1. Ki mannyer Labib i dekrir vre lanmour?

 LANMOUR i “parey en laflanm dife, laflanm sorti kot Ya. En ta delo pa kapab tenny lanmour, menm bann larivyer pa pou kapab trenn li.” b (Sal. 8:6, 7) Sa i en zoli fason pour dekrir vre lanmour! Sa bann parol i kapab ankouraz bann koup ki’n marye. I montre ki zot kapab annan sa vre lanmour pour kanmarad.

2. Ki en koup i bezwen fer pour fer sir ki zot lanmour pa refrwadir?

² Pour en koup kapab kontan kanmarad tou dilon zot lavi, zot bezwen fer zefor. Annou vwar en legzanp. Pour en dife kapab kontinyen brile, en dimoun i bezwen kontinyen met dibwa ladan. Si i pa fer sa, avek letan sa dife pour tennyen. Pareyman, sa lanmour ant en msye ek son madanm i kapab kontinyen reste for si zot kontinyen fer zot relasyon vin pli for. Parfwa en koup i kapab santi ki zot lanmour pe refrwadir sirtou ler zot annan problenm larzan, problenm lasante oubyen ler zot pe fer grandi zot zanfan. Alor si ou’n marye, ki mannyer ou kapab kontinyen gard sa “laflanm sorti kot Ya” brile dan ou maryaz? Dan sa lartik, nou pou vwar trwa fason ki bann koup marye i kapab kontinyen fer zot relasyon vin pli for e annan en lavi maryaz ki ere. c

3. Ki mannyer ler en koup i annan en bon lanmitye avek Zeova, sa i ed zot pour kontinyen kontan kanmarad? (Eklezyast 4:12) (Vwar portre.)

³ Pour en koup kontinyen gard sa “laflanm sorti kot Ya” brile, zot tou le de zot bezwen fer zefor pour annan en bon lanmitye avek Zeova. Ki mannyer sa i kapab ed zot dan  zot maryaz? Ler en koup i apresye zot lanmitye avek zot Papa ki dan lesyel, zot pou kontan pour aplik son bann konsey. Sa pou ed zot pour evit e sirmont bann problenm ki kapab fer zot lanmour pour kanmarad refrwadir. (Lir Eklezyast 4:12.) Ler en koup i annan en bon lanmitye avek Zeova, zot pou fer zot mye pour swiv son legzanp e zot pou devlop bann kalite ki Zeova i annan parey labonte, pasyans e zot pou pare pour pardonnen. (Efe. 4:32–5:1) Ler en koup i demontre sa bann kalite, sa pou fer li pli fasil pour zot kontan kanmarad plis. En ser ki apel Lena, ki’n marye pour plis ki 25 an, i dir: “I fasil pour kontan e annan respe pour en dimoun ki annan en bon lanmitye avek Zeova.”

4. Akoz Zeova ti swazir Zozef ek Mari pour vin paran Mesi?

⁴ Annou vwar en legzanp dan Labib. Ler Zeova ti swazir en koup pour vin paran Mesi, I ti swazir Zozef ek Mari parmi tou bann desandans David. Akoz? Zot tou le de zot ti annan zot prop lanmitye avek Zeova e Zeova ti konnen ki zot ti pou met li premye dan zot maryaz. Bann koup marye, ki zot kapab aprann avek legzanp Zozef e avek legzanp Mari?

5. Ki bann msye marye i kapab aprann avek legzanp Zozef?

⁵ Zozef ti pare pour aplik bann lenstriksyon Zeova e sa ti fer li en pli bon msye. Dan omwen trwa fwa, i ti ganny bann lenstriksyon sorti kot Bondye konsernan son fanmir. Sak fwa i ti ganny lenstriksyon, i ti obei vitman menm ler i ti bezwen fer bann gran sanzman. (Mat. 1:20, 24; 2:13-15, 19-21) Ler Zozef ti swiv lenstriksyon Bondye, Zozef ti protez Mari e pran swen avek Mari. Imazinen ki mannyer sa ki Zozef ti fer, ti fer Mari kontan li e annan plis respe pour li. Bann msye marye, ou kapab swiv legzanp Zozef par rod konsey dan Labib lo ki mannyer pour pran swen avek ou fanmir. d Ler ou aplik sa konsey menm si sa i vedir ou bezwen fer bann sanzman, ou montre ki ou kontan ou madanm e ou fer ou maryaz vin pli for. En ser ki reste Vanuatu, ki’n marye pour plis ki 20 an, i dir: “Ler mon msye i rod gidans Zeova e i aplik li, sa i fer mwan annan plis respe pour li. Mon santi mwan an sekirite e mon annan konfyans ki i pou fer bann bon desizyon.”

