1. Ki serten benediksyon nou gannyen akoz nou form parti lorganizasyon Zeova?

 I EN gran benediksyon pour form parti lorganizasyon Zeova pandan sa bann dernyen zour ki vreman difisil. Lavi dan sa lemonn pe vin deplizanpli difisil me Zeova i donn nou en fanmir spirityel ki ini pour ed nou. (Ps. 133:1) Zeova i osi ed nou pour annan en lavi fanmir ki ere. (Efe. 5:33–6:1) Osi, Zeova i donn nou lasazes ki nou bezwen pour nou kapab fer fas avek lenkyetid e pour nou zwaye.

2. Ki nou bezwen fer e akoz?

² Nou bezwen fer bokou zefor pour kontinyen servi Zeova fidelman. Akoz? Parski parfwa nou kapab ankoler akoz sa ki lezot in dir oubyen fer. Nou kapab osi santi nou dekouraze ler nou fer fot sirtou ler nou kontinyen repet menm fot. Nou bezwen kontinyen servi Zeova (1) ler en frer oubyen en ser i ofans nou, (2) ler nou konzwen i dezapwent nou e (3) ler nou dekouraze akoz bann fot ki nou fer. Dan sa lartik, nou pou vwar sak sa bann sityasyon. Dan sak sa bann sityasyon, nou pou vwar legzanp en dimoun ki ganny mansyonnen dan Labib ki ti reste fidel.

KONTINYEN SERVI ZEOVA, LER EN FRER OUBYEN EN SER I OFANS OU

3. Ki difikilte bann serviter Zeova i fer fas avek?

³ Sa ki kapab difisil pour nou. Serten nou bann frer ek ser i annan bann tre dan zot personnalite ki fatig nou. Lezot i kapab fer keksoz ki dezapwent nou oubyen zot pa tret nou dan en bon fason. I kapab arive ki bann ansyen i fer fot. Sa bann keksoz i kapab fer serten annan dout konsernan si zot dan lorganizasyon Bondye. Olye kontinyen servi Bondye “ansanm dan linite,” i kapab ki zot evit bann ki’n ofans zot oubyen menm aret vin renyon. (Zef. 3:9) Eski i saz pour fer sa? Annou vwar sa ki nou kapab aprann avek legzanp en dimoun  dan Labib ki ti pas dan bann problenm en pe parey.

4. Ki difikilte zapot Pol ti fer fas avek?

⁴ Legzanp en dimoun dan Labib. Zapot Pol ti konnen ki son bann frer ek ser dan kongregasyon ti enparfe. Par egzanp, ler i ti fek vin dan kongregasyon Zerizalenm, serten pa ti krwar ki i en disip Zezi. (Akt 9:26) Pli tar, serten ti dir bann move keksoz lo li pour fer lezot perdi konfyans dan li. (2 Kor. 10:10) En zour, Pol ti vwar en ansyen fer en move desizyon ki ti’n kapab fer lezot tonbe. (Gal. 2:11, 12) Osi, Mark ki ti enn bann bon zanmi Pol, ti dezapwent li. (Akt 15:37, 38) Pol ti’n kapab les sa bann sityasyon fer li evite pas letan avek bann ki’n ofans li. Kantmenm sa i ti kontinyen annan en bon pwennvi lo son bann frer ek ser e i ti kontinyen servi Zeova fidelman. Kwa ki ti ed Pol pour fer sa?

5. Kwa ki ti ed Pol pour reste pros avek son bann frer ek ser? (Kolosyen 3:13, 14) (Vwar portre.)

⁵ Pol ti kontan son bann frer ek ser. Sa lanmour ki Pol ti annan pour lezot, ti fer li konsantre lo zot bann zoli kalite olye lo zot bann defo. Sa lanmour ki Pol ti annan pour lezot, ti osi ed li pour fer sa ki i ti ekri dan Kolosyen 3:13, 14. (Lir.) Remark lafason ki Pol ti tret Mark. Pandan sa premye vwayaz misyonner ki Pol ti fer, Mark ti abandonn li. Kantmenm sa, Pol pa ti reste ankoler avek Mark. Pli tar, Pol ti ekri en zoli let pour bann Kretyen dan lavil Kolos e i ti dir ki Mark i enn son koleg travay ki i apresye e ki Mark ti “en gran sours rekonfor” pour li. (Kol. 4:10, 11) Ler Pol ti dan prizon Ronm i ti spesifikman demande ki Mark i vin ed li. (2 Tim. 4:11) I kler ki Pol ti pardonn son bann frer ek ser e i ti reste pros avek zot. Ki nou kapab aprann avek legzanp Pol?

