1. Apre ki Adan ek Ev ti’n fer pese, ki lenformasyon Zeova ti donnen konsernan nou lennmi?

ADAN ti konnen ki bann serpan pa kapab koze. Alor ler i ti aprann ki en serpan ti’n koz avek Ev, petet i ti realize ki en lanz ki ti’n koze. (Zenez 3:1-6) Adan ek Ev pa ti konnen lekel sa lanz. Par kont, Adan ti swazir pour pran kote avek sa etranze e rebel kont son Papa dan lesyel ki ti kontan li. (1 Timote 2:14) Deswit, Zeova ti konmans donn plis lenformasyon konsernan sa move lennmi e promet ki sa lennmi ti pou ganny detrir pli tar. Me Zeova ti averti ki antretan, sa lanz ki ti’n koz atraver sa serpan ti pou opoz tou bann ki kontan Bondye.​—Zenez 3:15.

2, 3. Pour ki rezon petet Zeova pa’n donn bokou lenformasyon lo Satan avan Mesi i arive?

² Zeova pa’n zanmen dir nou non sa lanz ki ti rebel kont li. * (Vwar not.) Apre sa rebelyon dan zarden Edenn, 2,500 an ti pase avan ki Zeova ti fer konnen lekel sa rebel.  (Zob 1:6) I koni par sa tit “Satan,” ki vedir “Opozan.” Anfet, i annan zis trwa liv dan Lekritir Ebre ki mansyonn Satan, 1 Kronik, Zob ek Zekarya. Akoz pa bokou lenformasyon ki ti ganny devwale konsernan sa lennmi avan Mesi i arive?

³ Dan Lekritir Ebre, Zeova pa’n enkli bokou detay konsernan Satan e sa ki i fer. Apre tou, Lekritir Ebre ti ganny ekrir pour ed dimoun rekonnet e swiv Mesi. (Lik 24:44; Galat 3:24) Ler Mesi ti arive, Zeova ti servi li ek son bann disip pour donn laplipar lenformasyon ki nou konnen lo Satan ek bann lanz ki’n zwenn ansanm avek li. * (Vwar not.) Sa i apropriye, parski Zeova pou servi Zezi ek bann Kretyen swazir pour detri Satan ek bann ki pe swiv li.​—Romen 16:20; Revelasyon 17:14; 20:10.

4. Akoz nou pa devret per Dyab?

⁴ Zapot Pyer i dekrir Satan oubyen Dyab, konman “en lyon ki pe kriye” e Zan i apel li en “serpan” ek en “dragon.” (1 Pyer 5:8; Revelasyon 12:9) Me nou pa devret per Dyab. I annan keksoz ki i napa pouvwar pour fer. (Lir Zak 4:7.) Nou annan proteksyon Zeova, Zezi ek bann lanz fidel. Avek zot led, nou kapab reziste nou lennmi. Kantmenm sa, nou bezwen konn larepons trwa kestyon enportan: Ki kantite lenfliyans Satan i annan? Ki mannyer i esey enfliyans dimoun? Kwa ki i pa kapab fer? Annou reponn sa bann kestyon e vwar ki leson nou kapab aprann.

5, 6. Akoz bann gouvernman imen pa kapab anmenn bann sanzman ki limanite i pli bezwen?

⁵ En kantite lanz ti pran kote avek Satan e rebel kont Bondye. Avan Deliz, Satan ti tant omwen serten sa bann lanz pour annan relasyon seksyel avek bann madanm. Labib i dekrir sa dan en fason senbolik ler i dir ki sa dragon ki ti tonbe sorti dan lesyel ti trenn en tyer bann zetwal dan lesyel avek li. (Zenez 6:1-4; Zid 6; Revelasyon 12:3, 4) Ler sa bann lanz ti abandonn fanmir Bondye, zot ti met zot lekor anba kontrol Satan. Nou pa devret krwar ki sa bann lanz rebel i form en group ki mal organize. Dan zot lemonn envizib, Satan in kopye Rwayonm Bondye e etabli son prop gouvernman. I’n apwent son lekor konman lerwa e i’n organiz bann demon, donn zot pouvwar e fer zot vin bann sef sa lemonn.​—Efezyen 6:12.

