1, 2. (a) Ki serten dimoun i dir lo sa nide ki Bondye i annan en lorganizasyon? (b) Ki nou pou diskite dan sa lartik?

SERTEN dimoun i dir: “Ou pa bezwen en lorganizasyon pour diriz ou. Ou zis bezwen annan en relasyon avek Bondye.” Eski sa i vre? Ki levidans i montre?

² Dan sa lartik, nou pou vwar ki Zeova i fer keksoz dan lord e ki i organiz son pep. Nou pou osi diskit lo sa ki nou bezwen fer ler lorganizasyon Zeova i donn nou lenstriksyon. (1 Korentyen 14:33, 40) Dan premye syek, vi ki pep Zeova ti swiv lenstriksyon dan Lekritir, zot ti kapab pres sa bon nouvel dan bokou landrwa. Parey zot, nou les Labib gid nou ozordi. Nou osi obei lenstriksyon ki nou gannyen sorti kot lorganizasyon Bondye. Sa i fer ki nou kapab pres sa bon nouvel partou dan lemonn. Nou osi gard kongregasyon pir, anpe e dan linite.

3. Kwa ki fer ou asire ki Zeova i en Bondye annord?

³ Ler nou get bann keksoz ki Zeova in kree nou vwar klerman ki i en Bondye annord. I “ti poz fondasyon  later avek son lasazes; lesyel ti ganny etabli par son konnesans.” (Proverb 3:19) I annan bokou keksoz ki nou pa konnen konsernan sa ki Zeova in fer. Anfet, nou konn “zis en pti nide son bann aksyon.” (Zob 26:14) Me sa ptigin ki nou konnen lo liniver, i kler ki i byen organize. (Psonm 8:3, 4) Dan lespas, i annan plizyer milyon zetwal ki bouz dan lord. Zis mazin lafason ki bann plannet dan nou sistenm soler i fer letour soley. Sa lord ekstraordiner i posib akoz Zeova i organiz lafason ki bann zetwal ek plannet i bouze. Ler nou mazin lo ki mannyer “in fer lesyel [ek later] avek lentelizans,” nou anvi loue li, ador li e fidel avek li.​—Psonm 136:1, 5-9.

4. Akoz syantis pa kapab trouv larepons bann kestyon enportan?

⁴ Bann syantis in servi bokou keksoz ki zot in aprann lo liniver ek nou later pour fer ki nou amelyor nou fason viv. Me zot napa larepons bokou kestyon enportan. Par egzanp, bann astrolog pa kapab dir nou ki mannyer liniver ti konmanse oubyen akoz imen, zannimo ek plant i egziste lo later. Deplis, laplipar dimoun pa kapab eksplike akoz imen i vreman anvi viv pour touzour. (Eklezyast 3:11, NWT) En rezon akoz dimoun napa larepons sa bann kestyon i akoz bann syantis ek lezot i dir ki napa Bondye e zot promot evolisyon. Me Bondye i donn nou larepons dan son Liv, Labib.

5. Ki bann diferan fason imen i depan lo bann lalwa dan lanatir?

⁵ Zeova in met bann lalwa dan lanatir. Sa bann lalwa pa sanze. Bann elektrisyen, plonber, enzenyer, pilot, sirizyen ek lezot i depan lo sa bann lalwa pour fer zot travay. Par egzanp, leker dan lekor tou imen i normalman dan menm landrwa, alor en sirizyen i konnen kote pour trouv leker sak pasyan. Tou dimoun i konnen ki si i sorti lo en oter e sot anba, i kapab mor. Nou obei lalwa lanatir tel parey gravite akoz nou anvi reste vivan.

6. Ki mannyer nou konnen ki Zeova i anvi dimoun i ador li dan en fason organize?

⁶ Zeova in organiz liniver dan en fason merveye. San dout, i anvi son pep i ador li dan en fason byen organize. Anfet, Zeova in donn nou Labib pour nou konnen ki mannyer pour ador li. Zis par swiv son gidans ki i donn nou atraver Labib ek son lorganizasyon ki nou pou kapab viv ere e annan en lavi satisfezan.

