1-2. (a) Kote Pol ti ete ler i ti ekri sa let pour bann Kretyen dan lavil Efez e akoz i ti ekri zot? (b) Ki bann kestyon nou pou reponn?

 LER zapot Pol ti en prizonnyen dan en lakaz Ronm, i ti anvi ankouraz son bann frer ek ser. I pa ti kapab al vizit zot alor i ti ekri let pour zot. Apepre lannen 60 oubyen 61, i ti ekri enn sa bann let pour bann Kretyen dan lavil Efez.—Efe. 1:1; 4:1.

² Apepre di-z-an pli boner, Pol ti’n pas en pe letan Efez pe anons e ansenny sa bon nouvel. (Akt 19:1, 8-10; 20:20, 21) I ti kontan son bann frer ek ser en kantite e i ti anvi ed zot pour reste fidel avek Zeova. Me akoz i ti ekri bann Kretyen swazir konsernan fernwanr ek lalimyer? Ki leson tou Kretyen i kapab aprann avek sa ki Pol ti ekri? Annou vwar larepons sa bann kestyon.

ZOT TI SORTI DAN FERNWANR E AL DAN LALIMYER

3. Ki konparezon Pol ti servi dan sa let ki i ti ekri pour bann Kretyen dan lavil Efez?

³ Pol ti dir bann Kretyen dan lavil Efez: “Zot ti deza dan fernwanr, me aprezan zot dan lalimyer.” (Efe. 5:8) Dan sa verse, Pol i servi sa mo fernwanr ek lalimyer pour montre ki bann Kretyen dan lavil Efez ti’n fer bann gran sanzman. Annou vwar akoz Pol ti dir ki sa bann Kretyen ti “deza dan fernwanr.”

4. Dan ki fason bann Kretyen dan lavil Efez ti dan fernwanr spirityel?

⁴ Zot ti dan fernwanr akoz zot ti dan fo larelizyon. Avan ki bann Kretyen dan lavil Efez ti aprann laverite, zot ti pe swiv bann lansennyman fo larelizyon e zot ti krwar dan siperstisyon. Dan lavil Efez, i ti annan tanp en Bondye Grek ki apel Artemis. En kantite dimoun sa letan, ti krwar ki sa tanp ti enn parmi bann pli zoli batiman ki zonm ti’n konstri.  Bann dimoun ti al dan sa tanp pour ador zidol. Bann artizan ti fer e vann bann pti tanp ki ti parey tanp Artemis e zot ti fer en kantite larzan avek sa. (Akt 19:23-27) An plis ki sa, en kantite dimoun dan lavil Efez ti osi fer mazik.—Akt 19:19.

5. Dan ki fason bann Kretyen dan lavil Efez ti dan fernwanr moralman?

⁵ Zot ti dan fernwanr akoz zot ti napa bann bon standar moral. Bann dimoun dan lavil Efez ti fer en kantite keksoz imoral e zot pa ti onte pour fer bann move keksoz. Souvan dan zot bann pyes teat e dan zot bann lafet relizye, zot ti koz lo sèks. (Efe. 5:3) En kantite dimoun dan lavil Efez ti’n “perdi tou sans moral.” Sa lekspresyon i literalman vedir “nepli santi okenn douler.” (Efe. 4:17-19) Avan ki bann Kretyen dan sa lavil ti konn bann standar Zeova konsernan sa ki byen ek sa ki mal, zot konsyans pa ti fatig zot ler zot ti fer en keksoz mal e zot pa ti enterese avek lafason ki Zeova ti santi konsernan zot aksyon. I pour sa rezon ki Pol ti kapab dir ki zot “lespri i dan fernwanr, [e] zot napa okenn par dan lavi ki Bondye i donnen.”

