1. Ki difikilte en kantite parmi nou i fer fas avek?

 ESKI ou’n deza met en lobzektif spirityel e ou vwar li difisil pour atenn sa lobzektif? b Si wi, ou pa tousel parski bokou dimoun i santi koumsa. Par egzanp, Philip ti anvi priy pli souvan e amelyor son lapriyer. Me i ti vwar li difisil pour trouv letan pour priye. Erika ti annan sa lobzektif pour ariv aler pour renyon predikasyon. Me kantmenm sa, i ti kontinyen ariv tar pour preski tou renyon predikasyon. Tomáš ti esey lir Labib antye plizyer fwa. I dir: “Mon pa ti kontan lir Labib. Mon ti eseye trwa fwa me sak fwa mon ti lir ziska Levitik apre mon ti arete.”

2. Akoz nou pa devret dekouraze si i annan en lobzektif spirityel ki nou pa ankor atenn?

² Si i annan en lobzektif ki ziska aprezan ou pa ankor atenn, pa dekouraze. I demann zefor ek letan pour atenn en senp pti lobzektif. Lefet ki ou ankor anvi atenn ou lobzektif i montre ki ou lanmitye avek Zeova i presye pour ou e ou anvi donn Zeova ou meyer. Zeova i apresye ou bann zefor. Me i pa ekspekte ki ou fer plis ki sa ki ou kapab. (Ps. 103:14; Mik. 6:8) Alor, ler ou met en lobzektif fer sir ki ou kapab atenn sa lobzektif. Apre ki ou’n met en lobzektif, ki ou kapab fer pour atenn sa lobzektif? Annou vwar serten sizesyon.

3. Akoz i enportan pour ou annan sa dezir pour atenn ou lobzektif?

³ I enportan ki ou annan sa dezir pour atenn ou lobzektif spirityel. Ler ou annan sa dezir pour atenn ou lobzektif, ou pou travay dir pour atenn sa lobzektif. Sa dezir ki nou  annan pour atenn nou lobzektif i parey sa divan ki pous en bato lavwal ver son destinasyon. Si sa divan i kontinyen soufle, i tre probab ki sa maren pou ariv son destinasyon. Si divan i for, i kapab ki i pou ariv dan son destinasyon pli vit. Pareyman si nou vreman anvi atenn nou lobzektif, i tre probab ki nou pou kapab fer li. En frer ki apel David ki reste El Salvador i dir: “Ler ou vreman anvi atenn en lobzektif, ou fer bokou zefor pour atenn sa lobzektif. Ou pa les nanryen anpes ou fer sa.” Alor ki ou kapab fer pour annan sa dezir pour atenn ou lobzektif?

4. Ki nou kapab priy lo la? (Filipyen 2:13) (Vwar portre.)

⁴ Demann Zeova pour donn ou sa dezir pour atenn ou lobzektif. Zeova i kapab servi son lespri sen pour donn ou sa dezir pour atenn ou lobzektif. (Lir Filipyen 2:13.) Parfwa nou met en lobzektif parski nou konnen ki nou devret fer sa keksoz e ki i en bon keksoz pour nou fer. Me i kapab ki nou pa vreman anvi atenn sa lobzektif. Sanmenm sa ki ti arive avek en ser ki apel Norina ki reste Uganda. I ti met sa lobzektif pour kondwir en letid Labib me i pa ti vreman anvi atenn sa lobzektif parski i ti krwar ki i pa en bon ansenyan. Kwa ki ti ed li? I dir: “Toulezour mon ti demann Zeova pour ed mwan annan sa dezir pour kondwir en letid Labib. An menm tan, mon ti fer zefor pour amelyor mon abilite pour ansennyen. Apre enn de mwan, mon ti remarke ki mon ti pli anvi kondwir en letid Labib. Sa menm lannen, mon ti konmans kondwir de letid Labib.”

5. Ki nou kapab medit lo la ki pou ed nou pour nou anvi atenn nou lobzektif?

⁵ Medit lo sa ki Zeova in fer pour ou. (Ps. 143:5) Zapot Pol ti medit lo labonte ekstraordiner ki Zeova in demontre anver li e sa ti motiv li pour travay dir pour Zeova. (1 Kor. 15:9, 10; 1 Tim. 1:12-14) Pareyman, si ou kontinyen medit lo sa ki Zeova in fer pour ou, ou pou pli anvi atenn ou lobzektif. (Ps. 116:12) Annou vwar kwa ki ti ed en ser ki ti reste Honduras pour atenn son lobzektif pour vin en pionye ordiner. I dir: “Mon ti reflesir lo ki kantite Zeova i kontan mwan. I’n fer mwan konn son pep. I pran swen avek mwan e i protez mwan. Ler mon ti reflesir lo sa, mon lanmour pour Zeova ti vin pli for e mon ti fer plis zefor pour fer pionye.”

