1, 2. (a) Akoz nou ganny ankouraze avek bann frer ek ser ki kontinyen pres dan bann teritwar kot bokou dimoun pa ekoute? (Vwar portre o konmansman sa lartik.) (b) Ki Zezi ti dir konsernan pres dan son “prop lavil”? (Vwar not.)

SERGIO EK OLINDA i en koup ki fer pionye Leta-z-ini. Zot tou le de zot dan zot 80 an. Tou dernyenman, douler dan zot lipye i fer li difisil pour zot marse. Me parey zot in fer pour plizyer lannen, set er bomaten zot marse ziska en landrwa piblik dan lavil kot i annan bokou dimoun. Zot pran zot plas o bor en bestop e ofer nou bann piblikasyon avek dimoun ki pe pase. Laplipar dimoun i inyor zot, me Sergio ek Olinda i reste dan zot plas e fer en sourir avek bann ki get zot. Ler midi i sonnen, zot marse dousman dousman pour retourn kot zot. Son landmen bomaten, ler set er i sonnen, zot retourn ankor kot sa bestop. Zot fer sa sis fwa par semenn, tou dilon lannen.

 ² Parey Sergio ek Olinda, i annan en kantite frer ek ser fidel ki’n pres dan zot prop lavil pour plizyer lannen, menm si laplipar dimoun pa ekoute. Petet ou osi ou pres dan en teritwar koumsa. Si wi, nou felisit ou, parski ou andire e kontinyen prese menm si i difisil. * (Vwar not.) Ou legzanp i ankouraz en kantite frer ek ser, menm bann ki annan plizyer lannen leksperyans. Get sa ki trwa sirveyan rezyonal in dir: “Ler mon travay dan predikasyon avek bann frer ek ser ki demontre zot fidelite dan sa fason, zot legzanp i donn mwan lafors pour kontinyen.” “Zot fidelite i ankouraz mwan pour persevere e pour demontre kouraz dan mon prop minister.” “Zot legzanp i tous mwan en kantite.”

3. Ki sa trwa kestyon ki nou pou diskit lo la e akoz?

³ Dan sa lartik nou pou reponn trwa kestyon: Akoz parfwa nou kapab dekouraze? Ki savedir prodwir oubyen raport fri? Kwa ki pou ed nou kontinyen prodwir fri avek landirans? Ler nou konn larepons sa bann kestyon, sa pou ankouraz nou pour kontinyen fer sa travay predikasyon ki Zezi ti donn nou pour fer.

4. (a) Ki mannyer reaksyon bann Zwif ti fer Pol santi? (b) Akoz Pol ti santi koumsa?

⁴ Eski ou’n deza dekouraze akoz dimoun dan ou teritwar pa oule ekout sa mesaz lo Rwayonm? Si wi, ou pou konpran lafason ki zapot Pol ti santi. I ti anons sa mesaz pour apepre 30 an e i ti ed en kantite dimoun pour vin Kretyen. (Akt 14:21; 2 Korentyen 3:2, 3) Kantmenm sa, i pa ti kapab ed en kantite Zwif pour vin Kretyen. O kontrer, laplipar zot ti refize ekout Pol e serten ti menm persekit li. (Akt 14:19; 17:1, 4, 5, 13) Ki mannyer zot reaksyon ti fer Pol santi? I ti dir: “Mon dan en gran latristes e mon leker i kontinyelman fermal.” (Romen 9:1-3) Akoz i ti santi koumsa? Parski i ti vreman kontan predikasyon ek bann dimoun. Pol ti vreman enterese avek bann Zwif e i ti sagren ler zot pa ti aksepte konpasyon Bondye.

5. (a) Kwa ki motiv nou pour prese? (b) Akoz i normal pour dekouraze parfwa?

