1-2. Ki mannyer legzanp zapot Pol i kapab ed bann ansyen ozordi?

 ZAPOT Pol ti kontan bann frer ek ser. I ti travay vreman dir pour ed zot. (Akt 20:31) Alor bann frer ek ser ti kontan Pol en kantite. En fwa, ler bann ansyen sorti Efez ti aprann ki zot pa ti pou vwar li ankor, zot tou zot ti “plere en bon pe.” (Akt 20:37) Pareyman, bann ansyen ki travay dir i kontan nou en kantite e fer tou sa ki zot kapab pour ed nou. (Fili. 2:16, 17) Me parfwa, bann ansyen i pas dan bokou difikilte. Kwa ki kapab ed zot pour sirmont sa bann difikilte?

² Bann ansyen i kapab swiv legzanp Pol. (1 Kor. 11:1) I pa ti parey bann lanz. Pol ti en zonm enparfe e parfwa i ti lite pour fer sa ki byen. (Rom. 7:18-20) I ti osi fer fas avek plizyer problenm. Me Pol pa ti abandonnen oubyen perdi son lazwa. Par imit Pol, bann ansyen i kapab sirmont zot bann difikilte ki zot fer fas avek e kontinyen gard zot lazwa anmenn tan ki zot kontinyen servi Zeova. Ki mannyer?

3. Ki nou pou vwar dan sa lartik e ki led ki nou pou gannyen?

³ Dan sa lartik, nou pou vwar kat difikilte ki bann ansyen i fer fas avek: (1) Ki mannyer pour annan ase letan pour predikasyon ek lezot responsabilite? (2) Ki mannyer pour vin bann bon berze? (3) Ki mannyer pour pa dekouraze akoz zot prop lenperfeksyon? (4) Ki mannyer pour fer fas avek lenperfeksyon lezot? Nou pou vwar ki mannyer Pol ti sirmont sa bann difikilte e ki mannyer bann ansyen i kapab imit son legzanp.

4. Akoz i kapab en difikilte pour bann ansyen diriz predikasyon?

⁴ Akoz sa i en difikilte? Akoz apard diriz sa travay predikasyon, bann ansyen i annan bann lezot responsabilite. Par egzanp, zot fer tyermenn dan nou renyon lasemenn e kondwir letid Labib kongregasyon. Zot osi fer bann diskour. Zot osi form bann serviter kongregasyon e zot kontan ankouraz bann frer ek ser. (1 Pyer 5:2) Serten ansyen i travay dan konstriksyon e mentenir nou bann Lasal Rwayonm ek lezot batiman ki ganny servi pour ador Zeova. Kantmenm sa, en ansyen i premyerman anons sa bon nouvel zis parey tou frer ek ser dan kongregasyon.​—Mat. 28:19, 20.

5. Ki legzanp Pol in kite konman en predikater?

⁵ Legzanp zapot Pol. Lafason ki Pol ti reisi i ganny trouve dan Filipyen 1:10 ki ankouraz nou pour: “Verifye sa ki pli enportan.” Pol ti swiv son prop konsey. I ti ganny sa responsabilite pour anons sa bon nouvel e pour plizyer dizenn lannen, i ti vwar sa travay konman sa keksoz pli enportan dan son lavi. I ti pres “an piblik e kaz an kaz.” (Akt 20:20) I ti pres nenport ler dan lazournen e nenport zour dan lasemenn. I ti sezi tou loportinite pour li prese. Par egzanp, ler i ti pe esper son bann frer Atenn, i ti pres sa bon nouvel Rwayonm avek en group dimoun enportan e sa ti anmenn en bon rezilta. (Akt 17:16, 17, 34) Menm ler i ti “dan prizon,” Pol ti pres avek bann dimoun otour li.​—Fili. 1:13, 14; Akt 28:16-24.