7. Ki nou kapab aprann avek fason ki Labib in ganny ekrir?

⁷ Labib i vreman en kado spesyal sorti kot Bondye. Serten eksper i dir ki Labib i zis bann liv Zwif ek liv Kretyen ki’n ganny met ansanm par zonm. Me Bondye ki’n deside lekel ki ti pou ekri sa bann liv, kan zot ti pou ekri e ki zot ti pou ekri. Sanmenm sa tou bann liv Labib i ed nou konpran mesaz Bondye. Depi Zenez ziska Revelasyon, Labib i montre ki ti pou annan  en “desandans” ki pou fer later revin en paradi. Nou’n osi aprann ki sa “desandans” i Zezi Kri e ki son Rwayonm pou prouve ki Zeova i annan drwa pour diriz lo tou dimoun.​—Lir Zenez 3:15; Matye 6:10; Revelasyon 11:15.

8. Dan ki fason bann Izraelit ti byen organize?

⁸ Bann Izraelit ti swiv Lalwa ki Bondye ti donn zot e zot ti byen organize. Par egzanp, i ti annan “bann [madanm] ki ti fer zot servis devan lantre Latant” oubyen tabernak. (Egzod 38:8) Bann Izraelit ti osi annan bann lenstriksyon lo ki mannyer pour bouz zot kan ek tabernak dan lord. Pli tar, Lerwa David ti organiz bann pret ek Levit pour fer bann travay spesifik kot tanp. (1 Kronik 23:1-6; 24:1-3) Ler Bann Izraelit ti obei Zeova, i ti beni zot. Zot ti organize, anpe e dan linite.​—Deterononm 11:26, 27; 28:1-14.

9. Ki mannyer kongregasyon dan premye syek ti organize?

⁹ Bann kongregasyon dan premye syek osi ti organize. Zot ti annan en konsey direkter, savedir en group zonm ki ti diriz bann kongregasyon. Bann zapot ti premye pour form parti sa group. Pli tar, lezot ansyen ti ganny enkli dan sa konsey direkter. (Akt 6:1-6; 15:6) Zeova ti gid bann manm konsey direkter ek lezot ki ti travay ansanm avek zot pour ekri bann let ki ti annan konsey ek lenstriksyon pour bann kongregasyon. (1 Timote 3:1-13; Tit 1:5-9) Ki byenfe kongregasyon ti gannyen ler zot ti swiv lenstriksyon sorti kot konsey direkter?

10. Ki ti arive ler bann kongregasyon dan premye syek ti swiv lenstriksyon konsey direkter? (Vwar portre lo paz 9.)

¹⁰ Lir Akt 16:4, 5. Dan premye syek serten frer ti vizit bann kongregasyon pour dir zot “desizyon ki bann zapot ek ansyen ti’n fer Zerizalenm,” setadir desizyon konsey direkter. Sa bann kongregasyon ti swiv sa bann lenstriksyon e zot “ti vin deplizanpli for e lakantite disip ti ogmante zour apre zour.” Ki nou kapab aprann avek zot legzanp ki pou ed nou dan kongregasyon ozordi?

11. Ki bann ansyen ek asistan ministeryel i devret fer ler zot ganny lenstriksyon sorti kot lorganizasyon Bondye?

¹¹ Bann manm Biro Brans, sirveyan rezyonal ek ansyen i bezwen swiv lenstriksyon ki zot gannyen avek lorganizasyon Bondye. Anfet, Labib i dir nou obei bann ki pe dirize. (Deterononm 30:16; Ebre 13:7, 17) Bann ki fidel avek Zeova pa rebel e zot pa konplent kont bann lenstriksyon ki zot gannyen. Nou pa pou anvi vin parey Dyotref ki ti napa respe pour bann frer ki ti pe dirize. (Lir 3 Zan 9, 10.) Ler nou swiv lenstriksyon ki nou gannyen, nou ede pour gard lape ek linite dan kongregasyon. Alor nou kapab demann nou lekor: ‘Eski mon ankouraz mon bann frer ek ser pour fidel avek Zeova? Eski  deswit mon swiv lenstriksyon ki mon gannyen sorti kot lorganizasyon Bondye?’

