Sara * i dir: “Mon en dimoun timid e mon napa bokou konfidans dan mon lekor. Alor, mon pa santi mwan konfortab avek bann dimoun ki vreman konfidan e agresif. Me mon santi mwan alez ler mon avek en dimoun ki dous e ki annan limilite. Mon kapab koz avek sa kalite dimoun lo mon bann santiman ek problenm. Mon bann zanmi pros i koumsa.”

Sa ki Sara ti dir i montre ki si nou demontre ladouser, lezot dimoun pou anvi vin nou zanmi. Zeova i kontan dimoun ki demontre ladouser. Son Parol i ankouraz nou pour “demontre . . . ladouser.” (Kol. 3:12) Ki savedir ladouser? Ki mannyer Zezi ti demontre ladouser? Ki mannyer ladouser i kapab fer nou lavi pli ere?

En dimoun ki kontan fer lape i kapab devlop ladouser. En dimoun ki dous i tret lezot dan en bon fason, i zantiy e i reste kalm ler i ankoler.

Serten dimoun i krwar ki dimoun ki dous i fay me sa pa vre. Sa mo Grek pour “ladouser” ti ganny servi pour dekri en seval ki’n ganny donte. Sa seval i ankor for me i’n ganny montre ki mannyer pour kontrol son lafors. Pareyman, ler nou demontre ladouser nou kontrol nou bann move tandans e nou gard lape avek lezot.

Nou kapab mazinen ki nou pa en dimoun ki dous. Ozordi, bokou dimoun i agresiv e enpasyan, sa i kapab fer li difisil pour nou demontre ladouser. (Rom. 7:19) Alor, i demann zefor pour nou devlop ladouser me lespri sen Zeova pour ed nou pour kontinyen demontre ladouser. (Gal. 5:22, 23) Akoz nou devret fer zefor pour devlop ladouser?

Ladouser i en kalite ki atir dimoun. Parey Sara, ki’n ganny mansyonnen pli boner i dir, nou kontan pas letan avek bann dimoun ki dous. Zezi i en bon legzanp en dimoun ki dous e bon. (2 Kor. 10:1) Menm bann zanfan ki pa ti konn li ti anvi pas letan avek li.​—Mark 10:13-16.

Ler nou demontre ladouser, sa i protez nou e lezot dimoun otour nou. Si nou en dimoun dous, nou pa pou ankoler vitman oubyen azir dan lakoler. (Prov. 16:32) Nou pa pou bles lezot, sirtou dimoun ki nou kontan e  sa pou fer ki nou pa pou santi nou koupab. Osi, nou anpese ki lezot i soufer akoz nou pa’n kontrol nou santiman ek nou aksyon.

Menm si Zezi ti annan bann gran responsabilite e i ti byen okipe, i ti dous anver tou dimoun. Bokou dimoun dan son letan ti pe rente e zot ti fatige. Zot ti bezwen reganny lafors. Zot ti bezwen santi zot byen rekonforte ler Zezi ti dir zot: “Vin kot mwan, . . . parski mon dous e mon annan limilite”!​—Mat. 11:28, 29.

Ki mannyer nou kapab devlop ladouser parey Zezi? Nou bezwen etidye Parol Bondye pour aprann ki mannyer Zezi ti tret bann dimoun e ki i ti fer dan bann sityasyon difisil. Apre, ler nou fer fas avek bann sityasyon difisil, nou fer tou sa ki nou kapab pour azir parey Zezi. (1 Pyer 2:21) Annou vwar trwa keksoz ki ti ed Zezi pour demontre ladouser.

Zezi ti annan limilite. Zezi ti dir ki i en dimoun “dous e [i] annan limilite.” (Mat. 11:29) Dapre Labib, ladouser ek limilite i mars ansanm akoz si ou annan limilite ou pa pou ofans vitman e ou pou azir avek ladouser.​—Efe. 4:1-3.

Ler nou annan limilite, nou pa pou ankoler vitman par sa ki lezot dimoun i dir lo nou. Ki mannyer Zezi ti azir anver bann ki ti kritik li konmkwa i “manz tro bokou e i kontan bwar diven”? Par son fason viv, i ti montre ki sa ki zot ti dir pa vre. Avek limilite i ti dir zot ki “lasazes en dimoun i ganny rekonnet par son aksyon.”​—Mat. 11:19.

Si en dimoun i dir en keksoz konsernan ou ras, sèks oubyen landrwa kot ou sorti, i ti pou byen si ou fer zefor pour azir avek ladouser. En ansyen ki apel Peter e ki reste Sidafrik, i dir: “Ler en dimoun i dir en keksoz ki fer mwan ankoler, mon demann mon lekor, ‘Ki Zezi ti pou fer dan sa sityasyon?’ Mon’n aprann pour pa pran keksoz tro serye.”

Zezi ti konnen ki imen i enparfe. Bann disip Zezi ti oule fer sa ki byen me vi ki zot ti enparfe, zot pa ti toultan fer sa ki byen. Par egzanp, sa zour swar avan Zezi ti mor, Pyer, Zak ek Zan pa ti reste eveye avek Zezi parey i ti’n demann zot pour fer. Zezi ti montre ki i ti konnen akoz zot ti’n dormi ler i ti dir ki “lespri i anvi fer sa ki byen, me lekor enparfe i feb.” (Mat. 26:40, 41) Vi ki Zezi ti konpran ki son bann zapot ti enparfe, i pa ti ankoler avek zot.

