1-2. Ki benediksyon en dimoun i gannyen apre ki i’n batize?

 NOU kontan ler nou batize e form parti fanmir Zeova. I en loner pour form parti fanmir Zeova e nou dakor avek sa ki psalmis David ti dir. I ti dir: “Ere sa enn ki ou [Zeova] swazir e ki ou fer vin reste dan bann lakour ou tanp.”—Ps. 65:4.

² Zeova pa permet nenport ki pour antre dan bann lakour son tanp. Parey nou’n vwar dan sa lartik avan, Zeova i swazir pour vin pros avek bann ki montre ki zot anvi annan en lanmitye pros avek li. (Zak 4:8) Ler ou dedye ou lavi avek Zeova e ou batize, ou vin pros avek Zeova dan en fason spesyal. Ou kapab asire ki apre ki ou’n batize, Zeova pou ‘devid en benediksyon lo ou ziska ki ou pa mank nanryen.’—Mal. 3:10; Zer. 17:7, 8.

3. Ki responsabilite serye en Kretyen ki’n dedye son lavi avek Zeova e batize i annan? (Eklezyast 5:4, 5)

³ Batenm i zis en konmansman. Apre ki ou’n batize, ou pou anvi fer ou mye pour gard ou promes pour servi Zeova e ou pou reste fidel avek li, menm ler ou ganny tante pour fer en keksoz mal oubyen ler ou pas dan difikilte. (Lir Eklezyast 5:4, 5.) Konman en disip Zezi, ou pou fer ou mye pour swiv legzanp Zezi e obei son bann lord. (Mat. 28:19, 20; 1 Pyer 2:21) Sa lartik pou ed ou fer sa.

“KONTINYEN SWIV” ZEZI MENM LER OU PAS DAN DIFIKILTE E OU GANNY TANTE

4. Dan ki fason bann disip Zezi i anmenn en “poto martir”? (Lik 9:23)

⁴ Pa bezwen krwar ki apre ou batenm ou lavi pou fasil. Zezi ti dir ki son bann disip ti pou anmenn en “poto martir.”  Anfet zot pou bezwen fer sa “sak zour.” (Lir Lik 9:23.) Eski Zezi ti pe dir ki son bann disip ti pou toultan soufer? Non. O kontrer, i ti pe dir ki apard bann benediksyon ki zot ti pou gannyen, zot ti pou fer fas avek bann difikilte. Serten sa bann difikilte i kapab menm fer zot soufer.—2 Tim. 3:12.

5. Ki benediksyon Zezi i promet bann ki fer bann sakrifis?

⁵ Petet ou fanmir in opoz ou oubyen ou’n senplifye ou lavi pour ou kapab met Rwayonm Bondye premye dan ou lavi e aprezan ou annan mwens larzan ek keksoz materyel. (Mat. 6:33) Si ou’n fer sa, ou kapab asire ki Zeova i konn tou sa ki ou’n fer pour li. (Ebr. 6:10) I tre probab ki ou’n vwar ki sa ki Zezi in dir, i vre. I ti dir: “Napa personn ki’n kit son lakaz, frer, ser, manman, papa, zanfan ouswa plantasyon akoz mwan e akoz sa bon nouvel ki la konmela pa pou ganny 100 fwa plis, lakaz, frer, ser, manman, zanfan ek plantasyon avek persekisyon e dan sa lemonn ki pe vini, lavi eternel.” (Mark 10:29, 30) Bann benediksyon ki ou’n gannyen i bokou plis ki bann sakrifis ki ou’n fer.—Ps. 37:4.

