Lekel ki enfliyans ou fason panse?
“Pa les sa lemonn enfliyans zot.”—ROMEN 12:2.
1, 2. (a) Ki mannyer Zezi ti reponn Pyer ler Pyer ti dir li ki i bezwen bon avek son lekor? (Vwar portre o konmansman sa lartik.) (b) Akoz Zezi ti reponn dan sa fason?
BANN disip Zezi ti dan sok! Zot ti krwar ki Zezi ti pou retabli rwayonm Izrael, me Zezi ti dir ki byento i ti pou soufer e mor. Zapot Pyer ti koz premye: “Ou bezwen bon avek ou lekor Senyer, sa pa pou zanmen ariv avek ou.” Zezi ti reponn: “Pas deryer mwan Satan! Ou parey en ros dan mon semen, parski ou pa mazin parey Bondye me plito parey en zonm.”—Matye 16:21-23, not; Akt 1:6.
2 Ler Zezi ti dir sa, i ti fer kler ki fason panse Zeova i diferan avek bann nide sa lemonn kontrole par Satan. (1 Zan 5:19) Pyer ti ankouraz Zezi pour annan sa menm latitid egois ki en kantite dimoun dan sa lemonn i annan. Me Zezi ti konnen ki Zeova ti anvi ki i prepar son lekor pour sa soufrans ek lanmor ki i ti pou byento eksperyanse. Larepons Zezi i montre klerman ki i ti aksepte fason panse Zeova e rezet fason panse sa lemonn konpletman.
3. Akoz i difisil pour aksepte fason panse Zeova e rezet fason panse sa lemonn?
3 Me nou, eski nou pans parey Zeova ouswa parey bann dimoun dan sa lemonn? Konman Kretyen, nou travay dir pour fer sir ki nou aksyon i fer plezir Bondye. Me ki nou pou dir lo nou fason panse? Eski nou pe esey annan menm fason panse avek Zeova, savedir pour vwar keksoz parey Zeova i vwar? I demann bokou zefor pour fer sa. Par kont, i vreman fasil pour annan menm fason panse avek dimoun dan sa lemonn, parski leta lespri sa lemonn i partou. (Efezyen 2:2) Osi, dimoun dan sa lemonn i souvandfwa konsantre lo zot menm e nou kapab ganny tante pour mazin parey zot. I difisil pour annan menm fason panse avek Zeova, me i vreman fasil pour mazin parey bann dimoun dan sa lemonn.
4. (a) Ki pou arive si nou les sa lemonn enfliyans nou fason panse? (b) Ki nou pou aprann dan sa lartik?
4 Si nou les sa lemonn enfliyans nou fason panse, i tre probab nou pou vin egois e anvi desid pour nou menm kwa ki byen e kwa ki mal. (Mark 7:21, 22) Alor i vreman enportan ki nou aprann pour “mazin parey Bondye,” pa “parey en zonm.” Sa lartik pou ed nou fer sa. Nou pou vwar bann rezon akoz ler nou vwar keksoz parey Zeova sa pa pe tro priv nou me i pour nou prop byenfe. Nou pou osi aprann ki mannyer nou kapab evite ganny enfliyanse par sa lemonn. Dan sa lot lartik, nou pou aprann ki mannyer nou kapab konn fason panse Zeova lo serten keksoz e fer son fason panse vin nou fason panse.
FASON PANSE ZEOVA I POUR NOU PROP BYENFE
5. Akoz serten dimoun pa oule ki personn i enfliyans zot?
5 Serten dimoun pa anvi ki personn i enfliyans zot fason panse. Zot dir, “Mon pa bezwen personn pour dir mwan ki pour fer.” I tre probab ki zot pe sey dir ki zot anvi fer zot prop desizyon e ki zot annan drwa fer li. Zot pa oule ki lezot i kontrol zot oubyen fors zot pour vin zis parey tou lezot dimoun. * (Vwar not.)
