1. Akoz serten pa anvi etidye?

OZORDI, en kantite dimoun i bezwen travay dir pour ganny ase larzan pour viv. En kantite nou bann frer ek ser i bezwen fer bann gran lazournen travay zis pour zot kapab ganny ase larzan pour aste manze ek lenz e pour ganny en landrwa reste pour zot fanmir. I annan lezot frer ek ser ki bezwen vwayaz bann gran zistans pour al travay e sa i pran plizyer erdtan pour ale e retournen. An plis, en kantite nou bann frer ek ser i fer bann gro travay fizik pour siport zot lekor ek fanmir. A lafen lazournen sa bann frer ek ser i epwize! Zot sitan fatige ki etidye i dernyen keksoz dan zot lespri.

2. Kan ki ou ou etidye?

² Par kont, nou bezwen trouv en moman pour vreman etidye Parol Bondye ek bann piblikasyon baze lo Labib. Nou oblize fer sa si nou anvi annan en bon relasyon avek Zeova e viv pour touzour. (1 Tim. 4:15) Serten i lev boner toulezour pour etidye ler i ankor trankil e zot kapab reflesi byen apre ki zot in repoze. Lezot i deside met en pti pe letan akote a lafen lazournen kot zot pa pou ganny distrer pour etidye e medit lo Parol Bondye ek nou bann piblikasyon.

3-4. Ki sanzman ki’n ganny fer lo lakantite lenformasyon ki nou gannyen e akoz?

³ I tre probab ki ou dakor ki i enportan ki nou fer letan pour etidye. Me kwa ki nou devret etidye? Serten i kapab dir, ‘I annan en ta pour lir’ oubyen ‘Mon vwar li difisil pour lir tou sa ki nou gannyen.’ Serten i kapab lir tou nou bann piblikasyon e get tou bann video baze lo Labib ki nou gannyen, me lezot i vwar li difisil pour trouv letan pour fer sa. Konsey Direkter i konnen ki sa i leka. I pour sa rezon ki resaman Konsey Direkter in deside pour redwir lakantite  lenformasyon ki nou enprimen e ki nou met lo nou sit Enternet.

⁴ Par egzanp, nou nepli pibliy Yearbook of Jehovah’s Witnesses, parski nou kapab trouv en kantite leksperyans ankourazan lo jw.org^® e osi dan bann progranm ki nou gannyen tou le mwan lo Televizyon JW^®. Aprezan Latour Veyer edisyon piblik ek magazin Veye! i ganny pibliye zis trwa fwa par an. Sa bann sanzman pa’n ganny fer pour nou annan plis letan pour fer lezot keksoz ki napa nanryen pour fer avek nou servis pour Zeova. Zot in ganny fer pour nou kapab annan plis letan pour konsantre lo “sa ki pli enportan.” (Fili. 1:10) Annou vwar ki mannyer ou kapab deside kwa ki pli enportan e ki mannyer ou kapab tir maksimonm profi dan ou letid Labib personnel.

5-6. Ki bann piblikasyon nou devret fer sir ki nou etidye o profon?

⁵ Ki nou devret etidye premye? Nou definitivman bezwen pas en pe letan sak zour pour etidye Parol Bondye. Konmela, i annan mwens verse pour lir dan nou lektir Labib pour lasemenn, koumsa nou annan plis letan pour medit e fer resers lo sa ki nou’n lir. Olye zis lir bann verse ki nou’n ganny demande pour lir pour renyon lasemenn, nou anvi ki sa mesaz Labib i tous nou leker e ed nou vin pli pros avek Zeova.​—Ps. 19:14, NWT.

⁶ Kwa ankor ki nou devret etidye o profon? Byensir, nou anvi prepar nou lartik letid Latour Veyer, Letid Labib kongregasyon ek tou lenformasyon ki nou gannyen pour renyon lasemenn. Nou devret osi lir sak magazin Latour Veyer ek Veye! ki nou gannyen.

7. Eski nou devret dekouraze si nou pa kapab lir oubyen get tou sa ki ganny mete lo nou sit Enternet ek Televizyon JW?

⁷ Kekfwa ou kapab dir, ‘Oke, me ki nou pou fer avek tou sa bann lezot keksoz ki nou gannyen lo nou sit Enternet jw.org ek tou sa bann video ki sorti lo Televizyon JW? I annan en ta keksoz pour etidye!’ Mazin sa legzanp: Dan en restoran ki fer boufe, i annan en gran varyete manze. Bann dimoun ki vin dan sa restoran pa kapab gout tou sa ki i annan. Alor zot swazir zis detrwa pla. Pareyman, si ou pa kapab lir oubyen get tou sa ki sorti lo nou bann sit Enternet, pa dekouraze. Fer sa ki ou kapab. Aprezan, annou vwar ki savedir etidye e ki nou kapab fer pour tir maksimonm profi dan nou letid.