⁶ Satan i servi son lorganizasyon pour kontrol tou gouvernman imen. Nou kapab asire ki sa i vre parski Satan ti montre Zezi “tou bann rwayonm lo later” e i ti dir: “Mon pou donn ou laglwar ek lotorite lo tou sa bann rwayonm, parski i’n ganny donnen avek mwan e mwan mon donn li avek nenport ki ki mon  oule.” (Lik 4:5, 6) Kantmenm sa, plizyer gouvernman i fer bann bon keksoz pour zot sitwayen e serten dirizan i senserman anvi ed zot pep. Me napa okenn dirizan imen ki kapab anmenn bann sanzman ki nou pli bezwen.​—Psonm 146:3, 4; Revelasyon 12:12.

7. Apard ki servi bann gouvernman, ki mannyer Satan i servi fo larelizyon ek sa lemonn komers? (Vwar portre o konmansman sa lartik.)

⁷ Satan ek bann demon i osi servi fo larelizyon ek lemonn komers pour anbet “dimoun lo later antye,” setadir tou limanite. (Revelasyon 12:9) Satan i servi fo larelizyon pour propaz bann mansonz lo Zeova e i’n menm esey kasyet non Bondye. (Zeremi 23:26, 27) Sa in fer ki serten dimoun senser ki krwar ki zot pe ador Bondye pe aktyelman ador bann demon. (1 Korentyen 10:20; 2 Korentyen 11:13-15) Satan i osi servi sa lemonn komers pour propaz bann mansonz, tel parey ki larzan ek keksoz materyel i fer dimoun ere. (Proverb 18:11) Bann ki krwar sa mansonz i pas tou zot lavi pe servi “Larises” plito ki Bondye. (Matye 6:24) Menm si zot ti deza kontan Bondye, zot lanmour pour bann keksoz materyel i vin telman for ki zot lanmour pour Bondye i disparet.​—Matye 13:22; 1 Zan 2:15, 16.

8, 9. (a) Ki de leson nou kapab aprann avek sa ki Adan, Ev ek bann lanz rebel ti fer? (b) Akoz i bon pour nou konnen ki Satan ki kontrol lemonn?

⁸ I annan de leson enportan ki nou kapab aprann dan sa ki Adan, Ev ek bann lanz rebel ti fer. Premyerman, nou aprann ki i annan zis de kote e ki nou bezwen swazir enn. Nou kapab swa lo kote Zeova ouswa lo kote Satan. (Matye 7:13) Dezyenmman, nou aprann ki bann ki lo kote Satan i ganny zis bann byenfe tanporer. Par egzanp, Adan ek Ev ti ganny loportinite pour deside pour zot menm kwa ki byen e kwa ki mal. Osi, bann demon ti ganny serten pouvwar lo bann gouvernman imen. (Zenez 3:22) Me bann ki swazir pour pran kote Satan i toultan ganny bann move rezilta. Napa bann vre byenfe!​—Zob 21:7-17; Galat 6:7, 8.

⁹ Akoz i enportan pour nou konnen ki Satan i kontrol sa lemonn? I ed nou pour annan sa pwennvi apropriye lo bann gouvernman e motiv nou pour pres sa bon nouvel. Nou konnen ki Zeova i anvi nou annan respe pour bann gouvernman. (1 Pyer 2:17) I ekspekte ki nou obei zot bann lalwa o tan ki sa bann lalwa pa al kont son bann standar. (Romen 13:1-4) Me nou osi konnen ki nou pa devret pran okenn kote dan bann zafer politik e ki nou pa devret zanmen siport okenn parti politik ouswa dirizan imen. (Zan 17:15, 16; 18:36) Vi ki nou realize ki Satan pe esey kasyet non Zeova e sali Son repitasyon, nou fer tou sa ki nou kapab pour ansenny dimoun laverite lo nou Bondye. Nou fyer pour port son non e pour servi sa non. I pli enportan pour nou kontan  Bondye ki kontan larzan oubyen bann keksoz materyel.​—Izai 43:10; 1 Timote 6:6-10.

