1. Ki keksoz eksitan ki ti pou arive avek bann Zwif ki ti an egzil Babilonn?

 BANN Zwif ti vreman eksite. Zeova ti “fer Siris lerwa Pers” liber bann Izraelit, ki ti an egzil Babilonn pour plizyer lannen. Sa lerwa ti anonse ki bann Zwif ti pou kapab retourn dan zot pei “e rekonstri lakaz Zeova Bondye Izrael.” (Ezra 1:1, 3, NWT) Sa ti en moman vreman eksitan parski i ti vedir ki bann Zwif ti pou kapab ador sa vre Bondye ankor dan sa pei ki i ti’n donn zot.

2. Ler bann Zwif ti retourn Zerizalenm, ki premye keksoz zot ti reisi fer?

² An 537 avan Kris, premye group Zwif ki ti an egzil ti ariv Zerizalenm ki ti kapital rwayonm Zida ki ti dan sid. Pa bokou letan apre ki sa bann Zwif ti’n arive, zot ti konmans konstri tanp e ver 536 avan Kris, zot ti’n fini fer fondasyon tanp.

3. Lekel ki ti opoz bann Zwif e ki zot ti fer?

³ Apre ki bann Zwif ti’n konmans rekonstri tanp, en kantite dimoun ti konmans opoz zot. Bann nasyon dan zalantour “ti kontinyen dekouraz pep Zida e fer zot perdi kouraz pour konstri sa lakaz.” (Ezra 4:4, NWT) Sa ti en sityasyon difisil pour bann Zwif me keksoz ti vin pli pir. An 522 avan Kris, Artakzerses ti vin nouvo lerwa Pers. * Bann ki ti pe opoz sa travay konstriksyon ti mazinen ki vi ki i ti annan en nouvo lerwa, zot ti pou kapab aret sa travay konstriksyon. Zot ti “servi lalwa pour fer problenm.” (Ps. 94:20, NWT) Zot ti anvoy en let pour Lerwa Artakzerses e dir ki bann Zwif ti pe fer plan pour rebel kont li. (Ezra 4:11-16) Lerwa ti krwar zot mansonz e i ti donn lord pour aret konstriksyon tanp. (Ezra 4:17-23) Sa ti fer ki bann Zwif ti aret konstri sa tanp.​—Ezra 4:24.

4. Ki Zeova ti fer ler bann Zwif ti ganny lord pour aret konstri tanp? (Izai 55:11)

 ⁴ Bann nasyon dan zalantour e serten dimoun dan gouvernman Pers ti determinen pour anpes bann Zwif rekonstri tanp. Me Zeova ti anvi ki bann Zwif i fini rekonstri sa tanp e Zeova i toultan akonpli son plan. (Lir Izai 55:11, NWT.) I ti swazir Zekarya pour vin son profet e i ti fer li ganny wit vizyon. Apre sa, Zekarya ti pou bezwen dir bann Zwif konsernan sa bann vizyon pour ankouraz zot. Sa bann vizyon ti ed bann Zwif pour vwar ki zot pa ti bezwen per bann ki ti opoz zot e ankouraz zot pour kontinyen fer sa travay ki Zeova ti anvi zot fer. Dan sa senkyenm vizyon, Zekarya ti vwar en sandelye ek de pye zoliv.

5. Ki nou pou diskite dan sa lartik?

⁵ Nou tou nou dekouraze parfwa. Alor, nou kapab ganny bann byenfe avek sa lankourazman ki Zeova ti donn bann Izraelit atraver sa senkyenm vizyon ki i ti donn Zekarya. Ler nou konpran sa vizyon, sa i kapab ed nou pour servi Zeova fidelman ler dimoun i opoz nou, ler nou sirkonstans i sanze e ler nou ganny lenstriksyon ki nou pa konpran.

6. Ki mannyer sa vizyon konsernan sa sandelye ek sa de pye zoliv ki dan Zekarya 4:1-3 ti donn bann Zwif kouraz? (Vwar portre lo kouvertir.)