⁵ Parey Pol, nou anons mesaz Labib avek dimoun parski nou enterese avek zot e anvi ed zot. (Matye 22:39; 1 Korentyen 11:1) Nou prop leksperyans in montre nou ki servi Zeova i sa pli bon fason viv. E nou anvi ed lezot pour vwar ki zot lavi osi i kapab vin pli meyer! Sanmenm sa nou kontinyen ankouraz zot pour aprann laverite lo Zeova ek son plan pour limanite. I konmsi nou pe anmenn en zoli kado pour zot e nou pe sipliy zot: ‘Silvouple aksepte sa kado.’ Alor ler zot pa aksepte sa kado, i normal pour nou ‘leker fermal,’ zis parey Pol. Nou santi sa douler, pa akoz nou mank lafwa, me akoz nou vreman kontan bann dimoun. Alor, menm si parfwa nou dekouraze, nou kontinyen prese. Petet nou pou dakor avek Elena ki’n fer  pionye pour plis ki 25 an. I dir: “Pour mwan, travay predikasyon i difisil. Me kantmenm sa, napa en lot travay ki mon ti a pli kontan fer.”

6. Ki kestyon nou pou reponn aprezan?

⁶ Akoz nou kapab asire ki nou kapab reisi dan predikasyon nenport landrwa kot nou prese? Pour reponn sa kestyon enportan, annou diskit lo de legzanp ki Zezi ti donnen kot i ti koz lo sa nesesite pour “raport fri.” (Matye 13:23) Premye legzanp i konsernan en pye rezen.

7. (a) Dan sa legzanp ki Zezi ti donnen, lekel ki ganny reprezante par sa “fermye,” “pye rezen” ek “bann brans”? (b) Ki kestyon nou ankor bezwen reponn?

⁷ Lir Zan 15:1-5, 8. Dan sa legzanp, Zezi ti eksplike ki Zeova i “sa fermye,” ki Zezi li menm i sa “pye rezen” e ki son bann disip i “bann brans.” * (Vwar not.) Apre Zezi ti dir son bann zapot: “Mon Papa i ganny glorifye ler zot kontinyen raport bokou fri e montre ki zot mon disip.” Alor, ki savedir prodwir oubyen raport fri? Dan sa legzanp, Zezi pa ti dir ki sa fri i reprezante egzakteman, me i ti donn en nide ki ed nou pour trouv larepons sa kestyon.

8. (a) Dan legzanp Zezi, akoz “raport fri” pa kapab vedir fer bann nouvo disip? (b) Kwa ki vre dan tou sa ki Zeova i demann nou pour fer?

⁸ Zezi ti dir sa konsernan son Papa: “Tou brans lo mwan ki pa raport fri, i koupe.” Andotmo, nou bann serviter Zeova si selman nou raport fri. (Matye 13:23; 21:43) Alor dan sa legzanp, raport fri pa kapab vedir fer bann nouvo disip. (Matye 28:19) Si non, bann Temwen fidel ki pa’n ed en dimoun pour vin en disip Zezi pou parey bann brans ki pa raport fri. Me sa pa kapab vre! Akoz? Parski nou pa kapab fors dimoun pour vin bann disip e Zeova i kontan nou. I pa ti pou zanmen demann nou pour fer en keksoz ki nou pa kapab fer. I demann nou pour fer zis sa ki nou kapab fer.​—Deterononm 30:11-14.

9. (a) Ki mannyer nou raport fri? (b) Ki legzanp nou pou diskit lo la aprezan?

⁹ Ki savedir raport fri alor? I bezwen en keksoz ki nou tou nou kapab fer. Ki travay Zeova in donn tou son bann serviter? Pour anons sa bon nouvel lo Rwayonm Bondye. * (Vwar not.) (Matye 24:14) Legzanp Zezi lo en fermye ki ti senm lagrenn i ed nou pour konpran sa pli byen. Annou diskit lo sa legzanp aprezan.

10. (a) Ki sa lagrenn ek sa later dan legzanp Zezi i reprezante? (b) Ki en tiz dible i prodwir?

