1-2. (a) Ki legzanp ki montre ki tou dimoun i ne avek sa bezwen pour ganny rekonforte e ki zot annan sa abilite pour rekonfort lezot? (b) Akoz serten zanfan i soufer?

TOU dimoun i ne avek sa bezwen pour ganny rekonforte e tou dimoun i annan sa abilite merveye pour rekonfort lezot. Par egzanp, si dan pe zwe en zanfan i tonbe e deplis son zenou, i tay kot manmi ek dadi an pleran. Son paran pa kapab geri son boubou, me zot kapab rekonfort li. Zot kapab demann sa zanfan ki’n arive, eswiy son larm, may li, netway son boubou e met en plaster lo la. Pa bokou letan apre, sa zanfan i aret plere e i menm kapab al zwe ankor. Avek letan, son boubou pou geri.

² Me parfwa, bann zanfan i ganny dimal dan bann fason bokou pli pir ki sa. Serten i ganny abize seksyelman. I kapab ki sa zanfan i ganny abize zis en fwa oubyen i kapab ki sa i arive pandan plizyer lannen. Ki swa i ariv en fwa oubyen plizyer fwa, sa zanfan i soufer en kantite e i toultan annan bann problenm emosyonnel. Dan serten ka, sa abizer i ganny arete e met dan prizon. De lot kote, i kapab paret ki sa abizer pa zanmen ganny pini pour son krim. Me menm si sa abizer i ganny pini vitman, i kapab ki sa zanfan pou ankor soufer ler i vin adilt.

3. Dapre 2 Korentyen 1:3, 4, ki Zeova i anvi e ki kestyon nou pou reponn?

³ Si en frer oubyen en ser ti ganny abize ler i ti ankor zanfan e i ankor pe soufer akoz sa labi, ki nou kapab fer pour ed li? (Lir 2 Korentyen 1:3, 4.) I kler ki Zeova i anvi ki son bann serviter byenneme i ganny sa lanmour ek rekonfor ki zot bezwen. Alor annou diskit lo sa trwa kestyon: (1) Akoz serten ki’n ganny abize ler zot ti ankor zanfan i bezwen ganny rekonforte? (2) Lekel ki kapab rekonfort zot? (3) Ki  mannyer nou kapab rekonfort zot dan sa bon fason?

4-5. (a) Akoz i enportan pour realize ki en zanfan i diferan avek en adilt? (b) Ki mannyer labi seksyel i kapab afekte abilite en zanfan pour annan konfyans dan lezot?

⁴ Serten adilt ki ti ganny abize ler zot ti zanfan, i ankor bezwen rekonfor menm si plizyer lannen in pase. Akoz? Pour konpran sa, nou bezwen realize ki en zanfan i diferan avek en adilt. Lafason ki en zanfan i ganny afekte ler i ganny abize i diferan avek lafason ki en adilt i ganny afekte. Annou vwar akoz labi seksyel lo zanfan i sitan serye.

⁵ En zanfan i bezwen pros e annan konfyans dan bann ki pe elve li e ki pe pran swen avek li. Ler bann dimoun i pros avek en zanfan ki zot pe pran swen avek e sa zanfan i annan konfyans dan zot, sa pou fer ki sa zanfan i santi li proteze e i pou aprann pour annan konfyans dan tou bann ki kontan li. (Ps. 22:9) Malerezman, dan laplipar ka bann zanfan i ganny abize kot zot reste par en manm fanmir pros oubyen en dimoun ki zot abitye avek. Ler en zanfan i ganny abize par en dimoun ki i annan konfyans ladan, sa i kapab fer li difisil pour sa zanfan annan konfyans dan lezot dimoun, menm plizyer lannen pli tar.

6. Akoz labi seksyel i en keksoz kriyel ki fer bokou ditor?

⁶ En zanfan pa kapab protez son lekor e labi seksyel i en keksoz kriyel ki fer bokou ditor. Ler bann zanfan i ganny forse pour fer bann keksoz seksyel avan ki zot in pare fizikman, emosyonnelman e mantalman pour konpran ki savedir maryaz ek relasyon seksyel, sa i kapab fer zot en kantite ditor. Ler en zanfan i ganny abize, sa i kapab fer li annan en move pwennvi lo sèks, fer li santi ki i pa vo nanryen e ki i pa kapab annan konfyans dan personn.

7. (a) Akoz i fasil pour en dimoun anbet e apre abiz en zanfan? Ki mannyer en abizer i kapab fer sa? (b) Ki mannyer sa bann mansonz i kapab afekte sa zanfan?

