LARTIK LETID 22
Kontinyen mars lo sa “Semen Sen”
“I pou annan en gran semen laba, . . . ki pou ganny apele Semen Sen.”—IZA. 35:8.
KANTIK 31 Mars avek Bondye
SA KI NOU POU ETIDYE a
1-2. Ki desizyon enportan bann Zwif ki ti reste Babilonn ti bezwen fer? (Ezra 1:2-4)
LERWA ti’n fer en lanons! Bann Zwif ki ti an egzil Babilonn pour apepre 70 an, ti lib pour retourn dan zot pei Izrael. (Lir Ezra 1:2-4.) Zis Zeova ki ti’n kapab fer en keksoz koumsa! Akoz nou dir sa? Parski normalman Babilonn pa ti larg son prizonnyen. (Iza. 14:4, 17) Me i ti annan en pei ki ti’n ranport laviktwar lo Babilonn e sa nouvo lerwa ti dir bann Zwif ki zot ti kapab kit sa pei. Sa ti fer ki tou Zwif, sirtou bann sef fanmir, ti bezwen deside si zot ti pou kit Babilonn oubyen si zot ti pou reste Babilonn. I kapab ki sa pa ti en desizyon fasil pour fer. Akoz sa?
2 I kapab ki serten ti tro vye pour fer sa gran vwayaz pour retourn Izrael. Vi ki laplipar bann Zwif ti’n ne Babilonn, zot pa ti’n zanmen reste okenn landrwa apard Babilonn. Pour zot, Izrael ti pei zot bann zanset. I paret ki serten Zwif ti’n vin ris ler zot ti Babilonn. Alor i kapab ki zot ti vwar li difisil pour kit zot lakour ki ti konfortab oubyen zot biznes, pour al reste dan en landrwa ki zot pa ti konnen.
3. Ki benediksyon Zeova ti pou donn bann Zwif ki ti pou retourn Izrael?
3 Bann Zwif fidel ti konnen ki zot ti pou ganny bokou byenfe si zot retourn Izrael. Sa bann byenfe ti pou bokou plis ki okenn sakrifis ki zot ti pou fer. Sa pli gran byenfe ti annan pour fer avek zot ladorasyon. Menm si dan lavil Babilonn i ti annan plis ki 50 tanp bann fo Bondye, i ti napa en tanp pour Zeova. I ti napa en lotel pour bann Izraelit ofer bann sakrifis ki Lalwa Moiz ti demann zot pour fer e i ti napa bann pret pour ofer sa bann sakrifis. Osi, dan sa lavil, i ti annan bokou plis dimoun ki ti ador bann fo Bondye ki bann ki ti annan respe pour Zeova e pour Son bann standar. Alor, sa plizyer milye Zwif ki ti kontan Zeova ti vreman anvi retourn dan zot pei pour reetabli vre ladorasyon.
4. Ki led Zeova ti promet pour donn bann Zwif ki ti pe retourn Izrael?
4 Sa vwayaz sorti Babilonn pour al Izrael ti difisil e i kapab ki i ti pou pran apepre kat mwan. Me Zeova ti promet ki i ti pou tir okenn lobstak ki ti pou anpes zot retourn Izrael. Profet Izai ti dir: “Prepar semen Zeova! Fer en gran semen drwat atraver dezer pour nou Bondye. . . . Later ki annan bann bos i devret vin plat, sa teren ki annan bann ros i devret vin en laplenn.” (Iza. 40:3, 4) Zis imazin sa: I annan en gran semen atraver dezer e i annan en landrwa plat ant bann montanny. Dimoun ti pou vreman kontan pour mars lo sa semen. Dan plas mont bann montanny oubyen desann dan bann vale, i ti pou pli fasil pour zot vwayaz dan sa gran semen drwat. Sa ti pou osi fer zot ariv kot zot destinasyon pli vit.
5. Ki mannyer sa gran semen senbolik ant Babilonn ek Izrael ti apele?
5 Ozordi bann gran semen i annan en non oubyen en nimero. Sa gran semen senbolik ki Izai ti koz lo la, ti osi annan en non. Izai i dir: “I pou annan en gran semen laba, wi, en semen ki pou ganny apele Semen Sen. Sa enn ki enpir pa pou mars lo sa semen.” (Iza. 35:8) Ki sa promes ti vedir pour bann Izraelit sa letan e ki i vedir pour nou ozordi?