En ser ki apel Mandy ti kontan kritik lezot me aprezan i fer bokou zefor pour demontre ladouser parey Zezi ti fer. I dir: “Mon esey gard antet ki tou imen i enparfe e mon esey konsantre lo zot bann bon kalite, parey Zeova i fer.” Si ou esey vwar febles imen parey Zezi ti vwar, sa pou ed ou tret lezot avek ladouser.

Zezi ti met son konfyans dan Zeova. Ler Zezi ti lo later, i ti fer fas avek bokou lenzistis. Dimoun pa ti konpran li, zot ti ay li e zot ti tortir li. Kantmenm sa, i ti kontinyen demontre ladouser akoz i ti “les tou dan lanmen sa Enn ki ziz avek lazistis.” (1 Pyer 2:23) Zezi ti konnen ki son Papa ki dan lesyel ti pou ed li andire e ki dan sa bon moman i ti pou pini bann ki pa ti pe tret li byen.

Si nou ganny trete dan en fason enzis e nou azir dan lakoler, nou kapab fer nou sityasyon pli grav. Sanmenm sa ki Labib i dir: “Ler en dimoun i pran lakoler, i pa azir an armoni avek ladrwatir Bondye.” (Zak 1:20) Menm si nou annan rezon pour ankoler, nou lenperfeksyon i kapab fer nou azir dan en move fason.

En ser Lalmanny ki apel Cathy ti krwar ki ‘si ou pa defann ou lekor, personn pa pou fer li pour ou.’ Me ler i ti aprann pour met son konfyans dan Zeova, son latitid ti sanze. I ti dir: “Aprezan, mon nepli bezwen toultan pare pour defann mon lekor. Mon kapab azir avek ladouser akoz mon konnen ki Zeova pou aranz tou keksoz ki mal dan lemonn.” Si ou’n deza en viktim lenzistis, ler ou swiv legzanp Zezi pour met ou konfyans dan Zeova, sa pou ed ou pour kontinyen demontre ladouser.

Zezi ti fer resorti ki si nou anvi ere, nou bezwen demontre ladouser. I ti dir: “Ere bann ki dous.” (Mat. 5:5) Annou vwar ki mannyer ler nou demontre ladouser sa i kapab ede dan sa bann sityasyon swivan.

Ler nou demontre ladouser dan maryaz, sa i ede redwir stres. En frer Lostrali ki apel Robert i dir: “Mon’n dir mon madanm en kantite keksoz blesan ki mon pa ti’n devret dir. Me ou pa kapab fer konmsi nanryen ditou apre ki ou’n dir sa bann keksoz dan lakoler. Mon ti regrete ler mon ti vwar lefe ki mon bann parol ti annan lo mon madanm.”

“Nou tou nou souvan fer fot” dan sa ki nou dir e nou bann parol san reflesir i kapab anmenn problenm dan nou maryaz. (Zak 3:2) Dan sa bann sityasyon, ladouser i ed nou pour reste kalm e kontrol sa ki nou dir.​—Prov. 17:27, NWT.

Robert ti fer zefor pour devlop kontrol lo son lekor e reste kalm. Ki ti arive ler i ti fer sa? I dir: “Aprezan, ler mon ganny en dezakor avek mon madanm, mon esey mon mye pour ekoute, pour koz avek ladouser e pour pa ankoler vitman. Mon relasyon avek mon madanm in amelyore.”

Ler nou demontre ladouser, sa i amelyor nou relasyon avek lezot. Bann dimoun ki ankoler vitman napa bokou zanmi. Par kont, ladouser i ed nou pour ‘gard sa lape ki ini nou tou ansanm.’ (Efe. 4:2, 3) Cathy, ki’n ganny mansyonnen pli boner, i dir: “Ler mon demontre ladouser, mon kapab pas en bon moman avek lezot menm si i difisil pour pas letan avek serten dimoun.”

Ler nou demontre ladouser, nou ganny lape lespri. Dapre Labib, en dimoun ki annan “lasazes ki sorti dan lesyel” i demontre ladouser e i kontan fer lape. (Zak 3:13, 17) En dimoun ki dous i annan “en leker kalm.” (Prov. 14:30, NWT) En frer ki apel Martin, ki’n fer bokou zefor pour devlop ladouser, i dir: “Konmela mon pa toultan ensiste ki keksoz i ganny fer dan mon fason.”

I kapab ki nou bezwen travay dir pour devlop ladouser. En frer i dir: “Fransman pour dir ou, ziska ozordi, parfwa mon bwi anndan.” Vi ki Zeova i oule ki nou fer tou nou posib pour devlop ladouser, i pou ed nou fer sa. (Iza. 41:10; 1 Tim. 6:11) I kapab ‘fini nou formasyon’ e i kapab ‘fer nou for.’ (1 Pyer 5:10) Parey zapot Pol, avek letan nou kapab imit “ladouser ek labonte Kris.”​—2 Kor. 10:1.