⁶ Lir Zekarya 4:1-3, NWT. Sa vizyon konsernan sa sandelye ek sa de pye zoliv ti donn bann Zwif kouraz pour kontinyen zot travay menm si dimoun ti pe opoz zot. Ki mannyer? Eski ou’n remarke ki sa sandelye pe kontinyen ganny delwil? I annan delwil ki sorti dan de pye zoliv e ki pe koul dan en bol. Apre sa delwil ki sorti dan sa bol, i koul dan bann lalanp ki lo sa sandelye. Sa delwil i fer sa lalanp kontinyen reste alimen. Zekarya ti demande: “Ki sa bann keksoz i reprezante?” Lanz ti reponn e dir li sa ki Zeova i dir: “‘Pa par en lafors militer, ni par pouvwar, me par mon lespri,’ Zeova bann larme in dir.” (Zek. 4:4, 6, NWT) Sa delwil ki sorti dan sa bann pye zoliv i reprezant lespri sen Zeova ki pwisan e ki pa zanmen fini. Lespri sen Bondye ti bokou pli pwisan ki larme Pers. Avek led Zeova, bann ki ti pe konstri tanp ti pou kapab konplet zot travay malgre okenn lopozisyon. Sa mesaz ti vreman ankourazan. Tou bann Zwif ti bezwen met konfyans dan Zeova e repran zot travay. I sanmenm ki zot ti fer menm si zot travay ti ankor enterdi.

7. Ki sanzman ki ti ed bann Zwif ki ti pe konstri tanp?

⁷ I ti annan en sanzman ki ti anmenn en soulazman pour bann Zwif ki ti pe konstri tanp. Ki sanzman? An 520 avan Kris, Daryis 1 ti vin nouvo lerwa Pers. Dan dezyenm lannen son renny, i ti dekouver ki sa lord pour aret konstri tanp ti ilegal. Apre, Daryis ti donn permisyon bann ki ti pe konstri tanp pour fini zot travay. (Ezra 6:1-3) Sa desizyon ti sirprann tou dimoun. Me lerwa pa ti zis donn permisyon pour konstri tanp, i ti fer plis ki sa. I ti donn lord bann nasyon dan zalantour pour aret enterfer avek sa travay konstriksyon e pour donn bann Zwif larzan ek tou sa ki zot ti bezwen pour fini konstri sa tanp. (Ezra 6:7-12) Sa ti fer ki dan en pti pe plis ki kat-r-an pli tar, an 515 avan Kris, bann Zwif ti fini konstri tanp.​—Ezra 6:15.

8. Akoz ou kapab annan kouraz ler lezot i opoz ou?

 ⁸ Parey dan lepase, ozordi osi en kantite serviter Zeova i ganny opoze. Par egzanp, serten i reste dan bann pei kot nou travay i anba restriksyon. Dan sa bann pei, i kapab ki bann frer ek ser i ganny arete e ganny “anmennen devan bann gouverner ek lerwa” pour kapab rann temwannyaz avek zot. (Mat. 10:17, 18) Parfwa, en gouvernman i sanze e nou bann frer ek ser i pli lib pour ador Zeova. Oubyen en ziz i kapab fer en desizyon ki permet ki bann frer ek ser i pli lib pour ador Zeova. I annan lezot serviter Zeova ki ganny opoze dan en lot fason. Zot reste dan en pei kot zot lib pour ador Zeova me bann manm zot fanmir ki anvi zot aret servi Zeova i opoz zot. (Mat. 10:32-36) Dan plizyer ka, bann manm fanmir i aret opoz bann frer ek ser ler zot realize ki zot pa kapab fors zot aret servi Zeova. Dan serten ka, bann ki ti opoz bann frer ek ser in vin bann Temwen Zeova devoue. Ler dimoun i opoz ou, pa aret servi Zeova. Demontre kouraz. Zeova pe ed ou avek son lespri sen ki pwisan alor napa nanryen pour ou per.

9. Akoz serten Zwif ti sagren ler zot ti vwar fondasyon sa nouvo tanp?

⁹ Ler bann zonm aze ti vwar ki fondasyon tanp ti’n fini ganny mete, zot ti plere. (Ezra 3:12) Zot ti’n vwar sa zoli tanp ki Salomon ti’n konstri e zot ti santi ki sa tanp ki zot ti pe konstri pa ti pou “nanryen ditou konpare” avek enn avan. (Aga. 2:2, 3, NWT) Zot ti vreman sagren parski zot ti pe konpar sa nouvo tanp avek sa enn avan. Me vizyon Zekarya ti pou ed zot pour reganny zot lazwa. Ki mannyer?