6. (a) Ki laliberte Zeova i donn nou? (b) Eski sa i laliberte total?
6 I byen pour konnen ki si nou aksepte fason panse Zeova, nou ankor kapab annan nou prop lopinyon. Dezyenm Korentyen 3:17 i dir: “Kot lespri sen Zeova i ete, i annan laliberte.” Zeova i donn nou sa laliberte pour vin sa kalite dimoun ki nou anvi vini. Nou kapab annan nou prop preferans e swazir ki keksoz ki enteres nou. Zeova in fer nou dan sa fason. Me sa pa vedir ki nou annan laliberte total. (Lir 1 Pyer 2:16.) Ler nou bezwen konnen kwa ki byen e kwa ki mal, Zeova i oule ki nou servi son Parol konman nou gid. Eski sa i priv nou oubyen i benefisye nou?
7, 8. Ler nou vwar keksoz parey Zeova i anvi nou vwar, eski sa i priv nou? Donn en legzanp.
7 Annou vwar en legzanp. Bann paran i esey ansenny zot zanfan bann bon prensip. I kapab ki zot montre zot zanfan pour vin onnet, travay dir e pran swen avek lezot. Sa pa pe priv zot. O kontrer, bann paran pe prepar zot zanfan pour reisi dan lavi. Ler bann zanfan i grandi e kit lakour, zot pou lib pour fer zot prop swa. Si zot swazir pour viv dapre bann bon prensip ki zot paran in ansenny zot, i annan plis sans ki zot pou fer bann bon desizyon e evit en kantite problenm, traka ek regre.
Zeova i envit nou pour aprann vwar keksoz parey li e pour viv dapre son bann prensip
8 Parey en bon paran, Zeova i anvi ki son bann zanfan i ganny sa pli bon lavi posib. (Izai 48:17, 18) Alor i ansenny nou bann prensip de baz konsernan moralite e ki mannyer nou devret tret lezot. I envit nou pour aprann vwar keksoz parey li e pour viv dapre son bann prensip. Sa pa priv nou. O kontrer, i fer nou pli saz e ed nou fer bann pli bon desizyon. (Psonm 92:5; Proverb 2:1-5; Izai 55:9) Nou ankor kapab swazir sa ki nou prefere, me nou pou fer bann swa ki fer nou ere. (Psonm 1:2, 3) Ler nou annan menm fason panse avek Zeova, sa i benefisye nou dan plizyer fason!
FASON PANSE ZEOVA I SIPERYER
9, 10. Kwa ki montre ki fason panse Zeova i pli siperyer ki pour sa lemonn?
9 En lot rezon akoz nou anvi nou fason panse i vin pli parey pour Zeova i akoz son fason panse i bokou pli siperyer ki pour sa lemonn. Lemonn i donn nou konsey lo ki kalite kondwit ki akseptab, ki mannyer pour annan en lavi fanmir ere, ki mannyer pour reisi dan nou karyer e dan lezot laspe lavi ankor. Me laplipar konsey ki sa lemonn i donnen i tou lekontrer avek panse Zeova. Par egzanp, lemonn i souvandfwa ankouraz dimoun pour rod zis zot prop lentere e pour vwar imoralite seksyel konman akseptab. Osi, parfwa lemonn i dir ki bann koup marye ti pou pli ere si zot separe ouswa divorse pour bann senp pti problenm. Sa konsey i al kont sa ki Labib i dir. Me eski konsey sa lemonn i pli itil ozordi ki konsey Labib?
