1. Ki leson rekonfortan Zeova ti ansenny Abraam?

 ATRAVER en lanz, Bondye ti dir Abraam ki i ti pe al detri lavil Sodonm ek Gomor. Menm si Abraam ti annan en lafwa for dan Bondye, sa ti vreman difisil pour li konpran. Abraam ti dir: “Eski ou pou vreman detri bann dimoun drwat ansanm avek bann move dimoun? . . . Eski sa Ziz lo later antye pa pou fer sa ki drwat?” Avek pasyans, Zeova ti ansenny son zanmi Abraam en leson enportan, setadir ki i pa pou zanmen detri bann dimoun drwat. Sa ki Zeova ti ansenny Abraam i ed nou ozordi e i rekonfort nou.—Zen. 18:23-33.

2. Kwa ki fer nou asire ki ler Zeova i ziz bann dimoun, i toultan fer sa ki drwat e i pran pitye?

² Kwa ki fer nou asire ki ler Zeova i ziz bann dimoun, i toultan fer sa ki drwat e i pran pitye? Nou asire parski nou konnen ki “Zeova i vwar sa ki i annan dan leker” dimoun. (1 Sam. 16:7) Anfet, i konn “leker sak dimoun.” (1 Rwa. 8:39; 1 Kron. 28:9) Sa i en keksoz enpresyonan. Zeova i bokou pli saz ki nou alor nou pa pou toultan konpran akoz i fer serten desizyon. I pour sa rezon ki zapot Pol ti dir: “Lekel ki kapab konpletman konpran bann desizyon Bondye?”—Rom. 11:33.

3-4. Ki kestyon nou kapab demann nou lekor parfwa e ki nou pou vwar dan sa lartik? (Zan 5:28, 29)

³ Menm si nou konnen ki Zeova i toultan fer sa ki byen, i kapab ki nou annan bann kestyon en pe parey sa ki Abraam ti demande. Petet nou kapab menm demande: ‘Eski i annan lespwar pour bann dimoun ki Zeova in detri par egzanp bann dimoun dan lavil Sodonm ek Gomor? Eski i posib ki serten parmi zot pou ganny resisite ler bann “dimoun . . . move pou resisite”?’—Akt 24:15.

 ⁴ Annou vwar sa ki nou konpran konsernan rezireksyon. Resaman in annan en azisteman dan nou konprenezon konsernan bann ki pou “ganny resisite pour ganny lavi” e bann ki pou “ganny resisite pour ganny zize.” a (Lir Zan 5:28, 29.) Sa azisteman in ed nou pour fer lezot azisteman dan nou konprenezon. Dan sa lartik e sa enn ki swiv, nou pou diskit lo sa bann azisteman. Premyerman, nou pou vwar sa ki nou pa konnen konsernan ler Zeova i ziz dimoun e apre nou pou vwar sa ki nou konnen.

SA KI NOU PA KONNEN

5. Ki nou bann piblikasyon in dir dan lepase konsernan bann dimoun ki Zeova ti detri dan lavil Sodonm ek Gomor?

⁵ Dan lepase, dan nou bann piblikasyon nou’n koz konsernan sa ki arive avek bann dimoun ki Zeova i konsider konman bann dimoun move. Nou ti dir ki bann dimoun ki Zeova ti detri, par egzanp bann dimoun dan lavil Sodonm ek Gomor, pa pou ganny resisite. Me apre plis letid o profon dan Parol Bondye e plis lapriyer, i kler ki nou pa kapab dir sa. Akoz?