6. Akoz ou pou bezwen kontinyen lager avek ou bann “dezir lekor enparfe” apre ou batenm?

⁶ Apre ou batenm, ou pou bezwen kontinyen lager avek ou bann “dezir lekor enparfe.” (1 Zan 2:16) Sa i akoz ou ankor enparfe. I kapab ki parfwa ou santi en pe parey zapot Pol ti santi. Zapot Pol ti dir: “Dan mon leker mon vreman kontan lalwa Bondye, me dan mon lekor, i annan en lot lalwa ki pe lager avek sa lalwa ki dan mon lespri e ki fer mwan prizonnyen sa lalwa pese ki dan mon lekor.” (Rom. 7:22, 23) I kapab ki ou santi ou dekouraze parski ou bezwen lager avek bann move dezir. Me ler ou mazin sa promes ki ou ti fer avek Zeova zour ou ti dedye ou lavi avek li, sa pou donn ou lafors pour lager kont tantasyon. Sa i vedir ki sa promes ki ou ti fer avek Zeova pou ed ou ler ou fer fas avek tantasyon. Ki mannyer?

7. Ki mannyer ler ou dedye ou lavi avek Zeova, sa pou ed ou reste fidel avek li?

⁷ Ler ou dedye ou lavi avek Zeova, ou aret viv zis pour ou menm. Sa i vedir ki ou swazir pour pa met bann lobzektif e pour pa fer bann keksoz ki ou anvi, ki pa fer Zeova plezir. (Mat. 16:24) Alor ler ou ganny tante oubyen ler ou pe pas dan en sityasyon difisil, ou pa pou bezwen pran bokou letan pour reflesir ki pour fer. Ou pou’n fini deside ki ou pou fer e sa i pour reste fidel avek Zeova. Ou determinen pour fer Zeova plezir. Dan en sans, ou pou parey Zob. Menm si Zob ti pas dan bann gro difikilte, i ti dir: “Mon pou reste fidel!”—Zob 27:5.

8. Ki mannyer ler ou reflesir lo ou lapriyer pour dedye ou lavi avek Zeova, sa pou ed ou reziste tantasyon?

⁸ Ler ou reflesir lo ou lapriyer pour dedye ou lavi avek Zeova, sa pou donn ou lafors pour reziste tantasyon. Par egzanp, eski ou pou konmans flirt avek konzwen en lot dimoun? Non! Parski ou’n fini promet Zeova ki ou pa pou zanmen fer en keksoz koumsa. Si ou pa les bann santiman ki pa apropriye devlope dan ou, sa pou fer ki ou pa pou trouv ou dan en sityasyon kot ou pe lager pour debaras ou avek sa bann santiman. Ou pa pou vwar ou lo “santye bann move dimoun.”—Prov. 4:14, 15.

9. Ki mannyer ler ou reflesir lo ou lapriyer pour dedye ou lavi avek Zeova, sa pou osi ed ou gard bann aktivite spirityel premye?

 ⁹ Ki ou pou fer si ou ganny ofer en travay ki pou anpes ou asiste renyon regilyerman? Ou deza konnen ki ou devret fer. Menm avan ou ganny ofer sa travay, ou ti’n fini deside ki ou pa pou aksepte en travay ki pou anpes ou asiste renyon. Alor ou pa pou ganny tante pour aksepte sa travay e apre pour ou rod fason pour met Zeova premye. Ler ou reflesir lo lafason ki Zezi ti fer plezir son Papa, deswit ou pou rezet okenn keksoz ki ou konnen pa pou fer plezir sa Bondye ki ou’n dedye ou lavi avek.—Mat. 4:10; Zan 8:29.

10. Apre ki ou’n batize, ki mannyer Zeova pou ed ou pour “kontinyen swiv” Zezi?

¹⁰ Bann problenm ek tantasyon ki ou fer fas avek i donn ou sa loportinite pour montre ki ou anvi “kontinyen swiv” Zezi. Ou kapab asire ki Zeova pou ed ou pour kontinyen fer sa. Labib i dir: “Bondye i fidel e i pa pou permet ki zot ganny tante plis ki zot kapab siporte. Me ler zot ganny tante, i pou osi donn zot semen sorti pour ki zot kapab andire.”—1 Kor. 10:13.

KI OU KAPAB FER POUR KONTINYEN SWIV ZEZI?