10 Zezi ti dir: “Lasazes en dimoun i ganny rekonnet par son aksyon.” (Matye 11:19) Menm si lemonn in fer bokou progre dan teknolozi, i pa’n kapab rezourd bann gro problenm ki anpes nou ere, tel parey lager, rasizm ek krim. An plis, menm si sa lemonn i vwar imoralite seksyel akseptab, en kantite dimoun i admet ki sa i detri bann fanmir, anmenn bann problenm lasante ek lezot move konsekans. Me ki nou pou dir lo konsey Zeova? Bann Kretyen ki’n aksepte pwennvi Zeova i annan en fanmir pli ere, zot pli an bonn sante e zot annan bann bon relasyon avek bann frer ek ser partou dan lemonn. (Izai 2:4; Akt 10:34, 35; 1 Korentyen 6:9-11) Sa i klerman montre ki fason panse Zeova i pli siperyer ki pour sa lemonn.
11. Lekel ki ti enfliyans fason panse Moiz e ki rezilta sa ti anmennen?
11 Bann serviter fidel Zeova dan lepase ti konnen ki fason panse Zeova i pli siperyer. Par egzanp, menm si Moiz ti’n ganny ansennyen “tou lasazes bann Ezipsyen,” i ti konnen ki vre lasazes i sorti kot Zeova. (Akt 7:22, not; Psonm 90:12) Alor i ti demann Zeova: “Montre mwan ou semen.” (Egzod 33:13) Vi ki Moiz ti les Zeova enfliyans son fason panse, Zeova ti servi li dan en fason merveye pour akonpli Son plan e i ti onor Moiz par apel li en zonm ki annan bokou lafwa.—Ebre 11:24-27.
12. Ki Pol ti baz son desizyon lo la?
12 Zapot Pol ti en zonm entelizan, byen edike e i ti koz Ebre ek Grek. (Akt 5:34; 21:37, 39; 22:2, 3) Me i ti rezet lasazes sa lemonn e fer son desizyon baze lo Parol Bondye. (Lir Akt 17:2; 1 Korentyen 2:6, 7, 13.) Sa ti fer ki i ti annan en bon minister e i ti enpasyan pour sa rekonpans ki ti pou dire pour touzour.—2 Timote 4:8.
13. Lekel ki responsab pour aziste nou fason panse pour nou kapab vwar keksoz parey Zeova?
13 I kler ki fason panse Bondye i bokou pli siperyer ki pour sa lemonn. Si nou swiv bann standar Bondye, nou pou vreman ere e reisi dan lavi. Me Zeova pa pou fors nou pour mazin parey li. “Lesklav fidel e pridan” e ni menm bann ansyen pa kontrol nou panse. (Matye 24:45; 2 Korentyen 1:24) Sakenn parmi nou i responsab pour aziste nou prop fason panse pour nou kapab vwar keksoz parey Zeova. Ki mannyer nou kapab fer sa?
EVITE GANNY ENFLIYANSE PAR SA LEMONN
14, 15. (a) Ki nou bezwen medit lo la pour nou kapab annan menm fason panse avek Zeova? (b) Akoz nou pa devret les bann nide sa lemonn antre dan nou lespri? Donn en legzanp.
14 Romen 12:2 i dir: “Pa les sa lemonn enfliyans zot, me transform zot par sanz zot fason panse, pour ki zot menm zot fer sir ki sa i lavolonte Bondye, ki bon, akseptab e parfe.” Sa verse i montre nou ki nenport kwa ki ti enfliyans nou fason panse avan nou ti aprann laverite, nou kapab sanz nou fason panse e fer zot vin pli parey pour Bondye. Menm si bann laspe zenetik e nou bann leksperyans dan lavi in lenfliyans nou fason panse a en serten degre, nou lespri i kapab kontinyen sanze. Laplipar ditan i pou sanze dapre sa ki nou swazir pour mazin lo la. Si nou medit lo fason panse Zeova, nou pou realize ki son pwennvi i toultan byen. Sa pou fer nou anvi vwar keksoz parey Zeova i vwar.
