1-2. Ki problenm bokou Temwen Zeova i fer fas avek?

ZAPOT Pol ti ankouraz Timote pour akonpli byen son minister. (2 Tim. 4:5) Sa konsey i osi aplik pour nou e nou pran li o serye. Me parfwa i pa fasil. En kantite nou bann frer ek ser i bezwen bokou kouraz pour fer sa travay predikasyon. (2 Tim. 4:2) Mazin par egzanp, nou bann frer ek ser ki reste dan bann landrwa kot nou travay predikasyon i anba restriksyon oubyen in ganny enterdi. Zot anons sa bon nouvel menm si zot konnen ki zot kapab ganny met dan prizon.

² Pep Zeova i pas dan en kantite problenm ki kapab fer zot dekouraze. Par egzanp, en kantite frer ek ser i travay pour plizyer erdtan zis pour ganny keksoz de baz pour zot fanmir. Zot ti pou kontan fer plis dan predikasyon me apre en semenn travay, zot napa bokou lenerzi. Lezot pa kapab fer bokou pour servi Zeova parski zot vreman malad, zot aze oubyen zot pa kapab kit zot lakour. I annan lezot ankor ki santi zot pa vo nanryen dan lizye Zeova. En ser ki apel Mary * i dir: “Mon bezwen fer bokou zefor pour kontrol mon bann santiman ler mon dekouraze, sa i fer mwan vreman fatige. Apre, mon santi mwan koupab akoz mon fatige e mon napa letan ek lenerzi pour al predikasyon.”

3. Ki nou pou vwar dan sa lartik?

³ Nenport ki problenm nou annan, Zeova i kapab donn nou sa lafors ki nou bezwen pour fer fas avek nou problenm e pour kontinyen servi li. Dan sa lartik, nou pou vwar ki mannyer Zeova i kapab ed nou. Me avan sa, nou pou vwar ki mannyer Zeova ti donn Pol ek Timote lafors pour akonpli zot minister menm si zot ti annan problenm.

4. Ki problenm Pol ti fer fas avek?

⁴ Pol ti fer fas avek bokou problenm. I ti bezwen lafors sirtou ler i ti ganny bate, ganny saboule avek ros e ganny mete dan prizon. (2 Kor. 11:23-25) I pa ti kanmi pour dir ki parfwa i ti dekouraze e ki i ti bezwen lager avek sa santiman. (Rom. 7:18, 19, 24) Pol ti osi dir ki i annan “en pikan ki pe pik” li. I kapab ki i ti pe refer avek en maladi ki i ti vreman anvi Bondye i tire.​—2 Kor. 12:7, 8.

5. Ki Pol ti fer menm si i ti fer fas avek problenm?

⁵ Zeova ti donn Pol lafors pour kontinyen anons sa bon nouvel menm si i ti fer fas avek problenm. Nou vwar levidans ki Zeova ti donn Pol lafors ler nou vwar tou sa ki Pol ti fer. Par egzanp, ler i ti prizonnyen dan en lakaz Ronm, i ti anons sa bon nouvel avek devouman avek en kantite dimoun e petet osi avek bann zofisye gouvernman. (Akt 28:17; Fili. 4:21, 22) I ti osi anons sa bon nouvel avek bann gard lanperer e avek tou sa ki ti vin vizit li. (Akt 28:30, 31; Fili. 1:13) Pandan sa menm letan, Zeova ti servi Pol pour ekri bann let ki’n ed bann vre Kretyen dan lepase e ki pe ed nou ozordi. Legzanp Pol ti osi ankouraz bann frer ek ser Ronm e sa ti fer zot “demontre plis kouraz ankor pour koz lo parol Bondye san okenn lafreyer.” (Fili. 1:14) Menm si Pol pa ti kapab fer sa kantite ki i ti anvi, i ti fer son mye e sa “in finalman ede pour fer sa bon nouvel propaze.”​—Fili. 1:12.

6. Dapre 2 Korentyen 12:9, 10, kwa ki ti ed Pol pour akonpli byen son minister?

⁶ Pol ti rekonnet ki tou sa ki i ti fer ti akoz Zeova i donn li lafors. I ti dir ki “pwisans [Bondye] i vin pli for ler ou feb.” (Lir 2 Korentyen 12:9, 10.) Zeova ti donn Pol lafors atraver son lespri sen pour akonpli byen son minister malgre i ti ganny persekite, ganny met dan prizon e i ti fer fas avek lezot problenm.

7. Ki problenm Timote ti annan ki ti’n kapab fer li difisil pour li akonpli byen son minister?

⁷ Timote ki ti pli zenn ki Pol, ti osi bezwen depan lo pwisans Bondye pour li kontinyen anons sa bon nouvel. Timote ti akonpanny Pol lo bann gran vwayaz misyonner. Pol ti osi anvoy Timote pour  vizit e ankouraz bann kongregasyon. (1 Kor. 4:17) Petet Timote ti santi ki i pa ti kalifye pour li fer sa. I kapab i sanmenm rezon Pol ti dir li: “Pa les personn mepriz ou akoz ou zenn.” (1 Tim. 4:12) Deplis, pandan sa letan Timote ti “souvan malad.” (1 Tim. 5:23) Me Timote ti konnen ki lespri sen Zeova ti pou donn li sa lafors ki i ti bezwen pour kontinyen anons sa bon nouvel e pour ed son bann frer ek ser.​—2 Tim. 1:7.