10-12. (a) Petet ki mannyer Satan in servi labwet pour tant serten lanz? (b) Ki nou aprann avek sa ki sa bann lanz ti fer?

¹⁰ Satan i servi bann metod efikas pour enfliyans lezot. Pour fer zot fer sa ki i anvi, parfwa i servi bann keksoz konman labwet pour tant zot e lezot fwa i esey bouli zot.

¹¹ Satan ti servi labwet pour tant en kantite lanz. I tre probab ki i ti obzerv zot pour en bon pe letan pour li konnen kwa ki ti pou tant zot. Serten lanz ti mord sa labwet e fer sèks avek bann madanm. Zot zanfan ti vin bann zean vyolan ki ti kriyel avek bann dimoun o tour zot. (Zenez 6:1-4) An plis ki servi imoralite seksyel pour tant sa bann lanz, i kapab ki Satan ti osi promet zot ki zot ti pou ganny pouvwar lo tou imen. Dan sa fason, i kapab ki Satan ti pe esey enterfer avek lakonplisman profesi Zeova konsernan ‘desandans sa fanm.’ (Zenez 3:15) Me Zeova ti anpes li reisi. I ti anmenn Deliz ki ti kas okenn plan ki Satan ek son bann demon ti’n kapab annan.

¹² Ki nou aprann avek sa? Imoralite seksyel ek lorgey i bann kalite labwet ki mars byen. Bann lanz ki ti pran kote avek Satan ti’n pas plizyer lannen dan lesyel avek Bondye li menm! Kantmenm sa, en kantite zot ti les bann move dezir devlope dan zot leker e sa bann dezir ti vin vreman for. Nou bezwen toultan rapel ki menm si nou’n servi Zeova pour en bon pe letan, bann move dezir i kapab pran rasin dan nou leker. (1 Korentyen 10:12) Se pour sa rezon ki nou devret toultan egzamin nou leker e retir okenn panse imoral ek lorgey ki kapab fer nou vin egois!​—Galat 5:26; lir Kolosyen 3:5.

13. Ki lot kalite labwet Satan i servi e ki mannyer nou kapab evite pran sa labwet?

¹³ En lot kalite labwet ki Satan i servi se sa lanvi pour konn plis lo bann  keksoz ki annan pour fer avek demon. Ozordi, i esey servi fo larelizyon ek divertisman pour fer dimoun enterese dan bann demon. Bann film, zwe video ek lezot kalite divertisman i kapab donn sa lenpresyon ki bann keksoz ki annan pour fer avek demon i gou. Ki mannyer nou kapab evite pran sa labwet? Nou pa devret ekspekte ki lorganizasyon Bondye i donn nou en lalis bann bon ek move divertisman. Nou bezwen aprann servi nou konsyans pour ki nou kapab fer bann bon swa baze lo bann prensip Zeova. (Ebre 5:14) Osi, si nou lanmour pour Bondye i “san lipokrizi,” nou pou fer bann bon swa. (Romen 12:9, not) En ipokrit i dir en keksoz me i fer lekontrer avek sa ki i’n dir. Alor ler nou swazir divertisman, nou kapab demann nou lekor: ‘Eski mon pe aplik menm prensip ki mon dir lezot swiv? Ki mon bann letid Labib ouswa bann dimoun ki mon koz avek dan predikasyon pou mazinen si zot vwar bann divertisman ki mon swazir?’ Ler nou aplik menm prensip ki nou ankouraz lezot pour aplike, i pli fasil pour nou rezet labwet Satan.​—1 Zan 3:18.

