Sa ki ti arive sa zour swar, ti sanz mon lavi parski i ti apartir sa moman ki mon ti esey aprann konn Bondye. Me avan mon rakont zot sa ki ti arive apre, mon ti pou kontan rakont zot serten keksoz ki ti arive avek mwan ler mon ti ankor zanfan, ki ti fer mwan anvi aprann konn Bondye.

Mon ti ne an 1937 dan en landrwa ki apel Guesnain dan nor Lafrans. Mon papa ti travay dan en min sarbon e i ti ansenny mwan ki i enportan pour travay dir. Mon papa ti osi ansenny mwan pour ay lenzistis. I ti vwar ki en kantite dimoun ki travay dan min pa ganny trete dan en fason zis e zot ti travay dan bann kondisyon ki danzere. Sa ti fer li anvi ed zot. Alor, i ti zwenn ansanm avek bann lorganizasyon ki defann drwa bann dimoun ki travay dan min. I ti osi ankoler avek lipokrizi bann pret. En kantite parmi zot ti annan en lavi konfortab me kantmenm sa, zot ti demann bann dimoun pov ki ti travay dan min pour donn zot manze ek larzan. Mon papa pa ti kontan latitid sa bann pret e sa ti fer ki i pa  ti ansenny mwan nanryen konsernan larelizyon. Annefe, nou pa ti zanmen koz lo Bondye.

Anmezir mon ti pe grandi, mon ti konmans ay lenzistis. Enn bann keksoz ki mon ti vwar enzis i ki bann dimoun pa ti kontan bann etranze ki ti vin reste Lafrans. Me mwan, mon ti kontan zwe foutbol avek zanfan bann imigran e mon ti kontan pas letan avek zot. An plis, mon manman pa ti Franse, i ti sorti Polonny. Mon ti anvi ki dimoun diferan ras i viv ansanm dan lape e ki tou dimoun i ganny trete parey.

An 1957, mon ti bezwen zwenn larme. I pour sa rezon ki mon ti dan montanny sa zour swar, ki mon’n koz lo la pli boner. Apre ki mon ti’n kriye: “Bondye, ed mwan!” Mon ti vreman soulaze pour vwar en bourik dan plas en solda lennmi. Kantmenm sa, sa ki ti arive sa zour swar ek sa lager Lalzeri, ti fer mwan reflesir seryezman lo ki bi lavi e bann kestyon parey: Akoz nou lo later? Eski Bondye i enterese avek nou? Eski en zour pou annan vre lape lo later?

Pli tar, ler mon ti dan lakour pe vizit mon paran, mon ti zwenn en Temwen Zeova. I ti donn mwan en kopi La Sainte Bible an Franse, en Labib ki Katolik in tradwir. Mon ti konmans lir ler mon ti retourn Lalzeri. En verse Labib ki ti fer mwan reflesir ti Revelasyon 21:3, 4. I dir: “Gete! Latant Bondye i avek bann imen . . . I pou eswiy tou larm dan zot lizye, i pou nepli annan ni lanmor, ni dey, ni leokri, ni douler ankor.” * Sa bann parol ti sirprann mwan. Mon ti demann mon lekor si sa bann parol ti vre. Sa letan, mon pa ti konn preski nanryen lo Bondye ek Labib.

Apre ki mon ti kit larme an 1959, mon ti zwenn en Temwen Zeova ki apel François. I ti ansenny mwan bokou keksoz sorti dan Labib. Par egzanp, i ti montre mwan dan Labib ki Bondye i apel Zeova. (Ps. 83:18, NWT) I ti osi eksplik mwan ki Zeova pou anmenn lazistis lo later, i pou fer later vin en paradi e i pou akonpli sa bann parol dan Revelasyon 21:3 ek 4.

Sa bann lansennyman dan Labib ti fer sans e zot ti tous mon leker. Me, mon ti osi vreman ankoler avek bann pret e mon ti anvi dir zot ki zot pa ti pe ansenny sa ki Labib i dir. I paret ki mon ti ankor pe mazin parey mon papa e mon ti anvi lager kont bann lenzistis. Mon pa ti anvi espere. Mon ti anvi fer en keksoz deswit.

