1. Ki mannyer ou lavi ti ete avan ki ou ti konmans etidye Labib?

 KI MANNYER ou lavi ti ete avan ki ou ti konmans etidye Labib avek bann Temwen Zeova? En kantite parmi nou pa kontan mazin lo la. I tre probab ki nou latitid ek personnalite ti ganny enfliyanse par sa ki sa lemonn i dir i byen e mal. Si sa i vre, nou “ti napa lespwar e [nou] pa ti konn Bondye.” (Efe. 2:12) Me apre ki nou’n konmans etidye Labib, nou fason viv ti sanze.

2. Ki ou ti aprann anmezir ki ou ti pe etidye Labib?

² Anmezir ki ou ti etidye Labib, ou ti aprann ki ou annan en Papa dan lesyel ki kontan ou en kantite. Ou ti realize ki si ou anvi fer plezir Zeova e vin enn son serviter, ou ti pou bezwen fer bann gran sanzman dan ou fason viv, dan ou latitid e dan ou fason panse. Ou ti bezwen aprann pour viv dapre bann standar Zeova.​—Efe. 5:3-5.

3. Dapre Kolosyen 3:9, 10, ki Zeova i anvi nou fer e ki nou pou diskite dan sa lartik?

³ Zeova i nou Kreater e nou Papa. Alor i annan sa drwa pour deside ki mannyer bann ki form parti son fanmir i devret azir. Avan ki nou batize, Zeova i demann nou pour fer tou sa ki nou kapab pour “debaras [nou] avek sa vye personnalite ek son bann pratik.” * (Lir Kolosyen 3:9, 10.) Sa lartik pou ed bann ki anvi batize pour reponn sa trwa kestyon swivan: (1) Kisisa “sa vye personnalite”? (2) Akoz Zeova i demann nou pour debaras nou avek sa vye personnalite? (3) Ki mannyer nou kapab fer sa? Sa lartik pou osi ed bann parmi nou ki’n fini batize, pour pa azir oubyen annan menm fason panse ki nou ti annan  avan ki nou ti debaras nou avek sa vye personnalite.

4. Ki en dimoun i fer ler i ankor annan “sa vye personnalite”?

⁴ Normalman en dimoun ki ankor annan “sa vye personnalite,” i mazin e azir dapre bann dezir son lekor enparfe. I kapab ki i egois, i ankoler vitman, pa rekonesan e orgeye. I kapab kontan get bann keksoz ki annan pour fer avek pornografi e bann film vyolan oubyen imoral. San dout, i annan bann zoli kalite e i santi li koupab pour sa bann move keksoz ki i dir oubyen fer. Me i pa anvi sanz son fason panse e aret fer sa ki i pe fer.​—Gal. 5:19-21; 2 Tim. 3:2-5.

5. Eski nou kapab konpletman debaras nou avek sa vye personnalite? Eksplike. (Akt 3:19)

⁵ Nou enparfe, alor personn pa kapab konpletman tir tou bann move panse ek dezir dan nou leker ek lespri. Parfwa, nou pou dir oubyen fer en keksoz ki nou pou regrete. (Zer. 17:9, NWT; Zak 3:2) Me ler nou debaras nou avek sa vye personnalite, nou nepli ganny kontrole par bann move latitid ek bann move pratik. Nou vin en lot kalite dimoun.​—Iza. 55:7; lir Akt 3:19.

6. Akoz Zeova i demann nou pour aret annan bann move fason panse ek move labitid?

⁶ Zeova i demann nou pour aret annan bann move fason panse ek move labitid akoz i kontan nou en kantite e i anvi ki nou ere. (Iza. 48:17, 18, NWT) I konnen ki sa bann ki pa lager avek zot bann move dezir, zot fer ditor zot prop lekor ek bann ki otour zot. I sagren ler i vwar nou pe fer ditor nou prop lekor ek lezot.