8. Ki mannyer Zeova i donn son pep lafors ozordi?

⁸ Ozordi Zeova i donn son pep sa lafors ki “pli pwisan” pour zot kapab kontinyen servi li fidelman. (2 Kor. 4:7) Aprezan, annou vwar kat keksoz ki Zeova in donn nou, ki donn nou lafors e ed nou reste fidel avek li. Sa i lapriyer, Labib, bann frer ek ser e nou travay predikasyon.

9. Ki mannyer lapriyer i kapab ed nou?

⁹ Zeova i donn nou lafors atraver lapriyer. Dan Efezyen 6:18, Pol i ankouraz nou pour priy Bondye “dan tou lokazyon.” An retour Bondye pou donn nou lafors. Jonnie, ki reste Bolivi ti vwar ki mannyer Zeova ti ed li ler i ti pas dan plizyer problenm. Son madanm ek tou le de son paran ti tonm malad an menm tan. I ti difisil pour Jonnie pran swen avek tou le trwa. Son manman ti mor e i ti pran bokou letan pour son madanm ek son papa rekipere. Ler Jonnie i mazin sa letan, i dir: “Ler mon ti vreman enkyet, sa ki ti ed mwan ti ler mon priy Zeova e eksplik li ki mannyer mon santi.” Zeova ti donn Jonnie sa lafors ki i ti bezwen pour andire. Ronald, en ansyen ki reste Bolivi, ti aprann ki son manman ti annan kanser. Son manman ti mor en mwan pli tar. Kwa ki ti ed Ronald pandan sa moman difisil? Ronald i dir: “Ler mon priy Zeova, mon dir li tou sa ki mon pe santi. Mon konnen ki i konpran mwan pli byen ki okenn dimoun. I menm konpran mwan pli byen ki mon konpran mon prop lekor.” Parfwa, nou santi ki nou pa kapab fer fas avek nou problenm e nou pa konnen ki nou pou priy lo la. Me Zeova i anvi nou priye menm si i difisil pour dir li sa ki nou pe santi e sa ki nou pe mazinen.​—Rom. 8:26, 27.

10. Dapre Ebre 4:12, akoz i vreman enportan pour lir Labib e medit lo la?

¹⁰ Zeova i donn nou lafors atraver Labib. Pol ti lir Labib pour ganny lafors ek rekonfor e nou osi nou bezwen fer parey. (Rom. 15:4) Anmezir ki nou lir Parol Bondye e medit lo la, Zeova i kapab servi son lespri sen pour ed nou konpran pli byen ki mannyer Labib i kapab ed nou. (Lir Ebre 4:12.) Ronald ki’n ganny mansyonnen pli boner, i dir: “Mon kontan ki mon’n devlop sa labitid pour lir Labib tou le swar. Mon medit lo bann kalite Zeova ek lafason ki i pran swen avek son pep. Sa i donn mwan lafors.”

11. Ki mannyer Labib ti ed en ser ki son msye in mor?

¹¹ Ler nou medit lo Parol Bondye, sa i ed nou pour annan en bon latitid anver nou problenm. Annou vwar ki mannyer Labib ti ed en ser ki son msye in mor. En ansyen ti sizere ki i lir liv Zob pour ganny bann leson ki kapab ed li. Ler i ti fek konmans lir liv Zob, i ti kritik Zob pour son move fason panse. Dan son lespri, i ti dir Zob: “Pa mazin zis ou problenm!” Me  apre i ti realize ki son latitid ti parey avek sa ki pour Zob. Sa ti ed li pour aziste son pwennvi e donn li lafors pour fer fas avek son sityasyon.

12. Ki mannyer Zeova i servi nou bann frer ek ser pour donn nou lafors?

¹² Zeova i donn nou lafors atraver nou bann frer ek ser. Pol ti dir ki i vreman anvi zwenn son bann frer ek ser pour zot “ankouraz kanmarad.” (Rom. 1:11, 12) Mari ki’n ganny mansyonnen pli boner, i kontan ler i pas letan avek bann frer ek ser. I dir: “Zeova in servi bann frer ek ser ki pa ti ni menm konn mon bann problenm. Zot ti dir mwan en keksoz ankourazan oubyen zot ti anvoy en kart pour mwan e i ti sanmenm sa ki mon ti bezwen. I osi ede ler mon koz avek lezot ser ki annan bann problenm parey avek sa ki pour mwan. Mon’n aprann avek sa ki zot in fer e bann ansyen osi in fer mwan santi ki mon annan en plas dan kongregasyon.”