6. Kwa ankor ki kapab ed nou pour anvi atenn nou lobzektif?

⁶ Konsantre lo bann byenfe ki ou pou gannyen ler ou atenn ou lobzektif. Remark sa ki ti ed Erika, ki’n ganny mansyonnen pli boner, pour atenn son lobzektif pour ariv aler pour renyon predikasyon. I dir: “Mon ti realize ki mon ti pe mank en kantite keksoz ler mon ti ariv tar pour renyon predikasyon. Si mon ti ariv boner, mon ti pou kapab koz avek bann frer ek ser e pas letan avek zot. Mon ti pou osi kapab tann bann sizesyon ki ti pou ed mwan pour trouv lazwa dan predikasyon e pour amelyore.”  Erika ti konsantre lo bann byenfe ki i ti pou gannyen ler i ariv boner e sa ti ed li atenn son lobzektif. Ki byenfe ki ou kapab konsantre lo la? Si ou lobzektif i annan pour fer avek ou lektir Labib oubyen lapriyer, medit lo ki mannyer sa lobzektif pou ed ou vin pli pros avek Zeova. (Ps. 145:18, 19) Si ou lobzektif i annan pour fer avek devlop en kalite Kretyen, medit lo ki mannyer sa lobzektif pou amelyor ou lanmitye avek lezot. (Kol. 3:14) Petet ou kapab fer en lalis tou bann rezon akoz ou anvi atenn ou lobzektif. Pas lo sa lalis regilyerman. Tomáš, ki’n ganny mansyonnen pli boner, i dir: “Pli mon annan en kantite rezon pour atenn en lobzektif, pli mon travay dir pour atenn sa lobzektif.”

7. Kwa ki ti ed Julio ek son madanm pour atenn zot lobzektif?

⁷ Pas letan avek bann ki pou ankouraz ou pour atenn ou lobzektif. (Prov. 13:20) Annou vwar sa ki ti ed Julio avek son madanm pour atenn zot lobzektif pour fer plis dan predikasyon. Julio i dir: “Nou ti fer zanmi avek bann dimoun ki ti ankouraz nou pour esey atenn nou lobzektif e nou ti koz lo nou lobzektif avek zot. En kantite parmi zot ti’n atenn en lobzektif en pe parey. Alor zot ti kapab donn nou bann bon sizesyon. Nou bann zanmi ti demann nou ki mannyer nou ti pe pase avek nou lobzektif e zot ti ankouraz nou ler nou ti bezwen lankourazman.”

8. Ki i kapab arive si nou fer zefor pour atenn en lobzektif zis ler nou anvi? (Vwar portre.)

⁸ Nou bezwen rekonnet ki i annan zour kot nou tou nou pa anvi atenn nou lobzektif. Eski sa i vedir ki nou pa kapab fer keksoz pour atenn nou lobzektif? Non. Annou pran en legzanp. Lafors divan i kapab pous en bato lavwal ver son destinasyon. Me lafors divan i sanze e i annan serten zour ki i menm napa divan. Me sa pa vedir ki sa maren pa kapab kontinyen bouze. Par egzanp, serten bato lavwal i annan masin e lezot i annan pagay. Sa maren i kapab servi sa moter oubyen pagay pour li kontinyen bouze ziska son destinasyon. Sa dezir ki nou annan pour atenn nou lobzektif i parey divan. I kapab sanze. I annan zour ki nou pa anvi fer nanryen pour atenn nou lobzektif. Me si ou ti pou fer zefor pour atenn ou lobzektif zis ler ou anvi, ou pa ti pou zanmen atenn sa lobzektif. Zis parey sa maren i trouv lezot fason pour ariv son destinasyon, nou osi nou kapab fer keksoz pour atenn nou lobzektif menm ler nou pa anvi. Byensir sa pa pou fasil. Me ou pou zwaye ler ou atenn ou lobzektif. Avan ki nou vwar serten sizesyon ki kapab ed nou, annou vwar larepons en kestyon ki kapab ganny souleve.

9. Eski nou devret kontinyen fer zefor pour atenn en lobzektif menm si nou pa vreman anvi? Eksplike.

⁹ Zeova i anvi nou servi li avek lazwa e akoz nou anvi. (Ps. 100:2; 2 Kor. 9:7)  Alor, eski nou devret kontinyen fer zefor pour atenn en lobzektif spirityel menm si nou pa anvi? Annou vwar legzanp zapot Pol. I ti dir: “Mon tret mon lekor dir e mon kontrol li parey en lesklav.” (1 Kor. 9:25-27, not letid dan nwtsty dan verse 27) Zapot Pol ti fors son lekor pour fer sa ki byen menm ler i pa ti anvi. Eski Zeova ti kontan sa ki zapot Pol ti fer pour li? Wi. Zeova ti rekonpans li pour son bann zefor.​—2 Tim. 4:7, 8.