7. Dapre Romen 12:1, 2, ki nou bezwen swazir?

⁷ I kapab ki o konmansman nou fanmir ek nou bann zanmi i sikann nou akoz nou pe esey sanz nou personnalite. (1 Pyer 4:3, 4) Zot kapab dir ki nou annan drwa fer sa ki nou anvi e ki nou pa devret les personn dir nou ki nou pou fer. Me sa bann ki pa aksepte bann standar Zeova pa pe vreman fer sa ki zot oule. An realite, zot pe les sa lemonn ki ganny dirize par Satan enfliyans  zot. (Lir Romen 12:1, 2.) Nou tou nou bezwen swazir. Nou bezwen swazir si nou pou kontinyen annan sa vye personnalite ki ganny enfliyanse avek lemonn Satan ek nou prop pese. Oubyen si nou pou les Zeova transform nou e fer nou vin sa pli bon dimoun ki nou kapab ete pour le moman.​—Iza. 64:8.

8. Kwa ki kapab ed nou pour evite annan bann move panse ek bann move labitid?

⁸ Zeova i konnen ki i pou pran letan ek zefor pour evite annan bann move fason panse ek bann move labitid. (Ps. 103:13, 14) Alor, i servi son Parol, son lespri sen ek son lorganizasyon pour donn nou sa lasazes, lafwa ek led ki nou bezwen pour fer bann sanzman ki nou bezwen fer. Sirman i’n deza ed ou. Aprezan, annou vwar ki nou kapab fer pour kontinyen debaras nou avek sa vye personnalite e pour kalifye pour batize.

9. Ki Parol Bondye i kapab ed ou fer?

⁹ Servi Labib pour byen egzamin ou. Parol Bondye i parey en laglas ki kapab ed ou pour analiz ou fason panse, fason koze ek ou aksyon. (Zak 1:22-25) Sa dimoun ki pe etidye Labib avek ou ek lezot Kretyen matir i kapab donn ou bann konsey. Par egzanp, zot kapab servi Labib pour ed ou konn ou bann pwen for ek pwen feb. Zot kapab montre ou ki mannyer pour trouv bann lenformasyon baze lo Labib, ki pou donn ou bann konsey lo ki mannyer ou kapab aret ou bann move labitid. Osi, Zeova i toultan pare pour ed ou. Vi ki i konnen ki i annan dan ou leker, i sa enn ki pou pli byen kapab ed ou. (Prov. 14:10; 15:11) Alor, devlop sa labitid pour priy Zeova e etidye son Parol toulezour.

10. Ki ou’n aprann avek leksperyans Elie?

¹⁰ Ou bezwen asire ki bann standar Zeova i pli bon pour ou. Tou sa ki Zeova i demann nou pour fer, i bon pour nou. Sa bann ki viv dapre Son bann standar, i annan respe pour zot lekor, i annan en bi dan lavi e zot vreman ere. (Ps. 19:7-11) De lot kote, bann ki rezet bann standar Zeova i soufer akoz zot viv dapre zot bann move dezir e zot ganny bann konsekans. Remarke ki en msye ki apel Elie i dir konsernan sa bann ki rezet bann standar Bondye. Elie ti grandi avek son paran ki kontan Zeova. Me ler i ti adolesan, i ti swazir pour fer bann zanmi avek bann dimoun ki pa viv dapre bann standar Zeova e i ti konmans servi drog, annan en lavi imoral e vole. Elie i dir ki i ti konmans ankoler vitman e i ti vin vyolan. Elie i dir: “Anfet, mon pa ti pe fer sa ki mon ti’n aprann. Mon ti pe fer tou sa ki en Kretyen pa devret fer.” Me Elie pa ti oubliy sa ki i ti’n aprann ler i ti ankor ptipti. Pli tar, i ti rekonmans etidye Labib. I ti fer en kantite zefor pour aret fer bann move keksoz ki i ti pe fer e i ti batize dan lannen 2000. Ki byenfe Elie in gannyen ler i’n viv dapre bann standar Zeova? Elie i dir: “Mon annan lape lespri e mon annan en konsyans kler.” * Leksperyans Elie i montre nou ki bann ki swazir pour rezet bann standar Zeova i fer ditor zot prop lekor. Me kantmenm sa, Zeova i pare pour ed zot sanze.