8. Ki mannyer ou kapab etidye ou Latour Veyer e ki byenfe ou pou gannyen ler ou fer sa?

⁸ Ler ou etidye, ou konsantre lo sa ki ou pe lir pour ou kapab aprann en keksoz enportan. I pa vedir ki ou zis lir sa lenformasyon vit vit e apre souliny larepons. Par egzanp, ler ou pe prepar ou letid Latour Veyer, konmans par lir sa bout o konmansman sa lartik ki apel: Sa ki nou pou etidye. Apre sa, lir e reflesi lo tit sa lartik, lo bann soutit ek bann kestyon revizyon. Ler ou’n fini fer sa, pran ou letan pour lir sa lartik byen. Port latansyon lo sa fraz ki dir ou lo kwa sa paragraf i baze. Normalman sa i premye fraz sa paragraf e i ed ou pour konnen ki pwen sa paragraf pe al diskit lo la. Anmezir ki ou lir sa lartik, mazin lo lafason ki sak paragraf i relye avek bann soutit ek tenm sa lartik. Ekri okenn mo oubyen pwen ki ou pa ti konnen avan ki ou ti a kontan fer plis resers lo la.

9. (a) Ler nou pe etidye nou Latour Veyer, akoz nou devret konsantre lo bann verse Labib e ki mannyer nou kapab fer sa? (b) Dapre Zozye 1:8, ki nou devret fer apard ki zis lir bann verse Labib?

 ⁹ Letid Latour Veyer i ed nou pour pli byen konpran Labib. Alor, konsantre lo bann verse Labib, sirtou bann ki pou ganny lir dan lasal. Port latansyon lo ki mannyer bann mo oubyen fraz dan sa verse i fer resorti sa pwen ki dan paragraf. An plis, pran letan pour reflesi o profon lo bann verse e lo ki mannyer ou kapab aplik li dan ou lavi.​—Lir Zozye 1:8.

10. Baze lo sa ki nou aprann dan Ebre 5:14, akoz paran i devret pran en pe letan pandan ladorasyon fanmir pour ed zot zanfan aprann ki mannyer pour etidye e fer resers?

¹⁰ I normal ki bann paran i anvi ki zot zanfan i pas en bon moman pandan Ladorasyon Fanmir sak semenn. Par kont, menm si bann paran i devret toultan plàn en keksoz ki zot anvi fer pour ladorasyon fanmir, zot pa bezwen santi ki zot bezwen fer en keksoz spesyal e gou tou le semenn. Menm si pandan Ladorasyon Fanmir zot kapab get sa progranm ki nou gannyen tou le mwan lo Televizyon JW oubyen travay lo en proze spesyal tanzantan, parey konstri en model lars Noe, i osi enportan ki bann zanfan i ganny montre ki mannyer pour etidye. Par egzanp, zot bezwen aprann ki mannyer pour prepar zot renyon oubyen ki mannyer pour fer resers lo en problenm ki zot pe gannyen kot lekol. (Lir Ebre 5:14.) Si zot pas en pe letan kot lakour pe etidye lo en topik dan Labib, i pou pli fasil pour zot konpran e konsantre pandan renyon ek lasanble menm ler napa en video. Byensir, lakantite letan ki en paran i deside etidye avek son zanfan i depan lo laz ek personnalite son zanfan.

11. Akoz i enportan ki nou ed nou bann etidyan Labib pour aprann etidye Labib o profon lo zot menm?

¹¹ Nou bann etidyan Labib osi i bezwen aprann ki mannyer pour etidye. Ler zot fek konmans etidye, nou kontan si zot souliny larepons dan zot liv pour letid oubyen renyon. Me nou bezwen ed nou bann etidyan Labib pour aprann ki mannyer pour fer resers e ki mannyer pour etidye o profon lo zot menm. Koumsa ler i annan en problenm, olye tay kot lezot dimoun dan kongregasyon pour ganny led, zot pou konnen ki mannyer pour fer resers dan nou bann piblikasyon pour zot ganny sa lenformasyon ki zot bezwen.