10. Ki byenfe nou gannyen ler nou fer zefor pour atenn en lobzektif menm ler nou pa anvi fer li?

¹⁰ Zeova i kontan ler i vwar nou pe fer zefor pour atenn en lobzektif menm ler nou pa anvi. I kontan parski i konnen ki menm si nou pa kontan sa keksoz ki nou pe fer, nou pe fer sa keksoz parski nou kontan li. Zis parey Zeova ti rekonpans Pol, i pou rekonpans nou pour nou zefor. (Ps. 126:5) Anmezir ki nou vwar lafason ki Zeova pe rekonpans nou, sa i kapab fer nou konmans anvi atenn nou lobzektif. En ser ki apel Lucyna ki sorti Lapolonny, i dir: “Parfwa mon pa anvi al predikasyon sirtou ler mon fatige. Kantmenm sa, sa lazwa ki mon gannyen ler mon sorti predikasyon i en zoli kado.” Aprezan annou vwar ki nou kapab fer ler nou pa anvi fer zefor pour atenn en lobzektif.

11. Ki mannyer Zeova i ed nou pour annan plis kontrol lo nou lekor?

¹¹ Demann Zeova pour ed ou annan kontrol lo ou lekor. En dimoun ki annan kontrol lo son lekor, i kapab kontrol son santiman ek son aksyon. Sa lekspresyon i souvan refer avek en dimoun ki anpes son lekor fer en keksoz mal. Ou osi bezwen annan kontrol lo ou lekor pour fer sa ki byen, sirtou si ou pe fer en keksoz ki difisil oubyen ou pa anvi fer sa keksoz. Gard antet ki kontrol lo nou lekor i form parti fri lespri sen. Alor, demann Zeova son lespri sen pour ed ou devlop sa kalite ki enportan. (Lik 11:13; Gal. 5:22, 23) David, ki’n ganny mansyonnen pli boner, i eksplike ki mannyer ler i ti demann Zeova led dan lapriyer, sa ti ed li. I ti anvi fer son letid personnel pli souvan. I dir: “Mon ti demann Zeova pour ed mwan annan kontrol lo mon lekor. Avek led Zeova, mon ti reisi fer en progranm pour fer mon letid personnel e mon ti reisi fer li regilyerman.”

12. Ki mannyer Eklezyast 11:4 i ed nou pour atenn nou lobzektif spirityel?

¹² Pa bezwen espere ziska ki tou keksoz i mars byen. Dan sa lemonn, pa toultan ki keksoz pou mars byen. Si nou espere, i kapab ki nou pa pou zanmen atenn nou lobzektif. (Lir Eklezyast 11:4.) En frer ki apel Dayniel i dir: “Napa sirkonstans ki parfe. Alor nou pa devret espere, nou devret zis konmanse.” En frer ki apel Paul ki reste Uganda i koz lo en lot rezon akoz nou pa devret espere. I dir: “Si nou fer keksoz pour atenn nou lobzektif menm ler i difisil, Zeova pou beni nou.”​—Mal. 3:10.

13. Ki byenfe ou gannyen ler ou konmans avek bann pti lobzektif?

¹³ Konmans par fer bann pti keksoz ki pou ed ou atenn ou lobzektif. I kapab ki nou pa anvi atenn nou lobzektif parski nou lobzektif i paret tro difisil pour atenn. Si sa i leka, petet ou kapab fer bann pli pti lobzektif pour ed ou atenn sa lobzektif. Par egzanp, si ou anvi devlop en kalite, petet o konmansman ou kapab demontre sa kalite dan bann pti fason. Si ou lobzektif i pour lir Labib an antye, petet ou kapab konmans par lir Labib pour en pti gin letan. Tomáš, ki’n ganny mansyonnen lo konmansman sa lartik, ti vwar li difisil pour lir Labib dan enn an. I dir: “Mon ti realize ki mon pa ti pou kapab lir Labib dan enn an. Alor mon ti deside pour esey  ankor me safwasi mon ti pou lir en parti en sapit toulezour e reflesir lo sa ki mon’n lir. Sa ti fer mwan kontan pour lir Labib.” Vi ki Tomáš ti kontan pour lir Labib, i ti anvi lir Labib pour plis letan. Avek letan, Tomáš ti lir Labib an antye. c