6. Ki Pol ti ansenny lezot pour fer?

⁶ Pol ti byen servi son letan. Souvan, i ti envit lezot pour pres ansanm avek li. Par egzanp, dan son premye vwayaz misyonner, i ti anmenn Zan Mark e dan son dezyenm vwayaz misyonner, i ti anmenn Timote. (Akt 12:25; 16:1-4) Nou napa okenn dout ki Pol ti fer son mye pour ansenny sa bann zonm ki mannyer pour organiz kongregasyon, ki mannyer pour fer vizit pastoral e ki mannyer pour vin bann bon ansenyan.​—1 Kor. 4:17.

7. Ki mannyer bann ansyen i kapab swiv parol Pol ki ganny trouve dan Efezyen 6:14, 15?

⁷ Ki leson bann ansyen i kapab aprann? Bann ansyen i kapab aprann pour swiv legzanp Pol, pa zis dan predikasyon kazankaz me osi zot devret pare pour donn en temwannyaz dan nenport lokazyon ki zot gannyen. (Lir Efezyen 6:14, 15.) Par egzanp, zot kapab donn en temwannyaz ler zot pe al laboutik  oubyen dan zot landrwa travay. Osi ler zot pe fer bann proze konstriksyon Lasal Rwayonm, zot kapab anons sa bon nouvel avek bann vwazen ek bann marsan. Parey Pol, bann ansyen i kapab servi sa letan ki zot pase dan predikasyon pour form lezot, enkli bann serviter kongregasyon.

8. Parfwa, ki en ansyen i bezwen fer?

⁸ Bann ansyen pa devret sitan okipe avek zot responsabilite dan kongregasyon oubyen avek lezot responsabilite dan sa rezyon ki zot napa letan pour prese. Pour zot annan letan pour fer lezot keksoz, parfwa zot pou bezwen refiz serten responsabilite. Apre ki zot in fer lapriyer, zot kapab realize ki zot pa pou kapab aksepte en lot responsabilite dan kongregasyon san negliz sa ki pli enportan. Sa i enkli fer ladorasyon fanmir sak semenn, devoue dan predikasyon ouswa montre zot zanfan ki mannyer pour prese. Serten ansyen i kapab vwar li difisil pour refiz serten responsabilite. Me zot kapab asire ki Zeova i konpran ki zot anvi ekilibre dan tou keksoz.

9. Ki difikilte ki bann ansyen ki vreman okipe i fer fas avek?

⁹ Akoz sa i en difikilte? Pep Zeova i fer fas avek plizyer problenm. Dan sa bann dernyen zour, nou tou nou bezwen lankourazman, sipor ek rekonfor. Parfwa, nou bezwen led pour aret fer bann move keksoz. (1 Tesa. 5:14) Byensir, bann ansyen pa kapab retir tou bann problenm ki pep Zeova i fer fas avek. Kantmenm sa, Zeova i anvi ki bann ansyen i fer tou sa ki zot kapab pour ankouraz e protez son bann mouton. Ki mannyer bann ansyen ki vreman okipe i kapab fer letan pour ed bann ki bezwen led?

10. Dapre 1 Tesalonisyen 2:7, ki mannyer Pol ti pran swen avek pep Zeova?

¹⁰ Legzanp zapot Pol. Pol ti rod fason pour li felisit e ankouraz son bann frer ek ser. Bann ansyen i fer byen ler zot swiv son legzanp par tret bann frer ek ser avek lanmour, tandres ek lafeksyon. (Lir 1 Tesalonisyen 2:7.) Pol ti asir son bann frer ek ser ki i kontan zot e ki Zeova i kontan zot osi. (2 Kor. 2:4; Efe. 2:4, 5) Pol ti tret bann dan kongregasyon konman zanmi e pas letan avek zot. I ti montre ki i annan konfyans dan zot ler i ti koz lo son prop lafreyer ek son lenperfeksyon. (2 Kor. 7:5; 1 Tim. 1:15) Me Pol pa ti konsantre lo son prop problenm. Plito i ti anvi ed son bann frer ek ser.