¹⁰ Lir Lik 8:5-8, 11-15. Dan legzanp sa fermye ki ti senm lagrenn, Zezi ti eksplike ki sa lagrenn i “parol Bondye” oubyen sa mesaz lo Rwayonm Bondye. Sa later i reprezant leker en dimoun. Sa lagrenn ki ti tonm lo bon later ti fer rasin, zermen e vin en plant. Apre, sa plant “ti raport fri 100 fwa plis.” Si sa plant ti en tiz dible, ki kalite fri i ti pou prodwir? Bann pti tiz dible? Non, i  ti pou prodwir bann lagrenn ki avek letan i pouse e vin bann tiz dible. Dan sa legzanp, en lagrenn ti prodwir 100 lagrenn. Ki sa i ansenny nou konsernan predikasyon?

11. (a) Ki nou aprann lo predikasyon avek legzanp sa fermye ki ti senm lagrenn? (b) Ki mannyer nou prodwir nouvo lagrenn?

¹¹ Premye fwa ki nou paran Kretyen ouswa lezot Temwen ti ansenny nou lo Rwayonm Bondye, i ti konmsi zot ti’n plant en lagrenn dan bon later. Zot ti vreman kontan ler zot ti vwar nou aksepte sa mesaz. Sa lagrenn ti kontinyen pouse ziska ki i ti pare pour raport fri. Zis parey sa tiz dible ki’n ganny mansyonnen pli boner pa prodwir bann nouvo tiz dible me bann nouvo lagrenn, nou osi nou pa prodwir bann nouvo disip me bann nouvo lagrenn. * (Vwar not.) Ki mannyer nou fer sa? Sak fwa nou koz lo Rwayonm Bondye avek lezot, i konmsi sa lagrenn ki ti ganny plante dan nou leker pe miltipliye e pe ganny senmen. (Lik 6:45; 8:1) Alor o tan ki nou kontinyen anons sa mesaz lo Rwayonm Bondye, nou “prodwir fri avek landirans.”

12. (a) Ki nou aprann avek legzanp Zezi konsernan sa pye rezen ek sa fermye ki ti senm lagrenn? (b) Ki mannyer sa leson i fer ou santi?

¹² Ki nou aprann avek legzanp Zezi konsernan sa pye rezen ek sa fermye ki ti senm lagrenn? Nou aprann ki “prodwir fri” pa depan lo si dimoun i ekout sa mesaz. I depan lo si nou kontinyen prese. Pareyman, Pol ti eksplike: “Sakenn pou ganny son rekonpans dapre son travay.” (1 Korentyen 3:8) Zeova pou rekonpans nou pour nou travay, pa pour rezilta nou travay. Matilda, ki’n fer pionye pour 20 an, i dir, “I donn mwan bokou lazwa pour konnen ki Zeova i rekonpans nou pour nou zefor.”

13, 14. Dapre Romen 10:1, 2, akoz Pol pa ti zanmen aret prese?

¹³ Kwa ki pou ed nou “prodwir fri avek landirans”? Annou get legzanp Pol pli byen? Nou konnen ki Pol ti dekouraze akoz bann Zwif pa ti aksepte sa mesaz lo Rwayonm. Par kont, Pol pa  ti zanmen aret anons sa mesaz avek zot. I ti eksplik lafason ki i ti santi konsernan sa bann Zwif ler i ti dir: “Sa ki mon anvi avek tou mon leker e ki mon pe sipliy Bondye, se ki bann Zwif i ganny sove. Parski mon kapab dir sa dan zot faver ki zot annan devouman pour Bondye me pa dapre konnesans egzakt.” (Romen 10:1, 2) Alor akoz Pol ti kontinyen prese?

