LER mon ti pe lekol, laplipar keksoz ti reste parey. Bann manrmay ki ti dan ou premye laklas lekol ti bann menm manrmay ki ou ti fini lekol avek. Ou ti konn non laplipar dimoun dan lavil e zot ti konn sa ki pour ou.

Dan zalantour lavil Liberty i ti annan bann pti laferm e laplipar ti bann plantasyon mai. Ler mon ti ne, mon papa ti travay pour enn sa bann fermye. Konman en adolesan, mon ti aprann dray trakter e fer lezot travay lo laferm.

Mon papa pa ti zenn ler mon ti ne. I ti annan 56 an e mon manman ti annan 35 an. Pourtan, mon papa ti for e an bonn sante. I ti kontan travay dir e i ti montre tou son bann zanfan pour fer parey. I pa ti zanmen fer bokou larzan, me i ti donn nou en landrwa reste, lenz pour mete ek dekwa manze. Deplis, i ti toultan pas letan avek nou. Mon papa ti annan 93 an ler i ti mor. Mon manman ti mor a laz 86 an. Ni enn ant zot pa ti servi Zeova. Par kont, enn parmi mon bann frer pe servi konman ansyen depi 1972.

Mon manman ti byen relizye. Tou le Dimans i ti anmenn nou legliz Baptist. A laz 12 an mon ti tann zot koz lo Trinite pour premye fwa. Alor mon ti  demann mon manman: “Ki mannyer Zezi i kapab Garson e Papa an menm tan?” Mon rapel ki i ti dir mwan: “Mon garson, i en mister sa. Nou pa sipoze konpran li.” I ti vreman en mister pour mwan. Kantmenm sa, ler mon ti annan apepre 14 an mon ti ganny batize dan en pti larivyer. Zot ti plonz mwan dan delo trwa fwa, en fwa pour Papa, en fwa pour Garson e en fwa pour lespri sen!

Ler mon ti dan lekol segonder, mon ti annan en zanmi ki ti en bokser e i ti konvenk mwan pour esey fer laboks. Alor mon ti konmans mon lantrennman e mon ti vin en manm dan en lorganizasyon laboks ki apel Golden Gloves. Mon pa ti tro bon, alor apre detrwa lager mon ti arete. Pli tar, mon ti ganny apele pour al dan Larme Lanmerik e mon ti ganny anvoye Lalmanny. Ler mon ti pe servi laba, bann ki ti ansarz ti anvoy mwan dan en lakademi larme akoz zot ti krwar ki mon kapab vin en bon lider. Zot ti oule ki mon fer en karyer dan militer. Par kont, mon pa ti anvi reste dan larme, alor an 1956 ler mon ti’n fini fer sa de-z-an ki mon ti sipoze, mon ti kit larme. Me pa bokou letan apre sa, mon ti antre dan en larme ki konpletman diferan.

Avan mon aprann laverite, mon ti annan en move nide lo ki mannyer en vre zonm i devret ete. Mon ti ganny enfliyanse par bann film ek bann dimoun ki mon ti frekante. Mon ti krwar ki bann zonm ki koz lo Labib pa bann vre zonm. Me apre mon ti konmans aprann lo serten keksoz ki ti sanz mon lavi. En zour, ler mon ti pe dray mon zoli loto rouz dan lavil, de zenn madanm ti fer mwan salanm apre zot ti sinyal mwan pour vin vwar zot. Zot ti de pti ser sa zonm ki ti’n marye avek mon gran ser. Sa de zenn fiy ti Temwen Zeova. Zot ti’n deza donn mwan bann magazin Watchtower ek Awake! me mon ti vwar The Watchtower en pe tro difisil pour konpran. Me safwasi, zot ti envit mwan pour asiste Letid Liv Kongregasyon, en pti renyon ki ti ganny fer kot zot, kot zot ti etidye e diskit Labib. Mon ti dir zot mon ava mazin lo la. Zot ti fer en pti sourir e dir, “Promet nou.” Mon ti dir, “Mon promet.”

