1-2. Ki en dimoun i bezwen fer avan i batize?

 PANDAN sa dernyen senk an, plis ki en milyon dimoun in batize e vin en Temwen Zeova. En kantite parmi zot i parey Timote, en Kretyen dan premye syek e zot in gannyen laverite “depi ptipti.” (2 Tim. 3:14, 15) Serten in aprann konsernan Zeova apre ki zot in vin adilt e lezot in aprann konn Zeova dan zot vye zour. En pe letan pase, en madanm ki ti etidye Labib avek Temwen Zeova ti batize a laz 97 an!

² Si ou en etidyan Labib oubyen si ou’n grandi dan laverite avek bann paran ki Temwen Zeova, eski ou pe mazin pour batize? Sa i en bon lobzektif pour annan! Me avan ou batize, ou pou bezwen dedye ou lavi avek Zeova. Sa lartik pou ed ou konpran ki i vedir pour dedye ou lavi avek Bondye. Sa lartik pou osi ed ou vwar akoz ki ou napa rezon pour per pour dedye ou lavi avek Zeova e batize ler ou pare.

KI I VEDIR POUR DEDYE OU LAVI AVEK BONDYE?

3. Ki serten dimoun dan Labib ki ti dedye zot lavi avek Zeova?

³ Dapre Labib, en dimoun ki’n dedye son lavi avek Zeova, in ganny met apar pour en servis spesyal. Bann Izraelit ti en nasyon ki ti’n ganny dedye avek Zeova. Me serten Izraelit ti’n ganny dedye avek Zeova dan en fason spesyal. Par egzanp, Aaron ti met en “siny dedikasyon ki sen,” setadir en plak klate annor devan lo son tirban. Sa plak annor ti montre ki Aaron ti’n ganny met apar pour servi Zeova dan en fason spesyal, setadir konman granpret. (Lev. 8:9) Bann Nazireen osi ti’n ganny dedye avek  Zeova dan en fason spesyal. Sa mo “Nazireen” i sorti dan sa mo Ebre nazirʹ ki vedir “sa enn ki’n ganny met apar” oubyen “sa enn ki’n ganny dedye.” Bann Nazireen ti bezwen obei bann lord ki ti’n ganny ekrir pour zot dan Lalwa Moiz.—Nom. 6:2-8.

4. (a) Ler ou dedye ou lavi avek Zeova, ki keksoz spesyal ki vin ou lobzektif aprezan? (b) Ler en dimoun i “aret viv zis pour li menm,” ki sa i enplike? (Vwar portre.)

⁴ Ler ou dedye ou lavi avek Zeova, ou swazir pour vin en disip Zezi Kri e ou fer lavolonte Bondye vin sa keksoz pli enportan dan ou lavi. Ler ou dedye ou lavi avek Zeova, ki sa i enplike? Zezi ti dir: “Si en dimoun i oule swiv mwan, fodre i aret viv zis pour li menm.” (Mat. 16:24) Sa term Grek ki’n ganny tradwir “fodre i aret viv zis pour li menm” i osi kapab ganny tradwir “dir non avek son lekor.” Konman en dimoun ki’n dedye ou lavi avek Zeova, ou pou bezwen rezet okenn keksoz ki pa fer plezir Zeova. (2 Kor. 5:14, 15) Sa i enkli rezet “bann move kondwit lekor enparfe,” parey imoralite seksyel. (Gal. 5:19-21; 1 Kor. 6:18) Eski ler ou obei sa bann lord sa i fer ou lavi difisil? Si ou kontan Zeova e ou asire ki son bann lalwa i pour ou prop dibyen, ou pa pou vwar ou lavi difisil. (Ps. 119:97; Iza. 48:17, 18) En frer ki apel Nicholas i dir: “Ou kapab vwar bann standar Zeova parey baraz en prizon ki anpes ou fer sa ki ou anvi oubyen parey en baraz kot i annan lyon, ki protez ou kont danze.”

