1-3. (a) Dapre Psonm 5:4-6, ki mannyer Zeova i santi konsernan bann keksoz mal? (b) Akoz nou kapab dir ki labi zanfan i kont “lalwa Kris”?

NOU Bondye Zeova i deteste tou sa ki mal. (Lir Psonm 5:4-6.) * Alor zis mazinen ki kantite i vreman deteste labi seksyel lo zanfan ki en pese grav e degoutan! Konman son bann Temwen ki swiv son legzanp, nou deteste labi zanfan e nou pa toler li dan kongregasyon.​—Rom. 12:9; Ebr. 12:15, 16.

² Tou labi zanfan i kont “lalwa Kris”! (Gal. 6:2) Akoz nou kapab dir sa? Parey nou’n aprann dan sa lartik avan, lalwa Kris i tou sa ki Zezi ti dir e fer. Sa lalwa i baze lo lanmour e i ankouraz dimoun pour tret lezot dan en fason zis. Vi ki bann vre Kretyen i obei sa lalwa, lafason ki zot tret bann zanfan i fer bann zanfan santi zot sen e sof e ki lezot i vreman kontan zot. Par kont, labi seksyel lo zanfan i mal. En dimoun ki abiz zanfan i mazin zis son prop lekor. Ler en zanfan i ganny abize, sa i fer li santi ki napa personn ki pe protez li e ki kontan li.

³ Malerezman, labi seksyel lo zanfan i en krim ki arive partou dan lemonn e bann vre Kretyen osi in ganny afekte. Akoz? Parski “bann move dimoun ek bann anbeter” in ogmante e serten i menm esey antre dan kongregasyon. (2 Tim. 3:13) An plis, serten ki dir ki zot servi Zeova pa’n kontrol zot move dezir seksyel e zot in abiz bann zanfan.  Premyerman, annou vwar akoz labi seksyel lo zanfan i en pese sitan grav. Apre nou pou vwar ki bann ansyen i fer ler en dimoun dan kongregasyon i fer en pese grav, enkli labi seksyel lo zanfan e ki mannyer paran i kapab protez zot zanfan. *

4-5. Akoz labi seksyel lo zanfan i en pese kont sa viktim?

⁴ Labi lo zanfan i afekte bann dimoun pour en kantite letan. I afekte bann viktim ensi ki tou bann ki kontan sa zanfan ki’n ganny abize, parey son fanmir ek bann frer ek ser dan kongregasyon. Labi seksyel lo zanfan i en pese grav.

⁵ Labi seksyel lo zanfan i en pese kont sa viktim. * I en pese pour bles en dimoun par ekspre e fer li soufer. Parey nou pou vwar dan sa lot lartik, sanmenm ki arive ler en dimoun i abiz en zanfan parski i fer sa zanfan en kantite ditor. Sa zanfan i annan konfyans dan li me i bles sa zanfan par ekspre. Sa i fer ki sa zanfan i nepli santi ki i annan en dimoun pour protez li e sa zanfan i ganny forse pour eksperyans keksoz ki en zanfan pa sipoze eksperyanse. Nou bezwen protez bann zanfan kont sa bann keksoz mal e bann zanfan ki’n ganny abize i bezwen led ek rekonfor.​—1 Tesa. 5:14.

6-7. Akoz labi seksyel lo zanfan i en pese kont kongregasyon ek lotorite gouvernman?

⁶ Labi seksyel lo zanfan i en pese kont kongregasyon. Ler en dimoun dan kongregasyon i abiz en zanfan i sali repitasyon kongregasyon. (Mat. 5:16; 1 Pyer 2:12) I mal pour dir ki kongregasyon Kretyen i soutir labi seksyel lo zanfan parski plizyer milyon Kretyen fidel pe “kontinyen lite” pour viv dan en fason ki glorifye Zeova. (Zid 3) Nou pa permet personn pour reste dan kongregasyon si zot pa repantir apre ki zot in fer sa ki mal e gat repitasyon kongregasyon.

