1-2. Si ou pa ankor pare pour batize, akoz ou pa devret dekouraze? (Vwar portre lo kouvertir.)

 ESKI ou anvi batize? Si wi, sa i en zoli lobzektif. Eski ou pare pour batize la konmela? Si ou krwar ki ou’n pare pour batize e bann ansyen in dakor, pa ezite pour ou batize dan sa prosen lasanble. Si ou fer sa, ou pou annan en lavi satisfezan dan servis Zeova.

² Me eski en dimoun in dir ou ki ou bezwen fer plis progre pour ou kapab batize? Oubyen eski ou menm ou’n realize ki ou bezwen fer plis progre? Si wi, pa dekouraze. Ki swa ou zenn oubyen ou aze, ou kapab progrese ziska ki ou atenn sa lobzektif.

3. Ki sa zofisye Etyopyen ti demann Filip e ki kestyon nou kapab demande? (Akt 8:36, 38)

³ Lir Akt 8:36, 38. En zofisye Etyopyen ti demann Filip sa predikater: “Kwa ki anpes mwan batize?” Sa Etyopyen ti anvi batize me eski i ti’n pare pour batize?

4. Ki mannyer sa Etyopyen ti montre ki i ti anvi kontinyen aprann?

⁴ Sa zonm Etyopyen “ti’n al ador Bondye, Zerizalenm.” (Akt 8:27) Alor i tre probab ki i ti’n aksepte larelizyon Zwif. San dout, i ti’n aprann konsernan Zeova dan Lekritir Ebre. Me kantmenm sa, i ti anvi aprann plis. Anfet ler Filip ti zwenn sa zofisye lo semen, sa zofisye ti pe lir liv profet Izai. (Akt 8:28) Sa ti bann laverite profon ki dan Labib. Sa zofisye pa ti satisfe zis avek bann laverite de baz me i ti anvi kontinyen aprann.

5. Ki sa Etyopyen ti fer avek sa ki i ti aprann?

⁵ Sa zonm ti en o zofisye ki “ti ansarz tou larzan Kandas, larenn Etyopi.” (Akt 8:27) Alor i bezwen ki i ti en zonm ki ti vreman bizi e ki ti annan en kantite responsabilite. Me i ti fer letan pour ador Zeova. I pa ti zis kontan  pour aprann laverite me i ti osi aplik sa ki i ti aprann. Alor i ti vwayaze sorti Etyopi pour li kapab al ador Zeova kot tanp Zerizalenm. I bezwen ki sa zonm ti pran en kantite letan e depans en kantite larzan pour fer sa vwayaz. I ti pare pour fer nenport kwa pour li kapab ador Zeova.

6-7. Kwa ki ti fer sa Etyopyen devlop plis lanmour pour Zeova?

⁶ Sa Etyopyen ti aprann bann laverite enportan avek Filip. Enn parmi i ki Zezi ti sa Mesi. (Akt 8:34, 35) Sirman sa zofisye ti kontan pour aprann konsernan sa ki Zezi in fer pour li. Ki i ti fer apre ki i ti’n aprann sa bann keksoz? I ti’n kapab reste dan larelizyon Zwif. Me o kontrer, son lanmour pour Zeova ek Son Garson ti vin pli for e sa ti motiv li pour fer en desizyon enportan. I ti deside pour batize konman en disip Zezi Kri. Filip ti vwar ki sa zonm ti’n pare alor i ti batiz li.

⁷ Legzanp sa Etyopyen i kapab ed ou pour prepar ou pour batize. Avek konfidans, ou osi ou pou kapab dir, “Kwa ki anpes mwan batize?” Aprezan annou vwar ki mannyer ou kapab swiv legzanp sa zonm Etyopyen. Sa zonm Etyopyen ti kontinyen aprann, i ti aplik sa ki i ti pe aprann e i ti kontinyen devlop plis lanmour pour Zeova.