13. Ki mannyer nou kapab ankouraz kanmarad ler nou asiste renyon?

¹³ Enn bann pli bon landrwa ki nou kapab ankouraz kanmarad i ler nou asiste renyon. Ler ou asiste renyon ou kapab esey ankouraz lezot par dir zot ki ou kontan zot e ki ou apresye sa ki zot fer. Par egzanp, avan en renyon en ansyen ki apel Peter ti dir avek en ser ki son msye pa Temwen Zeova: “I vreman ankourazan pour vwar ou la ansanm avek ou sis zanfan. Ou bann zanfan in toultan pare e zot in prepar en komanter.” Sa manman ti vreman apresye parol sa ansyen, i ti dir: “Mon ti vreman bezwen tann sa ozordi.”

14. Ki mannyer sa travay predikasyon i ed nou?

¹⁴ Zeova i donn nou lafors atraver nou travay predikasyon. Ler nou anons sa bon nouvel avek lezot nou santi nou byen ki swa dimoun i ekoute oubyen non. (Prov. 11:25) En ser ki apel Stacy ti eksperyans sa. Ler en manm son fanmir ti ganny ekskli dan kongregasyon, Stacy ti vreman sagren. I ti kontinyen demann son lekor, ‘Eski mon ti’n kapab fer plis pour ed li?’ I ti difisil pour li aret mazin sa problenm. Kwa ki ti ed li? I ti santi li pli byen ler i ti partisip dan predikasyon. Ler i ti anons sa bon nouvel, i ti konsantre lo bann dimoun ki ti bezwen son led olye konsantre lo son problenm. Stacy i dir: “Pandan sa letan, Zeova ti donn mwan en etidyan Labib ki ti vitman aplik bann keksoz ki i ti pe aprann. Sa ti ankouraz mwan en kantite. Predikasyon i sa keksoz ki’n ed mwan plis.”

15. Ki nou aprann avek sa ki Mary ti dir?

¹⁵ Serten frer ek ser i kapab santi ki akoz zot sirkonstans zot pa kapab fer bokou dan predikasyon. Si ou santi koumsa, rapel ki Zeova i kontan ler ou donn ou meyer. Annou vwar legzanp Mary ki’n ganny mansyonnen pli boner. Ler i ti al reste dan en landrwa kot dimoun i koz en lot langaz, i ti santi ki i pa ti kapab fer bokou keksoz. I dir: “Pour en pe letan, mon ti kapab zis donn en komanter, lir en verse Labib oubyen donn en trak dan predikasyon.” Mary ti santi ki i pa ti kapab fer nanryen konpare avek bann dimoun ki koz sa langaz. Me i ti sanz son fason panse. I ti konmans realize ki Zeova i kapab servi li menm si i pa koz sa langaz byen. Mary i dir: “Bann laverite ki dan Labib i senp e i sanmenm sa bann laverite ki kapab sanz lavi dimoun.”

16. Kwa ki kapab ed bann ki pa kapab kit zot lakour pour ganny lafors?

 ¹⁶ Zeova i vwar e i apresye ki serten parmi nou i anvi anons sa bon nouvel me nou pa kapab kit nou lakour. Alor i donn sa loportinite pour anons sa bon nouvel avek bann ki pran swen avek nou ouswa avek bann dokter ek ners. Si nou konpar sa ki nou pe fer la konmela avek sa ki nou ti fer dan lepase petet nou pou dekouraze. Me si nou vwar lafason ki Zeova pe ed nou la konmela, nou pou ganny sa lafors ki nou bezwen pour fer fas avek nou bann problenm avek lazwa.

17. Dapre Eklezyast 11:6, akoz nou devret kontinyen fer predikasyon menm si nou pa vwar rezilta deswit?

¹⁷ Nou pa konnen ki lagrenn laverite ki nou plante ki kapab pran rasin e konmans pouse. (Lir Eklezyast 11:6.) Par egzanp, en ser ki apel Barbara e ki dan son 80 an, i souvan fer predikasyon par telefonn e atraver let. Dan enn son bann let i ti met Latour Veyer le 1 Me 2014, avek lartik “Sa ki Bondye in fer pour ou.” I pa ti konnen ki i ti’n anvoy sa let pour en koup ki ti nepli Temwen Zeova. Sa koup ti lir sa magazin plizyer fwa. Sa msye ti santi konmsi Zeova ti pe koz avek li direkteman. Sa koup ti konmans asiste renyon. Apre ki zot ti’n kit laverite pour plis ki 27 an, zot ti revin Temwen Zeova. Barbara ti vreman ganny ankouraze pour vwar bann bon rezilta ki sa let ti’n anmennen.

18. Ki nou devret fer pour nou ganny lafors sorti kot Bondye?

¹⁸ Zeova i donn nou bokou keksoz ki kapab donn nou lafors. Parey lapriyer, Labib, nou bann frer ek ser ek sa travay predikasyon. Ler nou servi sa bann keksoz ki Zeova in donn nou, nou montre ki nou annan konfyans ki Zeova i anvi ed nou e i kapab fer li. Alor nou devret toultan annan konfyans dan nou Papa ki dan lesyel ki kontan pour “donn son lafors tou bann ki servi li avek tou zot leker.”​—2 Kron. 16:9.