5. (a) Ki mannyer ou dedye ou lavi avek Zeova? (b) Ki diferans i annan ant ler ou dedye ou lavi avek Zeova e ler ou batize? (Vwar portre.)

⁵ Ki mannyer ou dedye ou lavi avek Zeova? Dan en lapriyer, ou promet Zeova ki ou pou ador zis li e ki ou pou fer son  lavolonte vin sa keksoz pli enportan dan ou lavi. Anfet ou pe promet Zeova ki ou pou kontinyen kontan li “avek tou ou leker, avek tou ou nanm, avek tou ou lespri e avek tou ou lafors.” (Mark 12:30) Ler ou dedye ou lavi avek Zeova, ou fer li an prive e i ant ou avek Zeova. De lot kote, batenm i ganny fer an piblik e i montre lezot ki ou’n dedye ou lavi avek Zeova. Ler ou dedye ou lavi avek Zeova, sa i en promes ki serye. Ou devret gard sa promes e Zeova i ekspekte ki ou fer sa.—Ekle. 5:4, 5.

AKOZ OU DEVRET DEDYE OU LAVI AVEK ZEOVA?

6. Kwa ki motiv en dimoun pour dedye son lavi avek Zeova?

⁶ Sa rezon prensipal ki ou dedye ou lavi avek Zeova, i akoz ou kontan li. Ou lanmour pa baze zis lo ou santiman. Ou’n aprann pour kontan Zeova ler ou’n ganny “konnesans egzakt” konsernan li ek son plan. (Kol. 1:9) Ler ou’n etidye Labib, sa in konvenk ou (1) ki Zeova i egziste, (2) ki Labib in ganny enspire par Zeova e (3) ki Zeova i servi son lorganizasyon pour akonpli son lavolonte.

7. Ki nou devret pe deza fer avan nou dedye nou lavi avek Zeova?

⁷ Bann dimoun ki dedye zot lavi avek Zeova i devret konn bann lansennyman de baz ki dan Parol Bondye e zot devret pe viv dapre bann standar Bondye. Zot fer zot mye pour koz avek lezot lo sa ki zot in aprann. (Mat. 28:19, 20) Zot in devlop plis lanmour pour Zeova e zot vreman anvi ador zis Zeova. Eski pa sanmenm sa ki’n arive avek ou? Vi ki ou  kontan Zeova avek tou ou leker, ou pa pou vwar sa desizyon pour dedye ou lavi avek li e batize konman en fason pour fer plezir ou paran ouswa sa dimoun ki’n etidye Labib avek ou e ou pa pou fer li zis akoz ou bann zanmi in fer li.

8. Ki mannyer ler ou rekonesan, sa pou ed ou pour dedye ou lavi avek Zeova? (Psonm 116:12-14)

⁸ Ler ou mazin tou bann keksoz ki Zeova in fer pour ou, ou pou rekonesan anver li e ou pou anvi dedye ou lavi avek li. (Lir Psonm 116:12-14.) Labib i annan rezon pour dir ki Zeova i sa Enn ki donn “tou don ki bon e tou kado parfe.” (Zak 1:17) Sa pli gro kado ki Zeova in donn nou i son Garson Zezi konman sakrifis. Zis mazin sa! Sa ranson in fer li posib pour ou annan en lanmitye pros avek Zeova. Zeova in osi donn ou sa loportinite pour viv pour touzour. (1 Zan 4:9, 10, 19) Ler ou dedye ou lavi avek Zeova, sa i enn bann pli bon fason ki ou kapab montre Zeova ki ou rekonesan pour sa gran lanmour ki in demontre ler i ti donn son Garson konman sakrifis e osi pour bann lezot benediksyon ki in donn ou. (Det. 16:17; 2 Kor. 5:15) Dan liv Viv ere pour touzour! leson 46 pwen 4, i koz lo bann keksoz ki ed nou devlop sa lapresyasyon pour Zeova. Dan sa leson i osi annan en video trwa minit ki annan pour tit Presenting Your Gifts to God.