12. Ki mannyer bann ansyen ek asistan ministeryel i ganny apwente?

¹² Resaman, Konsey Direkter in sanz fason ki bann ansyen ek asistan ministeryel i ganny apwente dan sak kongregasyon. “Kestyon lekter” dan Latour Veyer le 15 Novanm 2014, i eksplike ki dan premye syek, konsey direkter ti donn sirveyan rezyonal drwa pour apwent bann ansyen ek asistan ministeryel. Alor, depi Septanm 2014 bann sirveyan rezyonal in konmans fer sa. Ler bann ansyen i rekomann en frer pour servi konman ansyen oubyen asistan ministeryel, sirveyan rezyonal i esey konn li ek son fanmir. Par egzanp, i kapab travay avek sa frer dan predikasyon. (1 Timote 3:4, 5) Apre sirveyan rezyonal ek bann ansyen i zwenn. Zot verifye atantivman bann verse Labib ki dekrir bann kalite ki en ansyen oubyen asistan ministeryel i bezwen annan.​—1 Timote 3:1-10, 12, 13; 1 Pyer 5:1-3.

13. Ki mannyer nou montre ki nou korpere avek lenstriksyon ki nou gannyen avek bann ansyen?

¹³ Bann ansyen i donn nou bann lenstriksyon sorti dan Labib parski zot anvi protez e pran swen avek kongregasyon. Nou bezwen korpere avek zot parski sa lenstriksyon i pour nou prop byenfe. (1 Timote 6:3) Dan premye syek, i ti annan serten dimoun ki ti “dezobeisan.” Zot pa ti pe travay ditou me zot ti mel dan zafer ki pa konsern zot. Bann ansyen ti esey konsey zot, me zot pa ti oule sanze. Pol ti dir kongregasyon ki mannyer zot devret tret en dimoun ki pa oule sanze. I ti dir: “Vey li byen e aret frekant li.” Zot ti bezwen aret asosye avek sa dimoun, me pa tret li parey en lennmi. (2 Tesalonisyen 3:11-15) Bann ansyen ozordi i esey ed en dimoun ki inyor standar Bondye, par egzanp en dimoun ki pe pwente avek en dimoun ki pa Temwen. (1 Korentyen 7:39) Si sa dimoun pa oule sanze, bann ansyen i kapab deside fer en diskour ki eksplike ki mannyer sa konportman i kapab fer lezot koz an mal lo kongregasyon. Si bann ansyen i fer sa diskour, ki mannyer ou pou reazir? Si ou konnen lekel sa dimoun eski ou pou aret asosye avek li? Si ou fer sa, ou pou kapab ed li realize ki son konportman i en danze pour li menm e i osi en keksoz ki Zeova pa kontan. Petet sa i kapab fer li sanz son latitid. ^[1]​—Vwar lezot not.

14. Ki mannyer nou kapab ede gard kongregasyon pir?

¹⁴ Parol Bondye i dir nou ki nou tou nou devret fer pour ki nou pa les bann move keksoz arive dan nou kongregasyon. Annou vwar ki ti arive Korent. Pol ti kontan bann frer ek ser laba. I ti’n ed bokou parmi zot pour konn laverite. (1 Korentyen 1:1, 2) Alor, mazinen ki mannyer i ti santi ler i ti dekouver ki enn parmi zot ti pe viv en lavi imoral e ki bann frer ek ser ti les sa dimoun reste dan kongregasyon. Pol ti dir bann ansyen “livre en zonm koumsa avek Satan.” Zot pou bezwen tir sa dimoun dan kongregasyon setadir ekskli li. (1 Korentyen 5:1, 5, 7, 12) Ozordi bann ansyen i kapab deside ki en dimoun i bezwen ganny ekskli akoz in komet en pese grav e i pa’n repantir. Dan sa ka, eski nou pou tret sa dimoun ki’n ganny ekskli parey Labib i demann nou? Si nou fer sa, nou pou ede gard kongregasyon pir. Nou pou osi ed sa dimoun realize ki i bezwen repantir e demann Zeova pour pardonn li.