12. Ki lobzektif nou kapab annan ler nou etidye?

¹² Si ou pa kontan etidye, kekfwa ou kapab krwar ki ou pa pou zanmen vwar li gou pour etidye. Me ou kapab aprann pour kontan etidye. Ou kapab konmans par etidye pour en ptigin letan e ptitapti ogmant lakantite letan ki ou etidye. Annan en lobzektif ler ou etidye. Byensir, sa rezon prensipal i akoz nou anvi vin pli pros avek Zeova. En lobzektif ki nou kapab atenn deswit, se reponn en kestyon ki en dimoun in demann nou oubyen fer resers lo en problenm ki nou pe fer fas avek.

13. (a) Eksplike ki en zenn i kapab fer pour eksplik son krwayans kot lekol. (b) Ki mannyer ou kapab aplik sa konsey ki dan Kolosyen 4:6?

¹³ Konman en legzanp, eski ou en zenn ki ankor pe lekol? Kekfwa tou bann manrmay dan ou laklas i selebre zot lanniverser nesans. Ou ti a kontan servi Labib pour eksplik zot akoz ou pa fet ansanm avek zot, me petet ou santi ki ou pa kapab fer sa. Alor ou bezwen etidye! I kapab ki ou annan de rezon pour fer sa: (1) pour batir ou prop lafwa ki Bondye pa kontan ler dimoun i selebre zot lanniverser nesans e (2) pour aprann ki mannyer pour pli byen eksplik sa ki ou krwar dapre Labib. (Mat. 14:6-11; 1 Pyer 3:15) Ou kapab konmans par demann ou lekor, ‘Akoz bann manrmay dan mon laklas i vwar li byen pour selebre lanniverser nesans?’ Apre, servi nou bann piblikasyon pour fer resers lo sa topik. Ou pou kapab vwar ki i pa telman difisil pour eksplik ou krwayans. Laplipar dimoun i selebre zot lanniverser akoz zot krwar ki tou dimoun pe fer parey. Si ou vwar zis enn de pwen ki ou kapab koz lo la, sa i kapab ed en dimoun ki vreman anvi konn laverite.​—Lir Kolosyen 4:6.

14-16. (a) Ki ou kapab fer pour aprann plis lo en liv Labib ki ou pa konn bokou lo la? (b) Eksplike ki mannyer bann verse ki’n ganny site i kapab ed ou pour pli byen konpran liv Amos. (Vwar osi sa bwat “ Aprann konn bann personnaz dan Labib pli byen!”)

¹⁴ Meton dan renyon nou pou lir e diskit lo enn bann liv Labib ki ti ganny ekrir par enn bann zonm ki nou apel pti profet. Kekfwa i enn bann profet ki ou pa konn bokou lo la. Pour konmanse, i ti a byen pour ou anvi konn plis lo sa ki sa profet ti ekri lo la. Alor, ki mannyer ou kapab eksit ou lapeti pour aprann plis?

¹⁵ Premyerman demann ou lekor: ‘Ki mon konnen lo sa ekriven? Lekel li, kote i ti reste e ki travay i ti fer?’ Ler nou aprann plis lo sa ekriven, sa i kapab ed nou pour pli byen konpran akoz i ti servi serten mo oubyen legzanp. Anmezir ki ou lir Labib, rod bann fraz ki ed ou pour imazinen ki kalite dimoun sa ekriven ti ete.

¹⁶ Apre, i ti pou bon pour konnen kan ki sa liv ti ganny ekrir. Ou kapab fasilman fer sa si ou get sa latab ki annan pour tit “Bann liv Labib,” ki deryer dan Tradiksyon nouvo lemonn. An plis, ou kapab get sa latab bann profet ek lerwa ki lo paz 14-17 dan sa liv En led pour etidye Parol Bondye. Si ou pe etidye en liv Labib profetik, i ti a byen si ou aprann ki mannyer lavi ti ete pour bann dimoun ler sa liv ti pe ganny ekrir. Ki bann move latitid oubyen pratik bann dimoun ti annan ki sa profet ti pe esey ed zot evite? Lekel ki ti viv an menm tan avek sa ekriven? Pour konpran sa sityasyon pli byen, kekfwa ou bezwen  get dan lezot liv Labib. Par egzanp, pour pli byen konpran ki ti pe arive dan letan profet Amos, ou kapab lir bann verse Labib dan 2 Lerwa ek 2 Kronik ki dan cross reference Amos 1:1. (Tradiksyon nouvo lemonn an Angle.) An plis, ou kapab lir liv Osea, ki petet ti viv dan menm letan avek Amos. Si ou get dan sa bann lezot liv Labib, ou pou pli byen konpran ki mannyer lavi ti ete dan letan Amos.​—2 Rwa. 14:25-28; 2 Kron. 26:1-15; Ose. 1:1-11; Amos 1:1.