ESKI OU’N PARE POUR DEDYE OU LAVI AVEK ZEOVA E BATIZE?

9. Akoz en dimoun pa devret santi li anba presyon pour dedye son lavi avek Zeova?

⁹ Petet ou santi ki ou pa ankor pare pour dedye ou lavi avek Zeova e batize. Petet ou ankor bezwen fer bann sanzman pour ou kapab viv an armoni avek bann standar Zeova ouswa ou bezwen plis letan pour ranforsi ou lafwa. (Kol. 2:6, 7) Pa tou etidyan Labib ki fer progre parey. I annan ki fer progre pli vitman e i annan ki fer progre pli dousman e pa tou zenn ki pare pour dedye zot lavi avek Zeova e batize ler zot ariv en serten laz. Esey vwar kote ou bezwen amelyore e apre fer sa ki ou kapab dapre ou abilite me pa konpar ou avek en lot dimoun.—Gal. 6:4, 5.

10. Ki ou kapab fer si ou vwar ki ou pa ankor pare pour dedye ou lavi avek Zeova e batize? (Vwar sa bwat “ Pour bann zenn ki pe grandi dan laverite.”)

¹⁰ Menm si ou realize ki ou pa ankor pare pour dedye ou lavi avek Zeova, kontinyen gard sa konman en lobzektif. Demann Zeova pour ed ou fer bann sanzman ki ou bezwen fer. (Fili. 2:13; 3:16) Ou kapab asire ki i pou ekout ou lapriyer e i pou ed ou.—1 Zan 5:14.

AKOZ SERTEN I EZITE POUR DEDYE ZOT LAVI AVEK ZEOVA E BATIZE?

11. Ki mannyer Zeova pou ed nou reste fidel avek li?

¹¹ Serten dimoun i pare pour dedye zot lavi avek Zeova e batize me zot ezite pour fer li. I kapab ki zot per ki apre ki zot in batize, zot pou fer en pese grav e zot pou ganny ekskli dan kongregasyon. Si ou santi koumsa, ou kapab asire ki Zeova pou donn ou tou sa ki ou bezwen pour ou kapab “viv dan en fason ki onor [li] e ki fer li vreman plezir.” (Kol. 1:10) I pou osi donn ou lafors pour fer sa ki byen. Zeova in montre ki i kapab fer sa parski in ed en kantite dimoun pour fer sa ki byen. (1 Kor. 10:13) I pour sa rezon ki pa tro bokou dimoun ki ganny ekskli  dan kongregasyon. Zeova i ed son pep pour reste fidel.

12. Ki nou kapab fer pour nou pa fer en pese grav?

¹² Tou imen i enparfe e zot ganny tante pour fer sa ki mal. (Zak 1:14) Me ou ki bezwen swazir ki ou pou fer ler ou ganny tante. Anfet, ou ki swazir ki mannyer ou pou viv ou lavi. Menm si serten dimoun i dir ki nou pa kapab kontrol nou santiman ek sa ki nou fer, sa pa vre. Nou kapab aprann pour kontrol nou bann move dezir. Alor menm si ou ganny bann move dezir, ou kapab swazir pour pa fer sa ki mal. Pour ed ou fer sa, ou bezwen priye toulezour. Annan en bon progranm pour fer letid personnel dan Parol Bondye. Asiste renyon dan kongregasyon. Koz avek lezot konsernan ou lafwa. Ler ou kontinyen fer sa bann keksoz, sa pou donn ou lafors pour reste fidel avek Zeova. Pa zanmen oubliye ki Zeova osi pou ed ou reste fidel.—Gal. 5:16.

