1. Nonm serten lalwa dan Labib e ki byenfe nou gannyen ler nou obei zot?

DAN Labib, Zeova in donn nou bann lalwa ki dir nou klerman sa ki i anvi nou fer. Par egzanp, i dir nou ki nou pa devret ador zidol, vole, bwar pour sou oubyen fer bann keksoz imoral. (1 Korentyen 6:9, 10) Zezi, garson Zeova, ti donn sa lord spesifik avek son bann disip: “Al parmi zabitan bann nasyon, e fer zot vin mon bann disip. Batiz zot lo non Papa, lo non Garson e lo non Lespri Sen. Ansenny zot pour obei tou sa ki mon’n komann zot. Pa oubliye: Mwan, mon pou avek zot tou le zour, ziska lafen lemonn.” (Matye 28:19, 20) Tou sa ki Zeova ek Zezi i dir nou i pour nou prop dibyen. Bann lalwa Zeova i ansenny nou ki mannyer pour pran swen avek nou lekor, nou fanmir, pour viv ere e annan en pli bon lasante. Pli enportan ankor, ler nou obei lord Zeova enkli sa komannman pour prese, i pran plezir dan nou e i beni nou.

2, 3. (a) Akoz Labib pa donn nou bann lareg pour tou sityasyon dan lavi? (b) Ki bann kestyon ki pou ganny diskite dan sa lartik? (Vwar portre lo paz 15.)

 ² An menm tan, Labib pa donn nou bann lalwa pour tou sityasyon dan lavi. Par egzanp, napa okenn lenstriksyon spesifik dan Labib lo ki lenz nou devret mete. Sa i montre ki degre Zeova i saz. Menm si lanmod i sanze avek letan e dimoun dan lemonn antye i met diferan kalite lenz, me Labib i toultan azour. I osi napa en kantite lalwa konsernan ki kalite travay oubyen detant nou devret swazir ouswa kwa egzakteman nou devret fer pour reste an bonn sante. Zeova i permet sak dimoun e bann sef fanmir fer desizyon konsernan sa bann keksoz.

³ Alor, ler nou annan en desizyon enportan pour fer, ki pou annan en lefe lo nou lavi e ki nou pa trouv okenn lalwa dan Labib, sa i kapab fer nou mazinen: ‘Eski Zeova i enterese avek desizyon ki mon fer? Eski i pou pran plezir dan sa ki mon swazir pour fer tan ki mon pa kas en lalwa dan Labib? Ki mannyer mon asire ki i pou dakor avek bann desizyon ki mon fer?’

4, 5. Ki mannyer nou bann desizyon i kapab annan lefe lo nou e lo lezot?

⁴ Serten dimoun i santi ki zot kapab fer sa ki zot anvi. Me nou, nou anvi fer sa ki Zeova i kontan. Alor, avan ki nou fer okenn desizyon, nou bezwen mazin lo sa ki Labib i dir e obei. Par egzanp, Labib i dir nou ki mannyer Bondye i santi konsernan disan, alor nou swiv sa ki i dir. (Zenez 9:4; Akt 15:28, 29) Nou kapab priy Zeova pour ed nou fer bann desizyon ki pou fer li plezir.

⁵ Nou bann desizyon i annan lefe lo nou. En bon desizyon i kapab ed nou vin pli pros avek Zeova e en move desizyon i kapab kas nou lanmitye avek li. Nou bann desizyon i kapab annan lefe lo lezot dimoun. Nou pa anvi fer nanryen ki kapab ofans nou bann frer ek ser ouswa afeblir zot lafwa. Nou osi pa anvi fer problenm ant bann frer ek ser dan kongregasyon. Alor, i enportan pour nou fer bann bon desizyon.​—Lir Romen 14:19; Galat 6:7.

6. Kwa ki devret gid nou ler nou pe fer bann desizyon?

⁶ Ki mannyer nou kapab fer bann bon desizyon ler Labib pa dir nou ki nou devret fer egzakteman? Olye fer sa ki nou anvi, nou devret mazin byen lo nou sityasyon e fer en desizyon ki pou fer plezir Zeova. Nou pou kapab asire ki i pou ed nou reisi.​—Lir Psonm 37:5, NW.

7. Ki mannyer nou pou konn sa ki Zeova i anvi nou fer dan en sityasyon kot napa en lalwa spesifik dan Labib?

⁷ Ki mannyer nou pou kapab konn sa ki fer plezir Zeova? Efezyen 5:17 i dir nou: “Fer tou zot posib pour zot konpran koman Senyer i oule zot azir.” Ler napa en lalwa spesifik dan Labib, nou bezwen konnen ouswa konpran kwa ki Zeova i anvi nou  fer dan nou sityasyon. Ki mannyer nou kapab fer sa? Nou devret fer lapriyer e les son lespri sen gid nou.