17-18. Servi bann legzanp dan paragraf oubyen ou prop legzanp pour montre ki mannyer bann pti detay i kapab ede pour fer ou letid Labib personnel pli gou.

¹⁷ Ler nou lir Labib, i byen si nou annan en profon dezir pour aprann plis. Par egzanp, meton ou pe lir douzyenm sapit liv Zekarya ki predir lanmor Mesi. (Zeka. 12:10) Ler ou ariv lo verse 12, ou lir ki “bann fanmir Natan” ti pou plere e vreman tris ler Mesi i mor. Olye inyor sa detay e zis kontinyen lir, ou kapab arete e demann ou lekor: ‘Ki bann fanmir Natan i annan pour fer avek Mesi? Eski i annan okenn fason pour ganny plis lenformasyon?’ Akoz ou pa fouy en pti pe plis? Dan cross reference sa verse, i annan 2 Samyel 5:13, 14, kot ou aprann ki Natan ti enn bann garson Lerwa David. En lot cross reference i Lik 3:23, 31, kot ou aprann ki Zezi ti en desandans Natan atraver Mari. (Vwar Latour Veyer piblik nimero 3 2016 paz 9 paragraf 1-3.) En sel kou, ou eksite pour konn plis! Ou ti konnen ki i annan en profesi ki Zezi ti pou sorti dan fanmir David. (Mat. 22:42) Me David ti annan plis ki 20 garson. Pa i enkrwayab ki Zekarya i dir ki fanmir Natan an partikilye ti  pou annan en rezon pour tris ler Zezi i mor?

¹⁸ Annou vwar en lot legzanp. Dan premye sapit Levanzil Lik, nou lir ki lanz Gabriyel ti vizit Mari e dir li en keksoz merveye pou arive avek sa garson ki i ti pou gannyen. I ti dir: “Sa zanfan pou remarkab e i pou ganny apele Garson sa Enn Tre O e Bondye Zeova pou donn li tronn son papa David. I pou Lerwa bann desandans Zakob pour touzour.” (Lik 1:32, 33) Nou kapab tant pour zis konsantre lo sa premye bout ki Gabriyel ti dir, setadir, ki Zezi ti pou ganny apele “Garson sa Enn Tre O.” Me Gabriyel ti osi predir ki Zezi ti pou “Lerwa.” Alor nou kapab demann nou lekor, ‘Ki Mari ti krwar Gabriyel pe koz lo la? Eski i ti krwar ki Gabriyel ti pe dir ki Zezi ti pou ranplas Lerwa Erod oubyen okenn lezot lerwa ki vin apre li, pour li dirize an Izrael?’ Si Zezi ti vin lerwa, Mari ti pou vin Larenn Mer e son fanmir ti pou al viv dan pale. Pourtan, Labib pa dir ki Mari ti mansyonn okenn keksoz koumsa avek Gabriyel e nou pa lir okenn par ki Mari ti demann en pozisyon spesyal dan Rwayonm, parey de disip Zezi ti fer. (Mat. 20:20-23) Sa pti detay i ed nou pour pli konvenki ki Mari ti en madanm avek bokou limilite!

19-20. Parey in ganny dekrir dan Zak 1:22-25 ek 4: 8, ki nou lobzektif ler nou pe etidye?

¹⁹ Annou toultan gard antet ki rezon prensipal ki nou etidye Parol Bondye ek nou bann piblikasyon i akoz nou anvi vin pli pros avek Zeova. Nou osi anvi vwar pli byen ki “kalite dimoun” nou ete e vwar ki bann sanzman nou bezwen fer pour fer plezir Bondye. (Lir Zak 1:22-25; 4:8.) Alor sak fwa ki nou konmans etidye, nou devret demann Zeova led son lespri sen. Nou devret sipliy li pour ed nou tir maksimonm profi posib avek sa lenformasyon e pour ed nou vwar ki bann sanzman nou bezwen fer.

²⁰ Sirman, nou tou nou ti a kontan vin parey sa serviter fidel ki en psalmis ti dekrir: “I pran plezir dan lalwa [Zeova] e medit lo son komannman, lizour koman aswar. . . . I reisi dan tou sa ki i antreprann.”​—Ps. 1:2, 3.