BOKOU dimoun i konnen ki lontan bann Ezipsyen ti ekri prensipalman lo papye ki’n ganny fer avek en plant ki apel papiris. Bann Grek ek Romen osi ti ekri lo papiris. * Me pa bokou dimoun ki konnen ki papiris ti osi ganny servi pour konstri bato.

Plis ki 2,500 an pase, profet Izai ti ekri ki dimoun ki reste “dan rezyon bann larivyer Letyopi” ti anvoy “bann anbasader lo lanmer, dan bann bato fer avek papiris.” Pli tar, profet Zeremi ti predir ki bann Med ek Pers ti pou anvair lavil Babilonn e bril zot “bann bato ki’n ganny fer avek papiris” pour zot pa sove.​—Iza. 18:1, 2, NWT; Zer. 51:32, NWT.

Labib i enspire par Bondye alor bann etidyan Labib i ekspekte ki bann arkeolog i trouv bann keksoz ki montre ki dimoun dan letan Labib ti servi papiris pour konstri bato. (2 Tim. 3:16) Ki zot in dekouver? Bann arkeolog in dekouver levidans ki bann dimoun Lezip ti servi papiris pour konstri bato.

Dan latonm bann Ezipsyen, i annan bann desen ek skilptir dan miray ki montre ki mannyer dimoun ti anmas papiris e konstri bato avek. Bann zonm ti koup bann tiz papiris e anmar par ta. Apre, sa bann ta ti ganny anmare ansanm byen sere. Bann tiz papiris i triyang. Alor, ler sa bann tiz i ganny anmare byen sere ansanm zot vin en ta ki vreman solid. Dapre liv A Companion to Ancient Egypt, bann bato ki ti ganny fer avek papiris ti kapab mezir apepre 17 met longer e i ti annan lespas pour 10 ouswa 12 pagay lo sak kote.

I ti annan en kantite papiris ki ti pouse dan vale kot larivyer Nil i koule. An plis, i ti fasil pour konstri bann bato avek papiris. I paret ki menm ler dimoun ti konmans servi dibwa pour konstri bann gro bato, bann peser ek saser ti kontinyen servi papiris pour konstri bann kartyemaron ek pti bato.

Pour bokou letan, dimoun ti kontinyen servi bann bato ki’n ganny fer avek papiris. Dapre en ekriven Grek, ki ti apel Plutarch, ki ti viv dan letan bann zapot, bann dimoun sa letan ti ankor servi bann bato ki ganny fer avek papiris.