6. Akoz Pol ti kapab dir bann Kretyen dan lavil Efez ki aprezan zot ti “dan lalimyer”?

⁶ Serten dimoun dan lavil Efez pa ti reste dan sa fernwanr ki Pol ti koz lo la. Pol ti dir ki “aprezan zot dan lalimyer an sa ki konsern Senyer.” (Efe. 5:8) Aprezan zot ti pe viv dapre Parol Bondye ki parey en lalimyer ki pe gid zot. (Ps. 119:105) Sa bann Kretyen dan lavil Efez ti’n abandonn zot bann fo pratik relizye e zot ti nepli viv en lavi imoral. Zot ti pe ‘swiv legzanp Bondye’ e zot ti pe fer zot mye pour ador li e fer li plezir.—Efe. 5:1.

7. Dan ki fason nou osi nou parey bann Kretyen dan lavil Efez?

⁷ Avan ki nou ti konn laverite, nou osi nou ti en pe parey bann Kretyen dan lavil Efez. Nou ti form parti fo larelizyon e fer bann keksoz imoral. Serten parmi nou ti selebre bann lafet fo larelizyon e i annan lezot ki ti viv en lavi imoral. Me apre ki nou’n aprann bann standar Zeova  konsernan sa ki byen ek sa ki mal, nou’n fer bann sanzman. Nou ti konmans viv dan sa fason ki Zeova i anvi nou viv. Sa in fer nou ganny en kantite byenfe. (Iza. 48:17) Me i pa toultan fasil pour reste lwen avek sa fernwanr ki nou’n kit deryer e “kontinyen viv konman bann zanfan lalimyer.” Ki mannyer nou kapab fer sa?

RESTE LWEN AVEK FERNWANR

8. Dapre Efezyen 5:3-5, ki bann Kretyen dan lavil Efez ti bezwen fer?

⁸ Lir Efezyen 5:3-5. Pour bann Kretyen dan lavil Efez kapab reste lwen avek bann keksoz imoral, zot ti bezwen kontinyen rezet bann keksoz ki pa fer Zeova plezir. Zot ti bezwen rezet bann keksoz ki annan pour fer avek imoralite seksyel e osi bann parol sal. Zapot Pol ti fer bann Kretyen dan lavil Efez rapel ki si zot pa rezet bann keksoz koumsa, zot pou “napa nanryen pour fer avek Rwayonm Kris ek Bondye.”

9. Akoz nou bezwen fer atansyon ki nou pa fer okenn keksoz ki kapab fer nou komet imoralite seksyel?

⁹ Nou osi nou bezwen kontinyen fer atansyon pour pa fer bann keksoz “ki annan pour fer avek fernwanr.” (Efe. 5:11) Bann leksperyans in montre ki ler en dimoun i get, ekout oubyen koz lo bann keksoz enpir ouswa imoral, sa i fer li pli fasil pour li fer bann keksoz mal. (Zen. 3:6; Zak 1:14, 15) Dan en pei, plizyer frer ek ser ti fer en group lo rezo sosyal pour koz avek kanmarad. O konmansman, en kantite zot ti koz lo bann keksoz spirityel. Me ptitapti zot ti konmans koz lo bann keksoz ki pa fer Zeova plezir. Zot konservasyon ti preski toultan annan pour fer avek sèks. Pli tar, en kantite sa bann frer ek ser ti dir ki sa bann konversasyon konsernan sèks ti kontribye pour fer zot komet imoralite seksyel.

10. Ki mannyer Satan i esey anbet nou? (Efezyen 5:6)

¹⁰ Lemonn Satan i esey anbet nou pour fer nou krwar ki bann keksoz ki Zeova i dir i imoral e enpir, i pa mal. (2 Pyer 2:19) Sa pa sirprann nou. Dyab in toultan esey konfiz dimoun pour ki zot pa kapab fer diferans ant sa ki byen ek sa ki mal. (Iza. 5:20; 2 Kor. 4:4) Nou pa sirprann ki en kantite film, progranm televizyon ek bann sit Enternet, i promot bann nide ki al kont bann standar Zeova. Satan pe esey fer nou krwar ki i pa mal pour nou viv en lavi imoral e fer bann move keksoz. I anvi fer nou krwar ki sa bann keksoz i gou e ki i napa move konsekans.—Lir Efezyen 5:6.