⁷ Labi seksyel lo zanfan i en pese kont lotorite gouvernman. Bann Kretyen i “devret soumet avek bann lotorite.” (Rom. 13:1) Nou montre ki nou soumet avek “bann lotorite” ler nou respekte e obei lalwa sa pei kot nou reste. Si en dimoun dan kongregasyon i kas lalwa, par egzanp si i abiz en zanfan seksyelman, sa i en pese kont gouvernman. (Konpar Akt 25:8.) Bann ansyen napa drwa pini personn ki’n kas lalwa. Par kont, zot pa pou anpes gouvernman pini sa dimoun ki’n abiz en zanfan. (Rom. 13:4) Sa dimoun pou rekolte sa ki i’n senmen.​—Gal. 6:7.

8. Ki mannyer Zeova i vwar bann pese ki en dimoun i fer kont son kanmarad?

⁸ Pli pir ankor, labi seksyel lo zanfan i en pese kont Bondye. (Ps. 51:4) Ler en dimoun i fer pese kont son kanmarad, i osi fer pese kont Zeova. Annou vwar en legzanp dan Lalwa ki Bondye ti donn nasyon Izrael. Dapre sa Lalwa, si en zonm ti vol oubyen trik son prosen, i ti pe “komet en fot grav anver [Zeova].” (Lev. 6:2-4) Alor, ler en dimoun dan kongregasyon i abiz en zanfan i fer en fot grav anver Zeova akoz in trik sa zanfan. Sa zanfan ti annan konfyans dan li me in anbet sa zanfan e servi li. Alor sa zanfan i nepli santi ki i ganny proteze. En  Temwen Zeova ki abiz en zanfan i gat repitasyon Zeova. I pour sa rezon ki nou bezwen konpran ki labi seksyel lo en zanfan i en pese degoutan kont Bondye e ki sa pa ganny tolere dan kongregasyon.

9. Ki lenformasyon baze lo Labib lorganizasyon Zeova in donnen pour plizyer lannen e akoz?

⁹ Pour plizyer lannen, lorganizasyon Zeova in pibliy en kantite lenformasyon baze lo Labib konsernan labi seksyel lo zanfan. Par egzanp, bann lartik dan Latour Veyer ek Veye! in diskit lo ki mannyer bann ki’n ganny abize seksyelman i kapab fer fas avek bann problenm emosyonnel ki dire, ki mannyer lezot i kapab ed e ankouraz zot e ki mannyer paran i kapab protez zot zanfan. Lorganizasyon in donn bann ansyen bann lenstriksyon byen detaye baze lo Labib lo ki pour fer ler en dimoun i abiz en zanfan. Lorganizasyon i regilyerman egzamin bann lenstriksyon ki i donn bann ansyen lo sa ki zot devret fer dan sa bann sityasyon e parfwa zot fer bann azisteman. Akoz? Pour fer sir ki bann ansyen i toultan aplik lalwa Kris e demontre lanmour ek lazistis ler i annan labi zanfan.

10-12. (a) Ler bann ansyen i ganny dir ki en dimoun in fer en pese grav, ki zot bezwen gard antet e ki zot lobzektif? (b) Dapre Zak 5:14, 15, ki bann ansyen i esey fer?

¹⁰ Ler bann ansyen i tret en ka kot en dimoun in fer en pese grav, zot gard antet ki dapre lalwa Kris zot bezwen tret bann dimoun dan kongregasyon avek lanmour e fer sa ki drwat e zis devan Bondye. Alor, ler zot ganny bann rapor konmkwa en dimoun in fer en pese grav, i annan plizyer keksoz ki zot bezwen pran kont. Sa ki pli enportan pour bann ansyen, se ki zot onor Zeova e anpese ki son repitasyon i ganny sali. (Lev. 22:31, 32; Mat. 6:9) En lot lobzektif enportan ki zot annan, se pour ed bann frer ek ser pour reste pros avek Zeova e pour rekonfort e siport bann viktim en pese grav.

¹¹ Bann ansyen i osi gete si sa dimoun ki’n fer sa pese grav in repantir e si wi, zot ed li pour reganny son relasyon avek Bondye. (Lir Zak 5:14, 15.) En Kretyen ki fer en pese grav pour satisfer son move dezir i parey en dimoun ki malad. Sa i vedir ki i nepli annan en bon relasyon avek Zeova. * Dan en sans, bann ansyen i parey bann dokter. Zot fer tou sa ki zot kapab pour ed “sa enn malad byen.” Zot servi Labib pour donn sa enn ki malad konsey ki pou ed li reganny son relasyon avek Bondye, me sa i posib si selman sa dimoun i senserman repantir.​—Akt 3:19; 2 Kor. 2:5-10.