⁷ En zanfan pa ankor aprann pour analiz keksoz byen, pour fer bann desizyon oubyen pour rekonnet e evit danze. (1 Kor. 13:11) Alor i vreman fasil pour en dimoun anbet e apre abiz en zanfan. Bann abizer i fer bann zanfan krwar bann keksoz ki pa vre. Par egzanp, zot kapab fer sa zanfan krwar ki i son lafot ki i pe ganny abize, ki i pa devret dir personn, ki menm si i dir, personn pa pou krwar oubyen ed li e ki i normal pour en zanfan ek en adilt ki kontan kanmarad fer bann aksyon seksyel. I pou pran plizyer lannen pour sa zanfan konpran ki tou sa bann keksoz pa vre. Anmezir ki sa zanfan i grandi, i kapab krwar ki i annan en keksoz mal avek li, ki son lekor i sal e ki i pa merite ki lezot i kontan oubyen rekonfort li.

8. Akoz nou kapab asire ki Zeova i kapab rekonfort bann ki’n ganny abize?

⁸ Nou kapab konpran alor akoz bann ki’n ganny abize i soufer pour plizyer lannen. Labi seksyel lo zanfan i en keksoz vreman kriyel! Vi ki sa pe arive partou, sa i montre ki nou pe viv dan bann dernyen zour, en letan kot bokou dimoun “napa lanmour pour kanmarad” e “bann move dimoun ek bann anbeter pou vin deplizanpli pli move.” (2 Tim. 3:1-5, 13) Bann taktik Satan i vreman kriyel e i fer lapenn ler dimoun i fer bann keksoz ki fer plezir Dyab. Par kont, Zeova i bokou pli for ki Satan ek tou bann ki fer sa ki Satan i anvi. Zeova i konn tou bann taktik Satan. Nou kapab asire ki Zeova i konnen ki kantite nou  pe soufer e ki i kapab donn nou sa rekonfor ki nou bezwen. I en gran benediksyon ki nou servi en “Bondye . . . ki donn rekonfor dan tou sityasyon. I rekonfort nou dan tou nou bann leprev pour ki nou osi nou kapab rekonfort lezot dan tou sort kalite leprev gras a sa menm rekonfor ki nou gannyen avek Bondye.” (2 Kor. 1:3, 4) Me lekel ki Zeova i servi pour rekonfort lezot?

9. Dapre parol Lerwa David dan Psonm 27:10, ki Zeova pou fer pour bann ki zot fanmir pa’n pran byen swen avek zot?

⁹ Bann zanfan ki pa’n ganny proteze avek zot paran kont labi seksyel oubyen bann ki’n ganny abize par en dimoun ki pros avek zot, i sirtou bezwen rekonfor. Lerwa David ti konnen ki nou toultan kapab depan lo Zeova pour rekonfort nou. (Lir Psonm 27:10.) David ti konvenki ki Zeova ti pou vin en Papa pour bann ki zot fanmir pa’n pran byen swen avek zot. Ki mannyer Zeova i fer sa? I servi son bann serviter fidel. Nou bann frer ek ser dan kongregasyon i parey en fanmir pour nou. Zezi ti ed nou konpran sa ler i ti dir ki bann ki ti ador Zeova ansanm avek li ti son bann frer, ser ek manman.​—Mat. 12:48-50.

10. Ki mannyer zapot Pol ti dekrir son travay konman en ansyen?

¹⁰ Dan sa paragraf ek sa lot ki swiv, nou pou vwar ki mannyer kongregasyon i parey en fanmir. Zapot Pol ti en ansyen fidel ki ti travay dir. I ti en bon legzanp e i ti menm ganny enspire pour ankouraz lezot pour swiv son legzanp parey li i ti swiv legzanp Kris. (1 Kor. 11:1) Remark lafason ki Pol ti dekrir son travay konman en ansyen: “Avek ladouser, nou ti pran swen avek zot, parey en manman ki pran swen avek son bann zanfan.” (1 Tesa. 2:7) Ozordi, anmezir ki bann ansyen fidel i servi Labib pour rekonfort bann ki bezwen led, zot kapab swiv legzanp Pol e koz avek ladouser ek tandres.

