1. Kwa ki enpresyonn en kantite dimoun ler zot asiste renyon pour premye fwa? (Vwar portre.)

 METON en koup ki’n marye i asiste renyon pour premye fwa dan Lasal Rwayonm Temwen Zeova. Sa koup i enpresyonnen ler zot vwar ki mannyer bann frer ek ser i zantiy e ki mannyer zot demontre lanmour anver kanmarad. Ler sa koup pe retourn kot zot apre renyon, sa madanm i dir avek son msye: “Sa bann dimoun i diferan e mon’n vreman kontan pour pas letan avek zot.”

2. Akoz serten in aret servi Zeova?

² Sa lanmour ki i annan parmi pep Zeova i vreman spesyal. Byensir, Temwen Zeova i enparfe. (1 Zan 1:8) Alor i tre probab ki pli nou konn bann frer ek ser dan kongregasyon, pli nou pou vwar serten zot bann defo. (Rom. 3:23) Malerezman serten in les defo ki lezot i annan, fer zot aret servi Zeova.

3. Ki mannyer dimoun i kapab konnen lekel ki bann vre disip Zezi? (Zan 13:34, 35)

³ Annou relir verse tenm pour sa lartik. (Lir Zan 13:34, 35.) Ki mannyer dimoun i kapab konnen lekel ki bann vre disip Zezi? Labib i dir ki zot pou demontre lanmour anver kanmarad e i pa dir ki zot pou parfe. Osi, remarke ki Zezi pa ti dir: ‘Par sa, ou pou konnen ki zot mon disip.’ Me i ti dir: “Par sa, tou dimoun pou konnen ki zot mon disip.” Alor, Zezi ti montre ki menm bann dimoun an deor kongregasyon ti pou rekonnet son bann disip atraver sa kalite lanmour ki zot ti pou annan antre zot.

4. Ki serten dimoun i kapab anvi konnen konsernan bann vre Kretyen?

⁴ Serten dimoun ki pa Temwen Zeova i kapab demande: ‘Ki mannyer lanmour i kapab ed nou pour konnen lekel bann vre disip Zezi? Ki mannyer Zezi ti demontre lanmour anver son bann zapot? Ki mannyer nou kapab swiv legzanp Zezi ozordi?’ I ti pou byen ki tou Temwen Zeova i reflesir lo larepons sa bann kestyon. Ler nou fer sa, sa i kapab ed nou pour demontre plis lanmour sirtou ler lezot i fer fot.​—Efe. 5:2.

5. Ki Zezi ti pe esey dir dan Zan 15:12, 13?

⁵ Zezi ti eksplike ki son bann disip ti pou demontre en kalite lanmour ki spesyal anver kanmarad. (Lir Zan 15:12, 13.) Remarke ki Zezi ti donn son bann disip sa lord: “Kontan kanmarad parey mwan mon’n kontan zot.” Ki sa i vedir? Parey Zezi ti eksplike apre, son bann disip i devret kontan lezot plis ki zot prop lekor oubyen i en kalite lanmour ki pou motiv en Kretyen pour li pare pour mor pour en lot si i neseser. b

6. Ki mannyer Parol Bondye i montre ki lanmour i enportan?

⁶ Parol Bondye i ansenny nou ki lanmour i vreman enportan. Par egzanp, sa bann verse ki swiv i parmi bann verse ki en kantite dimoun i pli kontan: “Bondye i lanmour.” (1 Zan 4:8) “Ou devret kontan ou prosen parey ou kontan ou prop lekor.” (Mat. 22:39) “Lanmour i kouver en kantite pese.” (1 Pyer 4:8) “Lanmour i reste pour touzour.” (1 Kor. 13:8) Sa bann verse ek lezot ankor i  montre ki i vreman enportan pour devlop e demontre sa zoli kalite.

7. Akoz Satan pa kapab ansenny dimoun pour kontan kanmarad e pour ini?

⁷ En kantite dimoun i demande: ‘Ki mannyer mon kapab konnen lekel sa vre larelizyon? Tou larelizyon i dir ki zot pe ansenny laverite me zot pe ansenny diferan keksoz lo Bondye.’ Satan in etabli en kantite fo larelizyon e sa i fer li difisil pour dimoun konnen lekel sa vre larelizyon. Satan pa kapab fer dimoun ki sorti partou dan lemonn, kontan kanmarad. Zis Zeova ki kapab fer sa. Nou konn sa parski lanmour i sorti kot Zeova. Zis bann ki annan lespri sen Zeova ek son benediksyon ki kapab vreman kontan kanmarad. (1 Zan 4:7) I pour sa rezon ki Zezi ti dir ki zis son bann disip ki ti pou kapab vreman kontan kanmarad.

8-9. Ler bann dimoun i vwar sa lanmour ki i annan parmi bann Temwen Zeova, ki lefe sa i annan lo zot?