6-7. Kwa ki pou ed nou pour kontinyen demontre lanmour anver nou bann frer ek ser menm si zot fer fot? (1 Zan 4:7)

⁶ Sa ki nou aprann. Zeova i anvi ki nou kontinyen demontre lanmour anver nou bann frer ek ser. (Lir 1 Zan 4:7.) Alor, ler nou bann frer ek ser pa tret nou dan en fason ki en Kretyen i devret, nou kapab annan konfyans ki zot anvi swiv bann prensip Labib e ki zot pa’n fer par ekspre pour bles nou santiman. (Prov. 12:18) Bondye i kontan son bann serviter fidel menm si zot fer fot. I kontinyen reste nou zanmi e i pa ankoler avek nou menm ler nou fer fot. (Ps. 103:9) Nou vreman rekonesan ki Zeova i pardonn nou e nou bezwen swiv son legzanp par pardonn lezot.—Efe. 4:32–5:1.

 ⁷ Nou bezwen osi gard antet ki anmezir lafen i aprose nou bezwen reste pros avek nou bann frer ek ser. Nou ekspekte ki nou pou ganny persekite plis ankor. I kapab ki nou ganny met dan prizon akoz nou lafwa. Si sa i arive, nou pou bezwen nou bann frer ek ser plis ki zanmen oparavan. (Prov. 17:17) Annou vwar sa ki ti arive avek en ansyen ki apel Josep a ki reste Lespanny. Josep ek lezot frer ti ganny mete ansanm dan prizon akoz zot pa ti oule antre dan larme. I dir: “Dan prizon, nou ti ganny mete ansanm e parfwa i ti fasil pour nou irit kanmarad. Nou ti bezwen siport kanmarad e pardonn kanmarad volonterman. Sa ti fer ki nou ti kapab reste ini e protez kanmarad. Nou ti antoure avek bann dimoun ki pa ti servi Zeova. En fwa, mon ti ganny dimal dan mon lebra e mon lebra ti bezwen ganny mete dan lakok. Alor mon pa ti kapab fer nanryen lo mon menm. Me en frer ki ti ansanm avek mwan dan prizon ti lav mon lenz e pran swen avek mwan. Mon bann frer ti demontre lanmour senser anver mwan ler mon ti vreman bezwen led.” Sa legzanp i montre nou ki nou annan bann bon rezon pour rezourd bann problenm ki nou annan avek kanmarad depi la konmela.

KONTINYEN SERVI ZEOVA, LER OU KONZWEN I DEZAPWENT OU

8. Ki difikilte bann koup marye i fer fas avek?

⁸ Sa ki kapab difisil pour nou. Dan tou maryaz i annan problenm. Labib i dir ki bann dimoun ki’n marye “pou ganny problenm dan zot lavi.” (1 Kor. 7:28) Akoz? Parski en msye ek madanm i de dimoun enparfe e zot annan diferan kalite ek keksoz ki zot kontan e pa kontan. I kapab ki zot sorti dan diferan kiltir e lafason ki zot in grandi i diferan. I kapab ki avek letan zot vwar bann tre dan personnalite zot konzwen ki zot pa ti vwar avan zot marye. Sa bann keksoz i kapab kree problenm dan en maryaz. Olye rekonnet ki zot tou le de zot fer fot e ki zot devret travay ansanm pour rezourd sa bann problenm, zot kapab blanm kanmarad pour bann problenm dan maryaz. Zot menm kapab konmans krwar ki zot devret separe oubyen divorse. Me eski si zot separe oubyen divorse sa pou rezourd zot bann problenm? b Annou vwar sa ki nou kapab aprann avek legzanp en madanm ki ti reste fidel avek Zeova menm si son msye ti fer son lavi vreman difisil.

9. Ki difikilte Abigel ti fer fas avek?

⁹ Legzanp en dimoun dan Labib. Abigel ti marye avek Nabal e Labib i dir ki Nabal ti en zonm brit ki ti konport li dan en move fason. (1 Sam. 25:3) I ti’n bezwen difisil pour Abigel viv avek en msye koumsa. Eski Abigel ti annan loportinite pour sorti dan sa maryaz? Wi. I ti ganny sa loportinite ler David, ki ti pou vin lerwa Izrael, ti vin touy son msye parski son msye ti’n ensilte David ek son bann zonm. (1 Sam. 25:9-13) Abigel ti’n kapab sove e les David touy Nabal me i pa ti fer sa. O kontrer, i ti konvenk David pour pa touy Nabal. (1 Sam. 25:23-27) Akoz i ti fer sa?