6. Ki bann madanm marye i kapab aprann avek legzanp Mari?

⁶ Mari ti annan son prop lanmitye avek Zeova. Son lafwa pa ti depan lo sa ki Zozef ti fer. I ti konn byen Lekritir. (Vwar not letid dan nwtsty dan Lik 1:46.) I ti osi pran letan pour medite. (Lik 2:19, 51) Nou kapab asire ki sa lanmitye ki Mari ti annan avek Zeova ti fer li en bon  madanm. Ozordi, en kantite madanm i fer zefor pour swiv legzanp Mari. Par egzanp, en ser ki apel Emiko i dir: “Ler mon ti selibater, mon ti annan mon progranm pour fer mon bann aktivite spirityel. Apre ki mon ti’n marye, mon msye ki ti priy pour nou e diriz ladorasyon fanmir. Mon ti realize ki mon ti pe konmans depan lo li pour fer sa bann keksoz pour mwan. Mon ti osi realize ki mwan ki ti pou bezwen gard mon lanmitye avek Zeova for. Alor, aprezan mon met letan dekote pour mwan pas letan avek mon Bondye mwan tousel. Mon priye, lir Labib e medit lo fason panse Bondye.” (Gal. 6:5) Bann madanm marye, ler ou kontinyen annan en bon lanmitye avek Zeova, ou msye pou annan plis rezon pour felisit ou e kontan ou.​—Prov. 31:30.

7. Ki bann koup marye i kapab aprann konsernan ador Zeova ansanm avek legzanp Zozef ek Mari?

⁷ Zozef ek Mari ti osi travay ansanm pour gard zot lanmitye avek Zeova for. Zot ti konpran ki i enportan pour ador Zeova ansanm konman en fanmir. (Lik 2:22-24, 41; 4:16) Me i ti kapab difisil pour zot fer sa espesyalman ler zot ti annan plis zanfan. Me zot ti kapab fer li. Sa i en bon legzanp pour bann koup ki’n marye! Si parey Zozef ek Mari, ou annan zanfan, i kapab ki i difisil pour asiste renyon oubyen pour fer ladorasyon fanmir. I kapab pli difisil pour trouv letan pour etidye oubyen priye konman en koup. Me gard antet ki ler zot ador Zeova ansanm, zot vin pli pros avek Zeova e zot vin pli pros avek kanmarad. Alor fer zot ladorasyon vin en priyorite.

8. Ki mannyer ladorasyon fanmir i kapab ed en koup ki annan problenm dan zot maryaz?

⁸ Ki ou kapab fer si i annan problenm dan ou maryaz? I kapab ki ou pa anvi fer ladorasyon fanmir ansanm. Alor petet zot kapab etidye en keksoz ki pa tro long, ki agreab e ki zot tou le de zot in dakor pour koz lo la. Sa i kapab ed zot pour kontan kanmarad plis e pour anvi ador Zeova ansanm.

9. Akoz en msye ek son madanm i bezwen pas letan avek kanmarad?

⁹ Bann koup marye, pour zot kapab kontinyen kontan kanmarad, zot bezwen pas letan ansanm. Ler zot fer sa, sa pou ed zot pour pa elwannyen avek kanmarad. Zot pou osi konnen ki zot konzwen pe mazinen e ki mannyer i santi. (Zen. 2:24) Remark sa ki Lilia ek Ruslan ti realize pa bokou letan apre ki zot ti’n marye plis ki 15 an pase. Lilia i dir: “Nou ti realize ki nou ti napa sa kantite letan pour pas avek kanmarad parey nou ti’n mazinen. Nou ti bizi avek nou travay, louvraz kot lakour e pli tar nou zanfan. Nou ti realize ki si nou pa ti fer letan pour pas letan avek kanmarad konman en koup, nou ti riske elwannyen avek kanmarad.”

10. Ki mannyer bann koup marye i kapab aplik sa prensip ki dan Efezyen 5:15, 16?

¹⁰ Ki en koup i kapab fer pour fer sir ki zot pas letan ansanm? Petet zot pou bezwen plàn oubyen met letan dekote pour pas letan ansanm. (Lir Efezyen 5:15, 16.) En frer ki reste Nizerya ki apel Uzondu i dir: “Ler mon pe fer mon progranm, mon enkli sa letan ki mwan avek mon madanm nou pou pase ansanm konman en koup e mon fer sa letan en priyorite.” (Fili. 1:10) Annou vwar ki mannyer Anastasia, madanm en sirveyan rezyonal ki sorti Moldova, ti servi byen son letan. I dir: “Mon esey fer mon bann keksoz ki mon bezwen fer ler mon msye i bizi pe desarz son bann  responsabilite. Koumsa, nou kapab pas letan ansanm pli tar.” Me ki zot pou fer si zot sitan annan keksoz pour fer ki zot vwar li difisil pour trouv letan pour pas letan ansanm?