¹² I kler ki bann ansyen i annan en responsabilite enportan. Zot vreman kontan kongregasyon parski Bondye in donn zot sa responsabilite pour pran swen avek son pep e pour demontre lanmour ek lazistis anver zot. (1 Pyer 5:1-3) Zot anvi ki zot bann frer ek ser i santi zot byen dan kongregasyon. I pour sa rezon ki zot azir deswit ler zot ganny dir ki en dimoun in fer en pese grav, enkli labi lo zanfan. Ki zot fer? Nou pou vwar sa dan  paragraf 13,  15 ek  17.

13-14. Eski bann ansyen i obei lalwa e raport avek gouvernman ler zot ganny dir ki en zanfan in ganny abize seksyelman? Eksplike.

 ¹³ Eski bann ansyen i obei lalwa e raport avek gouvernman ler zot ganny dir ki en zanfan in ganny abize seksyelman? Wi. Dan bann pei kot i annan sa bann lalwa, bann ansyen i soumet avek lalwa. (Rom. 13:1) Sa bann lalwa pa al kont lalwa Bondye.  (Akt 5:28, 29) Alor ler bann ansyen i ganny dir ki en zanfan in ganny abize, deswit zot kontakte biro brans pour demande ki mannyer zot kapab obei lalwa gouvernman e enform zot konsernan sa labi.

¹⁴ Ler bann ansyen i koz avek bann viktim labi, avek zot paran oubyen avek nenport dimoun ki konnen ki’n arive, bann ansyen i zantiman rapel zot ki zot lib pour raport sa avek lotorite. Me ki pou arive si bann ansyen i ganny dir ki en dimoun dan kongregasyon in abiz en zanfan e dimoun dan kominote in tande ki’n arive? Eski sa Kretyen ki’n raport sa ki’n arive i devret santi ki i’n anmenn repros lo non Bondye? Non. Sa dimoun ki’n abiz sa zanfan ki anmenn repros lo non Bondye.

15-16. (a) Dapre 1 Timote 5:19, akoz i bezwen annan omwen de temwen avan ki bann ansyen i form en komite disiplin? (b) Ki bann ansyen i fer ler zot ganny dir ki en dimoun dan kongregasyon in abiz en zanfan?

 ¹⁵ Akoz bann ansyen dan kongregasyon i bezwen omwen de temwen pour prouve ki en dimoun in fer en pese grav? Parski dapre Labib sa i en fason pour demontre lazistis. Ler bann ansyen i ganny dir ki en dimoun in fer en pese grav me sa dimoun pa konfese, i bezwen annan omwen de temwen pour bann ansyen kapab form en komite disiplin. (Det. 19:15; Mat. 18:16; lir 1 Timote 5:19.) Eski sa i vedir ki i bezwen annan de temwen avan ki en dimoun i kapab raport avek gouvernman ki en zanfan in ganny abize? Non. Sa prensip Labib i aplikab zis dan kongregasyon. I pa neseser pour annan de temwen avan ki en krim i ganny raporte avek gouvernman.

¹⁶ Ler bann ansyen i ganny dir ki en dimoun dan kongregasyon in abiz en zanfan, zot obei lalwa gouvernman lo ki pour fer dan sa bann sityasyon. Apre zot rode kwa ki’n arive egzakteman. Ler zot in ganny sa lenformasyon, zot servi bann prensip Labib pour deside si zot bezwen form en komite disiplin. Premyerman, bann ansyen i demann sa dimoun si i’n komet sa pese. Si i dir non, bann ansyen i koz avek bann ki konnen ki’n arive. Si sa enn ki’n akiz sa dimoun e en lot dimoun i konfirmen ki sa dimoun in abiz sa zanfan ouswa en lot zanfan, bann ansyen i annan ase laprev pour form en komite disiplin. * Si napa sa lot dimoun ki kapab konfirmen, sa pa vedir ki sa enn ki’n akiz sa dimoun pe koz manti. Menm si napa de dimoun pour konfirmen ki sa labi in ganny komet, bann ansyen i realize ki i kapab ki en pese grav in ganny komet, enn ki fer ditor lezot. Bann ansyen pou kontinyen rekonfort e siport bann dimoun ki’n ganny blese par sa ki’n arive. An plis, zot pou vey byen sa dimoun ki ti’n ganny akize pour fer sir ki zot protez kongregasyon.​—Akt 20:28.