10. Ki mannyer sa ki sa lanz ti dir dan Zekarya 4:8-10 ti ed bann Zwif pour reganny zot lazwa?

¹⁰ Lir Zekarya 4:8-10, NWT. Ki sa lanz ti pe dir ler i ti dir ki bann Zwif ti pou “kontan e zot pou vwar sa filaplon dan lanmen [gouverner Zwif] Zorobabel”? Filaplon i en zouti ki ganny servi pour konnen si en keksoz i vertikal oubyen drwat. Sa lanz ti pe reasir sa pep ki menm si serten ti krwar ki sa tanp pa ti pou sitan zoli parey sa enn avan, i ti pou fini ganny konstri  e i ti pou parey Zeova i anvi. Zeova ti pou kontan sa tanp. Alor, bann Zwif osi ti devret kontan. Sa ki ti enportan pour Zeova i ki bann Zwif i servi sa tanp pour ador li dan sa fason ki i anvi. Si bann Zwif ti konsantre lo servi Zeova dan en fason ki fer li plezir e pour ganny son laprouvasyon, zot ti pou reganny zot lazwa.

11. Kwa ki difisil pour serten serviter Zeova ozordi?

¹¹ I difisil pour en kantite nou ler nou sirkonstans i sanze. Serten frer ek ser ki ti dan servis spesyal a plen tan pour en kantite letan, in ganny en nouvo form servis. I annan ki’n bezwen arete dan en servis akoz zot laz. I normal pour sagren ler nou eksperyans sa bann sanzman. Premye kou, i kapab ki nou pa vreman konpran sa desizyon oubyen dakor avek. Nou kapab santi ki keksoz ti pli byen avan. Nou osi kapab dekouraze e mazinen ki aprezan nou pa kapab fer sa kantite ki nou ti ava anvi pour Zeova. (Prov. 24:10) Ki mannyer vizyon Zekarya i kapab ed nou pour kontinyen donn Bondye nou meyer?

12. Ki mannyer vizyon Zekarya i ed nou pour reste zwaye ler nou bann sirkonstans i sanze?

¹² I pli fasil pour nou abitye avek nou nouvo sirkonstans ler nou esey annan menm pwennvi avek Zeova konsernan nou sirkonstans. Zeova i fer bann gran keksoz ozordi e nou annan sa gran privilez pour travay ansanm avek li. (1 Kor. 3:9) Nou bann responsabilite dan lorganizasyon Zeova i kapab sanze me Zeova pou toultan kontan nou. Alor, si ou pa kapab kontinyen dan en responsabilite akoz i annan en sanzman dan lorganizasyon, pa bezwen pas tro bokou letan pour reflesir lo bann rezon akoz sa sanzman in ganny fer. Olye anvi ki ou lavi i parey “dan letan lontan,” demann Zeova pour ed ou vwar sa ki byen dan sa sanzman. (Ekle. 7:10, NWT) Ouswa olye mazin konsernan bann keksoz ki ou nepli kapab fer, reflesir konsernan bann keksoz ki ou kapab fer. Atraver vizyon Zekarya, nou aprann ki i enportan pour kontinyen annan en pwennvi pozitif. Sa pou fer ki nou pou reste zwaye e fidel menm ler nou bann sirkonstans i sanze.

13. Akoz ki serten Zwif ti santi ki sa lenstriksyon pour rekonstri tanp pa ti en bon desizyon?

¹³ Sa travay pour rekonstri tanp ti’n ganny enterdi. Me Granpret Zesoua (Zozye) ek Gouverner Zorobabel ki ti’n ganny apwente pour diriz sa pep ti “konmans rekonstri lakaz Bondye.” (Ezra 5:1, 2, NWT) I kapab ki serten Zwif ti krwar ki sa pa ti en bon desizyon parski zot lennmi ti pou vwar ki zot ti pe konstri tanp e zot ti konnen ki zot lennmi ti pou fer tou sa ki zot ti kapab pour aret zot travay. Alor Zeova ti reasir Zesoua ek Zorobabel ki i ti pe siport zot. Ki mannyer I ti fer sa?

