Akoz sa zonm ki Labib i apel “Entel” ti dir ki si i marye avek Rit sa ti pou fer li “perdi” son leritaz? (Rit 4:1, 6)

Dan letan Labib, si en zonm ti napa zanfan ler i mor, i ti annan detrwa kestyon ki ti bezwen ganny reponn. Par egzanp: Ki ti pou arive avek son leritaz? Eski non son fanmir ti pou disparet pour touzour? Serten lenstriksyon dan Lalwa Moiz ti ede reponn sa bann kestyon.

Ki ti arive avek later en zonm ki ti mor oubyen ki ti vin pov e ki akoz sa i ti bezwen vann son later? Son frer oubyen en fanmir pros ti kapab aste sa later. Sa ti fer ki sa later ti pou reste pour sa fanmir.​—Lev. 25:23-28; Nom. 27:8-11.

Me kwa ki ti ganny fer pour fer sir ki non sa zonm pa disparet dan Izrael? Non sa zonm ti ganny prezerve atraver en laranzman maryaz, setadir ki madanm sa zonm ti pou marye avek frer sa zonm. Sanmenm sa ki ti arive avek Rit. Dapre sa laranzman, en zonm ti pou marye avek vev son frer pour zot fer zanfan me sa zanfan ti pou annan non sa frer ki’n mor e i ti pou ganny propriyete sa frer ki’n mor konman leritaz. Sa laranzman ti osi en fason pour pran swen avek bann vev.​—Det. 25:5-7; Mat. 22:23-28.

Par egzanp, annou vwar sityasyon Naomi. I ti’n marye avek en zonm ki ti apel Elimelek. Ler Elimelek ek son de garson ti mor, i ti nepli annan en zonm dan son fanmir pour pran swen avek Naomi. (Rit 1:1-5) Apre ki Naomi ti’n retourn Zida ansanm avek son belfiy Rit, Naomi ti fer Rit demann Boaz pour reaste zot later. Boaz ti en fanmir pros avek Elimelek. (Rit 2:1, 19, 20; 3:1-4) Me Boaz ti konnen ki i ti annan en lot zonm ki ti en fanmir pli pros ki li. Labib i refer avek sa zonm konman “Entel.” Sa zonm ti annan sa drwa pour desid premye si i pou reaste zot later.​—Rit 3:9, 12, 13.

O konmansman, “Entel” ti pare pour ede. (Rit 4:1-4) I ti konnen ki i ti pou bezwen depanse pour aste sa later me i ti osi konnen ki Naomi ti tro vye pour li ganny en zanfan ki ti kapab erit later Elimelek. Si sa zonm ti aste sa later, sa later ti pou form parti son leritaz e sa ti paret konman en bon lenvestisman.

Me Entel ti sanz son nide ler i ti realize ki i ti pou bezwen marye avek Rit. I ti dir: “Mwan mon pa kapab aste sa later akoz mon riske perdi mon leritaz.” (Rit 4:5, 6) Akoz i ti sanz son nide?

Si Entel oubyen en lot dimoun ti marye avek Rit e Rit ti donn nesans en garson, sa garson ti pou ganny later Elimelek konman leritaz. Me ki mannyer sa ti pou fer Entel ‘perdi son leritaz’? Labib pa dir nanryen lo la me annou vwar serten rezon akoz sa ti kapab leka.

• Premyerman, i ti pou perdi sa larzan ki i’n depanse pour aste later Elimelek parski sa later pa ti pou vin pour li. Garson Rit ki ti pou ganny sa later.

• Dezyenmman, i ti pou bezwen pran swen avek Naomi ek Rit e fer sir ki zot ganny manze.

• Trwazyenmman, si Rit ti ganny lezot zanfan avek Entel e si Entel ti deza annan lezot zanfan, sa bann zanfan ti pou bezwen partaz leritaz Entel antre zot.

• Katriyenmman, si Entel ti napa zanfan avan sa, sa garson ki Rit ti pou gannyen ti pou ganny propriyete Elimelek ek propriyete Entel. Alor, ler Entel ti pou mor, son propriyete ti pou vin pour sa zanfan ki desandans Elimelek. Entel pa ti pare pour perdi son leritaz pour ed Naomi. Vi ki Boaz ti sa lot manm fanmir ki ti kapab aste sa plantasyon, Entel ti prefere les li pran sa responsabilite. Boaz ti fer sa pour ki “sa leritaz [i] reste pour desandans sa msye,” setadir desandans Elimelek.​—Rit 4:10.

I paret ki Entel ti pli anvi gard son leritaz e fer son non pa ganny oubliye. I ti egois. Menm si i ti fer tou pour ki son non pa ganny oubliye, ozordi nou pa ni menm konnen ki mannyer i ti apele. I ti osi perdi sa zoli privilez ki Boaz ti gannyen, setadir pour vin en zanset Mesi, Zezi Kri. I fer lapenn sa ki ti arive avek Entel parski i ti sitan egois, ki i pa ti pare pour ed en dimoun ki ti bezwen led.​—Mat. 1:5; Lik 3:23, 32.