1. Ki santiman serten serviter fidel Zeova i kapab annan?

 I VREMAN rekonfortan pour konnen ki konman pep Zeova nou annan son laprouvasyon. Labib i dir: “Zeova i pran plezir dan son pep.” (Ps. 149:4) Me parfwa serten i kapab telman dekouraze ki zot demande, ‘Eski mwan mon annan laprouvasyon Zeova?’ En kantite serviter fidel Zeova dan letan Labib ti santi koumsa parfwa.—1 Sam. 1:6-10; Zob 29:2, 4; Ps. 51:11.

2. Lekel ki annan laprouvasyon Zeova?

² Labib i montre ki bann imen enparfe i kapab ganny laprouvasyon Zeova. Ki mannyer nou kapab fer sa? Nou bezwen demontre lafwa dan Zezi Kri e batize. (Zan 3:16) Dan sa fason, nou montre lezot ki nou’n repantir pour nou bann pese e nou’n fer en promes avek Bondye pour fer son lavolonte. (Akt 2:38; 3:19) Zeova i kontan ler nou fer sa bann keksoz pour nou kapab annan en bon lanmitye avek li. Tan ki nou kontinyen fer nou mye pour gard sa promes ki nou’n fer avek Zeova pour servi li fidelman, nou ganny laprouvasyon Zeova e Zeova i vwar nou konman enn son zanmi.—Ps. 25:14.

3. Ki nou pou vwar aprezan?

³ Akoz parfwa serten i krwar ki zot napa laprouvasyon Zeova? Ki mannyer Zeova i fer nou konnen ki nou annan son laprouvasyon? Ki mannyer en Kretyen i kapab asire ki i annan laprouvasyon Bondye?

AKOZ SERTEN I KRWAR KI ZOT NAPA LAPROUVASYON ZEOVA?

4-5. Ki nou kapab asire menm si nou santi ki nou pa vo nanryen?

⁴ En kantite parmi nou i santi ki nou pa vo nanryen e parfwa nou santi koumsa depi ki nou ti ankor zanfan.  (Ps. 88:15) En frer ki apel Adrián i dir: “Mon’n toultan santi ki mon pa vo nanryen. Mon rapel ler mon ti ankor zanfan, mon ti priye ki mon fanmir i reisi ariv dan nouvo lemonn menm si mon ti asire ki mwan mon pa ti merite pour viv dan nouvo lemonn.” Tony, ki li i pa ti’n grandi dan en fanmir Temwen Zeova, i dir: “Mon paran pa’n zanmen dir mwan ki zot kontan mwan oubyen ki zot fyer akoz mwan. Sa ti fer mwan santi ki mon pa ti pou zanmen kapab fer zot plezir.”

⁵ Si parfwa nou santi ki nou pa vo nanryen, rapel ki Zeova li menm, in atir nou ver li. (Zan 6:44) Zeova i vwar bann bon kalite ki nou annan, ki petet nou, nou pa vwar e i konnen ki kalite dimoun nou vreman ete. (1 Sam. 16:7; 2 Kron. 6:30) Alor ler i dir ki nou presye, nou kapab annan konfyans dan li.—1 Zan 3:19, 20.

6. Ki mannyer zapot Pol ti santi konsernan bann fot ki i ti’n fer?

⁶ Avan ki nou ti konn laverite, serten parmi nou ti fer bann keksoz ki petet i ankor fer nou santi nou koupab. (1 Pyer 4:3) Menm bann Kretyen ki’n servi Zeova fidelman i kapab ki zot pe lalit avek bann febles. Me ou, eski parfwa ou santi ki Zeova pa kapab pardonn ou? Si wi, ou kapab ganny rekonforte ler ou konnen ki i annan lezot serviter fidel Zeova ki’n santi parey ou. Par egzanp, zapot Pol ti santi li dekouraze ler i ti mazin lo bann fot ki i ti’n fer. (Rom. 7:24) Byensir, Pol ti’n repantir pour son bann pese e i ti’n batize me i ti konsider son lekor konman “pli pti parmi tou bann zapot” e “pli pir” ki bann ki annan en move lavi.—1 Kor. 15:9; 1 Tim. 1:15.