14. Ki mannyer Satan i kapab esey bouli nou e ki mannyer nou kapab reziste li?

¹⁴ Satan i osi esey bouli nou e fer nou per pour ki nou pa reste fidel avek Zeova. Par egzanp, i kapab enfliyans bann gouvernman pour enterdi nou travay predikasyon. I kapab enfliyans nou koleg travay ouswa kanmarad lekol pour sikann nou akoz nou pe swiv bann standar Labib. (1 Pyer 4:4) Satan i menm kapab enfliyans bann manm nou fanmir ki pa Temwen pour esey anpes nou asiste bann renyon, menm si zot napa en move lentansyon. (Matye 10:36) Ki nou kapab fer pour reziste Satan ler i bouli nou? Nou pa devret sirprann par sa bann tel latak parski nou konnen ki Satan pe lager kont nou. (Revelasyon 2:10; 12:17) Nou devret osi rapel sa vre kestyon ki bezwen ganny reponn: Satan i dir ki nou servi Zeova zis ler i fasil  e ki nou pou rezet Bondye ler keksoz i vin difisil. (Zob 1:9-11; 2:4, 5) Finalman, nou devret toultan demann Zeova pour donn nou lafors. Rapel ki Zeova pa pou zanmen abandonn nou.​—Ebre 13:5.

15. Eski Satan i kapab fors nou pour fer okenn keksoz ki nou pa anvi? Eksplike.

¹⁵ Satan pa kapab fors personn pour fer sa ki zot pa anvi. (Zak 1:14) En kantite dimoun dan lemonn pa menm realize ki zot lo kote Satan. Me ler en dimoun i aprann laverite, i bezwen swazir si i pou lo kote Zeova ouswa lo kote Satan. (Akt 3:17; 17:30) Si nou determinen pour obei Bondye, Satan pa kapab kas nou fidelite.​—Zob 2:3; 27:5.

16, 17. (a) Kwa ankor ki Satan ek bann demon pa kapab fer? (b) Akoz nou pa devret per pour priy Zeova aotvwa?

¹⁶ I annan lezot keksoz ki Satan ek bann demon pa kapab fer. Par egzanp, Labib pa zanmen dir ki zot kapab konn sa ki dan nou lespri ek leker. Zis Zeova ek Zezi ki kapab fer sa. (1 Samyel 16:7; Mark 2:8) Alor eski nou devret per ki si nou koze oubyen priy aotvwa, Satan ek son bann demon pou tann sa ki nou pe dir e servi sa lenformasyon kont nou? Non! Akoz non? Mazin lo sa konparezon: Nou pa per pour fer bann bon keksoz dan nou servis pour Zeova zis akoz Dyab i kapab vwar nou. Dan menm fason, nou pa devret per pour priy aotvwa zis akoz petet Dyab i kapab tann nou. Labib i osi koz lo plizyer fwa ki bann serviter Bondye ti priy aotvwa e nou pa zanmen lir ki zot ti per ki Dyab ti pou tann zot. (1 Lerwa 8:22, 23; Zan 11:41, 42; Akt 4:23, 24) Si nou fer nou mye pour koz e azir parey Bondye i anvi nou fer, nou kapab asire ki Zeova pa pou permet Dyab fer nou ditor dan en fason permanan.​—Lir Psonm 34:7.

¹⁷ Nou bezwen konn nou lennmi, me nou pa bezwen per li. Menm si nou enparfe, avek sipor Zeova nou kapab ranport laviktwar lo Satan! (1 Zan 2:14) Si nou opoz Satan, i pou sov lwen avek nou. (Zak 4:7; 1 Pyer 5:9) Ozordi, i paret ki Satan pe atak espesyalman bann zenn. Ki mannyer zot kapab reziste bann latak Dyab? Nou pou reponn sa kestyon dan sa lot lartik.