¹⁴ Premyerman, Pol ti dir, “mon anvi avek tou mon leker.” Sa i montre nou ki i ti vreman anvi ki bann Zwif i ganny sove e sa ti motiv li pour anons sa mesaz avek zot. (Romen 11:13, 14) Dezyenmman, i ti dir ki i ti “sipliy Bondye.” Pol ti sipliy Zeova pour ed sak Zwif pour aksepte sa mesaz lo Rwayonm. Trwazyenmman, Pol ti dir: “Zot annan devouman pour Bondye.” Pol ti vwar sa ki bon dan dimoun ek zot potansyel pour servi Zeova. I ti konnen ki sa bann Zwif devoue ti kapab vin bann disip Kris devoue, zis parey li.

15. Ki mannyer nou kapab imit Pol? Donn bann legzanp.

¹⁵ Ki mannyer nou kapab imit Pol? Premyerman, nou bezwen vreman anvi ed sa bann ki “annan sa bon kondisyon leker pour ganny lavi eternel.” Dezyenmman, nou sipliy Zeova pour ed bann dimoun senser pour ekoute ler nou anons sa mesaz lo Rwayonm avek zot. (Akt 13:48; 16:14) Sanmenm ki  Silvana, ki’n fer pionye pour preski 30 an, in fer. I dir, “Avan mon al kot en lakaz dan mon teritwar, mon priy Zeova e demann li pour donn mwan en latitid pozitif.” Nou osi priye ki bann lanz i ed nou pour trouv bann dimoun ki pare pour ekoute. (Matye 10:11-13; Revelasyon 14:6) Robert, ki’n fer pionye pour plis ki 30 an, i dir, “Pour travay ansanm avek bann lanz ki konn sa ki pe pase dan lavi bann met lakour i eksitan.” Trwazyenmman, nou esey vwar sa ki bon dan dimoun ek zot potansyel pour servi Zeova. Carl, en ansyen ki ti batize plis ki 50 an pase, i dir, “Mon rod okenn pti detay dan sa dimoun ki montre ki i senser, petet en sourir, en regar zantiy ouswa en kestyon senser.” Si nou fer sa bann keksoz, nou pou “prodwir fri avek landirans” parey Pol ti fer.

16, 17. (a) Ki leson nou kapab aprann avek Eklezyast 11:6? (b) Ki lefe nou predikasyon i kapab annan lo bann ki pe obzerv nou?

¹⁶ Nou pa devret zanmen oubliye ki nou travay predikasyon i kapab annan en gran lefe lo dimoun, menm si i paret ki personn pa ekoute. (Lir Eklezyast 11:6.) Dimoun pe obzerv nou. Zot remarke ki nou sanz byen, annan lapolites e amikal. Sa i kapab enpresyonn zot e avek letan, menm bann ki ti annan move pwennvi lo nou i kapab konmans vwar nou dan en pli bon fason. Sergio ek Olinda ti vwar ki sa i vre.

¹⁷ Sergio i dir: “Vi ki nou ti malad, nou pa ti al dan sa landrwa piblik pour en pe letan. Ler nou ti retournen, bann dimoun ki ti pe pase ti dir, ‘Ki’n arive? Nou’n mank zot.’” Avek en sourir Olinda i dir: “Bann drayver bis ti fer nou salanm e serten ki ti pe dray ti kriye, ‘Bon travay!’ Zot ti menm demann nou magazin.” Sergio ek Olinda ti vreman sirprann ler en zonm ti vin kot zot prezantwar, donn zot en bouke fler e remersye zot pour sa travay ki zot pe fer.

18. Akoz ou determinen pour “prodwir fri avek landirans”?

¹⁸ O tan ki ou “pa arete” koz avek lezot konsernan Rwayonm Bondye, ou pe zwe en rol enportan dan sa travay pour rann “temwannyaz avek tou nasyon.” (Matye 24:14) Pli enportan, ou kapab ganny vre lazwa akoz ou konnen ki ou pe fer Zeova kontan. I kontan tou bann ki “prodwir fri avek landirans”!