1. Dapre Matye 24:9, akoz nou pa devret sirprann si lemonn i ay nou?

ZEOVA in kree nou pour demontre lanmour anver lezot e pour anvi ki lezot osi i kontan nou. Alor, ler en dimoun i ay nou sa i kapab fatig nou e nou kapab per. Par egzanp, en ser ki apel Georgina, ki reste Lerop i dir: “Ler mon ti annan 14 an, mon manman ti ay mwan akoz mon servi Zeova. Mon ti vreman sagren e mon ti santi mwan tousel. Mon ti konmans krwar ki petet mon en move dimoun.” * En frer ki apel Danylo, i dir: “Ler bann solda ti bat mwan, ensilte mwan e dir ki zot pou fer mon dimal akoz mon en Temwen Zeova, mon ti per e kanmi.” Nou pa kontan ler lezot i ay nou me sa pa sirprann nou. Zezi ti dir ki dimoun ti pou ay nou.​—Lir Matye 24:9.

2-3. Akoz dimoun i ay bann disip Zezi?

² Dimoun dan lemonn i ay bann disip Zezi. Akoz sa? Parski parey Zezi, nou “pa form parti sa lemonn.” (Zan 15:17-19) Alor, menm si nou respekte bann gouvernman imen, nou pa pran kote dan politik, nou pa salye paviyon e nou pa sant lim nasyonal. Nou ador zis Zeova tousel. Nou siport drwa Zeova pour diriz bann imen me Satan ek “son desandans” pa aksepte sa drwa. (Zen. 3:1-5, 15) Nou anonse ki zis Rwayonm Bondye ki pou rezourd tou problenm bann imen e ki i pou detri tou bann ki opoz li. (Dan. 2:44; Rev. 19:19-21) Sa i en bon nouvel pour bann ki annan limilite e i en move nouvel pour bann move dimoun.​—Ps. 37:10, 11.

³ Dimoun i osi ay nou akoz nou obei bann standar drwat Zeova. Sa bann standar i totalman lekontrer avek standar ki bann dimoun dan lemonn i swiv. Par egzanp, bokou dimoun  pa vwar nanryen mal ler en dimoun i pratik bann aksyon seksyel imoral parey bann dimoun Sodonm ek Gomor ti fer. Sa bann menm aksyon ki ti fer Bondye detri lavil Sodonm ek Gomor. (Zid 7) Vi ki nou obei bann standar Bondye konsernan sa bann pratik, bokou dimoun i boufonn nou e zot dir ki nou bet.​—1 Pyer 4:3, 4.

4. Ki bann kalite ki donn nou lafors ler dimoun i ay nou?

⁴ Kwa ki kapab ed nou pour andire ler dimoun i ay nou e ensilte nou? Nou bezwen annan en lafwa for ki Zeova pou ed nou. Parey en boukliye, nou lafwa i kapab “tenny tou bann dart alimen sorti kot sa enn move.” (Efe. 6:16) Me nou bezwen plis ki sa, nou bezwen annan lanmour. Akoz sa? Parski lanmour “pa ankoler fasilman.” I siport e andir tou keksoz. (1 Kor. 13:4-7, 13) Aprezan, annou vwar ki mannyer lanmour pour Zeova, pour nou bann frer ek ser e menm pour nou bann lennmi, i kapab ed nou pour andire ler dimoun i ay nou.

5. Ki mannyer lanmour ki Zezi ti annan pour son Papa ti donn li lafors?

⁵ Sa zour swar avan son bann lennmi i touy li, Zezi ti dir son bann disip: “Mon kontan mon Papa, mon pe fer sa ki mon Papa in donn mwan lord pour fer.” (Zan 14:31) Lanmour ki Zezi i annan pour Zeova ti donn li lafors pour fer fas avek bann keksoz ki ti pe al arive avek li. Pareyman, nou lanmour pour Zeova i kapab ed nou fer menm parey.