⁸ Zis parey Zezi ti predir, en kantite dimoun in rekonnet bann disip Zezi atraver sa kalite lanmour ki zot demontre antre zot. Par egzanp, en frer ki apel Ian i rapel sa premye fwa ki i ti asiste en lasanble Temwen Zeova. Sa lasanble ti ganny fer dan en stad ki fer sport, ki pre avek kot i reste. Detrwa mwan pli boner, Ian ti’n al dan sa menm stad pour get sport. I dir: “Konportman bann dimoun ki ti vin asiste sa lasanble, ti diferan avek konportman bann dimoun ki ti vin get sport. Bann Temwen Zeova ti zantiy, zot ti byen sanze e zot zanfan ti konport zot byen.” I ti osi dir: “Sa bann dimoun ti paret ere e anpe. Mon ti anvi koumsa mon osi. Mon pa rapel bann diskour ki ti ganny fer sa zour, me mon ankor rapel lafason ki bann Temwen Zeova ti konport zot.” c Nou konport nou dan sa fason parski nou vreman kontan kanmarad. Nou kontan nou bann frer ek ser, alor nou tret zot byen e avek respe.

⁹ En frer ki apel John ti annan en leksperyans en pe parey ler i ti konmans asiste renyon. I ti dir: “Tou dimoun ti zantiy e sa ti enpresyonn mwan. Zot ti telman zantiy ki mon ti krwar ki zot bann sen. Zot lanmour senser ti fer mwan konvenki ki mon ti’n trouv sa vre larelizyon.” d Bann leksperyans koumsa ek en kantite lezot ankor i montre ki pep Zeova i bann vre Kretyen.

10. Kan ki nou annan sa loportinite pour montre ki nou kontan nou bann frer ek ser? (Vwar osi not.)

¹⁰ Parey nou’n vwar lo konmansman sa lartik, tou nou bann frer ek ser i enparfe. Parfwa, nou bann frer ek ser pour dir oubyen fer en keksoz ki ofans nou. e (Zak 3:2) Ler sa i arive, nou kapab montre ki nou vreman kontan nou bann frer ek ser par lafason ki nou reazir. Dan bann sityasyon koumsa, ki nou kapab aprann avek legzanp ki Zezi in kite?​—Zan 13:15.

11. Ki move tre Zak ek Zan ti pe demontre? (Vwar portre.)

¹¹ Zezi pa ti ekspekte ki son bann disip i fer keksoz dan en fason parfe. O kontrer, Zezi ti ed zot pour travay lo zot bann febles e pour fer bann sanzman  pour ki zot kapab fer plezir Zeova. En fwa, Zak ek Zan ki ti de zapot, ti fer zot manman demann Zezi pour donn zot bann plas enportan dan Rwayonm. (Mat. 20:20, 21) Sa ki Zak ek Zan ti fer, ti montre ki zot ti orgeye e ki zot ti anvi vin pli enportan ki lezot.​—Prov. 16:18.

12. Eski zis Zak ek Zan ki ti demontre bann move tre? Eksplike.

¹² Pa zis Zak ek Zan ki ti demontre bann move tre sa zour. Remarke ki mannyer lezot zapot ti reazir: “Ler sa dis lezot zapot ti tann sa, zot ti byen mekontan avek sa de frer.” (Mat. 20:24) I kapab ki Zak, Zan ek lezot zapot ti dispit avek kanmarad. Petet lezot zapot ti dir en keksoz en pe koumsa: ‘Ki zot krwar zot ete pour zot demann bann pozisyon pli enportan dan Rwayonm? Pa zis zot ki’n travay dir avek Zezi. Nou osi nou merite ganny bann pozisyon enportan zis parey zot.’ Nenport kwa ki zot ti mazinen oubyen dir, sa zour zot ti oubliye ki zot devret toultan demontre lanmour ek labonte anver kanmarad.

13. Ki mannyer Zezi ti reazir ler son bann zapot ti fer fot? (Matye 20:25-28)

¹³ Ki Zezi ti fer dan sa sityasyon? I pa ti ankoler avek zot. Zezi pa ti dir ki i pou al rod bann pli bon zapot, bann ki ti pou demontre plis limilite e ki ti pou toultan demontre lanmour anver kanmarad. O kontrer, Zezi ti demontre pasyans e i ti koz avek zot parski i ti konnen ki  zot ti anvi fer sa ki byen. (Lir Matye 20:25-28.) Zezi ti kontinyen tret son bann zapot dan en bon fason menm si apre sa zot ti dispit ankor konsernan lekel ki pli gran parmi zot.​—Mark 9:34; Lik 22:24.

14. Dan ki kalite lanvironnman bann zapot Zezi ti’n grandi?

¹⁴ Nou kapab asire ki Zezi ti gard antet lafason ki bann zapot ti’n grandi. (Zan 2:24, 25) Bann sef larelizyon Zwif ek Farizyen ti ansennyen ki zis bann dimoun ki ti annan en o pozisyon ki ti enportan. (Mat. 23:6; vwar sa video The Front Seats in the Synagogue ki dan not letid dan nwtsty dan Matye 23:6.) Bann sef larelizyon Zwif ti osi krwar ki zot ti bann pli bon dimoun. f (Lik 18:9-12) Zezi ti konpran ki sa kalite fason panse ti kapab annan en lefe lo lopinyon ki bann zapot ti annan lo zot lekor e lo lezot. (Prov. 19:11) I pa ti ekspekte ki son bann disip pa ti pou zanmen fer fot e i ti demontre pasyans anver zot ler zot ti fer fot. I ti konnen ki zot ti anvi fer sa ki byen. Alor avek pasyans i ti ansenny zot pour demontre plis limilite e pour demontre lanmour anver kanmarad, olye toultan esey vin pli meyer ki kanmarad.