7. Ki nou devret gard antet konsernan bann fot ki nou’n fer?

⁷ Nou Papa ki dan lesyel i promet pour pardonn nou si nou repantir pour nou bann pese. (Ps. 86:5) Alor si nou vreman regrete pour bann fot ki nou’n fer, nou kapab annan konfyans ki sa ki Zeova in dir, i vre e ki i’n pardonn nou.—Kol. 2:13.

8-9. Ki nou kapab fer si nou santi ki nou pa pou zanmen kapab fer ase pour fer Zeova plezir?

⁸ Nou tou nou anvi fer tou sa ki nou kapab pour servi Zeova. Me serten i kapab santi ki zot pa pou zanmen kapab fer ase pour ganny laprouvasyon Zeova. En ser ki apel Amanda i dir: “Mon annan sa tandans pour krwar ki donn Zeova mon meyer i vedir ki mon toultan bezwen fer plis. Alor souvan, mon esey fer plis ki sa ki mon kapab. Ler mon ‘pa reisi,’ mon krwar ki Zeova i dezapwente avek mwan zis parey mon dezapwente avek mon lekor.”

⁹ Ki nou kapab fer si nou santi ki nou pa pou zanmen kapab fer ase pour fer Zeova plezir? Rapel ki Zeova i rezonnab. I pa zanmen demann nou pour fer plis ki sa ki nou kapab. I apresye tou sa ki nou pe fer pour li, tan ki nou donn nou meyer. Osi, nou kapab reflesir lo legzanp bann dimoun dan Labib ki ti servi Zeova avek tou zot leker. Par egzanp, reflesir lo legzanp zapot Pol. Pour plizyer lannen, i ti travay vreman dir e i ti vwayaz plizyer kilomet e i ti etabli plizyer kongregasyon. Me ler keksoz ti sanze dan son lavi e i pa ti kapab fer otan dan predikasyon parey i ti fer oparavan, eski sa i vedir ki i ti nepli annan laprouvasyon Bondye? Non. I ti kontinyen fer sa ki i ti kapab e Zeova ti beni li. (Akt 28:30, 31) Pareyman, sa ki nou kapab donn Zeova i kapab sanze parfwa. Me sa ki enportan pour Zeova, i nou motivasyon. Aprezan annou vwar serten fason ki Zeova i montre ki nou annan son laprouvasyon.

 KI MANNYER ZEOVA I MONTRE KI NOU ANNAN SON LAPROUVASYON?

10. Ki mannyer nou kapab “tann” Zeova pe dir nou ki nou annan son laprouvasyon? (Zan 16:27)

¹⁰ I donn nou Labib. Zeova i kontan pour montre son pep ki i kontan zot e ki zot annan son laprouvasyon. Labib i mansyonn de fwa kot Zeova ti dir Zezi ki i son Garson ki i kontan e ki i’n aprouve. (Mat. 3:17; 17:5) Eski ou ti pou kontan tann Zeova dir ou ki ou annan son laprouvasyon? Zeova pa koz avek nou direkteman me i koz avek nou atraver Labib. Ler nou lir konsernan sa ki Zezi ti dir avek son bann disip dan bann Levanzil, i konmsi nou pe tann Zeova pe dir nou sa bann parol. (Lir Zan 16:27.) Zezi ti imit personnalite son Papa dan en fason parfe. Alor ler nou lir ki Zezi ti dir son bann disip enparfe ki zot ti annan son laprouvasyon, nou kapab imazin Zeova pe dir sa bann parol avek nou.—Zan 15:9, 15.

11. Akoz ler nou pas dan problenm, sa pa vedir ki nou nepli annan laprouvasyon Zeova? (Zak 1:12)

¹¹ I donn nou sa ki nou bezwen. Zeova i vreman anvi ed nou. Par egzanp, i ed nou ganny sa ki nou bezwen pour viv. Parfwa, Zeova i kapab les bann move keksoz arive avek nou, zis parey i ti fer avek Zob. (Zob 1:8-11) Ler nou pas dan problenm, sa pa vedir ki nou nepli annan laprouvasyon Zeova. O kontrer, sa i en loportinite pour montre Zeova ki kantite nou kontan li e nou annan konfyans dan li. (Lir Zak 1:12.) Nou pou osi vwar ki kantite i kontan nou e ki mannyer i pe ed nou pour andire.