11. Ki bann aktivite Akila ek Prisil ti fer ansanm?

¹¹ Bann koup marye i kapab aprann avek legzanp Akila ek Prisil, en koup marye ki bokou Kretyen dan premye syek ti apresye. (Rom. 16:3, 4) Menm si Labib pa dir bokou keksoz konsernan zot maryaz, Labib i dir ki zot ti travay ansanm, anons sa bon nouvel ansanm e ed lezot ansanm. (Akt 18:2, 3, 24-26) Anfet, sak fwa Labib i koz lo Akila ek Prisil i toultan mansyonn zot de ansanm.

12. Ki en msye ek son madanm i kapab fer pour pas plis letan avek kanmarad? (Vwar portre.)

¹² Ki mannyer en koup marye i kapab swiv legzanp Akila ek Prisil? Mazin lo sa kantite keksoz ki ou ek ou konzwen zot bezwen fer. Eski zot kapab fer serten sa bann keksoz ansanm olye fer sakenn pour li? Par egzanp, Akila ek Prisil ti fer sa travay predikasyon ansanm. Eski zot osi zot fer parey? Akila ek Prisil ti osi travay ansanm. Petet ou ek ou konzwen pa travay dan menm landrwa me eski zot kapab fer bann louvraz kot lakour ansanm? (Ekle. 4:9) Ler zot ed kanmarad pour fer en louvraz, sa i kapab fer zot santi ki zot en lekip e zot annan loportinite pour koz avek kanmarad. Robert ek Linda in marye pour plis ki 50 an. Robert i dir: “Fransman, nou napa letan pour detann ansanm. Me ler mon lav zafer sal e mon madanm i eswiye oubyen ler i vin avek mwan pour travay dan zarden, sa i fer mwan vreman kontan. Ler nou fer keksoz ansanm, sa i fer nou vin pli pros avek kanmarad. Nou lanmour i kontinyen vin pli for.”

13. Ki en msye ek son madanm i devret fer pour zot vin pli pros avek kanmarad?

¹³ I pa akoz en msye ek son madanm i pas letan avek kanmarad, ki sa i vedir ki zot pou vin pli pros avek kanmarad. En madanm marye ki reste Brezil, i dir: “Konmela, i annan sitan en kantite keksoz ki kapab distrer nou ki nou kapab fasilman krwar ki nou pe pas letan ansanm zis akoz nou reste dan menm lakaz. Mon’n aprann ki nou bezwen fer plis ki zis viv ansanm. Mon osi bezwen donn mon konzwen sa latansyon ki i bezwen.” Annou vwar ki mannyer Bruno ek son madanm, Tays ti fer sir ki zot donn kanmarad sa latansyon ki zot bezwen. Bruno i dir: “Ler nou pas letan ansanm, nou met nou telefonn laba e nou zis apresye sa moman ansanm.”

14. Ki en koup i kapab fer si zot pa kontan pas letan avek kanmarad?

¹⁴ Me ki ou pou fer si ou ek ou konzwen zot pa kontan pas letan ansanm? Petet sa  i akoz zot pa enterese dan menm keksoz oubyen zot irit kanmarad. Annou vwar legzanp sa dife, ki’n ganny mansyonnen pli boner. O konmansman, sa dife i en pti dife. Anmezir ki sa dife i brile, ou bezwen azout bann pli gro bout dibwa. Pareyman, akoz zot pa konmans par pas bann pti moman ansanm toulezour? Fer sir ki zot fer en keksoz ki zot tou le de zot pou kontan e pa en keksoz ki pou fer enn ant zot ankoler. (Zak 3:18) Ler zot konmans par fer bann pti keksoz, sa i kapab fer zot lanmour pour kanmarad vin for parey avan.