11. Kwa ki montre ki pa zis bann ansyen ki kapab rekonfort lezot?

¹¹ Eski zis bann ansyen ki kapab rekonfort  bann dimoun ki’n ganny abize? Non. Nou tou nou annan sa responsabilite pour “kontinyen rekonfort kanmarad.” (1 Tesa. 4:18) Bann ser ki matir spirityelman i kapab en gran led pour bann ser ki bezwen rekonfor. Zeova i konpar son lekor avek en manman ki rekonfort son zanfan pour ed nou konpran ki mannyer i rekonfort bann ki pe soufer. (Iza. 66:13) Dan Labib i annan legzanp bann madanm ki ti rekonfort bann ki ti pe soufer. (Zob 42:11, NWT) Zeova i vreman kontan pour vwar bann ser Kretyen ozordi pe rekonfort lezot ser ki pe soufer! Dan serten ka, enn oubyen de ansyen i kapab demann en ser an prive si i kapab ed en lot ser ki pe soufer akoz labi. *

12. Ki nou devret evite fer?

¹² Byensir, ler nou pe esey ed en frer oubyen en ser ki’n ganny abize, nou pa devret demann li lo bann keksoz ki i pa anvi koz lo la. (1 Tesa. 4:11) Me ki nou kapab fer pour bann ki bezwen e ki anvi led ek rekonfor? Annou vwar senk keksoz dan Labib ki nou kapab fer pour rekonfort zot.

13. Parey nou vwar dan 1 Lerwa 19:5-8, ki lanz Zeova ti fer pour Eliya e ki mannyer nou kapab swiv legzanp sa lanz?

¹³ Fer en keksoz pour ed sa dimoun ki pe soufer. Ler profet Eliya ti pe esey sov bann ki ti anvi touy li, i ti sitan dekouraze ki i ti anvi mor. Zeova ti anvoy enn son lanz pwisan kot li. Sa lanz ti donn Eliya bann keksoz ki i ti bezwen. I ti donn li en repa so e i ti ankouraz li pour manze. (Lir 1 Lerwa 19:5-8.) Sa resi i montre nou en leson enportan: Parfwa en senp pti keksoz ki nou fer i kapab ede. Nou kapab montre nou frer ek ser ki pe soufer ki nou kontan li par fer en keksoz pour li, tel parey kwi en repa, donn li en pti kado oubyen en kart avek bann mo ankourazan. Si nou pa vwar li fasil pour koz avek en dimoun lo son bann santiman, nou kapab montre li ki nou enterese par fer sa bann keksoz pour ed li.

14. Ki nou kapab aprann avek sa resi lo Eliya?

¹⁴ Ed bann ki pe soufer akoz zot in ganny abize pour santi zot konfortab e ki zot pe ganny proteze. Nou kapab aprann en lot leson avek sa resi lo Eliya. Zeova ti fer en mirak e donn sa profet sa led ki i ti bezwen pour mars sa gran zistans ziska Montanny Oreb. Petet Eliya ti santi li an sekirite lo sa montanny kot Zeova ti’n fer en lalyans avek son pep dan lepase. Kekfwa i ti santi ki alafendefen i ti lwen avek bann dimoun ki ti anvi touy li. Ki nou aprann avek sa legzanp? Avan ki nou rekonfort bann dimoun ki’n ganny abize, nou bezwen fer zot santi ki zot pe ganny proteze. Par egzanp, bann ansyen i devret gard antet ki en ser ki’n ganny abize i kapab santi li pli konfortab e an sekirite kot li dan plas dan dezyenm lekol kot Lasal Rwayonm. Tandis ki en lot dimoun i kapab prefere koz lo sa ki’n arive kot Lasal Rwayonm.

15-16. Ki savedir ekout byen?

¹⁵ Ekout byen. Labib i donn sa konsey: “En dimoun i devret pare pour ekoute, me i devret pran letan avan koze.” (Zak 1:19) Eski nou ekout lezot byen? Petet nou krwar ki pour ekout byen nou zis bezwen asiz trankil e get sa dimoun san dir nanryen. Me nou bezwen fer plis ki sa. Par egzanp, ler profet Eliya ti finalman devid son leker avek Zeova, Zeova ti vreman ekout li. Zeova ti konpran ki Eliya ti per, santi li tousel e ki i ti krwar ki tou son travay ti  anven. Avek lanmour, Zeova ti rekonfort li. Zeova ti montre ki i ti’n vreman ekout Eliya.​—1 Rwa. 19:9-11, 15-18.

¹⁶ Ler nou pe ekout en frer oubyen en ser, ki mannyer nou kapab demontre lanmour, tandres ek konpasyon pour li? Parfwa, detrwa mo byen swazir ki ganny dir avek ladouser i kapab montre mannyer nou santi. Ou kapab dir: “Mon leker i fermal pour tann sa ki’n arive avek ou! En zanfan pa devret ganny trete koumsa!” Kekfwa ou kapab demann enn de kestyon pour fer sir ki ou konpran sa ki ou zanmi pe dir. Ou kapab demann li, “Eski ou kapab ed mwan pour pli byen konpran?” oubyen “Eski mon pe byen konpran? Sa i vedir ki . . . ” Ler ou demontre lanmour par koz dan sa fason, sa i kapab reasir sa dimoun ki ou pe vreman ekout li e pe esey konpran li.​—1 Kor. 13:4, 7.