11. Ki bann keksoz ki Zeova pa kontan?

 ¹¹ Aprann pour ay sa ki Zeova pa kontan. (Ps. 97:10) Labib i dir ki Zeova i ay sa bann ki annan “lizye orgeye, lalang ki dir bann mansonz, lanmen ki fer disan koule.” (Prov. 6:16, 17, NWT) I osi “deteste bann dimoun ki vyolan e ki trik lezot.” (Ps. 5:6, NWT) Zeova i sitan ay sa bann latitid ek aksyon ki i ti detri tou bann move dimoun dan letan Noe parski zot ti fer en kantite vyolans. (Zen. 6:13) Annou vwar en lot legzanp. Atraver profet Malaki, Zeova ti dir ki i ay sa bann ki fer bann trik pour divors zot konzwen inosan. Bondye pa aksepte zot ladorasyon e i pou fer zot rann kont pour zot move aksyon.​—Mal. 2:13-16; Ebr. 13:4.

12. Ki savedir “deteste sa ki mal”?

¹² Zeova i anvi ki nou “deteste sa ki mal.” (Rom. 12:9) Sa mo “deteste” i dekrir en santiman ki for. I vedir vreman ay en keksoz e vwar sa keksoz degoutan. Mazin ki mannyer ou pou santi si ou ganny demande pour manz en manze ki pouri. Zis pour mazin sa, i fer ou malad. Pareyman, zis pour mazin fer en keksoz ki Zeova pa kontan, i devret degoutan pour nou.

13. Akoz nou devret rezet bann move panse?

¹³ Rezet bann move panse. Sa ki nou mazinen i annan en lefe lo sa ki nou fer. I pour sa rezon ki Zezi ti ansenny nou pour rezet bann panse ki kapab fer nou fer en pese grav. (Mat. 5:21, 22, 28, 29) Nou anvi fer plezir nou Papa ki dan lesyel. Alor, i vreman enportan ki nou rezet okenn move panse deswit.

14. Sa ki nou dir i montre kwa lo nou e ki bann kestyon ki nou devret demann nou lekor?

¹⁴ Vey sa ki ou dir. Zezi ti dir: “Sa ki sorti dan labous i sorti dan leker.” (Mat. 15:18) I kler ki sa ki nou dir i montre sa ki nou ete. Alor, demann ou lekor sa bann kestyon: ‘Eski mon koz laverite menm si mon pou ganny problenm? Konman en dimoun ki’n marye, eski mon fer atansyon pour pa flirt avek en dimoun lot sèks? Eski mon evite koz lo bann keksoz ki imoral? Eski mon reponn dan en fason kalm ler en dimoun i fer mwan ankoler?’ I ti pou bon si ou reflesir lo sa bann kestyon. Nou vye personnalite i parey en  lenz. Bann move keksoz ki nou dir i parey difil ki koud sa lenz. Alor si nou anvi debaras nou avek sa vye personnalite, nou bezwen aret koz manti, aret koz lo bann keksoz imoral e aret ensilte lezot.

15. Ki i vedir klout nou vye personnalite “lo poto”?

¹⁵ Pare pour fer tou sa ki neseser. Zapot Pol ti servi en legzanp pour ansenny nou ki i vreman enportan pour nou sanz nou fason viv. I ti dir ki nou devret klout nou vye personnalite “lo poto.” (Rom. 6:6) Zezi ti pare pour ganny kloute lo en poto pour fer plezir Zeova. Pareyman, pour nou fer plezir Zeova, nou bezwen sanz nou latitid e aret fer bann keksoz ki Zeova pa kontan. Nou bezwen fer sa bann keksoz pour nou kapab annan en konsyans kler e pour nou annan sa lespwar pour viv pour touzour. (Zan 17:3; 1 Pyer 3:21) Rapel ki Zeova pa pou sanz son bann standar pour fer nou plezir. O kontrer nou ki bezwen sanze e obei son bann standar.​—Iza. 1:16-18; 55:9.