11. Ki enn bann pli bon fason pour kontinyen swiv Zezi? (Vwar portre.)

¹¹ Zezi ti servi Zeova avek tou son leker e i ti toultan priy Zeova. (Lik 6:12) Anfet apre ou batenm, ou pou bezwen kontinyen fer bann keksoz ki pou fer ou vin pros avek Zeova. Sa i enn bann pli bon fason ki pou ed ou pour kontinyen swiv Zezi. Labib i dir: “Nenport ki progre ki nou’n fer, annou kontinyen al annavan dan sa menm direksyon e dan en fason  annord.” (Fili. 3:16) Tanzantan ou pou tann leksperyans bann frer ek ser ki’n deside pour fer plis dan zot servis pour Zeova. Petet zot in asiste Lekol pour bann predikater Rwayonm oubyen zot in al servi dan en landrwa kot i annan bezwen pour plis proklanmater. Si ou sirkonstans i permet ou pour fer en keksoz parey, sa i en bon lobzektif pour ou annan. Bann serviter Zeova i vreman anvi fer plis pour Zeova. (Akt 16:9) Me ki ou pou fer si ou sirkonstans pa permet ou pour fer plis? Pa bezwen krwar ki ou pli enferyer ki bann ki kapab fer plis pour Zeova. Sa ki pli enportan i ki ou kontinyen andire. (Mat. 10:22) Pa oubliye ki ou fer Zeova vreman kontan ler ou servi li dapre ou abilite ek sirkonstans. Sa i en fason enportan ki ou kapab kontinyen swiv Zezi apre ki ou’n batize.—Ps. 26:1.

12-13. Ki ou kapab fer si ou nepli annan sa motivasyon pour fer bann keksoz spirityel parey avan? (1 Korentyen 9:16, 17) (Vwar sa bwat “ Reste dan sa lakours.”)

¹² Ki ou pou fer si ou lapriyer in vin zis parey en routin ouswa ou nepli kontan predikasyon parey avan? Oubyen ou nepli kontan lir Labib parey avan. Si ou santi koumsa apre ou batenm, pa bezwen krwar ki ou’n perdi lespri sen Zeova. Ou en imen enparfe e ou santiman i kapab sanze tanzantan. Si ou nepli annan sa motivasyon pour fer bann keksoz spirityel parey avan, ou kapab medit lo legzanp zapot Pol. Menm si Pol ti esey swiv legzanp Zezi, i ti konnen ki parfwa i pa ti pou anvi fer sa ki i ti bezwen fer. (Lir 1 Korentyen 9:16, 17.) Pol ti dir: “Menm si mon pa fer li volonterman, toudmenm Senyer in konfye mwan sa responsabilite.” Andotmo, Pol ti determinen pour  akonpli son minister malgre sa ki i ti pe santi dan sa moman.

¹³ Parey Pol, pa bezwen fer ou bann desizyon zis dapre sa ki ou pe santi. Ou bezwen determinen pour fer sa ki byen menm si ou pa anvi fer li. Si ou kontinyen fer sa ki byen menm si ou pa anvi, avek letan, ou santiman i kapab sanze. Me antretan, ler ou annan en bon progranm spirityel, setadir pour fer letid personnel, fer lapriyer, asiste renyon e pour partisip dan sa travay predikasyon, sa pou ed ou kontinyen swiv Zezi apre ki ou’n batize. Ler ou bann fer ek ser i vwar ou pe kontinyen fer sa bann keksoz, sa pou ankouraz zot.—1 Tesa. 5:11.