11. Ki mannyer leksperyans Angela i montre ki nou bezwen aplik sa konsey saz ki dan Efezyen 5:7? (Vwar portre.)

¹¹ Satan i anvi ki nou pas letan avek bann dimoun ki fer li pli difisil pour nou obei bann standar Zeova. I pour sa rezon ki Pol ti dir bann Kretyen dan lavil Efez ki “zot devret napa nanryen pour fer avek sa bann dimoun” setadir bann dimoun ki fer bann move keksoz dan lizye Bondye. (Efe. 5:7) Me nou, nou bezwen fer plis atansyon ki bann Kretyen dan lavil Efez. Parski ozordi nou kapab pas letan avek dimoun an personn me osi lo rezo sosyal. En ser ki apel Angela a ki reste dan en pei Lazi, ti vwar ki rezo sosyal i kapab vin en keksoz danzere. I dir: “Ptitapti rezo sosyal ti sanz mon fason panse. Avek letan, mon pa ti vwar li mal pour annan bann zanmi ki pa obei bann prensip Labib. Mon ti konmans krwar ki i oke pour viv en lavi ki pa  fer Zeova plezir.” Me avek lanmour, bann ansyen ti ed Angela pour fer bann sanzman neseser. I dir: “Aprezan mon konsantre lo bann keksoz spirityel olye lo rezo sosyal.”

12. Kwa ki pou ed nou pour kontinyen obei bann standar Zeova konsernan sa ki byen ek sa ki mal?

¹² Dimoun dan lemonn i krwar ki i normal pour fer bann keksoz imoral. Me nou, nou bezwen fer zefor pour pa annan menm pwennvi avek zot parski nou konnen ki sa i mal. (Efe. 4:19, 20) Kantmenm sa, i ti pou byen nou demann nou lekor: ‘Eski mon fer sir ki mon evite pas plis letan ki neseser avek mon bann koleg travay, bann kanmarad lekol oubyen lezot dimoun ki pa obei bann standar Zeova? Eski mon demontre kouraz e mon swiv bann standar Zeova menm si serten dimoun i dir ki mon bet parski mon pa aksepte bann dimoun ki zot lopinyon i diferan avek sa ki pour mwan?’ Parey nou vwar dan 2 Timote 2:20-22, i kapab ki nou osi bezwen fer atansyon ler nou pe swazir nou zanmi dan kongregasyon. Nou bezwen gard antet ki serten pa pou ed nou pour reste fidel dan nou servis pour Zeova.

VIV “KONMAN BANN ZANFAN LALIMYER”

13. Ki i vedir pour “kontinyen viv konman bann zanfan lalimyer”? (Efezyen 5:7-9)

¹³ Pol ti ankouraz bann Kretyen dan lavil Efez pour pa zis kontinyen reste lwen avek fernwanr me pour osi “kontinyen viv konman bann zanfan lalimyer.” (Lir Efezyen 5:7-9.) Sa i vedir ki nou devret konport nou konman bann vre Kretyen. En fason ki nou kapab fer sa, i par lir e etidye Labib regilyerman ansanm avek bann piblikasyon baze lo Labib. I sirtou enportan ki nou etidye legzanp ek bann lansennyman Zezi Kri ki “lalimyer lemonn.”—Zan 8:12; Prov. 6:23.

14. Ki mannyer lespri sen Bondye i kapab ed nou?

¹⁴ Pour nou kapab kontinyen viv “konman bann zanfan lalimyer,” nou osi bezwen led lespri sen Bondye. Akoz? Parski i vreman difisil pour reste prop dan sa lemonn ki ranpli avek bann keksoz imoral. (1 Tesa. 4:3-5, 7, 8) Lespri sen Bondye i  kapab ed nou pour pa aksepte pwennvi sa lemonn, enkli bann filozofi ek pwennvi bann dimoun ki pa vwar keksoz parey Zeova i vwar. Lespri sen i osi kapab ed nou pour prodwir “tou sort keksoz ki byen, [e] drwat.”—Efe. 5:9.

