1, 2. Anmezir ki nou kontinyen fer progre, ki nou aprann? Donn en legzanp.

METON en dimoun i donn en zanfan en kado. Paran sa zanfan i dir li, “Dir mersi.” Sa zanfan i dir mersi zis akoz son paran in dir li. Me anmezir ki sa zanfan i grandi, i konmans konpran akoz son paran i krwar ki i enportan pour rekonesan ler lezot i fer bann bon keksoz. Avek letan, i ganny pouse pour dir mersi lo li menm parski i’n aprann pour demontre rekonesans.

² En keksoz parey ti arive avek nou. Ler nou ti konmans aprann laverite, nou ti aprann ki i enportan pour obei bann komannman de baz Zeova. Me anmezir ki nou kontinyen fer progre, nou aprann plis lo son fason panse, setadir, lo sa ki i kontan, sa ki i pa kontan e son fason vwar keksoz. Ler nou les fason panse Zeova enfliyans nou bann swa personnel ek nou aksyon, nou fer son fason panse vin nou fason panse.

3. Akoz i kapab difisil pour annan menm fason panse avek Zeova?

 ³ Menm si nou kontan pour aprann vwar keksoz parey Zeova, parfwa i difisil pour mazin dan sa fason parski nou enparfe. Par egzanp, nou konn pwennvi Zeova lo lapirte moral, materyalizm, sa travay predikasyon, mal servi disan ek lezot keksoz ankor. Me i kapab difisil pour nou konpran akoz i vwar zot koumsa. Alor ki mannyer nou kapab aprann pour mazin plis parey Zeova? Osi, ki mannyer sa pou ed nou fer sa bon swa la konmela e dan lavenir?

4. Ki savedir sanz nou fason panse?

⁴ Lir Romen 12:2. Dan sa verse, zapot Pol ti dekrir sa ki nou bezwen fer pour aprann vwar keksoz parey Zeova. I ti dir: “Pa les sa lemonn enfliyans zot.” Parey nou ti aprann dan sa lartik avan, sa i vedir ki nou bezwen rezet bann nide ek latitid sa lemonn. Me Pol ti osi dir ki nou bezwen sanz nou fason panse. Sa i vedir ki nou bezwen etidye Parol Bondye, konpran son fason panse, medit lo zot e travay dir pour annan fason panse Bondye.

5. Eksplik diferans ant lir e etidye.

⁵ Ler nou etidye, nou bezwen fer plis ki lir bann lenformasyon vitman vitman ouswa souliny larepons bann kestyon. Nou mazin lo ki sa lenformasyon i ansenny nou lo Zeova, lo sa ki i fer e ki mannyer i vwar keksoz. Nou esey konpran akoz Zeova i dir nou fer en keksoz e evite fer en lot keksoz. Nou osi mazin lo sa ki nou bezwen sanze dan nou lavi e dan nou fason panse. Byensir, petet i pa posib pour medit lo tou sa bann pwen sak fwa nou etidye. Me i bon pour pas letan pour medit lo sa ki ou lir. Petet ou kapab pran lanmwatye sa letan ki ou pe etidye pour ou medite.​—Psonm 119:97; 1 Timote 4:15.

6. Ki arive ler nou medit lo Parol Bondye?

⁶ En bon keksoz i arive ler nou regilyerman medit lo Parol Bondye. Labib i dir ki ‘nou menm nou fer sir’ ki fason panse Zeova i parfe. Sa i vedir ki nou pe konvenk nou lekor. Nou konmans konpran lafason ki Zeova i vwar keksoz e avek letan nou aksepte son pwennvi. Alor nou sanz nou fason panse e konmans mazin dan en nouvo fason. Gradyelman, nou fer fason panse Zeova vin nou fason panse.

7, 8. (a) Ki mannyer Zeova i vwar bann keksoz materyel? (Vwar bann portre o konmansman sa lartik.) (b) Si nou annan menm pwennvi avek Zeova lo bann keksoz materyel, kwa ki pou toultan pli enportan pour nou?

⁷ Nou fason panse i annan en lefe lo nou aksyon. (Mark 7:21-23; Zak 2:17) Annou vwar detrwa legzanp pour fer sa pwen kler. Premyerman, sa resi konsernan nesans Zezi i montre klerman ki mannyer Zeova i vwar keksoz materyel. Bondye ti personnelman swazir Zozef ek Mari pour elve son Garson menm si zot ti napa bokou larzan. (Levitik  12:8; Lik 2:24) Ler Zezi ti ne, Mari ti “met li dan en loz parski zot pa ti’n ganny okenn landrwa pour reste.” (Lik 2:7) Si Zeova ti’n anvi, i ti’n kapab fer sir ki Zezi ti ne dan en landrwa bokou pli bon. Me i ti anvi ki Zezi i ganny elve dan en fanmir ki met ladorasyon Bondye premye. Sa ti sa keksoz pli enportan pour Zeova.