16. Akoz ou devret determinen pour kontinyen lager kont bann move dezir?

¹⁶ Kontinyen reziste bann move dezir. Menm apre ki nou’n batize, nou bezwen kontinyen lager kont bann move dezir. Mazin leksperyans en zonm ki apel Maurício. Ler i ti ankor zenn, i ti konmans fer bann aksyon omoseksyel. Pli tar, i ti konmans etidye Labib avek bann Temwen Zeova. I ti fer bann sanzman dan son lavi e an 2002, i ti batize. Menm si Maurício in servi Zeova pour plizyer lannen, i dir: “Mon bezwen admet ki parfwa mon bezwen lager avek bann move dezir.” Me Maurício pa les sa fer li dekouraze. O kontrer i dir: “Mon ganny rekonforte parski mon konnen ki ler mon swazir pour pa azir dapre sa bann dezir, mon pe fer plezir Zeova.” *

17. Kwa ki ou’n vwar ankourazan avek leksperyans Nabiha?

¹⁷ Priy Zeova pour ganny led, depan lo son lespri sen e pa lo ou prop lafors. (Gal. 5:22; Fili. 4:6) Nou devret fer bokou zefor si nou anvi debaras nou avek sa vye personnalite e pa vin parey nou ti ete avan. Annou vwar leksperyans en madanm ki apel Nabiha. Ler i ti annan si-z-an, son papa ti kit zot fanmir. Nabiha i dir: “Sa ti fer mwan soufer en kantite.” Anmezir Nabiha ti grandi, i ti vin en dimoun ki agresiv e ankoler vitman. I ti konmans vann drog, lapolis ti aret li e i ti  pas detrwa lannen dan prizon. Bann Temwen Zeova ki ti vizit sa prizon ti konmans etidye Labib avek li. Nabiha ti konmans fer bann gran sanzman. I dir: “I ti fasil pour mwan aret serten mon bann move labitid me i ti difisil pour mwan aret fimen.” Pour plis ki enn an, Nabiha ti esey aret sa move labitid e avek letan, i ti reisi aret fimen. Kwa ki ti ed li? I dir: “Sa keksoz pli enportan ki ti ed mwan ti lapriyer. Mon ti priy Zeova regilyerman.” Aprezan, Nabiha i dir avek lezot: “Mon asire ki si mwan, mon’n kapab fer bann sanzman pour fer plezir Zeova, nenport dimoun i kapab!” *

18. Dapre 1 Korentyen 6:9-11, ki en kantite serviter Bondye in reisi fer?

¹⁸ Dan premye syek, serten dimoun ki Zeova ti swazir pour dirize ansanm avek Zezi dan lesyel, ti fer bann move keksoz oparavan. Par egzanp, zot ti komet adilter, zot ti bann omoseksyel ek bann voler. Avek led lespri sen Zeova, zot ti kapab sanz zot personnalite. (Lir 1 Korentyen 6:9-11.) Pareyman, ozordi Labib in ed plizyer milyon dimoun pour fer bann sanzman dan zot lavi. * Zot in aret fer bann move keksoz ki ti vreman difisil pour zot aret fer. Zot legzanp i montre ki ou osi ou kapab fer bann sanzman dan ou personnalite e aret fer bann move keksoz pour ki ou kapab kalifye pour ou batize.

19. Ki nou pou vwar dan sa lartik ki swiv?

¹⁹ Bann ki anvi batize, i devret fer zefor pour debaras zot avek sa vye personnalite me zot devret osi fer zefor pour devlop sa nouvo personnalite. Dan sa lartik ki swiv, nou pou vwar ki mannyer nou kapab fer sa e ki mannyer lezot i kapab ed nou.