15. Ki nou bezwen fer pour nou kapab ganny lespri sen? (Efezyen 5:19, 20)

¹⁵ En fason ki nou kapab ganny lespri sen i par priy Zeova e demann li son lespri sen. Zezi ti dir ki Zeova pou “donn lespri sen bann ki pe demann li!” (Lik 11:13) Nou osi ganny lespri sen ler nou loue Zeova ansanm avek nou bann frer ek ser dan renyon. (Lir Efezyen 5:19, 20.) Lespri sen Bondye i annan en bon lefe lo nou e sa pou ed nou pour viv dan en fason ki fer Bondye plezir.

16. Kwa ki pou ed nou fer bann desizyon ki saz? (Efezyen 5:10, 17)

¹⁶ Ler nou annan bann desizyon enportan pour fer, nou bezwen konpran “lavolonte Zeova” e azir an armoni avek son lavolonte. (Lir Efezyen 5:10, 17.) Ler nou rod bann prensip Labib ki aplikab dan nou sityasyon, nou pe rod pwennvi Bondye lo sa sityasyon. Apre, ler nou aplik son bann prensip, nou pou kapab fer bann pli bon desizyon.

17. Ki mannyer nou kapab servi byen nou letan? (Efezyen 5:15, 16) (Vwar portre.)

¹⁷ Pol ti osi konsey bann Kretyen dan lavil Efez pour servi byen zot letan. (Lir Efezyen 5:15, 16.) Nou lennmi Satan, ki “sa enn move,” i anvi ki nou sitan bizi avek bann keksoz dan sa lemonn ki nou napa letan pour fer bann keksoz ki Zeova i demann nou pour fer. (1 Zan 5:19) I ti pou fasil pour en Kretyen konmans konsantre lo bann keksoz materyel, lo ledikasyon oubyen lo travay olye lo bann diferan loportinite kot zot kapab servi Zeova. Si en Kretyen i fer sa, i pou pe montre ki i pe konmans mazin parey bann dimoun ki pa servi Zeova. Byensir, sa bann keksoz i pa bann move keksoz. Me nou pa  devret zanmen met zot premye dan nou lavi. Pour nou kapab kontinyen viv “konman bann zanfan lalimyer,” nou bezwen “servi byen [nou] letan,” setadir konsantre lo sa ki vreman enportan.

18. Ki Donald ti fer pour li kapab servi son letan pli byen?

¹⁸ Rod bann fason ki ou kapab fer plis pour Zeova. I sanmenm ki en frer ki apel Donald, ki reste Sidafrik ti fer. I dir: “Mon ti reflesir lo mon sityasyon e mon ti sipliy Zeova pour ed mwan pour fer plis dan predikasyon. Mon ti demann Zeova pour ed mwan pour trouv en travay ki ti pou permet mwan ganny plis letan pour fer predikasyon. Avek led Zeova, mon ti trouv en travay ki ti ed mwan fer sa. Apre sa, mwan ek mon madanm, nou ti konmans servi Zeova a plen tan, ansanm.”

19. Ki mannyer nou kapab kontinyen viv “konman bann zanfan lalimyer”?

¹⁹ Nou kapab asire ki sa let ki Pol ti ekri pour bann Kretyen dan lavil Efez ti ed zot pour reste fidel avek Zeova. Sa bann konsey i sorti kot Zeova e i kapab ed nou osi. Parey nou’n vwar, sa bann konsey i kapab ed nou pour swazir byen nou divertisman ek nou bann zanmi. I osi kapab motiv nou pour kontinyen etidye Labib regilyerman pour ki sa lalimyer laverite i kapab gid nou dan tou sa ki nou fer. Sa bann konsey i montre nou ki nou bezwen lespri sen parski lespri sen i kapab ed nou pour devlop bann zoli kalite. Ler nou aplik bann konsey ki Pol ti donnen, sa i kapab ed nou pour fer bann desizyon ki saz, ki an armoni avek fason panse Zeova. Ler nou fer sa bann keksoz, nou pou reste lwen avek bann keksoz sa lemonn ki annan pour fer avek fernwanr e nou pou reste dan lalimyer!