⁸ Sa resi konsernan nesans Zezi i montre nou ki mannyer Zeova i vwar keksoz materyel. Serten paran i anvi ki zot zanfan i ganny bann pli bon keksoz materyel, menm si sa i afekte relasyon zot zanfan avek Zeova. Me i kler ki Zeova i vwar nou relasyon avek li konman sa keksoz pli enportan. Eski ou’n aksepte pwennvi Zeova an rapor avek sa? Ki ou aksyon i montre?​—Lir Ebre 13:5.

9, 10. Ki mannyer nou kapab montre ki nou annan menm pwennvi avek Zeova an rapor avek fer lezot fer pese?

⁹ En dezyenm legzanp i annan pour fer avek lafason ki Zeova i vwar en dimoun ki fer lezot fer pese ouswa aret servi Zeova. Zezi ti dir: “Sa ki fer en dimoun ki annan lafwa dan mwan e ki parey en zanfan fer pese, plito en ros moulen i ganny anmare dan son likou e i ganny zete dan lanmer.” (Mark 9:42) Sa bann parol i vreman serye! Nou konnen ki Zezi i zis parey son Papa. Alor nou kapab asire ki Zeova pa kontan ditou ler en dimoun i fer enn bann disip Zezi fer pese.​—Zan 14:9.

¹⁰ Eski nou annan menm pwennvi avek Zeova ek Zezi an rapor avek sa? Ki nou aksyon i montre? Par egzanp, i kapab ki nou kontan en kalite stil lenz ek laparans. Me ki nou pou fer si nou swa i fer serten dan kongregasyon enkonfortab ouswa fer lezot annan bann panse imoral? Eski nou lanmour pour nou bann frer ek ser pou pous nou pour pa fer sa ki nou ti a prefere?​—1 Timote 2:9, 10.

11, 12. Ki mannyer nou pou protez nou lekor si nou aprann pour ay sa ki Zeova pa kontan e devlop kontrol lo nou lekor?

¹¹ La en trwazyenm legzanp: Zeova i ay sa ki mal. (Izai 61:8, NWT) Byensir, i konnen ki parfwa i difisil pour nou fer sa ki byen akoz nou enparfe. Kantmenm sa, i oule ki nou ay sa ki mal parey li i fer. (Lir Psonm 97:10.) Si nou medit lo akoz Zeova i ay bann keksoz mal, sa pou ed nou fer son pwennvi nou prop pwennvi e i pou donn nou lafors pour pa fer bann move keksoz.

¹² Si nou aprann pour ay sa ki mal, sa pou osi ed nou realize ki serten keksoz i mal menm si Labib pa koz lo zot spesifikman. Par egzanp, en form kondwit imoral ki apel lap dancing pe vin pli popiler konmela. Serten dimoun i dir ki i pa konmsi zot pe fer sèks, alor zot  krwar ki napa nanryen mal avek sa. * (Vwar not.) Me eski Zeova i vreman santi koumsa? Rapel ki Zeova i ay tou sa ki mal. Alor annou reste lwen avek nenport keksoz ki mal par aprann pour devlop kontrol lo nou lekor e ay sa ki Zeova pa kontan.​—Romen 12:9.

13. Akoz nou devret mazin lo fason ki Zeova i vwar keksoz depi la konmela pour nou kapab fer bann desizyon saz a lavenir?

¹³ Ler nou etidye, nou devret mazin lo ki mannyer Zeova i vwar bann keksoz parski sa i kapab ed nou fer bann desizyon saz. Koumsa, si nou trouv nou dan en sityasyon kot nou bezwen fer en desizyon toudswit, nou pa pou sitan sirprann. (Proverb 22:3) Annou vwar serten legzanp dan Labib.

14. Ki nou aprann avek sa larepons ki Zozef ti donn madanm Potifar?

¹⁴ Ler madanm Potifar ti esey sedwir Zozef, deswit Zozef ti refize. I evidan ki Zozef ti’n medit lo lafason ki Zeova i vwar maryaz. (Lir Zenez 39:8, 9.) * (Vwar not.) Zozef ti dir madanm Potifar: “Ki mannyer eski mon pou kapab fer en keksoz osi mal e komet en pese kont Bondye?” Sa i montre ki i ti’n fer fason panse Bondye vin son fason panse. Me nou? Ki ou ti pou fer si en koleg travay i konmans rod latraksyon avek ou? Ouswa si en dimoun i anvoy en mesaz ouswa en portre ki pa apropriye lo ou telefonn? * (Vwar not.) I bokou pli fasil pour reste fidel avek Zeova si nou’n deza aprann e aksepte son pwennvi lo sa bann keksoz e nou’n fini deside ki nou pou fer.