“KONTINYEN TESTE . . . KONTINYEN FER SIR”

14. Ki nou devret egzaminen regilyerman e akoz? (2 Korentyen 13:5)

¹⁴ Apre ki ou’n batize, i enportan pour egzamin ou lekor regilyerman. (Lir 2 Korentyen 13:5.) I ti pou byen si tanzantan ou egzamin lafason ki ou pe viv ou lavi ek ou bann labitid pour vwar si ou pe priye toulezour, si ou pe lir e etidye Labib, asiste renyon e partisip dan predikasyon. Esey rod bann fason ki pou ed ou kontan e ganny plis byenfe avek sa bann aktivite spirityel. Par egzanp, demann ou lekor bann kestyon parey: ‘Eski mon kapab eksplik lezot bann lansennyman de baz ki dan Labib? Eski i annan keksoz ki mon kapab fer ki pou ed mwan kontan predikasyon plis? Eski mon pe fer bann lapriyer spesifik e eski mon bann lapriyer i montre ki mon pe depan lo Zeova konpletman? Eski mon asiste renyon regilyerman? Ki mannyer mon kapab konsantre pli byen e partisip plis dan renyon?’

15-16. Ki ou aprann avek leksperyans en frer konsernan reziste tantasyon?

¹⁵ I osi enportan pour konn nou bann febles. En frer ki apel Robert i koz lo en keksoz ki ti arive avek li, ki montre akoz i enportan pour konn ou bann febles. I dir: “Ler mon ti annan 20 an, mon ti travay dan en landrwa a mitan. En zour apre travay, en madanm ki ti travay avek mwan, ti envit mwan kot li. I ti dir ki nou pou tousel e ki nou pou kapab ‘pas en bon moman.’ Premye kou, mon ti donn bann pti leskiz. Me finalman mon ti dir li non e eksplike akoz.” Robert ti reziste tantasyon e sa i en bon keksoz. Me pli tar, i ti reflesir lo sa ki ti’n arive e i ti realize ki i ti’n devret reazir pli byen. I dir:  “Ler mon ti refiz lenvitasyon sa madanm, mon pa ti fer li sitan ferm oubyen vitman parey Zozef ti reziste madanm Potifar. (Zen. 39:7-9) Anfet mon ti sirprann ki mannyer i ti difisil pour mwan refiz son lenvitasyon. Sa sityasyon ti ed mwan pour vwar ki mon bezwen ranforsi mon lanmitye avek Zeova.”

¹⁶ Ou osi ou kapab ganny bann byenfe si ou egzamin ou lekor parey Robert ti fer. Menm ler ou reisi reziste tantasyon, demann ou lekor, ‘Ki kantite letan in pran mwan pour dir non?’ Si ou vwar ki ou bezwen amelyore, pa dekouraze. O kontrer, kontan ki ou’n konnen ki ou annan sa febles. Priy Zeova konsernan ou febles e fer bann keksoz ki pou fer ou pli determinen pour viv dapre bann standar Zeova.—Ps. 139:23, 24.

17. Ki mannyer ler Robert ti reste fidel avek Zeova, sa ti annan en lefe lo repitasyon Zeova?

¹⁷ I annan en lot keksoz ki nou kapab aprann avek leksperyans Robert. I dir: “Apre ki mon’n refiz lenvitasyon mon koleg travay, mon koleg travay ti dir, ‘Ou’n pas sa tes!’ Mon ti demann li ki i ti pe esey dir. I ti dir mwan ki enn son zanmi ki ti en Temwen Zeova avan, ti dir li ki tou zenn Temwen Zeova i fer sa ki mal an sekre si zot ganny loportinite. Alor i ti’n dir son zanmi ki i ti pou vwar si mon koumsa. Ler i ti dir mwan sa, mon ti realize ki mon ti’n onor non Zeova e sa ti fer mwan kontan.”

18. Ki ou determinen pour fer apre ou batenm? (Vwar sa bwat “ De lartik ki ou pou kontan.”)

¹⁸ Ler ou dedye ou lavi avek Zeova e ou batize, ou montre ki ou anvi sanktifye non Zeova nenport kwa ki arive. Ou kapab asire ki Zeova i konn bann difikilte ki ou fer fas avek ek bann tantasyon ki ou reziste. I pou beni bann zefor ki ou fer pour reste fidel avek li. Ou kapab asire ki atraver son lespri sen i pou donn ou lafors ki ou bezwen pour reste fidel. (Lik 11:11-13) Avek led Zeova, ou pou kapab kontinyen swiv Zezi apre ou batenm.