8. Ki Zan 17:3 i dir nou bezwen fer?

⁸ Lir Zan 17:3. Eski sa ki Zezi ti dir dan sa verse in ed ou pour konmans etidye Labib? I koumsa ki en kantite parmi nou in konmans etidye Labib. Me sa bann menm parol i ankouraz nou pour kontinyen aprann. Nou pa pou zanmen aret “aprann konn . . . sa sel vre Bondye.” (Ekle. 3:11) Nou pou kontinyen aprann konsernan Zeova pour touzour. Pli nou aprann, pli nou pou vin pli pros avek Zeova.​—Ps. 73:28.

9. Ki nou bezwen fer apre ki nou’n aprann bann laverite de baz ki dan Labib?

⁹ Ler nou konmans aprann lo Zeova, nou aprann bann lansennyman de baz ki dan Labib. Dan sa let ki zapot Pol ti ekri pour bann Ebre, i ti refer avek bann lansennyman de baz konman bann “keksoz elemanter.” I pa ti pe dir ki bann lansennyman de baz pa enportan. O kontrer i ti pe montre ki sa bann lansennyman i parey dile ki nouri pti baba. (Ebr. 5:12; 6:1) Me i ti osi ankouraz tou Kretyen pour kontinyen aprann plis ki zis sa bann lansennyman de baz e pour  aprann bann laverite profon ki dan Parol Bondye. Eski ou vreman anvi aprann bann laverite pli o profon ki dan Labib? Eski ou pare pour kontinyen aprann lo Zeova ek son plan?

10. Akoz serten i vwar li difisil pour etidye?

¹⁰ En kantite parmi nou i vwar li difisil pour etidye. Eski ou osi ou vwar li difisil pour ou etidye? Eski lekol ou ti aprann ki mannyer pour lir e etidye? Eski ou ti kontan etidye e ou ti santi ki ou ti pe aprann en kantite keksoz? Oubyen eski ou krwar ki ou pa kapab aprann nanryen dan bann liv? Si ou santi koumsa, ou pa tousel. Me Zeova i kapab ed ou. I parfe e i sa pli bon Ansenyan.

11. Ki mannyer Zeova i montre ki i nou “Gran Ansenyan”?

¹¹ Zeova i dir ki i nou “Gran Ansenyan.” (Iza. 30:20, 21) I en ansenyan ki annan pasyans, ki bon e ki konpran nou. I rod sa ki bon dan son bann etidyan. (Ps. 130:3) I pa zanmen ekspekte ki nou fer plis ki sa ki nou kapab. Rapel ki Zeova ki’n kree nou laservel e nou laservel i en zoli kado. (Ps. 139:14) Nou annan sa dezir pour aprann nouvo keksoz. Nou Kreater i anvi ki nou kontinyen aprann pour touzour e ki nou kontan pour aprann. Alor i saz pour “devlop sa dezir” pour aprann laverite ki dan Labib depi la konmela. (1 Pyer 2:2) Met bann lobzektif ki ou kapab atenn e fer en progranm pour lir e etidye Labib regilyerman. (Zoz. 1:8) Avek led Zeova, nou pou aprann pour kontan pour lir e etidye konsernan li.

12. Akoz nou devret etidye konsernan lavi Zezi ek son minister?

¹² Pran letan regilyerman pour reflesir lo lavi Zezi ek son minister. I enportan ki nou swiv legzanp Zezi si nou anvi servi Zeova sirtou dan sa bann letan difisil. (1 Pyer 2:21) Zezi ti dir son bann disip ki zot ti pou fer fas avek problenm. (Lik 14:27, 28) Me i ti asire ki son bann disip ti pou reste fidel avek Bondye parey li in reste fidel. (Zan 16:33) Etidye bann lenformasyon konsernan lavi Zezi e met bann lobzektif ki pou ed ou swiv son legzanp dan ou lavi toulezour.

13. Ki ou devret kontinyen demann Zeova e akoz?

¹³ I pa ase pour zis annan konnesans. Sa rezon akoz nou bezwen konnesans i pour nou kapab aprann plis konsernan Zeova e pour devlop bann kalite parey lanmour pour li ek lafwa dan li. (1 Kor. 8:1-3) Anmezir ki ou aprann, kontinyen demann Zeova pour ed ou pour annan plis lafwa. (Lik 17:5) Zeova i zenere. I pou reponn bann lapriyer koumsa. Ler nou lafwa i baze lo konnesans egzakt lo Bondye, sa pou ed nou fer plis progre.​—Zak 2:26.