10. Petet kwa ki ti ed Abigel pour reste avek son msye menm si son msye ti fer son lavi vreman difisil?

¹⁰ Abigel ti kontan Zeova e i ti respekte standar Zeova konsernan maryaz. San  dout i ti konn sa ki Bondye ti’n dir Adan ek Ev ler Bondye ti fer sa premye maryaz. (Zen. 2:24) Abigel ti konnen ki maryaz ti en keksoz sakre pour Zeova. I ti anvi fer Bondye plezir e sa ti motiv li pour fer tou sa ki i ti kapab pour sov bann dimoun dan son lakour enkli son msye. I ti azir vitman pour anpes David touy Nabal. I ti pare pour demann leskiz pour en keksoz ki i pa ti’n fer. I kler ki Zeova ti kontan Abigel, en madanm ki ti annan kouraz e ki pa ti mazin zis son prop lekor. Ki en msye ek en madanm marye i kapab aprann avek legzanp Abigel?

11. (a) Ki Zeova i ekspekte avek en koup marye? (Efezyen 5:33) (b) Ki ou’n aprann avek sa ki Carmen ti fer pour sov son maryaz? (Vwar portre.)

¹¹ Sa ki nou aprann. Zeova i anvi ki bann koup marye i respekte sa laranzman maryaz menm si zot konzwen i en dimoun difisil pour viv avek. Sirman Bondye i kontan ler i vwar en koup marye pe fer zefor pour rezourd zot problenm e pour demontre lanmour ek respe pour kanmarad. (Lir Efezyen 5:33.) Annou vwar legzanp Carmen. Apepre si-z-an apre ki Carmen ti’n marye, i ti konmans etidye Labib avek Temwen Zeova e pli tar i ti batize. Carmen i dir: “Mon msye pa ti kontan mon desizyon. I ti zalou Zeova parski mon ti pe asiste renyon olye pas letan avek li e mon ti determinen pour servi Zeova. I ti maltret mwan e i ti dir ki i pou kit mwan.” Kantmenm sa Carmen ti reste avek son msye. Pour 50 an, i ti fer bokou zefor pour demontre lanmour ek respe pour son msye. Carmen i dir: “Anmezir bann lannen ti pase, mon ti aprann pour konpran pli byen lafason ki mon msye i santi e pour koz avek li dan en bon fason. Mon ti konnen ki maryaz i sakre pour Zeova alor mon ti fer tou sa ki mon ti kapab pour protez mon maryaz. Mon pa ti zanmen esey kite avek mon msye parski mon ti kontan Zeova.” c Si ou annan problenm dan ou maryaz, ou kapab asire ki Zeova pou siport ou e ed ou pour reste dan ou maryaz.

KONTINYEN SERVI ZEOVA, LER OU DEZAPWENTE AKOZ OU’N FER EN FOT GRAV

12. Ki difikilte nou kapab fer fas avek si nou fer en pese grav?

¹² Sa ki kapab difisil pour nou. Si nou fer en fot grav, sa i kapab fer nou vreman dekouraze. Labib i dir ki nou pese i kapab fer nou santi konmsi nou ‘leker in kase’ e fer nou santi nou “dan lapenn.” (Ps. 51:17) En  frer ki apel Robert in travay vreman dir pour plizyer lannen pour kalifye pour vin en serviter kongregasyon. Me i ti fer en pese grav e i ti realize ki i ti’n trai Zeova. I dir: “Ler mon ti realize ki mon ti’n fer, mon konsyans ti konmans fatig mwan en kantite. Apre sa, mon pa ti santi mwan byen. Mon ti plere e apre mon ti priy Zeova. Mon ti mazinen ki Bondye pa pou zanmen anvi ekout mon lapriyer ankor parski mon’n dezapwent li.” Si nou’n fer en pese grav, petet nou kapab konmans santi nou sitan dekouraze ki nou konmans krwar ki Zeova in abandonn nou e ki i napa rezon pour nou kontinyen servi li. (Ps. 38:4) Si ou’n deza santi ou koumsa, reflesir lo legzanp en dimoun dan Labib ki ti kontinyen servi Zeova menm si i ti fer en pese grav.