8. Ki mannyer Zezi ti konn sa ki Zeova ti anvi i fer? Donn en legzanp.

⁸ Zezi ti toultan konn sa ki Zeova i anvi i fer. Par egzanp, de fwa ler bann lafoul ti lafen, Zezi ti fer lapriyer e apre donn zot manze par en mirak. (Matye 14:17-20; 15:34-37) Me ler Zezi ti lafen dan dezer e Dyab ti anvi ki i fer ros vin dipen, Zezi ti refize. (Lir Matye 4:2-4.) I ti konn son papa tre byen, alor i ti konnen ki Zeova pa ti pou anvi ki i servi lespri sen pour son prop bezwen. I ti asire ki son Papa ti pou gid li e donn li manze kan i ler.

9, 10. Kwa ki pou ed nou fer bann desizyon saz? Donn legzanp.

⁹ Nou osi nou kapab fer bann bon desizyon si nou depan lo gidans Zeova, parey Zezi. Labib i dir: “Met ou konfyans dan [Zeova] avek tou ou leker; pa kont lo ou prop rezonnman. Rekonnet li dan tou sa ki ou antreprann e i ava gid ou lo ou semen. Pa krwar ou tro saz; annan respe pour [Zeova] e elwanny ou avek sa ki mal.” (Proverb 3:5-7) Ler nou etidye Labib e aprann lo lafason ki Zeova i panse, nou pou konpran sa ki Zeova i anvi nou fer dan en sityasyon spesifik. Pli nou aprann konsernan lafason ki Zeova i panse, pli i pou fasil pour nou fer bann desizyon ki pou fer li plezir. Si nou fer sa, nou pou pli “sansib pour resevwar gidans bondye.”​—Ezekyel 11:19, not dan NW.

¹⁰ Mazin en madanm ki’n marye pe fer konmisyon e i vwar en zoli per soulye. Me sa soulye i ser! Menm si son msye pa avek li, i konnen ki mannyer son msye pou santi si i depans sa kantite larzan. Ki mannyer i konnen? Vi ki i’n marye avek li pour en pe letan, alor i konnen ki mannyer son msye i anvi ki zot servi zot larzan. Dan menm fason, ler nou aprann konsernan lafason ki Zeova i panse e sa ki i’n fer dan lepase, nou pou konn sa ki i anvi nou fer dan diferan sityasyon.

11. Ki bann kestyon ki nou kapab demann nou lekor ler nou pe lir ouswa etidye Labib? (Vwar sa bwat “ Ler ou etidye labib, demann ou lekor.”)

¹¹ Ki mannyer nou kapab konn sa ki Zeova i panse? Sa keksoz pli enportan ki nou kapab fer i lir e etidye Labib regilyerman. Ler nou pe fer sa, nou kapab demann nou lekor: ‘Ki sa i ansenny mwan lo Zeova? Akoz i ti azir dan sa fason?’ Parey David, nou osi nou devret demann Zeova pour ed nou konn li pli byen. David ti ekri: “[Zeova] Fer mwan konn  ou semen. Ansenny mwan viv koman oule. Gid mwan, ansenny mwan dan ou laverite. Ou menm Bondye ki sov mwan. Mon kont lo ou tou le zour.” (Psonm 25:4, 5) Ler nou aprann en keksoz lo Zeova, nou kapab mazin bann sityasyon kot nou kapab servi sa lenformasyon. Eski nou kapab servi li dan nou fanmir, dan travay, kot lekol ouswa dan predikasyon? Ler nou mazin lo en sityasyon spesifik, i pou pli fasil pour konnen ki mannyer Zeova i anvi nou servi sa lenformasyon.

12. Ki mannyer nou bann piblikasyon ek renyon i ed nou pour konn pli byen fason panse Zeova lo bann diferan sityasyon?

¹² En lot fason pour nou konn fason panse Zeova, i ler nou port nou latansyon lo sa ki son lorganizasyon i ansenny nou lo Labib. Par egzanp, ler nou annan en desizyon pour fer, Watch Tower Publications Index oubyen sa Liv resers pour Temwen Zeova i kapab ed nou konn sa ki Zeova i panse. Atraver nou bann renyon nou osi kapab ganny bann byenfe ler nou  ekout atantivman, fer komanter e ler nou medit lo sa ki pe ganny ansennyen. Sa pou ed nou aprann pour annan menm fason panse ki Zeova. Si nou fer sa, nou pou kapab fer bann desizyon ki pou fer li plezir e ki i pou beni.

13. Donn en legzanp, lo ki mannyer nou kapab fer en bon desizyon ler nou mazin sa ki Zeova i panse?

¹³ Annou vwar en legzanp lo ki mannyer nou kapab fer en bon desizyon ler nou mazin sa ki Zeova i panse. Petet ou ti pou anvi fer pionye. Ou’n fer serten sanzman dan ou lavi pour ki ou kapab pas plis letan dan predikasyon. Me ou pa ankor asire si ou pou vreman ere avek mwens larzan e mwens keksoz. I vre ki Labib pa dir ki nou bezwen fer pionye pour servi Zeova. Nou kapab kontinyen servi li fidelman konman en proklanmater. Me de lot kote, Zezi ti dir ki Zeova i beni sa bann ki fer bann sakrifis pour Rwayonm. (Lir Lik 18:29, 30.) Labib i osi dir ki nou fer Zeova plezir ler nou fer tou sa ki nou kapab pour loue li e i anvi ki nou servi li dan lazwa. (Psonm 119:108; 2 Korentyen 9:7) Ler nou priy e medit lo sa bann keksoz, nou pou kapab fer en desizyon ki pratik dan nou sityasyon e enn ki Zeova pou beni.