17-18. Eksplike ki bann ansyen lo komite disiplin i fer.

 ¹⁷ Ki bann ansyen ki lo sa komite disiplin i fer? Zot deside si sa dimoun ki’n fer en pese grav i kapab reste dan kongregasyon oubyen non. Zot pa deside si sa dimoun i devret ganny pini par lotorite akoz i’n kas lalwa gouvernman. Zot les gouvernman deside ki mannyer pour pini bann ki’n kas lalwa.​—Rom. 13:2-4; Tit 3:1.

¹⁸ Bann ansyen lo komite disiplin i ziz zis sa ki annan pour fer avek relasyon sa dimoun avek Bondye e avek bann frer ek ser. Zot servi Labib pour deside si sa dimoun ki’n abiz sa zanfan in repantir ouswa non. Si i pa oule repantir, bann ansyen i dir li ki i pou ganny ekskli dan kongregasyon e en  lanons i ganny fer dan kongregasyon ki i nepli en Temwen Zeova. (1 Kor. 5:11-13) Si i repantir, i kapab reste dan kongregasyon. Par kont, bann ansyen pou dir li ki i pa pou ganny okenn privilez dan kongregasyon pour plizyer lannen oubyen pour larestan son lavi. Vi ki bann ansyen i vreman anvi protez bann zanfan, i kapab ki zot pou koz avek bann paran dan kongregasyon an prive e dir zot ki zot bezwen fer atansyon ler zot zanfan i pas letan avek sa dimoun. Ler bann ansyen i fer sa, zot fer byen atansyon ki zot pa dir lekel ki’n ganny abize.

19-22. Ki bann paran i kapab fer pour protez zot zanfan? (Vwar portre lo kouvertir.)

¹⁹ Lekel ki prensipalman responsab pour protez bann zanfan kont labi? Zot paran. * Paran, ou zanfan i en kado, “en leritaz sorti kot Zeova.” (Ps. 127:3, NWT) Zeova in donn ou sa responsabilite pour protez ou zanfan. Alor, ki ou kapab fer pour protez ou zanfan kont labi?

²⁰ Premyerman, rod lenformasyon lo labi. Fer resers lo ki kalite dimoun ki abiz bann zanfan e ki bann teknik zot servi pour anbet bann zanfan. Vey byen bann sityasyon ek dimoun ki kapab danzere. (Prov. 22:3; 24:3) Rapel ki laplipar ditan sa abizer i en dimoun ki sa zanfan i deza konnen e annan konfyans ladan.

²¹ Dezyenmman, koz avek ou zanfan e ankouraz li pour koz avek ou. (Det. 6:6, 7) Sa i vedir ki ou bezwen ekout byen sa ki ou zanfan i dir ou. (Zak 1:19) Gard antet ki souvandfwa bann zanfan i per pour dir ki zot in ganny abize. Zot kapab per ki personn pa pou krwar zot ouswa sa abizer in dir zot ki i pou fer zot en keksoz si zot al dir. Si ou santi ki en keksoz mal in arive, demann zot bann kestyon dan en fason zantiy e avek pasyans ekout zot larepons.

²² Trwazyenmman, ansenny ou zanfan. Dir zot sa ki zot devret konnen lo sèks. Sa lenformasyon ki ou donn zot i devret depan lo zot laz e lo sa ki zot kapab konpran. Ansenny zot sa ki zot devret dir e fer si en dimoun i esey tous zot dan en fason ki pa apropriye. Servi lenformasyon ki lorganizasyon Bondye in donnen pour ou protez ou zanfan.​—Vwar sa bwat “ Ansenny ou lekor ek ou zanfan lo labi seksyel.”

23. Ki mannyer nou vwar labi seksyel lo zanfan e ki kestyon nou pou reponn dan sa lot lartik?

²³ Konman Temwen Zeova, nou vwar labi seksyel lo zanfan konman en pese degoutan e en gro krim. Nou bann kongregasyon i swiv lalwa Kris e nou pa ed bann abizer pour sap konsekans zot pese. Antretan, ki nou kapab fer pour ed bann frer ek ser ki’n ganny abize? Nou pou reponn sa kestyon dan sa lot lartik.