17. Akoz nou devret demontre pasyans e “pran letan avan koze”?

¹⁷ Par kont, ler ou pe esey ed en frer oubyen en ser, fer sir ki ou “pran letan avan koze.” Pa enteronp li pour donn li konsey oubyen pour koriz son fason panse. Demontre pasyans! Ler Eliya ti finalman devid son leker avek Zeova, i ti vreman dezespere e i ti eksprim son sagrinasyon. Pli tar, apre ki Zeova ti’n ranforsi lafwa Eliya, i ti devid son leker avek Zeova ankor enn fwa e repet menm zafer. (1 Rwa. 19:9, 10, 13, 14) Ki sa i montre nou? Parfwa, bann dimoun ki dezespere i bezwen koz lo zot santiman plizyer fwa. Parey Zeova, nou anvi ekout zot avek pasyans. Dan plas dir zot ki mannyer pour rezourd zot problenm, nou demontre lanmour, tandres ek konpasyon anver zot.​—1 Pyer 3:8.

18. Ki mannyer nou lapriyer i kapab rekonfort en dimoun ki pe soufer?

¹⁸ Priy avek tou ou leker avek sa enn ki pe soufer. Bann ki vreman dezespere i kapab santi ki zot pa kapab priye. Sa dimoun i kapab santi ki i pa diny pour koz avek Zeova. En fason nou kapab rekonfort li, i par priy  avek li e mansyonn son non. Dan sa lapriyer, nou kapab dir Zeova ki kantite nou ek lezot manm kongregasyon i kontan sa dimoun ki dezespere. Nou kapab demann Zeova pour rekonfort son serviter byenneme e pour ed li santi li kalm. En lapriyer koumsa i kapab vreman rekonfort sa dimoun.​—Zak 5:16.

19. Kwa ki kapab ed nou prepare avan nou rekonfort en dimoun?

¹⁹ Swazir bann parol ki pou ed li geri e konsol li. Reflesi byen avan ou koze parski bann parol san reflesi i kapab blesan, tandis ki bann parol dous i kapab geri. (Prov. 12:18, NWT) Alor demann Zeova pour ed ou servi bann parol dous, rekonfortan e konsolan. Gard antet ki parol Zeova ki dan Labib i pli pwisan ki okenn lezot parol.​—Ebr. 4:12.

20. Ki serten frer ek ser ki’n ganny abize i krwar e ki nou anvi zot konnen?

²⁰ Serten frer ek ser ki’n ganny abize i krwar ki zot sal, pa vo nanryen, ki personn pa kontan zot e menm ki personn pa kapab kontan zot. Sa pa vre ditou! Alor servi Labib pour ed zot rapel ki Zeova i kontan zot en kantite. (Vwar sa bwat “ Bann verse Labib rekonfortan.”) Rapel ki mannyer en lanz ti zantiman redonn profet Danyel lafors ler i ti santi li dekouraze. Zeova ti anvi ki son serviter i konnen ki i presye pour li e ki i kontan li. (Dan. 10:2, 11, 19) Pareyman, nou bann frer ek ser ki dezespere i presye pour Zeova e i kontan zot en kantite!

21. Ki pou arive avek tou bann ki fer bann move keksoz e ki pa repantir? Antretan, ki nou tou nou bezwen determinen pour fer pour bann ki’n ganny abize?

²¹ Ler nou rekonfort lezot, nou ed zot pour rapel ki Zeova i kontan zot. An plis, nou bezwen gard antet ki Zeova i osi en Bondye lazistis. Zeova i konn tou bann dimoun ki’n ganny abize menm si okenn lezot dimoun pa konnen. Zeova i vwar tou keksoz e i pou fer sir ki bann abizer ki pa’n repantir i ganny pini. (Nom. 14:18) Antretan, annou fer tou sa ki nou kapab pour demontre lanmour anver bann ki’n ganny abize. Deplis, i vreman rekonfortan pour konnen ki Zeova pou konpletman geri tou bann ki’n ganny abize par Satan ek son lemonn! Byento, sa bann souvenir ki fer nou soufer pa pou zanmen retourn dan nou lespri ek leker.​—Iza. 65:17.