6. Donn serten legzanp kot Zeova in ziz bann dimoun move e ki nou pa konnen konsernan sa bann zizman?

⁶ Reflesir lo lezot resi Labib ki en pe parey. I annan en kantite resi dan Labib ki koz konsernan ler Zeova in ziz bann dimoun move. Par egzanp, pandan Deliz, Zeova ti detri tou dimoun eksepte Noe ek son fanmir. Osi, i ti donn lord bann Izraelit pour detri sa set nasyon ki ti reste dan Later Promiz. Zeova ti osi servi en lanz pour touy 185,000 solda Asiryen dan en lannwit. (Zen. 7:23; Det. 7:1-3; Iza. 37:36, 37) Dan sa bann sityasyon, eski Labib i donn ase lenformasyon pour nou dir ki Zeova in ziz sak sa bann dimoun endividyelman e deside pour detri zot pour touzour e pa zanmen resisit zot? Non. Akoz nou dir sa?

7. Ki nou pa konnen konsernan bann dimoun ki ti ganny detrir dan Deliz oubyen bann dimoun ki ti ganny detrir ler bann Izraelit ti pe pran pei Kanaan? (Vwar portre.)

⁷ Dan sa bann legzanp ki fek ganny mansyonnen, nou pa konnen ki mannyer Zeova ti ziz sa bann dimoun e nou osi pa konnen si sa bann ki ti ganny touye ti ganny sa loportinite pour aprann konsernan Zeova e pour repantir. Ler Labib i koz lo sa letan avan Deliz, Labib i dir ki Noe ti “en zonm ki ti pe pres lo ladrwatir.” (2 Pyer 2:5) Me Labib pa dir ki ler Noe ti pe konstri sa gro lars, ki i ti pe osi esey anons mesaz Bondye avek tou dimoun lo later. Pareyman, nou pa konnen si tou bann dimoun move ki ti reste dan pei Kanaan ti ganny loportinite pour aprann konsernan Zeova e pour sanz zot konportman.

8. Ki nou pa konnen konsernan bann dimoun ki ti viv dan lavil Sodonm ek Gomor?

⁸ Ki nou pou dir konsernan bann dimoun ki ti mor ler Zeova ti detri lavil Sodonm ek Gomor? Lot ki ti en zonm drwat, ti reste parmi bann dimoun Sodonm. Me eski nou konnen si Lot ti anons mesaz Bondye avek zot tou? Non. I vre ki zot ti bann move dimoun me eski zot tou zot ti konnen kwa ki byen e kwa ki mal? Rapel ki en group zonm dan sa lavil ti anvi vyol bann envite Lot. Labib i dir ki dan sa group zonm i ti annan bann “zenn konman vye.” (Zen. 19:4; 2 Pyer 2:7) Eski nou asire ki Zeova, sa Bondye ki pran pitye, in kondann sak sa bann dimoun amor e ki i’n deside ki zot pa pou ganny resisite? Non, nou pa kapab dir sa. Zeova ti asir Abraam ki i ti napa ni menm dis zonm drwat dan sa lavil. (Zen. 18:32) Vi ki zot ti bann move dimoun, Zeova ti  annan rezon pour detri zot. Me eski nou kapab dir ki ni enn sa bann dimoun pa pou ganny resisite ler bann “dimoun . . . move pou resisite”? Non, nou pa kapab dir sa.

9. Ki nou pa konnen konsernan Salomon?

⁹ Dan Labib, i osi annan bann resi konsernan bann dimoun ki ti fer sa ki byen me ki apre zot in vin bann move dimoun. Enn parmi sa bann dimoun i Lerwa Salomon. I ti konnen lekel Zeova, ki mannyer i devret ador Zeova e Zeova ti donn li en kantite benediksyon. Me pli tar, Salomon ti konmans ador bann fo Bondye. Sa ti fer Zeova vreman ankoler e pour plizyer santenn lannen, nasyon Izrael antye ti soufer akoz bann pese Salomon. I vre ki Labib i dir ki ler Salomon ti mor, i ti “ganny antere dan Lavil David” ansanm avek bann zonm ki ti fidel parey Lerwa David. (1 Rwa. 11:5-9, 43; 2 Rwa. 23:13) Me eski sa i vedir ki Zeova pou resisit Salomon? Labib pa dir sa. Kantmenm sa, i annan serten dimoun ki kapab krwar ki Salomon pou ganny resisite parski Labib i dir ki “sa ki’n mor in ganny akite avek son pese.” (Rom. 6:7) Me sa pa vedir ki tou dimoun ki’n mor pou ganny resisite. Apre tou, i pa akoz en dimoun in mor ki sa i vedir ki i merite ganny resisite. Rezireksyon i en kado sorti kot nou Bondye ki kontan nou. Zeova i donn sa kado avek bann ki i anvi donn sa loportinite pour servi li pour touzour. (Zob 14:13, 14; Zan 6:44) Alor, eski Salomon pou ganny sa kado? Zis Zeova ki konn sa larepons, pa nou. Me sa ki nou konnen, i ki Zeova pou fer sa ki drwat.