6. Dapre Romen 5:3-5, ki mannyer bann serviter Zeova i santi ler dimoun dan lemonn i ay zot?

⁶ Bann serviter Zeova in kapab andire ler zot ganny persekite parski zot kontan Bondye. Par egzanp, ler lakour siprenm bann Zwif ti donn lord bann zapot pour aret anons sa bon nouvel, zot lanmour pour Bondye ti ed zot pour “obei Bondye plito ki zonm.” (Akt 5:29; 1 Zan 5:3) Ozordi nou bann frer ek ser i annan sa menm lanmour e sa i ed zot pour kontinyen reste fidel ler bann gouvernman pwisan e kriyel i persekit zot. Alor, ler dimoun dan lemonn i ay nou, olye dekouraze nou vwar li konman en privilez pour andire.​—Akt 5:41; lir Romen 5:3-5.

7. Ki mannyer nou devret reakte ler nou fanmir i opoz nou?

⁷ Enn bann keksoz pli difisil pour andire, i ler nou fanmir i opoz nou. I kapab ki ler nou fanmir i remarke ki nou anvi aprann konn Zeova, zot krwar ki nou pe ganny anbete oubyen ki nou fou. (Konpar Mark 3:21.) Sa i kapab fer zot opoz nou. Me zot reaksyon pa devret sirprann nou parski Zezi ti dir: “Lennmi en dimoun pou dan son prop lakour.” (Mat. 10:36) Byensir, menm si nou fanmir i vwar nou konman zot lennmi, nou, nou pa tret zot konman nou lennmi. O kontrer, anmezir ki nou lanmour pour Zeova i ogmante, sa i fer nou lanmour pour lezot osi ogmante. (Mat. 22:37-39) Alor, nou pa pou zanmen aret obei bann lalwa ek bann prensip ki dan Labib, zis pour fer plezir lezot dimoun.

8-9. Kwa ki ti ed en ser andire menm si i ti ganny persekite?

⁸ Georgina, ki’n ganny mansyonnen pli boner, ti andire menm si son manman ti persekit li. Georgina i dir: “Mwan ek mon manman ti konmans etidye Labib avek Temwen Zeova. Me sis mwan apre, ler mon ti anvi asiste renyon, mon manman ti konmans persekit mwan. Mon ti dekouver ki i ti pe koz avek bann aposta e i ti servi zot bann fo lakizasyon ler i ti koz avek mwan.  I ti ensilte mwan, redi mon seve, trangle mwan e zet mon bann piblikasyon. Ler mon ti annan 15 an, mon ti batize. Pour anpes mwan servi Zeova, mon manman ti met mwan dan en lenstitisyon pour bann zenn fiy ki ti annan problenm konportman. Laba, i ti annan serten ki ti pran drog e ki ti’n fer krim. I vreman difisil pour andire ler ou pe ganny persekite, sirtou si sa dimoun ki pe persekit ou, i devret pe kontan ou e pe pran swen avek ou.”

⁹ Ki mannyer Georgina ti andire? I dir: “Sa zour ler mon manman ti konmans persekit mwan, mon ti’n fek fini lir Labib antye. Mon ti konvenki ki mon ti’n trouv laverite e mon ti santi mwan pros avek Zeova. Mon ti koz avek li souvan e i ti ekout mwan. Ler mon ti pe reste dan sa lenstitisyon, en ser ti envit mwan kot li e nou ti etidye Labib ansanm. Pandan sa bann letan, bann frer ek ser kot Lasal Rwayonm ti vreman ankouraz mwan. Zot ti fer mwan santi ki mon form parti zot fanmir. Mon ti vwar pour mwan menm ki Zeova i pli for ki bann ki persekit nou, nenport ki, ki zot ete.”

10. Ki nou asire Zeova pou toultan fer?

¹⁰ Zapot Pol ti dir ki napa nanryen ki “kapab anpes Bondye ek Kris Zezi nou Senyer kontan nou.” (Rom. 8:38, 39) Menm si nou soufer pour en pe letan, Zeova pou toultan la pour rekonfort nou e donn nou lafors. Parey leksperyans Georgina i montre, Zeova i osi ed nou atraver nou bann frer ek ser dan kongregasyon.

