1. Ki legzanp Zezi in kite pour son bann disip e ki zot ti fer? (Vwar portre lo kouvertir.)

LER Zezi ti lo later i ti kontinyen anons sa bon nouvel parski i ti anvi ki tou dimoun i ekout li e i ti anvi ki son bann disip i fer parey li. (Zan 4:35, 36) Ler Zezi ti avek son bann disip, zot ti anons sa bon nouvel avek devouman. (Lik 10:1, 5-11, 17) Me ler Zezi ti ganny arete e ganny met amor, son bann disip ti nepli anvi anons sa bon nouvel. (Zan 16:32) Apre ki Zezi ti’n resisite, i ti ankouraz zot pour konsantre dan sa travay predikasyon. Menm apre ki Zezi ti’n retourn dan lesyel, zot ti kontinyen anons sa bon nouvel avek devouman. Zot ti sitan devoue dan sa travay predikasyon, ki zot bann lennmi ti dir: “Zot in ranpli Zerizalenm avek zot lansennyman.”​—Akt 5:28.

2. Ki mannyer Zeova in beni sa travay predikasyon?

² Zezi ti gid bann Kretyen dan premye syek anmezir ki zot ti anons sa bon nouvel e Zeova ti beni zot travay. Alor en kantite dimoun ti aksepte zot mesaz. Par egzanp, zour Lapannkot lannen 33, apepre 3,000 dimoun ti batize. (Akt 2:41) Apre sa, lakantite disip ti kontinyen ogmante. (Akt 6:7) Kantmenm sa, Zezi ti predir ki dan bann dernyen zour en kantite dimoun ti pou aksepte sa bon nouvel.​—Zan 14:12; Akt 1:8.

3-4. Akoz i difisil pour anons sa bon nouvel dan serten landrwa e ki nou pou vwar dan sa lartik?

³ Nou tou nou bezwen kontinyen annan en bon pwennvi lo nou travay predikasyon. Dan serten pei i fasil pour fer sa. Akoz? Parski en kantite dimoun i enterese pour etidye Labib me serten parmi zot i bezwen espere ziska ki en Temwen Zeova i kapab fer zot letid. Me dan lezot landrwa, bann proklanmater i vwar li difisil pour anons sa bon nouvel.  Sa i akoz pa souvan ki dimoun i kot zot lakour e bann ki kot lakour pa tro enterese pour etidye Labib.

⁴ Si ou reste dan en landrwa ki difisil pour anons sa bon nouvel, i tre probab ki bann sizesyon dan sa lartik pou ed ou. Nou pou vwar ki serten in fer pour zot zwenn plis dimoun dan predikasyon. Nou pou osi vwar akoz nou kapab reste pozitif ki swa dimoun i ekout nou oubyen non.

5. Ki difikilte en kantite proklanmater i fer fas avek?

⁵ I pe vin pli difisil pour en kantite Temwen Zeova anons sa bon nouvel avek dimoun kot zot lakour. Serten proklanmater i reste dan bann landrwa kot i annan bann batiman ki zot pa ganny akse avek ouswa bann lakour ki annan bann gran baro. I kapab ki sa bann batiman oubyen lakour i annan gard sekirite ki pa les dimoun antre san ganny permisyon avek en dimoun ki reste dan sa landrwa. Dan lezot landrwa, bann proklanmater i kapab al anons sa bon nouvel kazankaz me zot pa zwenn bokou dimoun kot lakour. I annan ankor lezot proklanmater ki anons sa bon nouvel dan bann landrwa ki lwen e kot pa bokou dimoun ki reste. I kapab ki sa bann proklanmater i vwayaz bann gran zistans zis pour esey zwenn en dimoun me i kapab ki sa dimoun pa kot lakour. Menm si nou pe fer fas avek sa bann difikilte, nou bezwen kontinyen anons sa bon nouvel. Ki nou kapab fer pour sirmont sa bann difikilte e koz avek plis dimoun?

6. Ki mannyer bann proklanmater i parey bann peser?

⁶ Zezi ti konpar predikasyon avek lapes. (Mark 1:17) Serten peser i al lapes pour plizyer zour san atrap okenn pwason me zot pa aret lapes. O kontrer zot sanz zot ler lapes, landrwa kot zot al lapes oubyen teknik lapes. Nou osi nou kapab fer parey dan nou travay predikasyon. Aprezan annou vwar detrwa sizesyon.