15. Ki mannyer nou kapab reste fidel avek Zeova parey sa trwa Ebre?

¹⁵ Annou vwar osi legzanp sa trwa Ebre ki koni konman Sadrak, Mesak ek Abednego. Ler Lerwa Neboukadnezar ti donn zot lord pour ador sa stati annor ki i ti’n fer, zot ti kareman refize. Sa larepons kler ki zot ti donn lerwa i montre ki zot ti’n fini reflesi lo sa ki ti pou arive si zot ti reste fidel avek Zeova. (Egzod 20:4, 5; Danyel 3:4-6, 12, 16-18) Me ozordi? Ki ou ti pou fer si ou anplwayer i demann ou pour kontribye pour en selebrasyon ki annan pour fer avek fo larelizyon? Dan plas espere ziska ki en keksoz koumsa i arive, i ti pou bon pour nou medite depi la konmela lo lafason ki Zeova i vwar sa bann keksoz. Koumsa, si nou vwar nou dan sa sityasyon, i pou pli fasil pour nou fer e  dir sa ki byen, parey sa trwa Ebre ti fer.

16. Ler nou konpran klerman fason panse Zeova, ki mannyer sa i ede prepar nou pour en swen medikal irzan?

¹⁶ Ler nou medit lo fason panse Zeova, sa i osi kapab ed nou pour reste fidel avek li si nou bezwen swen medikal irzan. Byensir, nou determinen pour pa aksepte en transfizyon disan ouswa son kat konponan prensipal. (Akt 15:28, 29) Me i annan bann prosedir ki enkli disan ki sak Kretyen i bezwen fer son prop desizyon baze lo bann prensip Labib. Ki sa pli bon moman pour deside ki pour fer? Eski i ler nou dan lopital, petet dan douler e anba presyon pour fer en desizyon la pour la? Non. La ki sa moman pour fer resers, ranpli en dokiman medikal legal ki eksplik klerman sa ki nou anvi e koz avek nou dokter. * (Vwar not.)

17-19. Akoz i enportan pour aprann fason panse Zeova lo bann keksoz depi la konmela? Donn en legzanp.

¹⁷ Finalman, mazin sa larepons ki Zezi ti donn Pyer vitman ler Pyer ti donn li sa move konsey: “Ou bezwen bon avek ou lekor Senyer.” I evidan ki Zezi ti’n medit en kantite lo sa ki Bondye i anvi i fer e lo bann profesi konsernan son lavi ek lanmor lo later. Sa konnesans ti donn li lafors pour reste fidel avek Zeova e pour donn son lavi konman en sakrifis pour nou tou.​—Lir Matye 16:21-23.

¹⁸ Ozordi, Bondye i anvi ki nou vin son zanmi e pour fer nou mye pour pres sa bon nouvel. (Matye 6:33; 28:19, 20; Zak 4:8) Me serten dimoun ki annan bon lentansyon i kapab esey dekouraz nou parey Pyer ti fer avek Zezi. Par egzanp, i kapab ki ou anplwayer i ofer ou plis larzan me ou konnen ki ou pou bezwen travay plis e ki ou pou napa menm kantite letan pour renyon ek predikasyon. Ouswa si ou pe lekol, i kapab ki ou bann  ansenyan i ofer ou sa loportinite pour al lwen avek kot ou reste pour ganny plis ledikasyon. Eski prezan ki ou pou bezwen priye, fer resers e koz avek manm ou fanmir ouswa bann ansyen avan fer en desizyon? I pli bon si ou aprann ki mannyer Zeova i vwar sa bann keksoz depi la konmela e fer son fason panse vin ou fason panse. Koumsa, si ou ganny ofer sa bann keksoz, i kapab ou pou vwar ki zot pa vreman tant ou. Ou konn egzakteman ki pour fer parski ou’n deza deside pour reste konsantre lo servi Zeova.

¹⁹ I tre probab ki ou kapab mazin lezot sityasyon ki kapab teste ou fidelite anver Zeova en sel kou. Byensir, nou pa kapab prepar nou pour tou sityasyon ki kapab arive. Me si nou medit lo fason panse Zeova pandan nou letid personnel, i annan plis sans ki nou pou rapel sa ki nou’n aprann e konnen ki mannyer pour aplik li dan nenport sityasyon. Alor ler nou etidye, annou rode ki mannyer Zeova i vwar bann keksoz, fer son fason panse vin nou fason panse e mazin lo ki mannyer sa pou ed nou fer bann desizyon saz la konmela e a lavenir.

20, 21. (a) Ki nou laliberte pou permet nou fer dan nouvo lemonn? (b) Ki mannyer nou kapab annan lazwa dan nou lavi depi la konmela?

²⁰ Nou tou nou pe esper sa nouvo lemonn avek enpasyans. Laplipar parmi nou i annan lespwar pour viv pour touzour dan Paradi lo later. Anba Rwayonm Bondye, nou pou ganny libere avek bann keksoz dan sa lemonn ki anmenn douler ek soufrans. Deplis, byensir nou pou ankor annan sa laliberte pour fer bann swa baze lo sa ki nou prefere e sa ki nou anvi.

²¹ Me sa pa vedir ki nou pou annan laliberte total. Bann dimoun ki annan limilite pou ankor fer bann desizyon baze lo bann lalwa Zeova ek son fason panse. Sa pou anmenn gran lazwa ek labondans lape. (Psonm 37:11, NWT) Ziska ler sa i arive, nou kapab rezoui lavi la konmela anmezir ki nou fer fason panse Zeova vin nou fason panse.