15. Akoz i enportan pour en koup annan respe pour kanmarad?

¹⁵ Dan en maryaz, i enportan ki sa msye ek son madanm i annan respe pour kanmarad. Respe i parey sa loksizenn ki kontinyen fer sa dife brile. Si napa loksizenn, en dife pou tenny vitman. Pareyman, si napa respe dan en maryaz, sa lanmour ki annan ant sa koup i kapab refrwadir vitman. Ler en msye ek son madanm i demontre respe anver kanmarad, zot pe osi fer zefor pour kontinyen annan lanmour antre zot. Me gard antet ki sa ki pli enportan i pa ki ou santi ki ou pe demontre respe, me ki ou konzwen i santi ki ou annan respe pour li. Penny ek Aret in marye pour plis ki 25 an. Penny i dir: “Vi ki nou annan respe pour kanmarad, nou lakour i ranpli avek lanmour. Nou santi nou alez pour koze parski nou konnen ki nou apresye lopinyon kanmarad.” Alor ki ou kapab fer pour fer ou konzwen santi ki ou annan respe pour li? Annou vwar legzanp Abraam ek Sara.

16. Ki bann msye marye i kapab aprann avek legzanp Abraam? (1 Pyer 3:7) (Vwar portre.)

¹⁶ Abraam ti tret Sara avek respe. I ti ekout Sara e i ti pran kont santiman Sara. En fwa, Sara ti ankoler e i ti koz avek Abraam lo son santiman. I ti menm blanm Abraam pour sa sityasyon. Eski Abraam ti ankoler e mal koz avek Sara? Non. I ti konnen ki Sara ti en madanm ki ti soumet e ki ti toultan siport li dan son bann desizyon. Abraam ti ekout Sara e i ti esey rezourd sa problenm. (Zen. 16:5, 6) Ki nou kapab aprann? Bann msye marye, ou annan sa lotorite pour fer bann desizyon pour ou fanmir. (1 Kor. 11:3) Kantmenm sa, ou kapab demontre lanmour anver ou madanm par pran kont son lopinyon avan ou pran en desizyon, sirtou si sa desizyon pou annan en lefe lo ou madanm. (1 Kor. 13:4, 5) I annan letan kot ou madanm i kapab santi li strese e i kapab ki i bezwen koz lo son santiman. Eski ou demontre respe pour li par ekout li byen ler i pe eksprim son santiman? (Lir 1 Pyer 3:7.) Angela ek Dmitry in marye pour preski 30 an. Angela  i eksplike ki mannyer son msye i fer li santi ki i annan respe pour li. I dir: “Dmitry i toultan pare pour ekout mwan ler mon ankoler oubyen ler mon zis anvi koze. I annan pasyans avek mwan menm ler mon pa kapab eksprim mon santiman dan en fason kalm.”

17. Ki bann madanm marye i kapab aprann avek legzanp Sara? (1 Pyer 3:5, 6)

¹⁷ Sara ti demontre respe pour Abraam par siport li dan son bann desizyon. (Zen. 12:5) En fwa, Abraam ti deside pour demontre lospitalite anver bann viziter ki ti’n arive san ekspekte. I ti demann Sara pour aret fer tou sa ki i ti pe fer e prepar en kantite dipen. (Zen. 18:6) Sara ti azir vitman e i ti fer sa ki Abraam ti’n demann li pour fer. Bann madanm marye, ou kapab swiv legzanp Sara par siport bann desizyon ki ou msye i fer. Ler ou fer sa, ou fer ou maryaz vin pli for. (Lir 1 Pyer 3:5, 6.) Dmitry, ki’n ganny mansyonnen dan sa paragraf avan i eksplike ki mannyer son madanm i fer li santi ki i annan respe pour li. Dmitry i dir: “Mon apresye zefor ki Angela i fer pour siport mon bann desizyon menm ler nou lopinyon i diferan. Si apre sa, keksoz pa mars byen, i pa kritik mwan.” I vreman fasil pour kontan en dimoun ki annan respe pour ou!

18. Ki byenfe bann koup i gannyen ler zot kontinyen fer zefor pour annan lanmour antre zot?

¹⁸ Satan i anvi ki bann msye ek madanm marye i aret kontan kanmarad. I konnen ki si en koup i aret kontan kanmarad, zot kapab konmans elwannyen avek Zeova. Me vre lanmour i dire pour touzour! Alor ki sa lanmour ki i annan dan ou maryaz, i parey sa lanmour ki ganny dekrir dan Kantik Salomon. Ou bezwen determinen pour met Zeova premye dan ou maryaz, fer letan pour kanmarad e annan respe pour kanmarad par pran kont santiman ek bezwen kanmarad. Ler ou fer sa, ou maryaz pou anmenn loner pour Zeova, ki sours vre lanmour e zis parey en dife ki pe ganny byen mentenir, ou lanmour pou reste for tou dilon ou lavi.