François ek mon bann nouvo zanmi ti ed mwan kontrol mon lakoler. Zot ti eksplik mwan ki konman bann Kretyen, nou pa devret ziz lezot me nou devret ed zot par anons sa bon nouvel konsernan Rwayonm Bondye. Sanmenm sa ki Zezi ti fer e i sanmenm sa travay ki i ti donn son bann disip pour fer. (Mat. 24:14; Lik 4:43) Mon ti osi bezwen aprann koz byen avek bann dimoun menm si mon pa ti dakor avek zot krwayans. Labib i dir: “En lesklav Senyer pa devret lager, me i devret zantiy anver tou dimoun.”​—2 Tim. 2:24.

 Mon ti fer bann sanzman neseser e an 1959, mon ti batize konman en Temwen Zeova, kot en lasanble rezyonal. Laba, mon ti zwenn en zenn ser ki ti apel Angèle e mon ti dakor avek li. Mon ti konmans asiste renyon dan son kongregasyon e an 1960, nou ti marye. I vreman en bon madanm e i en kado presye sorti kot Zeova.​—Prov. 19:14.

Pandan bann lannen ki’n pase, mon’n aprann en kantite leson enportan avek bann frer ki saz e eksperyanse. Enn bann leson pli enportan ki mon’n aprann i ki pour nou reisi dan nenport servis ki difisil nou bezwen annan limilite e aplik sa konsey saz ki dan Proverb 15:22 ki dir: “En proze . . . i reisi kan i annan bokou konseye.”

An 1964, mon ti vreman bezwen aplik sa konsey. Mon ti konmans servi konman sirveyan rezyonal. Mon ti bezwen vizit bann kongregasyon pour ankouraz bann frer ek ser e pour ed zot vin pli pros avek Zeova. Sa letan mon ti annan 27an e mon ti napa bokou leksperyans. Alor, mon ti fer fot me mon ti esey aprann avek sa bann fot. Pli enportan ankor, mon ti osi aprann bann leson enportan avek bann “konseye” ki kalifye e eksperyanse.

Mon rapel en keksoz ki ti arive ler mon ti’n fek vin sirveyan rezyonal. Apre ki mon ti’n vizit en kongregasyon Pari, en frer eksperyanse ti demann mwan si i kapab koz avek mwan an prive. Mon ti dir: “Byensir.”

I ti demann mwan: “Louis, ler en dokter i al vizit en dimoun kot li, lekel ki i al vwar?”

Mon ti reponn: “Sa enn ki malad.”

I ti dir: “Ou annan rezon. Me, mon remarke ki ou pas plis letan avek bann ki pe fer byen spirityelman parey sirveyan kongregasyon. Dan nou kongregasyon, i annan bokou frer ek ser ki dekouraze, ki nouvo ouswa ki timid. Zot ti pou vreman apresye si ou pas letan avek zot e menm al kot zot pour pran en repa.”

Mon ti apresye sa bon konsey ki sa frer ti’n donn mwan. Son lanmour pour mouton Zeova ti tous mon leker. Menm si, i ti difisil pour aksepte ki mon ti’n fer en fot, mon ti aplik sa konsey deswit. Mon remersye Zeova pour bann frer ki koumsa.

Pandan bann lannen 1969 ek 1973, mon ti sirveyan sa departman ki donn manze bann  dimoun dan de lasanble enternasyonal ki ti ganny fer Colombes, Pari. Dan sa lasanble enternasyonal ki ti ganny fer an 1973, nou ti bezwen donn manze apepre 60,000 dimoun pour senk zour. Mon pa ti konnen ki mannyer nou ti pou kapab fer sa. Me ankor enn fwa, sa konsey dan Proverb 15:22 ti ed nou rezourd nou problenm. Nou ti rod konsey avek lezot. Mon ti demann led avek bann frer ki ti eksperyanse. Serten parmi zot ti bann bouse, planter, kwizinyen ek bann ki aste konmisyon. Ansanm, nou ti kapab akonpli sa travay difisil.