11. Akoz Pol ti konsey son bann frer ek ser?

¹¹ Parfwa, Pol ti bezwen donn konsey son frer ek ser. Me i pa ti zanmen fer sa  akoz i ti ankoler. I ti konsey zot akoz i ti kontan zot e i ti anvi protez zot kont diferan move keksoz. Konsey Pol ti fasil pour konpran e i ti anvi ki zot aksepte son konsey. Par egzanp, dan en let ki i ti ekri bann Korentyen, Pol ti donn zot konsey ferm. Apre ki i ti’n ekri sa let, i ti anvoy Tit kot zot. Pol ti anvi konnen ki mannyer zot ti’n reazir anver son let. I ti vreman kontan ler i ti tande ki zot ti’n aksepte son konsey.​—2 Kor. 7:6, 7.

12. Ki mannyer bann ansyen i kapab batir son bann frer ek ser?

¹² Ki leson bann ansyen i kapab aprann? Bann ansyen i kapab swiv legzanp Pol par pas letan avek bann frer ek ser. En fason pour fer sa, i ariv boner dan renyon koumsa zot kapab fer bann konversasyon ankourazan avek lezot. I pa pran bokou letan pour donn lankourazman en frer ouswa en ser ki bezwen. (Rom. 1:12; Efe. 5:16) En ansyen ki swiv legzanp Pol pour ranforsi lafwa bann serviter Bondye par servi Son Parol pour batir zot e asir zot ki Bondye i kontan zot. I osi fer zot konnen ki i kontan zot. I gard kontak avek zot e i rod loportinite pour felisit zot. Ler en ansyen i donn konsey, i fer sir ki sa konsey i baze lo Parol Bondye. En ansyen i fran e zantiy ler i donn konsey akoz i anvi ki bann frer ek ser i aksepte son konsey.​—Gal. 6:1.

13. Ki mannyer lenperfeksyon en ansyen i kapab fer li santi?

¹³ Akoz sa i en difikilte? Bann ansyen pa parfe. Parey nenport ki, zot fer bann fot. (Rom. 3:23) Parfwa, zot kapab vwar li difisil pour annan en bon pwennvi lo zot lenperfeksyon. Serten i kapab konsantre en kantite lo zot lenperfeksyon e sa i kapab dekouraz zot. Lezot i kapab panse ki zot lenperfeksyon pa enportan e ki zot pa bezwen fer bann sanzman.

14. Dapre Filipyen 4:13, ki mannyer limilite ti ed Pol pour fer fas avek son bann lenperfeksyon?

¹⁴ Legzanp zapot Pol. Avek limilite, Pol ti konpran ki i pa kapab fer fas avek son prop lenperfeksyon lo li tousel. I ti bezwen lafors sorti kot Bondye. Avan sa, Pol ti en persekiter bann Kretyen, i ti kriyel e antete. Me pli tar, i ti konpran ki sa ki i ti’n fer ti mal e i ti pare pour sanz son latitid ek son personnalite. (1 Tim. 1:12-16) Avek led Zeova, Pol ti vin en berze ki ti annan lanmour, konpasyon ek limilite. I ti konn son bann lenperfeksyon e i pa ti kontinyen mazin lo zot. Me plito, i ti annan konfyans ki  Zeova ti’n pardonn li. (Rom. 7:21-25) I pa ti ekspekte ki i vin parfe. Plito i ti travay dir pour amelyor son personnalite Kretyen e avek limilite i ti depan lo led Zeova pour akonpli son bann travay.​—1 Kor. 9:27; lir Filipyen 4:13.

15. Ki bon pwennvi en ansyen i devret annan konsernan son lenperfeksyon?

¹⁵ Ki leson bann ansyen i kapab aprann? Bann ansyen pa ganny apwente akoz zot parfe. Me Zeova ti ekspekte ki bann ansyen i admet zot fot e devlop sa personnalite Kretyen. (Efe. 4:23, 24) En ansyen i devret servi byen Parol Bondye pour vwar konman i kapab amelyore. Koumsa Zeova pou ed li pour ganny lazwa e vin en bon ansyen.​—Zak 1:25.

