannyer bann ansyen i kapab ed bann etidyan Labib?

¹⁷ Pas letan avek bann etidyan Labib. Ansyen, ler ou demontre lanmour pour bann etidyan Labib e ou pran swen avek zot, ou kapab ed zot pour progrese ziska batenm.  Eski ou kapab koz avek bann etidyan Labib ler zot asiste renyon? Zot pou santi ki ou enterese avek zot si ou mazin zot non sirtou ler zot konmans reponn dan renyon. Eski ou kapab fer letan pour al avek en proklanmater ler i pe kondwir en letid Labib? I kapab ki ou pe ed sa etidyan san ki ou pe ekspekte. En pionye ki apel Jackie, ki reste Nizerya i dir: “En kantite etidyan i sirprann pour konnen ki sa frer ki pe akonpanny mwan pour fer zot letid, i en ansyen. En etidyan Labib ti dir: ‘Mon paster pa ti pou zanmen fer sa. I vizit zis bann dimoun ki ris e si zot pey li!’” Aprezan, sa etidyan pe asiste bann renyon.

18. Ki mannyer bann ansyen i kapab aplik sa ki dan Akt 20:28?

¹⁸ Form e ankouraz bann proklanmater. Ansyen ou annan sa responsabilite enportan pour ed bann proklanmater pour anons sa bon nouvel byen e pour vin bann bon ansenyan. (Lir Akt 20:28.) Si en dimoun i kanmi pour kondwir en letid Labib ler ou la, ou kapab ofer pour fer sa letid pour li. Jackie, ki’n ganny mansyonnen pli boner i dir: “Bann ansyen i souvan demann mwan konsernan mon bann etidyan Labib. Ler mon ganny difikilte pour kondwir en letid Labib, zot donn mwan bann bon konsey.” Bann ansyen i kapab fer en kantite pour ankouraz e ed bann ansenyan. (1 Tesa. 5:11) Jackie i dir: “Mon kontan ler bann ansyen i ankouraz mwan e zot dir mwan ki zot apresye sa travay dir ki mon pe fer. Bann parol koumsa i ankouraz mwan parey en ver delo fre i rafresi en dimoun ler i fer so. Ler zot felisit mwan, sa i fer mwan santi ki mon pe fer en bon travay avek mon bann etidyan Labib e i fer mwan pli zwaye.”​—Prov. 25:25.

19. Kwa ki kapab fer nou tou kontan?

¹⁹ Menm si nou napa en letid Labib pour le moman, nou kapab ed en dimoun pour progrese ziska batenm. Nou kapab ed en ansenyan pandan ki i pe kondwir en letid Labib, ler nou fer bann komanter ki nou’n byen prepare me san ki nou koz tro bokou. Nou kapab vin zanmi avek bann etidyan Labib ler zot vin kot Lasal Rwayonm e nou kapab vin bann bon legzanp pour zot. Bann ansyen i kapab ankouraz bann etidyan Labib par fer letan pour zot. Zot kapab osi ankouraz bann proklanmater par form e felisit zot. Menm si nou pa fer en gran keksoz, nou vreman kontan pour ed en dimoun pour kontan Zeova e pour servi li!