14. Ki mannyer zapot Pyer ti montre ki kantite i enportan pour aplik sa ki nou pe aprann? (Vwar portre.)

¹⁴ Zapot Pyer ti montre ki kantite i enportan pour bann disip Kris kontinyen aplik sa ki zot aprann. I ti koz lo sa resi konsernan Noe. Zeova ti dir Noe ki i ti pou anmenn en deliz pour detri bann move dimoun ki ti pe viv sa letan. Menm si Noe ti konnen ki i ti annan en deliz ki pe vini, sa pa ti ase pour sov li ek son fanmir. Remarke ki Pyer ti pe koz lo sa letan avan Deliz, “pandan ki lars ti pe ganny konstrir.” (1 Pyer 3:20) Noe ek son fanmir ti azir dapre sa ki Bondye ti’n dir zot e zot ti konstri en lars setadir en gro  bato. (Ebr. 11:7) Apre sa, Pyer ti konpar sa ki Noe ti fer avek batenm. I ti dir: “Batenm i parey e i pe sov zot.” (1 Pyer 3:21) Alor nou kapab konpar sa zefor ki ou pe fer la konmela pour prepare pour batize avek sa travay ki Noe ek son fanmir ti fer pour plizyer lannen pour konstrir lars. Ki ou bezwen fer pour prepare pour batize?

15. Ki mannyer nou montre ki nou’n repantir senserman?

¹⁵ Enn bann premye keksoz ki nou bezwen fer, i pour repantir pour nou bann pese. (Akt 2:37, 38) Ler nou repantir senserman, sa pou motiv nou pour fer bann sanzman. Eski ou’n aret fer bann keksoz ki pa fer plezir Zeova parey viv en lavi imoral, fimen, dir bann parol sal oubyen bann parol ki ensilte lezot? (1 Kor. 6:9, 10; 2 Kor. 7:1; Efe. 4:29) Si ou pa ankor fer sa bann sanzman, kontinyen esey fer li. Koz avek sa dimoun ki pe fer ou letid Labib oubyen demann bann ansyen ki dan ou kongregasyon pour ed ou e pour donn ou konsey. Si ou ankor zenn e ou pe reste avek ou paran, kontinyen demann zot pour ed ou pour aret bann move labitid ki kapab anpes ou batize.

16. Ki nou bezwen fer si nou anvi ador Zeova regilyerman?

¹⁶ I enportan pour annan en bon routin spirityel. Sa i enkli asiste renyon e partisipe pandan renyon. (Ebr. 10:24, 25) Ler ou kalifye pour partisip dan predikasyon, fer li regilyerman. Pli ou partisip dan sa travay predikasyon, pli ou pou kontan sa travay. (2 Tim. 4:5) Si ou ankor zenn e ou pe reste avek ou paran, demann ou lekor: ‘Eski mon paran ki bezwen dir mwan ki mon bezwen asiste renyon oubyen partisip dan predikasyon? Oubyen eski mon pran linisyativ pour fer li mwan menm?’ Ler ou pran linisyativ pour fer sa bann keksoz, ou montre ki ou annan lafwa dan Zeova, ki ou kontan li e ki ou rekonesan pour bann keksoz ki i donn ou. Sa i “bann aksyon ki demontre ki [ou] annan en devosyon pour Bondye” e i en kado ki ou donn Zeova. (2 Pyer 3:11; Ebr. 13:15) Tou bann  kado ki nou donn Zeova volonterman i fer li plezir. (Konpar 2 Korentyen 9:7.) Nou fer sa bann keksoz parski nou kontan ler nou donn Zeova nou meyer.

17-18. Ki kalite ki pou ed ou fer progre ziska batenm e akoz? (Proverb 3:3-6)

¹⁷ Anmezir ki ou progrese ziska batenm, ou pou fer fas avek problenm. Serten dimoun i kapab sikann ou akoz ou nouvo krwayans. Zot kapab menm opoz oubyen persekit ou. (2 Tim. 3:12) Petet ou pe fer zefor pour aret fer en keksoz ki ou konnen i mal, me parfwa i arive ki ou fer sa keksoz. Oubyen i kapab ki ou fatige espere e ou fristre parski ou pa pe kapab atenn ou lobzektif. Kwa ki pou ed ou andire? Ou bezwen annan en kalite enportan setadir lanmour pour Zeova.