11. Ki mannyer sa lanmour ki Zezi ti koz lo la dan Zan 15:12, 13 ti pou ed son bann disip? Donn en legzanp.

¹¹ Sa zour swar avan Zezi i mor, i ti rapel son bann disip ki zot devret kontan kanmarad. (Lir Zan 15:12, 13.) I ti konnen ki si zot annan sa kalite lanmour ki met lentere lezot premye, sa ti pou ed zot reste ini e andire ler dimoun i ay zot. Annou vwar legzanp kongregasyon Tesalonik. Depi ki sa kongregasyon ti’n ganny formen, bann frer ek ser ti ganny persekite. Kantmenm sa, bann frer ek ser ti reste fidel e ti demontre lanmour anver kanmarad. Zot ti vin en legzanp pour bann lezot Kretyen. (1 Tesa. 1:3, 6, 7) Zapot Pol ti ankouraz zot pour kontinyen demontre lanmour “plis ankor.” (1 Tesa. 4:9, 10) Lanmour ti motiv zot pour konsol bann ki dan depresyon e siport bann ki feb. (1 Tesa. 5:14) Zot ti  swiv lenstriksyon Pol parski dan sa dezyenm let ki Pol ti ekri zot enn an pli tar, i ti dir: “Zot lanmour pour kanmarad pe vin deplizanpli for.” (2 Tesa. 1:3-5) Zot lanmour pour kanmarad ti ed zot pour andir bann problenm ek persekisyon.

12. Ler i ti annan lager dan en pei, ki mannyer bann frer ek ser ti demontre lanmour pour kanmarad?

¹² Annou vwar leksperyans Danylo, ki’n ganny mansyonnen pli boner. Ler i ti annan lager dan sa lavil kot Danylo ek son madanm ti reste, zot ti kontinyen asiste bann renyon, fer zot mye pour anons sa bon nouvel e pour partaz manze ki zot ti annan avek bann frer ek ser. Me en zour, bann solda ti vin kot Danylo. Danylo i dir: “Zot ti demann mwan pour dir ki mon nepli en Temwen Zeova. Ler mon ti refize, zot ti bat mwan e fer krwar ki zot pe fiziye mwan me zot ti tir fizi par lao mon latet. Avan zot ti ale, zot ti dir ki zot ti pou retournen pour vyol mon madanm. Me deswit, bann frer ti met nou lo en tren pour al dan en lot lavil. Mon pa pou zanmen oubliy lanmour ki bann frer ek ser ti demontre. Ler nou ti ariv dan sa lot lavil, bann frer ek ser laba ti donn nou manze. Zot ti osi ed mwan pour trouv en travay ek en landrwa reste. Sa ti fer ki pli tar nou ti kapab donn bann frer ek ser ki ti pe sov lager, en landrwa reste.” Bann leksperyans koumsa i montre nou ki lanmour ki nou bann frer ek ser i demontre, i kapab ed nou andire ler dimoun i ay nou.

13. Ki mannyer lespri sen Bondye i kapab ed nou pour kontinyen servi Zeova menm ler lezot i ay nou?

¹³ Zezi ti dir son bann disip ki zot devret kontan zot bann lennmi. (Mat. 5:44, 45) Me eski sa i fasil pour fer? Non! Me nou kapab fer li avek led lespri sen Bondye. Lespri sen i kapab ed nou devlop bann kalite parey lanmour, pasyans, labonte, ladouser e kontrol lo nou lekor. (Gal. 5:22, 23) Sa bann kalite i kapab ed nou pour andire ler lezot i ay nou. Bokou dimoun ki ti opoz nou in sanze parski zot msye, madanm, zanfan oubyen vwazen in demontre sa bann zoli kalite anver zot. I annan ki’n vin nou frer ek nou ser. Alor, si ou vwar li difisil pour kontan bann ki ay  ou akoz ou pe servi Zeova, priye pour ou kapab ganny lespri sen Bondye. (Lik 11:13) Ou bezwen annan konfyans ki obei Bondye i toultan sa pli bon keksoz pour fer.​—Prov. 3:5-7.

14-15. Ki mannyer Romen 12:17-21 ti ed Yasmeen pour demontre lanmour pour son msye menm si i ti opoz li?

¹⁴ Annou vwar legzanp en ser ki apel Yasmeen. Ler Yasmenn ti vin en Temwen Zeova, son msye ti krwar ki i ti’n ganny anbete e i ti esey anpes li servi Bondye. I ti ensilte li e i ti demann bann manm fanmir, en paster ek en bonnonm dibwa pour fer Yasmeen per e pour dir ki i pe kas son fanmir. Son msye ti menm ensilte bann frer ek ser pandan renyon. Souvandfwa, Yasmeen ti plere akoz i pa ti pe ganny trete byen.