14. Dapre Zekarya 4:12, 14, ki lasirans Granpret Zesoua ek Gouverner Zorobabel ti gannyen?

¹⁴ Lir Zekarya 4:12, 14, NWT. Dan sa parti vizyon Zekarya, sa lanz i dir sa profet fidel ki sa de pye zoliv i reprezant “sa de dimoun ki’n ganny swazir” e sa i Zesoua ek Zorobabel. Sa lanz ti dir ki i ti konmsi sa de zonm ti pe “debout o bor Senyer later antye,” Zeova. Sa ti vreman en gran loner pour dan sa pozisyon. Zeova ti annan konfyans dan sa de zonm. Alor bann Izraelit ti kapab annan konfyans dan tou sa ki sa de zonm ti dir zot fer parski Zeova ti pe servi sa de zonm pou diriz zot.

15. Ki mannyer nou montre ki nou respekte lenstriksyon Zeova ki sorti dan son Parol?

¹⁵ Ozordi, Zeova i kontinyen donn lenstriksyon son pep atraver son Parol Labib. Dan sa liv sakre, I ti dir nou ki mannyer pour ador li dan sa fason ki i anvi nou fer li. Ki mannyer nou kapab montre ki nou respekte lenstriksyon ki nou gannyen sorti dan Parol Bondye? Nou fer sa ler nou pran letan pour lir e konpran sa ki nou pe lir. Demann ou lekor sa bann kestyon swivan: ‘Ler mon lir Labib oubyen enn nou bann piblikasyon, eski mon arete e medit lo sa ki mon pe lir? Eski mon esey konpran bann laverite ki dan Labib ki “difisil pour konpran”? Oubyen eski mon zis pas lo la vitman?’ (2 Pyer 3:16) Si nou pran letan pour medit lo sa ki Zeova pe ansenny nou, nou pou kapab swiv son bann lenstriksyon e fer nou travay predikasyon.​—1 Tim. 4:15, 16.

16. Ler nou pa tro konpran lenstriksyon ki nou gannyen avek “sa lesklav fidel e pridan,” kwa ki pou ed nou pour swiv sa lenstriksyon?

 ¹⁶ Zeova i osi donn lenstriksyon atraver “sa lesklav fidel e pridan.” (Mat. 24:45) Parfwa, i kapab ki sa lesklav i donn lenstriksyon ki nou pa vreman konpran. Par egzanp, nou kapab ganny serten lenstriksyon spesifik pour prepar nou pour en dezas natirel ki nou krwar pa pou arive kot nou reste. Oubyen nou kapab santi ki ler i annan en pandemi, sa lesklav pe pran tro bokou prekosyon. Ki nou devret fer si nou santi ki bann lenstriksyon ki nou gannyen i pa tro fer sans? Nou kapab mazin bann byenfe ki bann Izraelit ti gannyen ler zot ti fer sa ki Zesoua ek Zorobabel ti dir zot fer. Nou kapab osi mazin lo lezot resi dan Labib ki nou’n lir. Parfwa, pep Bondye i ganny bann lenstriksyon ki pa paret bon me ki’n sov zot lavi.​—Ziz 7:7; 8:10.

17. Ki lefe sa vizyon konsernan sa sandelye ek sa de pye zoliv ti annan lo bann Zwif?

¹⁷ I kapab ki sa senkyenm vizyon ki Zekarya ti gannyen pa ti al pour bokou letan me i ti ed bann Zwif pour annan en latitid pozitif konsernan zot travay ek zot ladorasyon. Ler zot ti aplik sa ki zot ti’n aprann avek vizyon Zekarya, zot ti santi ki Zeova ti pe siport e gid zot avek lanmour. Zeova ti servi son lespri sen ki pwisan pour ed zot kontinyen zot travay e reganny zot lazwa.​—Ezra 6:16.

18. Ki lefe vizyon Zekarya i annan lo ou?

¹⁸ Sa vizyon ki Zekarya ti gannyen konsernan sa sandelye ek sa de pye zoliv i kapab annan en gran lefe lo ou. Parey nou’n vwar dan sa lartik, sa vizyon i kapab donn ou sa lafors ki ou bezwen ler lezot i opoz ou. I osi donn ou sa lazwa ki ou bezwen ler ou sirkonstans i sanze e sa konfyans ki ou bezwen pour obei bann lenstriksyon ki ou pa konpran. Ki ou devret fer ler ou fer fas avek difikilte? Premyerman, vwar sa ki Zekarya ti vwar setadir laprev ki Zeova i pran swen avek son pep. Apre, met ou konfyans dan Zeova e kontinyen ador li avek tou ou leker. (Mat. 22:37) Ler ou fer sa, Zeova pou ed ou pour servi li dan lazwa pour touzour.​—Kol. 1:10, 11.