12. Ki nou kapab aprann avek leksperyans Dmitrii?

¹² Annou vwar leksperyans en frer ki apel Dmitrii, ki reste dan en pei Lazi. Dmitrii ti perdi son travay e pour plizyer mwan, i pa ti kapab trouv en lot travay. I ti deside pour montre ki i annan konfyans dan Zeova par fer plis dan predikasyon. Plizyer mwan ti pase e Dmitrii pa ti kapab trouv en travay. Apre i ti ganny en maladi grav e sa ti fer ki i ti bezwen reste lo lili. I ti konmans krwar ki i ti nepli en bon msye oubyen en bon papa. I ti osi mazinen ki i nepli annan laprouvasyon Zeova. En zour swar, son fiy ti ekri sa parol ki trouve dan Izai 30:15 lo en bout papye. Sa verse i dir: “Zot pou annan lafors si zot reste kalm e annan konfyans dan mwan.” I ti anmenn sa papye pour son papa, ki ti lo lili e dir:  “Dadi, ler ou pa santi ou byen, ou kapab mazin sa verse.” Dmitrii ti realize ki Zeova ti pe ed son fanmir parski zot ti annan manze, lenz ek en landrwa pour reste. I dir: “Mwan, mon ti zis bezwen reste kalm e kontinyen annan konfyans dan mon Bondye.” Si ou pe fer fas avek en problenm en pe parey, ou kapab asire ki Zeova i kontan ou e i pou ed ou pour kontinyen andire.

13. Lekel ki Zeova i kapab servi pour fer nou konnen ki nou annan son laprouvasyon e ki mannyer Zeova i fer sa?

¹³ I donn nou, nou bann frer ek ser. Zeova i servi nou bann frer ek ser pour fer nou konnen ki nou annan son laprouvasyon. Par egzanp, i kapab servi lezot pour ankouraz nou ler nou vreman bezwen. Sa ti arive avek en ser ki reste dan en pei Lazi ler i ti vreman strese. Sa ser ti’n perdi son travay e i ti’n ganny en maladi grav. Apre son msye ti fer en pese grav e i ti nepli servi konman en ansyen. Sa ser i dir: “Mon pa ti konpran akoz tousala ti pe arive. Mon ti mazinen ki petet mon ti’n fer en keksoz mal e ki mon ti nepli annan laprouvasyon Zeova.” Nou ser ti sipliy Zeova pour reasir li ki i ti ankor annan son laprouvasyon. Ki mannyer Zeova ti fer sa? Sa ser i dir: “Bann ansyen dan kongregasyon ti koz avek mwan e zot ti ed mwan pour vwar ki Zeova i ankor kontan mwan.” Pli tar i ti demann Zeova pour reasir li ankor. I dir: “Sa menm zour, mon ti ganny en let sorti kot en group frer ek ser dan kongregasyon. Anmezir mon ti lir zot bann parol rekonfortan, mon ti santi ki Zeova ti’n tann mon lapriyer.” Parey nou’n vwar, souvandfwa Zeova i montre nou ki nou annan son laprouvasyon atraver bann parol rekonfortan ki nou bann frer ek ser i dir nou.—Ps. 10:17.

14. Ki en lot fason ki Zeova i montre ki nou annan son laprouvasyon?

 ¹⁴ En lot fason ki Zeova i montre ki nou annan son laprouvasyon i par servi nou bann frer ek ser pour donn nou konsey ler nou bezwen. Par egzanp, dan premye syek, Zeova ti servi zapot Pol pour ekri 14 let pour bann Kretyen. Dan sa bann let, Pol ti donn son bann frer ek ser konsey direk me i ti fer li avek lanmour. Akoz Zeova ti enspir Pol pour enkli sa bann konsey dan son bann let? Zeova i en bon Papa e i disiplin son bann zanfan “ki [i] kontan.” (Prov. 3:11, 12) Alor si en dimoun i donn nou konsey sorti dan Labib, sa pa vedir ki nou nepli annan laprouvasyon Bondye me o kontrer i montre ki Zeova i ankor kontan nou. (Ebr. 12:6) Ki lezot keksoz ki montre ki nou annan laprouvasyon Zeova?