16. Ki i kapab arive si en ansyen i konsantre lo lenperfeksyon lezot?

¹⁶ Akoz sa i en difikilte? Ler bann ansyen i pas bokou letan avek bann frer ek ser, bann ansyen i kapab konn zot lenperfeksyon. Si bann ansyen pa fer atansyon, zot kapab ankoler, brit oubyen kritik bann frer ek ser. Pol ti averti bann Kretyen ki Satan ti pou kontan si zot fer sa.​—2 Kor. 2:10, 11.

17. Ki mannyer Pol ti vwar son bann frer ek ser?

¹⁷ Legzanp zapot Pol. Pol ti annan en bon pwennvi lo son bann frer ek ser. I ti konnen ki zot kapab fer bann fot parski parfwa sa ki zot ti fer ti afekte li personnelman. Me kantmenm sa, Pol ti konnen ki zot move kondwit pa vedir zot en move dimoun. I ti kontan son bann frer ek ser e i ti konsantre lo zot bann bon kalite. Si zot ti pe lite pour fer sa ki byen, i ti konpran ki zot motivasyon ti bon e ki zot ti senpleman bezwen led.

18. Ki nou aprann lo lafason ki Pol ti ed Evodi ek Sentis? (Filipyen 4:1-3)

¹⁸ Par egzanp, annou vwar ki mannyer Pol ti ed de ser dan kongregasyon Filip. (Lir Filipyen 4:1-3.) I paret ki Evodi ek Sentis ti annan en dezakor antre zot ki ti gat zot lanmitye. Pol pa ti koz brit avek zot ouswa kritik zot me i ti konsantre lo zot bann bon kalite. Zot ti bann ser fidel ki ti annan en bon repitasyon. Pol ti konnen ki Zeova i kontan zot. Pol ti annan en bon pwennvi lo sa de ser e sa ti ankouraz li pour ed zot fer lape. Vi ki i ti konsantre lo bann bon kalite ki bann frer ek ser ti annan dan kongregasyon, sa ti ed li gard son lazwa e gard en bon lanmitye avek zot.

19. (a) Ki mannyer bann ansyen i kapab annan en bon pwennvi lo bann frer ek ser? (b) Ki ou aprann lo sa portre kot en ansyen pe netway Lasal Rwayonm?

¹⁹ Ki leson bann ansyen i kapab aprann? Bann ansyen, zot devret vwar bann bon  kalite ki zot frer ek ser i annan. Zot enparfe me sakenn ant zot i annan bann bon kalite ki nou kapab admire. (Fili. 2:3) I vre ki tanzantan bann ansyen i bezwen ed bann frer ek ser pour sanz zot fason panse. Parey Pol, bann ansyen pa devret konsantre lo move parol ek aksyon en dimoun. Me plito, zot devret konsantre lo lanmour ki sa dimoun i annan pour Zeova, son fidelite pour servi Bondye e son abilite pour fer sa ki byen. Bann ansyen ki annan en bon pwennvi lo bann frer ek ser dan kongregasyon i ed zot pour santi ki i annan lanmour dan kongregasyon.

20. Ki mannyer bann ansyen i kapab kontinyen benefisye avek legzanp Pol?

²⁰ Zot bann ansyen, kontinyen etidye legzanp Pol, sa pou ed zot. Par egzanp, dan Watch Tower Publications Index, ou kapab get anba topik “Paul” e vwar sa soutit “example for elders.” Anmezir ki ou lir sa bann lenformasyon, demann ou lekor: ‘Ki mannyer legzanp Pol i kapab ed mwan pour gard mon lazwa anmezir ki mon desarz mon responsabilite konman en ansyen?’

21. Ki bann ansyen i kapab asire?

²¹ Bann ansyen, rapel ki Zeova pa pe demann zot pour vin parfe. Me i pe demann zot pour reste fidel. (1 Kor. 4:2) Zeova ti apresye travay dir ki Pol ti fer e son fidelite. Ou kapab asire ki Bondye i apresye sa ki ou fer pour li. Zeova pa pou zanmen “oubliy sa ki zot in fer e lanmour ki zot in demontre pour son non par servi e kontinyen servi bann sen.”​—Ebr. 6:10.