Mon ti regrete ki mon ti’n dir sa, me mon ti santi ki mon pa kapab kas mon promes. Alor sa zour swar mon ti al sa renyon. Mon ti pli enpresyonnen avek bann manrmay. Mon pa ti oule krwar ki kantite zot ti konnen lo Labib! Menm si mon ti’n al lanmes avek mon manman tou le Dimans, mon pa ti konn preski nanryen lo Labib. La aprezan mon ti vreman anvi konn plis, alor mon ti aksepte en letid Labib. Enn bann premye keksoz ki mon ti aprann se ki Bondye Tou Pwisan i annan en non personnel, Zeova. Plizyer lannen avan, mon ti’n demann mon manman lo bann Temwen Zeova, i ti’n zis dir mwan: “Anr zot, zot ador en vye tonton ki apel Zeova.” Me aprezan mon ti santi ki mon lespri ti pe konmans ouver!

Mon pa ti tarde pour fer progre parski mon ti konnen ki mon ti’n trouv laverite. Zis nef mwan apre ki mon ti’n asiste sa premye renyon, mon ti batize an Mars 1957. Mon latitid ti’n sanze. Mon vreman kontan ki mon’n aprann sa ki Labib i dir lo en vre zonm. Zezi ti en zonm parfe. I ti annan plis kouraz ek lafors ki tou lezot zonm. Me i pa ti lager avek personn. O kontrer, zis parey i ti’n ganny predir “i pa ti ouver son labous.” (Izai 53:2, 7) Mon ti  aprann ki en vre disip Zezi i “devret zantiy anver tou dimoun.”​—2 Timote 2:24.

Son lannen apre, an 1958, mon ti konmans fer pionye. Me pa bokou letan apre, mon ti bezwen arete pour en pti pe letan. Akoz? Mon ti’n deside marye avek Gloria ki ti enn ant sa de fiy ki ti’n envit mwan pour asiste sa letid liv! Mon pa’n zanmen regret sa desizyon. Gloria ti en bizou sa letan e i ankor en bizou ozordi. Dan mon lizye, i pli presye ki sa dyanman pli ser e mon vreman kontan ki mon’n marye avek li! Mon ava les li dir zot en ptigin lo li menm:

“Mon ti annan 16 frer ek ser. Mon manman ti en Temwen fidel. I ti mor ler mon ti annan 14 an. Apre sa, mon papa ti konmans etidye Labib. Vi ki nou ti nepli annan en manman kot lakour, mon papa ti fer en laranzman avek direktris lekol. Sa letan mon gran ser ti dan son dernyen lannen lekol segonder e Papa ti demande si nou ti kapab al lekol sakenn son tour. Koumsa, enn ant nou ti kapab reste dan lakour pour pran swen avek bann manrmay ki ti pli zenn. Nou ti osi kapab fer sir ki manze ti’n pare pour lafanmir ler Papa i sorti travay. Direktris lekol ti dakor e nou ti fer sa ziska ler mon gran ser ti fini lekol. De fanmir Temwen ti etidye Labib avek nou e 11 nou ti vin Temwen Zeova. Menm si mon ti vreman timid, mon ti kontan predikasyon. Mon msye Sam in vreman ed mwan avek sa diran bann lannen.”

Nou de Gloria nou ti marye an Fevriye 1959. Nou ti kontan fer pionye ansanm. Zilyet sa menm lannen, nou ti met nou laplikasyon pour al servi dan Betel. Nou ti vreman anvi servi kot biro prensipal Temwen Zeova. En bon frer ki apel Simon Kraker ti fer entervyou avek nou. I ti dir nou ki pour le moman Betel pa pe aksepte bann koup marye. Nou ti ankor anvi servi dan Betel, me i ti pran plizyer lannen avan sa i arive.

Nou ti ekri biro prensipal e demann zot pour anvoy nou servi dan en teritwar kot i ti annan en bezwen pour plis proklanmater. Zot ti donn nou zis en swa: Pine Bluff, Arkansas. Sa letan, i ti annan zis de kongregasyon Pine Bluff. En kongregasyon ti pour bann proklanmater blan e sa lot ti pour bann proklanmater nwanr. Nou ti ganny anvoye dan sa kongregasyon pour bann nwanr ki ti annan zis 14 proklanmater.