13. Ki mannyer Zozef i en bon legzanp pour nou?

¹³ I pou pli fasil pour reste fidel avek Zeova si ou deside davans ki ou pou fer si ou ganny tante. Dan Labib i annan legzanp plizyer dimoun ki ti fer sa menm si zot osi zot ti enparfe. Par egzanp, plizyer fwa madanm Potifar ti esey fer Zozef dormi avek li. Me Zozef ti deza konnen ki mannyer i pou reazir. Labib i dir ki Zozef “ti refize” e i ti dir: “Ki mannyer mon kapab fer en keksoz sitan mal e fer pese kont Bondye?” (Zen. 39:8-10) I kler ki Zozef ti konnen ki mannyer i ti pou reazir menm avan ki madanm Potifar ti esey tant li. Sa ti fer li pli fasil pour li fer sa ki byen ler i ti ganny tante.

14. Ki mannyer nou kapab aprann pour rezet bann tantasyon?

¹⁴ Ki mannyer ou kapab swiv legzanp Zozef e reste fidel avek Zeova ler ou ganny tante? Ou kapab deside depi la konmela ki ou pou fer ler ou ganny tante. Aprann pour rezet deswit bann keksoz ki Zeova pa kontan e swazir pour pa kontinyen mazin lo sa bann keksoz. (Ps. 97:10; 119:165) Koumsa, ler ou ganny tante ou pa pou fer pese. Ou pou konnen ki mannyer ou pou reazir parski ou pou’n fini fer ou desizyon.

15. Ki mannyer en dimoun i montre ki i pe “vreman rod” Zeova? (Ebre 11:6)

¹⁵ Dan ou ka, petet ou konnen ki ou’n  trouv laverite e ki ou anvi servi Zeova avek tou ou leker me kantmenm sa ou ezite pour dedye ou lavi avek Zeova e batize. Ou kapab fer parey Lerwa David ti fer e sipliy Zeova: “O mon Bondye, egzamin mwan byen pour konn sa ki dan mon leker. Egzamin mwan pour ki ou konn sa ki pe fatig mwan. Gete si i annan okenn move keksoz dan mwan e gid mwan lo semen leternite.” (Ps. 139:23, 24) Zeova i beni bann ki pe “vreman rod li.” Ler ou fer zefor pour atenn ou lobzektif pour dedye ou lavi avek Zeova e batize, ou pe montre Zeova ki ou pe vreman rod li.—Lir Ebre 11:6.

KONTINYEN VIN PROS AVEK ZEOVA

16-17. Ki mannyer Zeova i atir bann ki pe grandi dan laverite ver li? (Zan 6:44)

¹⁶ Zezi ti dir ki Zeova i sa Enn ki atir bann disip ver li. (Lir Zan 6:44.) I vreman tousan pour mazin sa e sa ki i vedir pour ou. Zeova in vwar en keksoz ki bon dan sak dimoun ki i atir ver li. I vwar sak dimoun ki i atir ver li konman “spesyal” oubyen konman son “propriyete ki annan valer.” (Det. 7:6; not.) I koumsa ki i vwar ou.

¹⁷ Petet ou en zenn ki pe grandi dan laverite. I kapab ki ou santi ki ou pe servi Zeova zis akoz ou paran pe fer li e pa akoz Zeova ki’n atir ou ver li. Kantmenm sa, Labib i dir: “Vin pros avek Bondye e i pou vin pros avek zot.” (Zak 4:8; 1 Kron. 28:9) Ler ou fer zefor pour vin pros avek Zeova, li osi i vin pros avek ou. Zeova pa vwar ou zis konman en dimoun ki form parti en group. I atir sak dimoun, enkli bann ki’n grandi dan laverite. Alor ler en dimoun ki’n grandi dan laverite i fer zefor pour vin pros avek Zeova, Zeova i reazir zis parey in ganny dir dan Zak 4:8.—Konpar 2 Tesalonisyen 2:13.

18. Ki nou pou vwar dan sa lartik ki swiv? (Psonm 40:8)

¹⁸ Ler ou dedye ou lavi avek Zeova e ou batize, ou pe swiv legzanp Zezi. Zezi ti pare pour fer tou sa ki son Papa ti demann li pour fer. (Lir Psonm 40:8; Ebr. 10:7) Dan sa lartik ki swiv, nou pou vwar kwa ki pou ed ou pour kontinyen servi Zeova fidelman apre ou batenm.