¹⁸ Ou lanmour pour Zeova i en zoli kalite. I sa pli bon kalite ki ou annan. (Lir Proverb 3:3-6.) Sa lanmour ki ou annan pour Zeova pou ed ou pour kontinyen servi li menm ler ou fer fas avek problenm. Labib i souvan koz lo lanmour fidel ki Zeova i annan pour son bann serviter. Vi ki Zeova i annan lanmour fidel, sa i vedir ki Zeova pa pou zanmen abandonn son bann serviter oubyen aret kontan zot. (Ps. 100:5) Ou’n ganny fer dan resanblans Bondye. (Zen. 1:26) Alor, ki mannyer ou kapab demontre sa menm kalite lanmour?

19. Ki mannyer ou kapab demontre plis rekonesans pour tou sa ki Zeova in fer pour ou? (Galat 2:20)

¹⁹ Pour ou kapab demontre lanmour fidel, ou bezwen rekonesan. (1 Tesa. 5:18) Toulezour demann ou lekor, ‘Ki mannyer Zeova in demontre lanmour anver mwan?’ Apre fer sir ki ou remersye Zeova dan lapriyer e ou mansyonn bann keksoz spesifik ki i’n fer pour ou. Vwar sa bann bon keksoz ki Zeova i fer pour ou personnelman konman bann keksoz ki i fer akoz i kontan ou. Zapot Pol osi ti realiz sa. (Lir Galat 2:20.) Demann ou lekor, ‘Eski mon anvi montre li ki mon kontan li mon osi?’ Ou lanmour pour Zeova pou ed ou pour kontinyen reziste bann tantasyon e pour andire malgre difikilte. I pou motiv ou pour kontinyen  fer ou bann aktivite spirityel e pour montre ou Papa ki ou kontan li toulezour.

20. Ki ou bezwen fer pour dedye ou lavi avek Zeova e ki mannyer ou devret konsider sa desizyon?

²⁰ Avek letan, ou lanmour pour Zeova pou motiv ou pour fer en lapriyer spesyal. Ou pou dedye ou lavi avek Bondye. Rapel ki ler ou’n dedye ou lavi avek Zeova, ou annan en lespwar merveye: Ou kapab vin pour li pour touzour. Ler ou dedye ou lavi avek Zeova, ou promet pour servi li dan botan e dan movetan. Ou pa pou zanmen bezwen fer sa promes ankor. Ler nou’n dedye nou lavi avek Zeova, nou pe fer en desizyon serye. Reflesir lo sa: Ou pou fer en kantite desizyon dan ou lavi, serten pou bann bon desizyon me ou pa pou zanmen fer en pli bon desizyon ki dedye ou lavi avek Zeova. (Ps. 50:14) Satan pou esey fer ou aret kontan ou Papa parski i anvi ki ou aret servi Zeova fidelman. Pa zanmen les Satan fer sa. (Zob 27:5) Ou lanmour pour Zeova pou ed ou gard ou promes pour servi li pour touzour e pou vin pli pros avek ou Papa ki dan lesyel.

21. Akoz nou kapab dir ki batenm i pa en finisyon me i en konmansman?

²¹ Apre ki ou’n dedye ou lavi avek Zeova, koz avek bann ansyen dan kongregasyon konsernan sa lot letap enportan ki ou bezwen fer. Me toultan rapel ki batenm i pa en finisyon me i en konmansman. Ou konmans ou servis pour Zeova ki dire pour touzour. Alor devlop plis lanmour pour Zeova la konmela. Met bann lobzektif ki pou ed ou pour kontan Zeova plis sak zour. Si ou fer sa, sa pou motiv ou pour batize. Sa pou en zour ki spesyal. Me sa i zis en konmansman. Ki ou lanmour pour Zeova ek son Garson i kontinyen vin pli for pour touzour.