Petet ou pe mazinen akoz Temwen Zeova ti pou separ bann proklanmater nwanr ek blan. Larepons, se ki sa letan nou ti napa okenn swa. I ti ilegal pour diferan ras melanz ansanm e i ti osi annan en problenm vyolans. Dan bokou landrwa, bann frer ek ser ti per ki zot Lasal Rwayonm ti pou ganny detrir si sa de ras ti zwenn ansanm pour ador Zeova. Bann keksoz koumsa ti arive. Si bann Temwen ki nwanr ti pres kazankaz dan en landrwa kot ti annan bann dimoun blan, zot ti pou ganny arete e i tre probab ki zot ti pou ganny bate. Alor, pour ki sa travay predikasyon i ganny fer, nou ti obei lalwa e swete ki keksoz ti pou sanze pour le meyer.

I pa ti toultan fasil pour prese. Par egzanp, ler nou ti pres dan en teritwar nwanr, par ler nou ti tap lo laport en fanmir blan par aksidan. Aprezan nou ti bezwen deside vitman: Eski nou devret esey fer en pti prezantasyon vit vit oubyen eski nou devret zis demann leskiz e al kot sa lot lakaz? Koumsanmenm keksoz ti ete sa lepok.

Byensir, menm si nou ti pe fer pionye nou ti bezwen fer larzan pour nou kapab viv. Laplipar travay ki nou ti fer nou ti ganny peye trwa dolar par zour. Gloria ti netway detrwa lakaz. Mon ti ganny permisyon pour ed li kot enn sa bann lakour, koumsa i ti fini pli vit. Sa fanmir ti donn nou en porsyon manze pour dezennen ki nou ti partaze avan nou ale. Sak semenn, Gloria ti dres lenz pour en fanmir. Mwan mon ti travay dan zarden, netway lafnet e fer lezot keksoz ki ti bezwen ganny fer kot sa lakour. Kot lakour en fanmir blan, nou ti netway zot lafnet. Gloria ti netway par anndan, mwan mon ti netway an deor. I ti pran lazournen antye, alor zot ti donn nou dezennen. Gloria ti manz anndan me i ti bezwen reste apar avek lafanmir. Mwan mon ti bezwen manz deor dan garaz, me sa pa ti fatig mwan. I ti en bon repa. Zot ti en bon fanmir, me zot ti ganny enfliyanse avek bann dimoun otour zot.  Mon rapel en zour ler nou ti aret kot en stasyon petrol. Apre ki mon ti’n ranpli tenk loto, mon ti demann sa dimoun ki ti pe travay la, en dimoun blan, si Gloria ti kapab servi kabinen. I ti get mwan avek en figir ankoler e dir, “I take.”

De lot kote, nou ti pas bann bon moman avek bann frer ek ser e nou ti kontan predikasyon! Ler nou ti fek ariv Pine Bluff, nou ti reste kot sa frer ki ti pe servi konman serviter kongregasyon sa letan. Son madanm pa ti ankor vin dan laverite e Gloria ti konmans etidye Labib avek li. Antretan, mon ti konmans etidye avek zot fiy ek son msye. Sa manman ek son fiy ti deside pour servi Zeova e batize.

Nou ti annan bann bon zanmi dan kongregasyon dimoun blan. Zot ti envit nou pour vin manze kot zot, me nou ti bezwen al apre ki fernwanr ti’n fer pour ki personn pa vwar nou ansanm. Sa letan Ku Klux Klan (KKK), en lorganizasyon ki promot rasizm ek vyolans ti vreman aktif. Mon rapel en zour swar Halloween mon ti vwar en zonm pe asize anba lavarang kot li, byen fyer abiye dan son lenz tipik ki bann manm KKK i mete. Me bann move leksperyans pa ti anpes bann frer ek ser demontre labonte. Pandan lete en lannen, nou ti bezwen larzan pour nou kapab al lasanble e en frer ti dakor pour aste nou transpor model Ford 1950 pour nou kapab ale. En zour, en mwan pli tar, nou ti byen fatige apre ki nou ti’n fer portanport dan sa gro ker soley e fer en kantite letid Labib. Ler nou ti retourn kot nou, nou ti ganny en sirpriz. Nou loto ti’n park devan nou lakaz! I ti annan en not lo vit devan ki ti dir, “Zot kapab repran zot transpor konman en kado sorti kot mwan. Zot frer.”