¹⁵ Kot Lasal Rwayonm, bann frer ek ser ti rekonfort e ankouraz Yasmeen. Bann ansyen ti ankouraz li pour aplik sa ki i dir dan Romen 12:17-21. (Lir.) Yasmeen i dir: “I ti difisil. Me mon ti demann Zeova pour ed mwan e apre mon ti fer mon mye pour aplik sa ki Labib i dir. Alor, ler mon msye ti zet later dan lakwizin, mon ti netwaye. Ler i ti ensilte mwan, mon ti reponn dan en bon fason e ler i ti malad, mon ti pran swen avek li.”

16-17. Ki nou aprann avek legzanp Yasmeen?

¹⁶ Lanmour ki Yasmeen ti demontre pour son msye ti anmenn bann bon rezilta. Yasmeen i dir: “Mon msye ti konmans annan plis konfyans dan mwan parski i ti konnen ki mon ti pou toultan koz laverite. I ti konmans ekout mwan byen ler nou ti koz lo larelizyon e i ti menm dakor pour fer lape kot lakour. Aprezan, i ankouraz mwan pour al renyon. Nou lavi fanmir in vreman sanze, aprezan i annan trankilite kot lakour. Mon swete ki mon msye i aksepte laverite e ki apre nou servi Zeova ansanm.”

¹⁷ Legzanp Yasmeen i montre ki lanmour i “siport tou keksoz, . . . i toultan annan lespwar e i andir tou keksoz.” (1 Kor. 13:4, 7) Lanmour i pli pwisan ki laenn. Si nou demontre lanmour pour lezot, sa i kapab fer zot sanz lafason ki zot santi anver nou e anver Zeova. Ler nou kontinyen demontre lanmour, sa pou fer Zeova kontan. Me menm si bann dimoun i kontinyen ay nou, nou kapab zwaye. Ki mannyer sa?

18. Akoz nou kapab ere ler dimoun i ay ou?

¹⁸ Zezi ti dir: “Ere kan dimoun i ay zot.” (Lik 6:22) Nou pa anvi dimoun i ay nou e nou pa kontan ler dimoun i persekit nou akoz nou lafwa. Me akoz nou kapab ere ler zot ay ou? Annou vwar trwa rezon. Premyerman, ler nou andire, nou ganny laprouvasyon Bondye. (1 Pyer 4:13, 14) Dezyenmman, nou lafwa i vin pli for e i annan plis valer. (1 Pyer 1:7) Trwazyenmman, ler nou andire, nou pou ganny en rekonpans, setadir lavi eternel.​—Rom. 2:6, 7.

19. Akoz bann zapot ti zwaye apre ki zot ti’n ganny fwete?

¹⁹ Pa bokou letan apre ki Zezi ti’n resisite, bann zapot ti eksperyans sa lazwa ki Zezi ti koz lo la. Apre ki zot ti’n ganny fwete e ganny demande pour aret anons sa bon nouvel, zot ti zwaye. Akoz? Parski “zot ti’n ganny konsidere diny pour ganny maltrete o non Zezi.” (Akt 5:40-42) Lanmour pour zot Met ti pli for ki lafreyer ki zot ti annan pour zot lennmi. Zot ti demontre zot lanmour par kontinyen anons sa bon nouvel “san arete”. Ozordi, bokou nou bann frer ek ser pe kontinyen servi Zeova malgre difikilte. Zot konnen ki Zeova pa pou zanmen oubliy zot travay e lanmour ki zot in demontre pour son non.​—Ebr. 6:10.

20. Ki nou pou diskite dan sa lot lartik?

²⁰ Tan ki sa lemonn i ankor egziste, bann dimoun pour ay nou. (Zan 15:19) Me nou pa bezwen per. Parey nou pou vwar dan sa lot lartik, Zeova “pou fortifye e protez” son bann serviter fidel. (2 Tesa. 3:3) Alor, annou kontinyen kontan Zeova, kontan nou bann frer ek ser e osi kontan nou bann lennmi. Ler nou swiv sa konsey, nou pou reste ini ansanm, nou lafwa pou vin pli for, nou pou onor Zeova e nou pou montre ki lanmour i bokou pli pwisan ki laenn.