14. Ki mannyer ou kapab konnen si en fason sanze i fer plezir Zeova?

¹⁴ Annou vwar en lot legzanp: Ou vreman kontan en kalite fason sanze, me ou konnen ki si ou met sa kalite lenz, sa i kapab ofans serten dan kongregasyon. Labib pa dir nanryen lo sa kalite lenz ki ou kontan. Alor, ki mannyer ou kapab konn sa ki Zeova i panse? Labib i dir nou: “Ki bann fanm i abiy zot dan en fason desan, diny e senp. Pa bezwen ki zot orn zot seve avek bizou annor, oubyen perl ek labiyman byen ser. O kontrer, ki zot ganny admire pour zot bann bon aksyon, ki apropriye delapar bann fanm ki annan respe pour Bondye.” (1 Timote 2:9, 10) Byensir, tou serviter Zeova, enkli bann zonm, i kapab aprann en leson avek sa konsey. Ler nou modes, nou mazin lo sa ki lezot i kapab panse lo bann lenz ki nou swazir pour mete. Vi ki nou kontan nou bann frer ek ser, nou pou evite trouble ouswa ofans zot. (1 Korentyen 10:23, 24; Filipyen 3:17) Si nou mazin lo sa ki Labib i dir e ki mannyer Zeova i panse, nou pou kapab fer bann desizyon ki pou fer li plezir.

15, 16. (a) Ki mannyer Zeova i santi ler nou kontinyen mazin lo bann keksoz imoral? (b) Ler nou pe swazir bann divertisman, ki mannyer nou pour kapab konnen kwa ki fer plezir Zeova? (c) Ki mannyer nou devret fer bann desizyon enportan?

¹⁵ Dan Labib, nou aprann ki Zeova i ganny blese i sagren ler dimoun i fer bann move keksoz e ler zot mazin lo bann move keksoz. (Lir Zenez 6:5, 6.) I kler ki Zeova pa anvi ki nou les nou lespri vagabonde lo bann keksoz imoral. Anfet, si nou kontinyen mazin lo sa bann keksoz, nou riske fer li. O kontrer, Zeova i anvi ki nou mazin  lo bann keksoz ki bon e pir. Disip Zak ti ekri ki lasazes Zeova “i premyerman pir. I kontan lape, i modere, pare pour met dakor. I ranpli avek pitye ek bon aksyon, san preferans e san lipokrizi.” (Zak 3:17) Alor, Labib i dir nou ki nou devret evit okenn divertisman ki kapab fer nou imazin ouswa anvi bann keksoz ki sal e move. Si nou konpran byen sa ki Zeova i kontan e sa ki i pa kontan, i pou fasil pour nou konnen ki liv, film ouswa bann zwe pour swazir. Alor, nou pa pou bezwen demann lezot sa ki nou devret fer.

¹⁶ Ler nou annan en desizyon pour fer, souvan i annan bann diferan opsyon ki nou kapab swazir ki pou fer plezir Zeova. Me ler nou annan en desizyon ki vreman enportan pour fer, i ti a bon pour nou demann en ansyen oubyen en frer ouswa ser eksperyanse pour donn nou konsey. (Tit 2:3-5; Zak 5:13-15) Byensir, nou pa devret demann personn pour fer desizyon pour nou. O kontrer, nou devret mazin atantivman lo kwa ki nou konnen lo Labib e apre fer nou prop desizyon. (Ebre 5:14) Zapot Pol ti dir: “Sakenn i devret desarz son prop responsabilite.”​—Galat 6:5, NW.

17. Ki byenfe nou gannyen ler nou fer bann desizyon ki fer plezir Zeova?

¹⁷ Ler nou fer bann desizyon ki fer plezir Zeova, nou vin pli pros avek li e nou ganny son laprouvasyon ek benediksyon. (Zak 4:8) Nou lafwa dan Zeova pou vin pli for. Alor, annou medit lo sa ki nou lir dan Labib, pour ki nou kapab konpran ki mannyer Zeova i panse. Byensir, i pou toultan annan nouvo keksoz pour nou aprann lo Zeova. (Zob 26:14) Me si depi konmela menm, nou fer zefor pour aprann konn li, nou pou vin saz e nou pou kapab fer bann bon desizyon. (Proverb 2:1-5) Bann nide ek plan zonm i sanze, me Zeova pa zanmen sanze. Sa psalmis i dir: “Bann plan [Zeova] i dire pour touzour. Son bann proze i reste pour leternite.” (Psonm 33:11) I kler alor, ki nou kapab fer bann pli bon desizyon, ler nou aprann lo lafason ki Zeova i panse e apre sa nou fer sa ki fer li plezir.