Nou ti ganny demontre labonte dan en lot fason ki ti tous mwan en kantite. An 1962, mon ti ganny envite pour asiste Lekol Minister Rwayonm ki ti ganny fer South Lansing, New York. Sa lekol ti pou dire pour en mwan pour form bann sirveyan kongregasyon, rezyonal ek distrik. Sa letan mon pa ti pe travay e nou ti napa bokou larzan. Par kont, mon ti’n al fer entervyou pour travay dan en lakonpannyen telefonn ki ti baze Pine Bluff. Si zot ti anploy mwan, mon ti pou sa premye zonm nwanr ki travay pour sa lakonpannyen. Finalman zot ti dir mwan ki zot anvi donn mwan sa louvraz. Ki mon ti pou fer? Mon ti napa larzan pour vwayaze pour al New York. Mon ti konmans mazin seryezman pour aksepte sa travay e pa aksepte sa lenvitasyon pour al sa lekol. Mon ti pe met mwan pare pour ekri Betel ler en keksoz ki mon pa pou zanmen oubliye ti arive.

En ser dan nou kongregasyon ki son msye pa ti dan laverite, ti tap nou laport en zour granmaten e donn mwan en lanvlop ranpli avek larzan. Li ek son bann zanfan ti’n lev granmaten toulezour pour al tir move zerb dan bann plantasyon koton. Zot ti fer sa pour zot ganny ase larzan pour mwan kapab al New York. I ti dir, “Al sa lekol e aprann tou sa ki ou kapab, apre retournen e ansenny nou!” Pli tar, mon ti demann sa lakonpannyen telefonn si  mon ti kapab konmans travay senk semenn pli tar ki nou ti’n plàn. Zot ti dir mwan, “Non!” Me i pa ti enportan. Mon ti’n fer mon desizyon. Mon vreman kontan ki mon pa ti aksepte sa travay!

Mon ava les Gloria rakont ou sa ki i rapel lo nou letan Pine Bluff: “Mon ti tonm anmoure avek nou teritwar! Mon ti annan 15 a 20 letid Labib. Alor nou ti pres kazankaz bomaten e apre pour larestan lazournen nou ti fer bann letid Labib, par ler menm ziska 11 er diswar. Predikasyon ti vreman gou! Mon ti pou’n kontan pour reste. Mon bezwen admet ki mon pa ti vreman anvi sanz nou servis e antre dan travay sirveyan rezyonal, me Zeova ti annan en lot plan antet.” Sa i vre.

Ler nou ti pe fer pionye Pine Bluff, nou ti fer laplikasyon pour vin pionye spesyal. Nou ti vreman krwar ki nou pou ganny aksepte. Akoz? Parski nou ti konnen ki nou sirveyan distrik ti oule ki nou ed en kongregasyon Texas e i ti anvi ki nou servi konman bann pionye spesyal laba. Nou ti kontan sa nide. Alor nou ti espere, espere, espere menm pour ganny en larepons, me zanmen i ti annan keksoz dan nou bwat let. Finalman, nou ti ganny en let. Nou ti ganny anvoye pour al fer travay sirveyan rezyonal! Sa ti an Zanvye 1965. Frer Leon Weaver, ki konmela pe servi konman kordinater Komite Brans Leta-z-ini, ti ganny apwente konman sirveyan rezyonal an menm tan.

Mon ti per pour vin en sirveyan rezyonal. Apepre enn an avan sa, James A. Thompson, Jr., ki ti nou sirveyan distrik, ti egzamin mon kalifikasyon. Zantiman i ti eksplik bann domenn kot mon kapab amelyore e i ti dir mwan bann kalite ki en bon sirveyan rezyonal i bezwen annan. Pa bokou letan apre ki mon ti’n konmans servi konman sirveyan rezyonal, mon ti realize ki kantite mon ti’n bezwen sa konsey. Apre ki mon ti’n ganny apwente, Frer Thompson ti sa premye sirveyan distrik ki mon ti travay avek. Mon ti aprann en kantite avek sa frer fidel.