KI SA “SEMEN SEN” TI VEDIR POUR BANN ZWIF E KI I VEDIR OZORDI?
6. Akoz Labib i dir ki sa semen i sen?
6 Sa gran semen ti apel “Semen Sen.” Pa sa i en zoli non! Me akoz Labib i dir ki sa semen i sen? “Sa enn ki enpir,” setadir bann Zwif ki ti komet imoralite, ki ti ador zidol oubyen fer lezot pese grav, pa ti pou kapab reste Izrael. Bann Zwif ki ti pe retourn Izrael ti pou vin “en pep sen” pour zot Bondye. (Det. 7:6) Me sa pa ti vedir ki bann ki ti kit Babilonn pa ti pou bezwen fer bann sanzman pour fer plezir Zeova.
7. Ki sanzman serten Zwif ti bezwen fer? Donn en legzanp.
7 Parey nou’n vwar pli boner, laplipar Zwif ti’n ne an Babilonn e i paret ki en kantite zot ti’n abitye avek fason panse ek standar bann Babilonnyen. Plizyer lannen apre ki sa premye group Zwif ti’n retourn Izrael, Ezra ti aprann ki serten Zwif ti’n marye avek bann madanm ki pa servi Zeova. (Egz. 34:15, 16; Ezra 9:1, 2) En pe letan apre sa, Gouverner Neemya ti sirprann pour aprann ki bann zanfan ki ti’n ne Izrael pa ti konn koz langaz bann Zwif. (Det. 6:6, 7; Nee. 13:23, 24) Ki mannyer sa bann zanfan ti pou kapab kontan Zeova e ador li si zot pa konpran Ebre, ki ti sa langaz prensipal ki Parol Bondye ti’n ganny ekrir ladan? (Ezra 10:3, 44) Alor sa bann Zwif ti pou bezwen fer bann gran sanzman. Me i ti pou pli fasil pour zot fer sa bann sanzman Izrael kot vre ladorasyon ti pe ptitapti ganny reetablir.—Nee. 8:8, 9.
Depi 1919, plizyer milyon msye, madanm ek zanfan in kit Gran Babilonn e zot in konmans mars lo sa “Semen Sen” (Vwar paragraf 8)
8. Akoz bann keksoz ki’n arive lontan pase i devret enteres nou ozordi? (Vwar portre lo kouvertir.)
8 Serten i kapab mazinen, ‘Sa i enteresan me eski sa ki ti arive avek bann Zwif lontan pase, i vedir en keksoz pour nou?’ Wi, parski dan en sans, nou osi nou pe mars lo sa “Semen Sen.” Ki swa nou en Kretyen swazir oubyen nou form parti “lezot mouton,” nou tou nou bezwen reste lo sa “Semen Sen.” b (Zan 10:16) Sa pou ed nou pour kontinyen servi Zeova la konmela e dan lavenir ler Rwayonm Bondye pou anmenn bann benediksyon pour later. Depi 1919, plizyer milyon msye, madanm ek zanfan in kit Gran Babilonn, setadir tou fo larelizyon e zot in konmans mars lo sa gran semen senbolik. I tre probab ou enn parmi sa bann dimoun. Menm si sa semen ti ouver apepre 100 an pase, i annan dimoun ki ti konmans prepar sa semen plizyer lannen avan sa.
ZOT TI PREPAR SA SEMEN
9. Dapre Izai 57:14, ki mannyer sa “Semen Sen” ti ganny prepare?
9 Ler bann Zwif ti kit Babilonn, Zeova ti fer sir ki tou lobstak i ganny tire dan zot semen. (Lir Izai 57:14.) Me eski i annan en “Semen Sen” dan nou letan? Pour plizyer santenn lannen avan 1919, Zeova ti servi bann zonm ki ti annan en gran respe pour li pour prepar semen pour ki bann dimoun i kapab sorti dan Gran Babilonn. (Konpar Izai 40:3.) Zot ti prepare pour ki pli tar bann dimoun senser i kapab kit fo larelizyon e ador Zeova ansanm avek Son pep. Ki mannyer zot ti prepare? Annou vwar serten keksoz ki zot ti fer.