7. Ki i kapab arive si nou sanz nou ler predikasyon.

⁷ Esey sanz nou ler predikasyon. Nou pou zwenn plis dimoun dan predikasyon si nou al en ler ki zot normalman kot lakour. Apre tou, dimoun i bezwen retourn kot zot a en moman. En kantite frer ek ser i pres dan apremidi oubyen dan aswar parski zot zwenn plis dimoun. Petet sa bann ler, bann met lakour i pli rilaks e pli pare pour koze. Oubyen ou kapab esey fer parey en ansyen ki apel David. David i dir ki apre ki li ek son konpanyon in pres dan en teritwar, zot retourn dan bann lakour kot zot pa’n zwenn dimoun. I dir: “Mon sirprann akoz en kantite met lakour i la ler nou retourn kot zot.” *

8. Ki mannyer nou kapab aplik Eklezyast 11:6 dan nou travay predikasyon?

⁸ Nou devret kontinyen fer zefor pour esey zwenn dimoun kot zot lakour. Sanmenm ki nou aprann avek verse tenm pour sa lartik. (Lir Eklezyast 11:6.) David ki’n ganny mansyonnen pli boner, ti kontinyen esey zwenn dimoun kot zot. Apre ki i ti’n retourn kot en lakour plizyer fwa, i ti finalman zwenn sa met lakour. Sa zonm ti anvi koz lo Labib e i ti dir: “Mon’n reste isi pour wit an e zanmen mon’n deza koz avek en Temwen Zeova kot mwan.” David i dir: “Mon’n aprann ki ler nou  finalman zwenn en dimoun kot lakour, souvandfwa zot ekout sa mesaz ki nou pe anonse.”

9. Ki serten proklanmater in fer pour zwenn dimoun ki zot pa zwenn kot zot?

⁹ Esey sanz landrwa kot ou fer predikasyon. Serten proklanmater i sanz landrwa kot zot anons sa bon nouvel, pour zot kapab zwenn bann dimoun ki zot pa zwenn se zot. Par egzanp, zot in vwar ki ler zot fer temwannyaz enformel e fer prezantwar, zot in kapab zwenn e koz avek bann dimoun ki reste dan bann gran batiman kot zot pa kapab anons sa bon nouvel kazankaz. Bokou proklanmater in osi vwar ki dimoun i prefere pour aksepte en piblikasyon ouswa koz avek zot ler zot dan bann landrwa piblik, dan bazar e dan bann landrwa biznes. En sirveyan rezyonal ki apel Floiran e ki reste Bolivi, i dir: “Nou al dan bazar e dan bann landrwa biznes, ant 1er ek 3er apremidi ler bann marsan pa tro bizi. Normalman nou annan bann bon konversasyon e nou konmans letid Labib.”

10. Ki en lot fason ou kapab zwenn dimoun dan ou teritwar?

¹⁰ Esey anons sa bon nouvel dan diferan fason. Meton plizyer fwa ou’n esey zwenn en dimoun kot li, ou’n pas kot son lakour diferan ler me kantmenm sa ou pa’n zwenn li. Eski i annan en lot fason ou kapab zwenn sa dimoun? Katarína i dir: “Mon ekri let pour bann dimoun ki mon pa’n zwenn zot kot zot e mon ekri sa ki mon ti pou dir zot si mon ti’n zwenn zot.” Ki nou aprann avek leksperyans Katarína? Anmezir ki ou anons sa bon nouvel, esey  zwenn tou dimoun dan ou teritwar dan en fason ouswa en lot.

11. Akoz serten dimoun pa anvi ekout nou mesaz?

¹¹ Serten dimoun pa anvi ekout nou mesaz. Zot pa krwar ki i neseser pour konn Bondye oubyen Labib. Zot pa krwar dan Bondye parski zot vwar ki kantite dimoun pe soufer dan lemonn. Zot pa enterese avek sa ki Labib i dir, parski zot vwar en kantite sef relizye ki dir zot fer sa ki Labib i dir me zot fer en kantite keksoz mal. Lezot i toultan pe mazin zot travay, fanmir oubyen zot bann problenm personnel e zot pa krwar ki Labib i kapab ed zot. Ki mannyer nou gard nou lazwa ler nou pres avek dimoun ki pa krwar ki nou mesaz i kapab ed zot?