14. Kwa ki kapab arive ki fer li difisil pour atenn nou lobzektif?

¹⁴ Malerezman, menm si nou anvi atenn nou lobzektif e nou fer tou sa ki nou kapab pour atenn sa lobzektif, parfwa i annan keksoz ki kapab arive ki fer li difisil pour atenn sa lobzektif. Par egzanp, bann “levennman san ekspekte” i kapab arive e sa i fer nou napa letan pour atenn nou lobzektif. (Ekle. 9:11) Nou kapab fer fas avek en problenm ki fer nou dekouraze e fer nou santi ki nou napa lafors. (Prov. 24:10) Vi ki nou enparfe, nou kapab fer bann fot ki fer li pli difisil pour nou atenn nou lobzektif. (Rom. 7:23) Ouswa i kapab ki nou zis fatige. (Mat. 26:43) Ki nou kapab fer ler en keksoz i arive ki fer li difisil pour nou atenn nou lobzektif?

15. Si en keksoz i arive ki anpes ou atenn ou lobzektif, eski sa i vedir ki ou devret aret fer zefor pour atenn ou lobzektif? Eksplike. (Psonm 145:14)

¹⁵ Rapel ki si en keksoz i arive ki anpes ou atenn ou lobzektif, sa pa vedir ki ou devret aret fer zefor pour atenn ou lobzektif. Labib i dir ki nou kapab pas dan problenm plizyer fwa. Me Labib i osi dir ki nou kapab kontinyen fer zefor pour atenn nou lobzektif sirtou avek led Zeova. (Lir Psonm 145:14.) En frer ki apel Philip, ki’n ganny mansyonnen pli boner, i dir: “Mon pa konsantre lo bann moman ki mon pa’n atenn mon lobzektif. O kontrer mon konsantre lo bann moman kot mon rekonmans fer zefor pour atenn mon lobzektif.” David, ki’n ganny mansyonnen pli boner, i dir: “Ler bann keksoz i arive  ki anpes mwan atenn mon lobzektif, mon esey pa vwar zot konman bann lobstak me mon vwar zot konman bann loportinite pour montre Zeova ki kantite mon kontan li.” Ler ou kontinyen fer zefor pour atenn ou lobzektif, ou montre Zeova ki ou anvi fer li plezir. Zeova i kontan ler i vwar ou pe kontinyen fer zefor pour atenn ou lobzektif.

16. Ki ou kapab aprann avek bann moman kot en keksoz i arive ki anpes ou atenn ou lobzektif?

¹⁶ Aprann avek bann moman kot en keksoz i arive ki anpes ou atenn ou lobzektif. Mazin lo sa ki’n arive e demann ou lekor, ‘Ki mon kapab fer pour anpes sa ariv ankor?’ (Prov. 27:12) Parfwa ler en keksoz i arive, sa keksoz i kapab montre ki sa lobzektif pa rezonnab. Si sa i leka pour ou, reflesir lo ou lobzektif pour vwar si sa lobzektif i ankor rezonnab pour ou. d Zeova pa pou krwar ki ou pa’n reisi si ou pa’n atenn en lobzektif ki pa ti rezonnab pour ou.​—2 Kor. 8:12.

17. Akoz ou pa devret oubliy bann lobzektif ki ou’n reisi akonpli?

¹⁷ Pa oubliy sa ki ou’n deza akonpli. Labib i dir ki “Bondye pa enzis pour oubliy sa ki zot in fer.” (Ebr. 6:10) Ou osi ou pa devret oubliy bann keksoz ki ou’n fer. Reflesir lo bann lobzektif ki ou’n fini atenn. Par egzanp, ou’n reisi devlop en lanmitye avek Zeova, ou’n koz avek lezot lo li ouswa ou’n batize. Dan lepase ou’n fer progre e ou’n reisi atenn ou lobzektif spirityel. Alor, ou kapab kontinyen fer progre e atenn bann lobzektif ki ou annan la konmela.​—Fili. 3:16.

18. Ki nou devret rapel anmezir ki nou fer zefor pour atenn nou lobzektif? (Vwar portre.)

¹⁸ Zis parey en maren i kontan pour ariv son destinasyon, avek led Zeova ou kapab atenn ou bann lobzektif. Me rapel ki bann maren i osi kontan ler zot pe fer sa vwayaz. Pareyman, toultan esey vwar ki mannyer Zeova pe ed ou parski sa pou ed ou reste zwaye anmezir ki ou fer zefor pour atenn ou lobzektif spirityel. (2 Kor. 4:7) Si ou kontinyen fer zefor, ou pou ganny plis benediksyon.​—Gal. 6:9.