Pour plizyer lannen, bann zonm ki ti annan gran respe pour Bondye ti ede prepar semen pour dimoun kapab sorti dan Gran Babilonn (Vwar paragraf 10-11)
10-11. Ki mannyer bann masin pour enprimen ek sa travay pour tradwir Labib in ed dimoun konn sa ki Labib i ansennyen? (Vwar portre.)
10 Bann masin pour enprimen. Avan lannen 1450, Labib ti ganny kopye avek lanmen. I ti pran letan pour fer sa e bann kopi Labib ti rar e vreman ser. Ler en masin pour enprimen ti ganny envante e zot ti servi sa masin pour enprim Labib, i ti pli fasil pour fer plis kopi Labib e distribye avek bann dimoun.
11 Bann diferan tradiksyon Labib. Pour plizyer santenn lannen, Labib ti disponib prensipalman dan langaz Laten e zis bann dimoun ki ti byen edike ki ti kapab konpran sa langaz. Me ler dimoun ti konmans servi masin enprimen plis, bann zonm ki ti annan en gran respe pour Bondye ti fer plis zefor pour tradwir Labib dan bann langaz ki laplipar dimoun ti koze. Sa ti fer ki bann dimoun ki ti lir Labib ti kapab konpar sa ki bann sef larelizyon ti pe ansennyen avek sa ki Labib i vreman dir.
Bann zonm ki ti annan gran respe pour Bondye ti ede prepar semen pour dimoun kapab sorti dan Gran Babilonn (Vwar paragraf 12-14) c
12-13. Apartir lannen 1835, ki mannyer bann dimoun ki ti pran letan pour etidye Labib ti montre ki bann legliz ti pe ansenny bann mansonz? Donn en legzanp.
12 Bann piblikasyon ki ed dimoun pour etidye Labib. Bann dimoun ki ti pran letan pour etidye Labib ti aprann en kantite ler zot ti lir Parol Bondye. Bann sef larelizyon ti ankoler ler sa bann dimoun ti konmans koz avek lezot konsernan sa ki zot in aprann dan Labib. Par egzanp, apartir 1835, serten zonm senser ti konmans pibliy bann trak ki ti montre ki bann legliz ti pe ansenny bann mansonz.
13 Ver lannen 1835, Henry Grew, en zonm ki ti annan en gran respe pour Bondye, ti pibliy en trak konsernan sa ki arive avek en dimoun ler i mor. I ti servi Labib pour montre ki en dimoun i vin imortel si Bondye i fer li vin imortel e ki dimoun pa ne avek en nanm imortel parey laplipar legliz ti ansennyen. An 1837, en pret ki ti apel George Storrs ti trouv en kopi sa trak ler i ti pe vwayaze dan en tren. I ti lir sa trak e i ti konvenki ki i ti’n trouv en laverite enportan. I ti deside pour koz avek lezot lo sa ki i ti’n aprann. An 1842, i ti fer plizyer diskour lo sa topik “An Inquiry—Are the Wicked Immortal?” (Eski bann move dimoun i imortel?) Sa ki George Storrs ti ekri ti annan en bon lenfliyans lo en garson ki ti apel Charles Taze Russell.
14. Ki byenfe Frer Russell ek son bann zanmi ti gannyen avek bann preparasyon ki ti’n ganny fer dan lepase? (Vwar portre.)
14 Ki byenfe Frer Russell ek son bann zanmi ti gannyen avek bann preparasyon ki ti’n ganny fer dan lepase? Zot ti etidye bann leksik, concordances ek plizyer tradiksyon Labib ki ti’n ganny prepare avan ki zot konmans zot travay. Zot ti osi benefisye avek resers ki bann zonm parey Henry Grew, George Storrs ek lezot ti fer. Frer Russell ek son bann zanmi ti osi ede pour prepar sa semen par pibliy plizyer liv ek trak ki koz lo sa ki Labib i dir.