SA KI NOU KONNEN

10. Ki mannyer Zeova i santi konsernan detri bann imen? (Ezekyel 33:11) (Vwar portre.)

¹⁰ Lir Ezekyel 33:11. Zeova i dir nou ki mannyer i santi ler i ziz bann dimoun. Zapot Pyer ti dir en keksoz en pe parey sa ki Ezekyel ti dir. Zapot Pyer ti dir: “Zeova . . . pa oule ki personn i ganny detrir.” (2 Pyer 3:9) Sa bann parol i rekonfort nou parski nou konnen ki Zeova pa pou detri en dimoun pour touzour si i napa en bon rezon pour fer li. I annan bokou pitye e i pran pitye sak fwa i posib pour li fer li.

11. Lekel ki pa pou ganny resisite e ki mannyer nou konn sa?

¹¹ Ki nou konnen konsernan bann dimoun ki pa pou ganny resisite? Labib i mansyonn zis detrwa dimoun ki pa pou ganny resisite. b Zezi ti montre ki Zida Iskaryot pa pou ganny resisite. (Mark 14:21; vwar osi Zan 17:12 ek not letid dan nwtsty.) Zida ti konnen ki sa ki i pe al fer ti mal me i ti volonterman opoz Zeova ek Son Garson. (Vwar Mark 3:29 ek not letid dan nwtsty.) Pareyman, Zezi ti dir ki serten sef relizye ki ti’n opoz li ti pou napa okenn lespwar pour ganny resisite ler zot mor. (Mat. 23:33; vwar Zan 19:11 ek not letid “the man” dan nwtsty.) Zapot Pol ti averti bann Kretyen ki bann aposta ki pa repantir pa pou ganny resisite.—Ebr. 6:4-8; 10:29.

12. Ki nou konnen konsernan lafason ki Zeova i pran pitye? Donn legzanp.

¹² Me ki nou konnen konsernan lafason ki Zeova i pran pitye? Ki mannyer i montre ki i “pa oule ki personn i ganny detrir”? Annou vwar lafason ki Zeova ti pran pitye pour serten dimoun ki ti fer bann pese grav. Lerwa David ti fer bann pese grav. Sa i enkli adilter ek mert. Me Lerwa David ti repantir alor Zeova ti pran pitye pour li e pardonn li. (2 Sam. 12:1-13) Lerwa Manase ti fer en kantite move keksoz pour laplipar  son lavi. Me kantmenm sa, Zeova ti pran pitye pour li e pardonn li parski i ti’n repantir. (2 Kron. 33:9-16) Sa bann legzanp i fer nou rapel ki Zeova i pran pitye sak fwa ki i vwar ki i annan rezon pour fer li. I pou resisit bann dimoun koumsa parski zot ti realize ki zot in fer bann pese grav e zot ti repantir.

13. (a) Akoz Zeova ti pran pitye pour bann dimoun dan lavil Niniv? (b) Ki Zezi ti dir pli tar konsernan bann dimoun dan lavil Niniv?