12. Ler nou aplik sa ki Filipyen 2:4 i dir, ki mannyer sa i kapab ed nou dan predikasyon?

¹² Montre ki ou enterese avek lezot. En kantite dimoun ki pa ti anvi ekout nou mesaz, in ekoute ler zot in santi ki nou vreman enterese avek zot. (Lir Filipyen 2:4.) Par egzanp, David ki’n ganny mansyonnen pli boner i dir: “Si en dimoun i dir nou ki i pa enterese, nou met nou Labib ek nou bann piblikasyon dan nou sak e dir ‘Mon ti ava kontan konnen akoz ou santi koumsa.’” Dimoun i kapab remarke ler en dimoun i enterese avek zot. Petet zot pa pou mazin sa ki nou ti dir zot me i tre probab zot pou rapel fason nou ti fer zot santi. Menm si en dimoun pa les nou koz lo sa bon nouvel avek li, nou kapab montre ki nou enterese avek li atraver nou latitid ek lekspresyon lo nou figir.

13. Ki mannyer nou kapab adapte nou prezantasyon avek bezwen sak met lakour?

¹³ Nou montre ki nou enterese avek lezot, ler nou adapte nou prezantasyon avek bezwen ek lentere sa met lakour. Par egzanp, eski nou vwar okenn keksoz ki montre ki sa met lakour i annan zanfan? Petet sa paran pou enterese avek bann konsey ek sizesyon sorti dan Labib ki pou ed li elve son zanfan oubyen amelyor son lavi fanmir. Eski lo zot laport i annan plizyer lok? Petet nou kapab koz lo ki mannyer krim i fer en kantite dimoun per. I kapab ki sa met lakour pou kontan pour tande ki tousala pou fini en zour. Sak fwa nou zwenn en dimoun ki anvi ekoute, esey ed zot pour konpran ki mannyer bann konsey Labib i kapab ed zot. Katarína, ki’n ganny mansyonnen pli boner, i dir: “Mon toultan gard antet ki mannyer Labib in ed mwan.” Sa i fer Katarína koz avek konviksyon e sa dimoun ki i pe koz avek i kapab vwar sa.

14. Dapre Proverb 27:17, ki mannyer bann proklanmater i kapab ed kanmarad dan predikasyon?

 ¹⁴ Rod led avek lezot proklanmater. Dan premye syek, zapot Pol ti montre Timote ki mannyer pour anons sa bon nouvel e ansenny lezot dimoun. Pol ti osi ankouraz Timote pour fer parey. (1 Kor. 4:17) Parey Timote, nou kapab aprann avek bann proklanmater pli eksperyanse dan nou kongregasyon. (Lir Proverb 27:17, NWT.) * Annou vwar legzanp en frer ki apel Shawn. Pour en pe letan, i ti fer pionye dan en landrwa kot dimoun ti reste lwen avek kanmarad e kot laplipar dimoun ti kontan zot larelizyon. Ki mannyer i ti gard son lazwa? I dir: “Kan i ti posib, mon ti travay avek en lot proklanmater. Nou ti servi sa letan ler nou kit en lakour pour al kot en lot pour ed kanmarad pour amelyor nou abilite pour ansennyen. Par egzanp, nou ti koz lo sa ki sa met lakour in dir e ki mannyer nou’n reponn. Apre sa, nou diskit lo sa ki nou kapab fer si laprosenn fwa en lot dimoun i dir nou menm keksoz.”

15. Akoz lapriyer i enportan ler nou pe anons sa bon nouvel?

¹⁵ Priy Zeova pour ganny led. Demann Zeova pour ed ou sak fwa ou anons sa bon nouvel. Nou bezwen son lespri sen pour ed nou dan tou sa ki nou fer. (Ps. 127:1; Lik 11:13) Ler ou demann Zeova son led dan lapriyer, dir li egzakteman sa ki ou oule. Par egzanp, demann li pour ed ou zwenn en dimoun ki anvi aprann konsernan li e ki pare pour ekoute. Apre, azir an armoni avek ou lapriyer par anons sa bon nouvel avek tou dimoun ki nou zwenn.