15. Ki keksoz enportan ki ti arive an 1919?
15 An 1919, pep Bondye ti sorti anba kontrol Gran Babilonn. Sa menm lannen, en “lesklav fidel e pridan” ti konmans travay pour ki bann dimoun senser i kapab konmans mars lo sa “Semen Sen.” (Mat. 24:45-47) Sa travay ki bann dimoun dan lepase ti fer pour prepar sa semen, in ed bann dimoun ki’n konmans mars lo sa gran semen pour aprann konsernan Zeova ek Son plan pour bann imen. (Prov. 4:18) Zot ti kapab viv dan sa fason ki Zeova i anvi. Zeova pa ekspekte ki son pep i fer bann sanzman neseser en sel kou. O kontrer, in rafin son pep ptitapti. (Vwar sa bwat “ Zeova i rafin son pep ptitapti.”) Nou tou nou pou vreman kontan ler nou pou kapab fer Zeova plezir dan tou sa ki nou fer.—Kol. 1:10.
SA “SEMEN SEN” I ANKOR OUVER
16. Depi 1919, ki travay ki’n ganny fer lo sa “Semen Sen”? (Izai 48:17; 60:17)
16 Tou semen i bezwen ganny mentenir regilyerman pour ki i kapab reste dan en bon kondisyon. Depi 1919, travay in kontinyen ganny fer lo sa “Semen Sen” pour ki plis dimoun i kapab kit Gran Babilonn. Sa lesklav fidel e pridan ki ti’n fek ganny apwente ti konmans travay e an 1921, zot ti pibliy en piblikasyon baze lo Labib pour ed dimoun konmans etidye Labib. Sa piblikasyon ti apel The Harp of God. Avek letan, apepre sis milyon kopi ti ganny distribye dan 36 langaz e en kantite dimoun ti aprann laverite avek sa piblikasyon. Tou dernyenman nou’n ganny en nouvo piblikasyon pour kondwir bann letid Labib. Sa i liv Viv ere pour touzour! Pandan bann dernyen zour, Zeova in servi son lorganizasyon pour kontinyen donn nou bann lenstriksyon sorti dan son Parol pour ed nou tou pour kontinyen mars lo sa “Semen Sen.”—Lir Izai 48:17; 60:17.
17-18. Kote sa “Semen Sen” pou anmenn nou?
17 Ler en dimoun i aksepte pour etidye Labib, nou kapab dir ki sa dimoun i annan en loportinite pour mars lo sa “Semen Sen.” Serten pa ariv tro lwen e apre zot kit sa semen. Lezot i determinen pour kontinyen mars lo sa semen ziska ler zot ariv kot zot destinasyon. Ki sa destinasyon?
18 Pour bann ki annan sa lespwar pour viv dan lesyel, sa “Semen Sen” i anmenn zot ver “paradi Bondye” ki dan lesyel. (Rev. 2:7) Pour bann ki annan sa lespwar pour viv pour touzour lo later, sa gran semen pou anmenn zot ver lafen Renny Mil an Kris, sa letan ler tou dimoun pou vin parfe. Si ou deza pe mars lo sa gran semen, pa konsantre lo bann keksoz ki ou’n kit deryer. Pa bezwen kit sa semen ziska ki ou ariv kot ou destinasyon, setadir dan nouvo lemonn. Nou swet ou en bon vwayaz!
KANTIK 24 Vin kot montanny Zeova
a Zeova ti apel sa gran semen sorti Babilonn pour al Izrael, sa “Semen Sen.” Sa ti en semen senbolik. Eski Zeova in fer en keksoz en pe parey pour son pep dan nou letan? Wi! Depi 1919, plizyer milyon dimoun in kit Gran Babilonn e zot in konmans mars lo sa “Semen Sen.” Nou tou nou bezwen reste lo sa semen ziska ki nou ariv nou destinasyon.
b Vwar liv Isaiah’s Prophecy—Light for All Mankind II, paz 56-57 an Angle.
c LEKSPLIKASYON PORTRE: Frer Russell ek son bann zanmi ti servi bann piblikasyon ki ti’n ganny prepare avan ki zot, zot konmans etidye Labib.