¹³ Nou osi konnen ki Zeova ti pran pitye pour bann dimoun dan lavil Niniv. Bondye ti dir Zonas konsernan Niniv: “Mon’n vwar bann move keksoz ki son bann zabitan pe fer.” Me ler sa bann dimoun ti repantir, Zeova ti pardonn zot. Zeova ti annan bokou plis pitye pour sa bann dimoun ki Zonas. Zonas ti ankoler e Bondye ti bezwen fer li rapel ki sa bann dimoun pa ti “ni menm konn sa ki byen ek sa ki mal.” (Zon. 1:1, 2; 3:10; 4:9-11) Pli tar, Zezi ti servi sa legzanp pour ansenny son bann disip konsernan lafason ki Zeova i demontre lazistis e i pran pitye. Zezi ti dir ki bann dimoun dan lavil Niniv ki ti’n repantir ti pou “resisite . . . Zour Zizman.”—Mat. 12:41.

14. Dan ki fason ki bann dimoun ki ti reste dan lavil Niniv pou “ganny resisite pour ganny zize”?

¹⁴ Ki Zezi ti pe esey dir ler i ti dir ki bann dimoun dan lavil Niniv pou “resisite . . . Zour Zizman”? Zezi ti pe dir ki dan lavenir i ti pou annan bann dimoun ki ti pou “ganny resisite pour ganny zize.” (Zan 5:29) Zezi ti pe koz lo sa mil an ki i ti pou dirize konman Lerwa dan Rwayonm Bondye kot “dimoun bon konman move pou resisite.” (Akt 24:15) Sa i vedir ki bann dimoun move pou “ganny resisite pour ganny zize.” I osi vedir ki apre ki sa bann dimoun in resisite, Zeova ek Zezi pou obzerv e evalye zot konportman pou vwar si zot pe obei e aplik sa ki zot in aprann. Si en dimoun ki ti reste dan lavil Niniv i refize ador Zeova apre ki in ganny resisite, Zeova pa pou permet li pour kontinyen viv. (Iza. 65:20) Me tou sa bann ki swazir pour ador Zeova fidelman, pou ganny sa loportinite pour viv pour touzour.—Dan. 12:2.

15. (a) Akoz nou pa devret dir ki personn dan lavil Sodonm ek Gomor pa pou ganny resisite? (b) Ki mannyer nou kapab konpran sa ki ganny dir dan Zid 7? (Vwar bwat “ Ki Zid ti pe esey dir?”)

¹⁵ Ler Zezi ti pe koz konsernan bann  dimoun dan lavil Sodonm ek Gomor, i ti dir ki “Zour Zizman” sa bann dimoun pou pli byen pase ki bann ki ti rezet li ek son bann lansennyman. (Mat. 10:14, 15; 11:23, 24; Lik 10:12) Ki i ti pe esey dir? Eski Zezi ti pe zis egzazere pour montre ki bann dimoun dan son letan ti pli pir ki bann dimoun dan lavil Sodonm ek Gomor? I paret ki sa pa ti leka, zis parey i pa ti leka ler Zezi ti pe koz lo bann dimoun dan lavil Niniv. O kontrer i paret ki Zezi pa ti pe egzazere ler i ti pe koz konsernan bann dimoun ki ti reste dan lavil Sodonm ek Gomor. Sa “Zour Zizman” ki Zezi ti koz lo la ler i ti refer avek bann dimoun dan lavil Sodonm ek Gomor, i sa menm “Zour Zizman” ki i ti pe refer avek ler i ti pe koz konsernan bann dimoun dan lavil Niniv. Zis parey bann dimoun dan lavil Niniv, bann dimoun dan lavil Sodonm ek Gomor ti fer bann move keksoz. Me bann dimoun dan lavil Niniv ti ganny loportinite pour repantir. Osi, rapel sa ki Zezi ti dir konsernan bann ki “pou ganny resisite pour ganny zize.” Sa pou enkli “bann ki ti fer sa ki mal.” (Zan 5:29) Alor i paret ki i annan lespwar pour bann dimoun ki ti reste dan lavil Sodonm ek Gomor. I posib ki serten sa bann dimoun pou ganny resisite e petet nou pou annan sa loportinite pour ansenny zot konsernan Zeova ek Zezi Kri.