LEZOT FASON KI FER NOU KONNEN KI NOU ANNAN LAPROUVASYON ZEOVA

15. Avek lekel ki Zeova i donn son lespri sen e ki mannyer sa i fer nou asire ki nou annan son laprouvasyon?

¹⁵ Zeova i donn son lespri sen avek bann ki annan son laprouvasyon. (Mat. 12:18) Reflesir lo sa kestyon, ‘Eski mon demontre serten kalite ki form parti fri lespri sen?’ Eski konmela ou annan plis pasyans avek lezot ki avan ou ti konn Zeova? Pli ou devlop bann zoli kalite ki form parti fri lespri sen Bondye, pli ou pou asire ki ou annan laprouvasyon Zeova.—Vwar sa bwat “ Fri lespri sen se . . . ”

16. Lekel ki Zeova i servi pour anons sa bon nouvel e ki mannyer sa i fer ou santi? (1 Tesalonisyen 2:4)

¹⁶ Zeova in konfye sa responsabilite pour anons sa bon nouvel avek bann ki annan son laprouvasyon. (Lir 1 Tesalonisyen 2:4.) Remark bann byenfe ki en ser ki apel Jocelyn ti gannyen ler i ti anons sa bon nouvel avek lezot. En zour bomaten ler Jocelyn ti leve, i ti santi li dekouraze. I dir: “Mon ti santi ki mon pa kapab fer nanryen ozordi. Mon ti pe fer pionye e sa zour, i ti mon zour predikasyon. Alor mon ti fer lapriyer e mon ti al predikasyon.” Sa zour bomaten Jocelyn ti zwenn Mary, en madanm ki ti zantiy e ki ti aksepte en letid Labib. Detrwa mwan pli tar, Mary ti dir Jocelyn ki ler Jocelyn ti tap son laport, i ti pe priy Bondye pour ed li. Ki Jocelyn i aprann avek sa leksperyans? I dir: “Mon ti santi konmsi Zeova ti pe dir mwan, ‘Ou annan mon laprouvasyon.’” Byensir pa tou  dimoun ki pou ekout sa mesaz ki nou pe anonse. Me nou kapab asire ki Zeova i kontan ler nou fer nou mye pour anons sa bon nouvel avek lezot.

17. Ki ou aprann avek sa ki Vicky ti dir konsernan ranson? (Psonm 5:12)

¹⁷ Zeova i aplik valer sa ranson avek bann ki annan son laprouvasyon. (1 Tim. 2:5, 6) Me ki nou kapab fer si nou ankor santi ki nou napa laprouvasyon Zeova menm si nou annan lafwa dan sa ranson e nou’n batize? Rapel ki nou pa kapab annan konfyans dan nou prop santiman me nou kapab annan konfyans dan Zeova. Zeova i konsider bann ki annan lafwa dan sa ranson konman bann dimoun drwat e i promet ki i pou beni zot. (Lir Psonm 5:12; Rom. 3:26) En ser ki apel Vicky ti medit lo sa ranson e sa ti ed li en kantite. En zour, apre ki i ti’n medit lo ranson, i ti realiz en keksoz. I dir: “Zeova in demontre pasyans anver mwan pour en kantite letan. . . . Me i ti konmsi mon ti pe dir Zeova, ‘Ou pa kapab kontan en dimoun parey mwan. Sakrifis ou Garson pa ase pour kouver mon bann pese.’” Ler i ti medit lo lefet ki Zeova in donn nou ranson konman kado, i ti konmans santi ki Zeova i kontan li. Ler nou medit lo ranson, sa osi i kapab ed nou santi ki Zeova i kontan nou e ki nou annan son laprouvasyon.

18. Ki nou kapab asire si nou kontinyen kontan nou Papa ki dan lesyel?

¹⁸ Menm si petet nou fer zefor pour aplik sa ki nou’n aprann dan sa lartik, parfwa nou kapab dekouraze e mazinen si nou annan laprouvasyon Zeova. Si sa i arive, rapel ki “bann ki kontinyen kontan [Zeova]” i ganny son laprouvasyon. (Zak 1:12) Alor kontinyen vin pros avek Zeova e fer zefor pour vwar bann fason ki Zeova pe montre ou ki ou annan son laprouvasyon. Osi gard antet ki Zeova “pa lwen avek sakenn ant nou.”—Akt 17:27.