13. Ki pese grav ki zapot Pyer ti fer e ki lezot fot ki i ti fer avan sa?

¹³ Legzanp en dimoun dan Labib. Sa zour swar avan Zezi ti ganny touye, zapot Pyer ti fer bann fot ki finalman ti fer li fer en pese grav. Premyerman, Pyer ti fer vantar e i ti dir ki i pou reste fidel avek Zezi menm si lezot zapot i abandonn Zezi. (Mark 14:27-29) Apre ler zot ti dan zarden Zetsemane, plizyer fwa Pyer pa ti kapab reste eveye. (Mark 14:32, 37-41) Apre Pyer ti abandonn Zezi ler en lafoul avek lepe ek baton ti vin aret Zezi. (Mark 14:50) Finalman, trwa fwa Pyer ti dir ki i pa konn Zezi e i ti menm fer en serman ki i pa konn Zezi. (Mark 14:66-71) Ki mannyer Pyer ti reazir ler i ti realize ki i ti’n fer en pese grav? I pa ti kapab tenir e i ti plere petet parski i ti santi li koupab. (Mark 14:72) Zis mazinen ki mannyer leker Pyer ti fermal ler detrwa erdtan pli tar son zanmi Zezi ti ganny touye. I bezwen ki Pyer ti santi ki i pa vo nanryen.

14. Kwa ki ti ed Pyer pour kontinyen servi Zeova? (Vwar portre lo .)

¹⁴ I annan plizyer rezon akoz Pyer ti kapab kontinyen servi Zeova. I pa ti izol son lekor, i ti al kot lezot disip e i tre probab ki zot ti rekonfort li. (Lik 24:33) Osi, apre ki Zezi ti’n resisite, i ti aparet avek Pyer. I tre probab ki Zezi ti fer sa akoz i ti anvi ankouraz Pyer. (Lik 24:34; 1 Kor. 15:5) Pli tar dan plas reprimann Pyer, Zezi ti dir son zanmi ki i pou ganny bann pli gran responsabilite. (Zan 21:15-17) Pyer ti konnen ki i ti’n fer en pese grav me i ti kontinyen esey fer sa ki byen. Akoz? Parski i ti konnen ki Zezi i ankor kontan li. Pyer ti osi ganny sipor avek lezot disip. Ki nou kapab aprann avek legzanp Pyer?

15. Ki Zeova i anvi nou asire? (Psonm 86:5; Romen 8:38, 39) (Vwar portre.)

 ¹⁵ Sa ki nou aprann. Zeova i anvi ki nou asire ki i kontan nou e ki i pare pour pardonn nou. (Lir Psonm 86:5; Romen 8:38, 39.) Ler nou fer pese, nou santi nou koupab. I normal e i en bon keksoz ki nou santi koumsa. Me nou pa devret krwar ki Zeova i nepli kontan nou e ki i pa pou pardonn nou. O kontrer, nou devret rod led deswit. Robert, ki’n ganny mansyonnen pli boner, i dir: “Mon ti fer pese parski mon ti depan lo mon prop lafors pour reziste en tantasyon.” Robert ti realize ki i bezwen koz avek bann ansyen. I dir: “Ler mon ti fer sa, zot ti ed mwan pour santi ki Zeova i kontan mwan. Mon ti santi ki bann ansyen osi i kontan mwan. Zot ti ed mwan annan konfyans ki Zeova pa’n abandonn mwan.” Nou osi nou kapab asire ki Zeova i kontan nou en kantite e i pardonn nou si nou repantir pour nou bann pese, si nou rod led ki nou bezwen e si nou fer zefor pour pa repet menm fot. (1 Zan 1:8, 9) Sa pou ed nou pour kontinyen servi Zeova menm apre ki nou’n fer en fot.

16. Akoz ou determinen pour kontinyen servi Zeova?

¹⁶ Zeova i vreman apresye zefor ki nou fer pour servi li pandan sa bann dernyen zour ki vreman difisil. Avek led Zeova, nou kapab kontinyen servi li fidelman menm ler nou dezapwente avek bann fot ki nou’n fer oubyen avek bann fot ki lezot i fer. Nou kapab kontinyen demontre lanmour anver nou bann frer ek ser e pardonn zot menm si zot ofans nou. Nou kapab montre ki kantite nou kontan Bondye e ki nou annan respe pour sa laranzman maryaz par fer tou sa ki nou kapab pour rezourd bann problenm ki nou gannyen dan nou maryaz. Osi, si nou fer pese nou kapab kontinyen rod led Zeova, aksepte ki i kontan nou e ki i pardonn nou e apre kontinyen servi li. Nou kapab asire ki nou pou ganny bokou benediksyon avek Zeova si nou “pa aret fer sa ki byen.”—Gal. 6:9.