15. Ki mannyer nou kapab gard lape dan kongregasyon?

¹⁵ I ti annan en lot problenm Korent. Serten ti pe anmenn zot bann frer ankour. Pol ti demann zot: “Akoz ou pa pare pour aksepte en lenzistis?” (1 Korentyen 6:1-8) Ozordi, serten frer dan kongregasyon in fer serten lagreman biznes antre zot e apre zot in perdi larzan oubyen santi ki zot frer in fer frod. Alor zot in anmenn zot bann frer ankour. Me ler sa i arive, i kapab fer dimoun koz an mal lo Zeova ek son pep. Sa i kapab osi fer problenm dan kongregasyon. Parol Bondye i ed nou vwar ki nou devret gard lape avek nou bann frer, menm si nou kapab perdi larzan. ^[2] (Vwar lezot not.) Anfet, Zezi ti ansenny nou ki mannyer pour rezourd bann problenm grav ek dezakor. (Lir Matye 5:23, 24; 18:15-17.) Ler nou obei son lenstriksyon nou gard lape ek linite dan kongregasyon.

16. Akoz pep Bondye i ini?

¹⁶ Labib menm i dir nou: “I bon, i gou war bann frer viv ini ansanm.” (Psonm 133:1) Bann Izraelit ti ini e organize ler zot ti obei Zeova. Bondye ti predir sa konsernan son pep: “Mon pou rasanble zot parey bann mouton dan berkay.” (Mika 2:12) Zeova ti osi predir ki son pep ti pou  konn laverite dan Labib e zot ti pou servi li dan linite. I ti dir: “Mon pou sanz langaz bann pep pour fer zot koz en langaz pir, pour ki zot tou zot kapab kriy lo non Zeova, pour zot servi li zepol kont zepol.” (Zefanya 3:9, NWT) Pa nou apresye ki nou pe ador Zeova dan linite!

17. Ki bann ansyen i devret fer ler en dimoun dan kongregasyon i fer en pese grav?

¹⁷ Si en dimoun i komet en pese grav, deswit bann ansyen i devret disiplin li avek lanmour. Zot konnen ki Zeova i anvi ki zot protez kongregasyon kont bann move lenfliyans e gard li pir e ini. (Proverb 15:3) Pol ti vreman kontan son bann frer Korent e i ti disiplin zot ler i ti neseser parey nou vwar dan son premye let ki i ti anvoy zot. Nou konnen ki bann ansyen ti swiv lenstriksyon Pol deswit akoz plizyer mwan pli tar, i ti felisit zot dan son dezyenm let. Si en frer “i pran en move semen san ki i realize,” bann ansyen i devret disiplin li avek lanmour.​—Galat 6:1.

18. (a) Ki mannyer bann lenstriksyon dan Parol Bondye ti ed bann kongregasyon dan premye syek? (b) Ki nou pou diskite dan lot lartik?

¹⁸ I kler ki ler bann Kretyen dan premye syek ti swiv lenstriksyon sorti dan Parol Bondye, zot kongregasyon ti pir, anpe e dan linite. (1 Korentyen 1:10; Efezyen 4:11-13; 1 Pyer 3:8) Sa ti fer ki bann frer ek ser ti kapab anons sa bonn nouvel “avek dimoun partou lo later.” (Kolosyen 1:23) Ozordi osi, pep Zeova i ini, organize e zot pres sa bon nouvel partou lo later. Sa lot lartik pou donn nou plis laprev ki zot pli gran dezir i pour onor Souvren Senyer Zeova e obei son gidans ki dan son prop Liv, Labib.​—Psonm 71:15, 16.