16. Akoz nou bezwen fer letid personnel pour nou kapab anons sa bon nouvel pli byen?

¹⁶ Fer letan pour ou letid personnel. Parol Bondye i dir ki nou menm nou bezwen “fer sir ki sa i lavolonte Bondye, ki bon, akseptab e parfe.” (Rom. 12:2) Ler nou etidye Labib, nou aprann konn Bondye pli byen, apre ler nou koz avek lezot lo Bondye zot pou vwar ki nou vreman krwar dan sa ki nou pe dir. Katarína, ki’n ganny mansyonnen pli boner, i dir: “Pa tro lontan pase, mon ti vwar ki mon ti bezwen ranforsi mon lafwa konsernan serten lansennyman de baz dan Labib. Alor mon ti etidye pli byen levidans ki i annan en Kreater, ki Labib i vreman Parol Bondye e ki Bondye i annan en lorganizasyon ki pe reprezant li ozordi.” Katarína i dir ki son letid personnel in ranforsi son lafwa e ogmant son lazwa dan sa travay predikasyon.

17. Akoz Zezi ti reste pozitif e kontinyen anons sa bon nouvel?

¹⁷ Zezi ti reste pozitif e kontinyen anons sa bon nouvel menm si serten dimoun pa ti ekout son mesaz. Akoz? I ti konnen ki dimoun ti bezwen aprann laverite e i ti anvi ed plis dimoun posib pour konn laverite. I ti osi konnen ki o konmansman serten dimoun pa ti pou ekout son mesaz me ki pli tar zot ti pou ekoute. Annou vwar sa ki ti arive avek son prop fanmir. Pandan sa trwa-z-an edmi ki Zezi ti anons sa bon nouvel, ni enn parmi son bann frer pa ti vin son disip. (Zan 7:5) Me apre son rezireksyon, zot ti vin Kretyen.​—Akt 1:14.

18. Akoz nou kontinyen anons sa bon nouvel?

¹⁸ Nou pa konnen lekel ki pou vin serviter Zeova. Serten dimoun i pran plis letan  ki lezot pour aksepte laverite. Menm bann ki pa anvi ekout nou mesaz i vwar nou bon kondwit ek latitid pozitif e avek letan zot kapab konmans “glorifye Bondye.”​—1 Pyer 2:12.

19. Dapre 1 Korentyen 3:6, 7, ki nou devret rekonnet?

¹⁹ Menm si nou anons sa bon nouvel e nou ansenny dimoun, nou devret rekonnet ki Bondye ki fer nou reisi dan sa travay predikasyon. (Lir 1 Korentyen 3:6, 7.) Getahun, en frer ki pe servi Letyopi i dir: “Pour plis ki 20 an mon ti sa sel Temwen Zeova dan sa landrwa kot mon ti reste. Me aprezan i annan 14 proklanmater. Trez parmi zot in batize enkli mon madanm ek mon trwa zanfan. Normalman i annan apepre 32 dimoun ki asiste renyon.” Getahun i kontan ki in kontinyen anons sa bon nouvel anmezir ki i esper Zeova avek pasyans pour atir bann dimoun senser ver son lorganizasyon.​—Zan 6:44.

20. Dan ki fason nou parey bann ki al sov dimoun?

²⁰ Tou dimoun i presye pour Zeova. I’n donn nou sa privilez pour travay ansanm avek son garson, pour anmenn dimoun sorti dan tou nasyon dan son lorganizasyon, avan lafen i arive. (Aga. 2:7, NWT) Nou travay predikasyon i kapab ganny konpare avek en travay pour sov dimoun. Nou parey bann dimoun ki’n ganny anvoye pour al rod dimoun ki’n perdi dan bwa. Menm si pa nou tou ki trouv enn sa bann dimoun ki’n perdi, nou tou nou’n fer en travay enportan. I menm parey avek nou travay predikasyon. Nou pa konnen ki kantite dimoun ki pou ganny sove dan sa lemonn. Me Zeova i kapab servi nenport parmi nou pour ed zot. Andreas ki reste Bolivi i dir: “Mon konnen ki ler en dimoun i aprann konn laverite e i batize i akoz nou tou nou’n travay ansanm pour ed li.” Annou kontinyen reste pozitif dan sa travay predikasyon. Si nou fer sa, Zeova pou beni nou e nou pou trouv lazwa dan sa travay predikasyon.