An 1973, mwan ek mon madanm ti ganny envite pour servi dan Betel Lafrans. Sa premye responsabilite ki mon ti gannyen ti osi vreman difisil. Mon ti bezwen rod fason pour anvoy piblikasyon pour bann frer ek ser Kameroun. Laba, nou travay ti’n ganny enterdi ant bann lannen 1970 ek 1993. Ankor enn fwa, mon pa ti konnen si mon ti pou kapab fer sa travay. Sirveyan biro brans Lafrans ti vwar ki mon ti enkyet. Pour ankouraz mwan, i ti dir: “Nou bann frer ek ser Kameroun i vreman bezwen manze spirityel. Annou donn zot sa ki zot bezwen.” Sanmenm sa ki nou ti fer.

Plizyer fwa, mon ti al dan bann pei ki ti o bor Kameroun pour zwenn avek bann ansyen. Sa bann frer ti annan kouraz e zot ti saz. Zot ti ed mwan rod bann fason ki mon ti pou kapab anvoy bann piblikasyon Kameroun pour zot ganny zot manze spirityel. Zeova ti beni nou bann zefor. Pour apepre 20 an, son bann serviter dan sa pei pa ti zanmen mank en nimero Latour Veyer ek en piblikasyon ki ti apel Our Kingdom Service ki ti sorti tou le mwan.

Depi ler nou ti pe pwente, mon ti remarke ki Angèle ti annan en bon lanmitye avek Zeova. Ler nou ti marye, mon ti osi vwar sa. Par egzanp, sa zour swar apre ki nou ti’n marye,  i ti demann mwan pour priy Zeova konsernan nou dezir pour servi Zeova otan ki nou kapab konman en koup marye. Zeova ti reponn nou lapriyer.

Angèle in osi ed mwan pour annan plis konfyans dan Zeova. Par egzanp, an 1973, ler nou ti ganny envite pour al servi dan Betel, mon ti ezite akoz mon ti kontan servi konman sirveyan. Me Angèle ti fer mwan rapel ki nou ti’n dedye nou lavi avek Zeova e ki nou devret fer sa ki son lorganizasyon i demann nou pour fer. (Ebr. 13:17) Mon ti dakor avek sa ki i ti’n dir. Alor, nou ti al Betel. Mon madanm i saz, rezonnab e i vreman kontan Zeova. Sa bann kalite in fer nou relasyon vin pli for e in ed nou fer bann bon desizyon pandan sa kantite letan ki nou’n ansanm.

Menm si, la nou’n pli vye, Angèle i ankor en bon madanm e i siport mwan. Par egzanp, nou de Angèle, nou ti konmans fer bokou zefor pour amelyor nou Angle pour nou kapab asiste bann lekol teokratik, ki laplipar i ganny fer an Angle. Alor, menm si nou ti dan nou bann 70 an, nou ti zwenn en kongregasyon Angle. I ti difisil pour mwan aprann en nouvo langaz parski konman en manm Komite Biro Brans Lafrans, mon annan bokou responsabilite. Me nou de Angèle, nou ti ed kanmarad. Aprezan nou dan nou bann 80 an, nou kontinyen prepar renyon an Angle e an Franse. Otan ki nou kapab nou osi esey partisip dan renyon e dan predikasyon. Zeova in beni nou bann zefor pour aprann koz an Angle.

An 2017, nou de Angèle, nou ti ganny envite pour asiste Lekol pour manm Komite Biro Brans avek zot madanm, ki ti ganny fer Watchtower Educational Center, Patterson, New York.

Zeova i vreman sa pli gran Enstrikter. (Iza. 30:20, NWT) Alor, nou tou, zenn konman vye, nou ganny sa pli bon ledikasyon. (Det. 4:5-8, NWT) Mon’n remarke ki bann zenn ki ekout Zeova e ki ekout bann frer ek ser eksperyanse i kapab fer bann bon desizyon e vin bann serviter fidel Zeova. Proverb 9:9 i dir: “Konsey en saz, e i ava vin pli saz; ansenny en zis, e son konnesans ava ogmante.”

Parfwa, mon mazin sa zour swar ler mon ti dan montanny Lalzeri apepre 60 an pase. Sa letan, mon pa ti konnen ki mon ti pou annan en lavi ere. Mon’n aprann bokou avek lezot. Zeova in donn nou de Angèle en lavi merveye. Alor, nou determinen pour pa zanmen aret aprann avek nou Papa ki dan lesyel e avek nou bann frer ek ser ki saz, eksperyanse e ki kontan Zeova.