15. Ki nou kapab aprann avek sa ki ti arive ant Zak, Zan ek lezot zapot?

¹⁵ Nou kapab aprann en kantite avek sa resi konsernan Zak ek Zan. I ti mal pour zot demann Zezi en plas enportan dan Rwayonm. Me sa ki lezot zapot osi ti fer ti mal parski zot pa ti esey reste ini avek kanmarad. Me Zezi ti demontre lanmour ek labonte anver tou le 12 zapot. Ki leson nou kapab aprann? Menm si sa ki lezot i fer i enportan, lafason ki nou reazir ler zot fer fot i osi enportan. Kwa ki kapab ed nou? Ler nou ankoler avek en frer oubyen en ser, nou kapab demann nou lekor: ‘Akoz mon ankoler avek sa ki i’n fer? Eski sa i montre ki mon annan en move tre ki mon bezwen travay lo la? Eski i kapab ki sa dimoun ki’n ofans mwan pe fer fas avek en problenm? Menm si mon santi ki mon annan rezon pour ankoler, eski mon kapab demontre lanmour e pardonn sa dimoun?’ Ler nou demontre lanmour anver kanmarad, nou montre ki nou bann vre disip Zezi.

16. Kwa ankor ki nou kapab aprann avek sa legzanp ki Zezi in kite?

¹⁶ Sa legzanp ki Zezi in kite, i osi ansenny nou pour esey konpran nou bann frer ek ser. (Prov. 20:5) I vre ki Zezi i kapab lir dan leker e nou nou pa kapab. Me nou kapab demontre pasyans anver nou bann frer ek ser ler zot fer en keksoz ki fer nou ankoler. (Efe. 4:1, 2; 1 Pyer 3:8) I pou pli fasil pour nou fer sa, si nou konn plis keksoz lo zot. Annou vwar en legzanp.

17. Ki byenfe en sirveyan rezyonal ti gannyen ler i ti aprann konn en frer pli byen?

¹⁷ En sirveyan rezyonal i rapel en frer dan enn bann kongregasyon kot i ti pe servi dan Les Lafrik. O konmansman sa sirveyan rezyonal ti vwar sa frer en pti pe brit. Ki mannyer sa sirveyan rezyonal ti reazir? I dir: “Olye evite pas letan  avek sa frer, mon ti deside pour konn li pli byen.” Ler sa sirveyan rezyonal ti pas letan avek sa frer, i ti aprann konsernan lafason ki sa frer ti’n grandi e lefe ki sa ti annan lo lafason ki sa frer i tret lezot. Sa sirveyan rezyonal ti osi dir: “Ler mon ti aprann ki kantite i ti difisil pour li fer bann sanzman ki i ti anvi fer pour li kapab enterakte avek lezot e ki kantite i ti’n vreman sanze, mon ti apresye li e nou ti vin de bon zanmi.” Ler nou esey konpran nou bann frer ek ser, souvandfwa nou vwar li pli fasil pour demontre lanmour anver zot.

18. Ki kestyon nou kapab demann nou lekor si en frer oubyen en ser in ofans nou? (Proverb 26:20)

¹⁸ Parfwa nou kapab santi ki nou bezwen koz avek en frer oubyen ser ki’n ofans nou. Premyerman i ti pou byen si ou demann ou lekor bann kestyon en pe parey: ‘Eski mon annan tou lenformasyon?’ (Prov. 18:13) ‘Eski petet i pa ti son lentansyon pour ofans mwan?’ (Ekle. 7:20) ‘Eski mon pa’n zanmen fer en fot en pe parey?’ (Ekle. 7:21, 22) ‘Si mon koz avek sa dimoun lo sa sityasyon, eski sa pa pou fer problenm vin pli grav?’ (Lir Proverb 26:20.) Ler nou pran letan pour reflesir lo bann kestyon koumsa, nou kapab realize ki sa lanmour ki nou annan pour nou bann frer ek ser i kapab motiv nou pour aret mazin lo sa ki’n arive.

19. Ki ou determinen pour fer?

¹⁹ Temwen Zeova pe montre ki zot bann vre disip Zezi par demontre lanmour anver kanmarad. Sakenn parmi nou i montre ki nou vreman bann disip Zezi ler nou demontre lanmour senser anver nou bann frer ek ser menm si zot fer fot. Ler nou demontre lanmour senser anver nou bann frer ek ser, sa i kapab ed lezot dimoun pour rekonnet sa vre larelizyon e pour zwenn avek nou pour ador Zeova sa Bondye lanmour. Alor annou determinen pour kontinyen demontre sa lanmour ki idantifye nou konman bann vre Kretyen.