Sa bann letan, en sirveyan rezyonal pa ti ganny bokou formasyon. Mon ti obzerv en sirveyan rezyonal pour en semenn ler i ti vizit en kongregasyon. Apre i ti obzerv mwan pour en semenn ler mon ti vizit en lot kongregasyon. I ti donn mwan bann sizesyon ek konsey. Me apre sa nou ti lo nou menm. Mon rapel mon ti dir Gloria, “Eski i vreman bezwen ale aprezan?” Me avek letan, mon ti realiz en keksoz enportan. I pou toultan annan bann bon frer ki kapab ed ou, me si selman ou les zot ed ou. Mon ankor seri sa led ki mon ti gannyen avek bann frer eksperyanse tel parey J. R. Brown, ki ti en sirveyan rezyonal sa letan ek Fred Rusk ki ti dan lafanmir Betel.

 Rasizm ti partou sa letan. En fwa, KKK ti fer en lamars dan en lavil ki nou ti pe vizite Tennessee. Mon rapel en lot fwa ler nou ti al kot en restoran pour repoz en ptigin pandan predikasyon. Ler mon ti al servi kabinen, en zonm byen ankoler ki ti annan bann tatou rasis lo li ti swiv mwan. Me apre, en frer blan ki ti bokou pli gro ki nou tou le de, ti antre. Sa frer ti demann mwan, “Frer Herd, tou keksoz i oke?” Deswit sa zonm ti ale san servi kabinen. Diran bann lannen, mon’n vwar ki sa vre rezon akoz ki i annan rasizm se pa kouler lapo en dimoun me sa pese ki dan nou tou. Mon’n osi aprann ki en frer i en frer nenport kouler son lapo e i pou mor pour ou si i neseser.

Nou ti pas 12 an dan travay sirveyan rezyonal e 21 an dan travay sirveyan distrik. Nou ti ganny bokou rekonpans pandan sa bann lannen e nou’n ganny bann leksperyans vreman ankourazan. Me i ti annan en lot rekonpans ki ti pe esper nou. An Out 1997 en rev ki nou ti’n annan pour plizyer lannen ti vin vre. Nou ti ganny envite pour al servi dan Betel Leta-z-ini. Sa ti 38 an apre ki nou ti’n fer nou premye laplikasyon. Son mwan apre, nou ti konmans servi dan Betel. Mon ti krwar ki bann frer responsab dan Betel ti oule ki mon ede zis pour en pti pe letan, me pa sa ki ti arive.

Premye landrwa ki mon ti travay dan Betel ti dan Departman Servis. Mon ti aprann en ta keksoz! Bann frer dan sa departman i ganny demande en kantite kestyon delika e difisil sorti kot bann konsey ansyen ek bann sirveyan rezyonal partou dan pei. Mon rekonesan ki sa bann frer ti demontre bokou pasyans e ed mwan anmezir ki zot ti pe form mwan. Si mon ti ganny demande pour travay laba ankor, i ti pou ankor annan en kantite pour mwan aprann avek sa bann frer.

Nou de Gloria nou kontan lavi dan Betel. Nou’n toultan kontan lev boner e sa labitid i ed nou dan Betel. Apepre enn an apre, mon ti konmans servi konman en led pour Komite Servis Konsey Direkter Temwen Zeova. Apre an 1999, mon ti ganny apwente konman en manm Konsey Direkter. Mon’n aprann en kantite keksoz dan sa servis. Me sa leson pli enportan se ki sef kongregasyon Kretyen i Zezi Kri, pa okenn zonm.

Ler mon reflesi lo mon lavi, par ler mon santi mwan en pe parey profet Amos. Zeova ti remark sa berze ki ti annan limilite. I ti annan sa travay senp pour pik bann fig, en fri ki zis bann dimoun mizer ki ti manze. Par kont, Bondye ti apwent Amos pour vin en profet e beni li en kantite dan son servis. (Amos 7:14, 15) Pareyman, Zeova ti remark mwan, garson en fermye mizer ki ti reste Liberty, Indiana. Zeova in beni mwan en kantite. I menm annan tro bokou benediksyon pour mwan koz lo la! (Proverb 10:22) I vre ki avan mon ti pov lo plan materyel, me mon vreman santi ki mon’n vin bokou pli ris ki mon ti’n kapab mazinen!