16. Ki nou konnen konsernan lafason ki Zeova pou deside lekel ki i pou resisite? (Zeremi 17:10)

¹⁶ Lir Zeremi 17:10. Dan sa verse, nou vwar sa ki nou konnen konsernan lafason ki Zeova i ziz dimoun. Zeova i toultan “egzamin leker” e “egzamin bann panse.” Ler Zeova pou deside lekel ki pou resisite dan lavenir, Zeova pou “donn sak dimoun dapre sa ki i’n fer.” Zeova pou ferm ler i neseser me i pou pran pitye ler i posib. Tan ki Labib pa dir ki en dimoun pa pou ganny resisite, nou pa devret krwar ki sa dimoun pa pou ganny resisite.

“SA ZIZ LO LATER ANTYE” POU “FER SA KI DRWAT”

17. Ki pou arive avek bann dimoun ki’n mor?

¹⁷ Depi ki Adan ek Ev in zwenn ansanm avek Satan e rebel kont Zeova, plizyer bilyon dimoun in mor. Lanmor i en “lennmi” ki kriyel. (1 Kor. 15:26) Me ki pou arive avek tou sa bann dimoun ki’n mor? I annan  en pti group 144,000 disip Kris ki pou ganny resisite pour ganny lavi imortel dan lesyel. (Rev. 14:1) Ler bann “dimoun bon . . . pou resisite,” parmi i pou annan en gran kantite zonm ek madanm fidel ki ti kontan Zeova. Si zot reste fidel pandan sa mil an ki Kris pou dirize e pandan sa tes final, zot pou kapab viv pour touzour lo later. (Dan. 12:13; Ebr. 12:1) Pandan sa mil an ki Kris pou dirize, bann dimoun move, enkli bann ki pa’n zanmen servi Zeova oubyen “bann ki ti fer sa ki mal” pou ganny sa loportinite pour sanz zot konportman e pour vin bann serviter fidel Zeova. (Lik 23:42, 43) Me i annan serten dimoun ki ti sitan move, sitan determinen pour rebel kont Zeova ek son plan, ki Zeova in deside ki i pa pou resisit zot.—Lik 12:4, 5.

18-19. (a) Akoz nou kapab asire ki ler Zeova pou ziz bann dimoun ki’n mor i pou fer sa ki byen? (Izai 55:8, 9) (b) Ki nou pou vwar dan sa lartik ki swiv?

¹⁸ Eski nou kapab asire ki ler Zeova i ziz bann dimoun i toultan fer sa bon desizyon? Wi! Zeova i sa “Ziz lo later antye.” I parfe, i vreman saz e i pran pitye. I sanmenm sa ki Abraam ti konpran. Zeova in donn formasyon son Garson e in donn li sa responsabilite pour ziz tou dimoun. (Zan 5:22) Zeova ek Zezi i konnen ki sak dimoun i mazinen e santi. (Mat. 9:4) Alor ler zot ziz bann dimoun, zot pou toultan fer “sa ki drwat”!

¹⁹ Annou toultan annan konfyans dan Zeova e dan tou bann desizyon ki i fer! Nou rekonnet ki nou napa drwa e nou pa kalifye pour ziz lezot. Me Zeova i kapab. (Lir Izai 55:8, 9.) I pour sa rezon ki nou annan konfyans dan Zeova ek Zezi e nou les zot zize. Nou konnen ki nou Lerwa, Zezi pou imit lafason ki son Papa i demontre lazistis e pran pitye. (Iza. 11:3, 4) Me ki nou kapab dir konsernan lafason ki Zeova ek Zezi pou ziz dimoun pandan gran ladetres? Ki nou pa konnen e ki nou konnen? Nou pou reponn sa bann kestyon dan sa lartik ki swiv.