15 Me pour sanz nou fason panse pour ki nou kapab mazin parey Zeova, nou bezwen “pa les sa lemonn enfliyans” nou. Sa i vedir ki nou bezwen aret gete, lir e ekout okenn keksoz ki al kont fason panse Bondye. Pour ed nou
konpran ki degre sa i enportan, annou pran legzanp manze. En dimoun ki anvi vin pli an bonn sante i kapab deside pour manz bann pli bon kalite manze. Me tou son zefor pour anven si i osi manz manze gate! Dan menm fason, tou nou zefor pour aprann konn fason panse Zeova pou anven si nou les bann nide sa lemonn antre dan nou lespri.16. Kont kwa ki nou devret protez nou?
16 Eski nou kapab konpletman evit bann nide sa lemonn? Non, nou pou ganny ekspoze avek serten bann nide sa lemonn parski nou pa kapab literalman sorti dan sa lemonn. (1 Korentyen 5:9, 10) Menm ler nou dan predikasyon, nou pou tann bann dimoun pe eksprim bann move nide ek bann fo krwayans. Me menm si nou pa kapab konpletman evit bann move nide, nou pa bezwen kontinyen mazin lo zot ouswa aksepte zot. Parey Zezi, nou devret vitman rezet bann panse ki Satan ti pou kontan nou annan. Nou kapab protez nou lekor par evit bann keksoz initil ki ekspoz nou avek panse sa lemonn.—Lir Proverb 4:23.
17. Ki mannyer nou kapab evite ganny ekspoze avek fason panse sa lemonn?
17 Par egzanp, nou devret swazir byen nou zanmi. Labib i averti ki si nou vin zanmi avek dimoun ki pa ador Zeova, nou pou konmans mazin parey zot. (Proverb 13:20; 1 Korentyen 15:12, 32, 33) Nou devret osi swazir byen nou bann divertisman. Ler nou rezet bann divertisman ki promot sa teori lo evolisyon, vyolans ouswa imoralite, nou evite anpwazonn nou lespri avek bann nide ki “anpes dimoun konn Bondye.”—2 Korentyen 10:5.
Eski nou ed nou zanfan pour rezet bann move divertisman? (Vwar paragraf 18, 19)
18, 19. (a) Akoz nou devret fer atansyon bann nide sa lemonn ki ganny promote dan bann fason ki pa sitan evidan? (b) Ki bann kestyon nou devret demann nou lekor e akoz?
18 Nou osi bezwen rekonnet e rezet Matye 22:36-39) Osi, menm si petet laplipar liv zistwar zanfan i akseptab, san realize serten i kapab fer bann zanfan aksepte bann konportman imoral.
bann panse sa lemonn ki ganny promote dan bann fason ki pa sitan evidan. Par egzanp, serten rapor dan nouvel i ganny prezante dan en fason ki siport serten lopinyon politik. Osi, serten bilten dan nouvel i promot bann lobzektif ek lakonplisman ki sa lemonn i admire. Serten film ek liv i promot sa fason panse ki mwan ek mon fanmir ki pas avan e zot fer sa fason panse paret rezonnab, atiran e menm byen. Par kont, sa bann pwennvi pa pran kont sa ki Labib i dir. Labib i dir ki nou ek nou fanmir pou vreman ere ler nou kontan Zeova plis ki tou. (19 Sa pa vedir ki i mal pour profit bann bon divertisman. Me nou devret demann nou lekor: ‘Eski mon rekonnet bann panse lemonn menm ler zot ganny promote endirekteman? Eski mon pe protez mon zanfan ek mon lekor kont serten progranm televizyon ek serten liv? Eski mon ed mon zanfan pour annan pwennvi Zeova lo keksoz pour ki zot pa ganny enfliyanse par bann nide sa lemonn ki zot tande e vwar?’ Si nou rekonnet diferans ki i annan ant fason panse Bondye ek fason panse sa lemonn, nou kapab evite “les sa lemonn enfliyans” nou.
LEKEL KI PE ENFLIYANS OU OZORDI?
20. Kwa ki pou determin sa ki enfliyans nou?
20 Nou bezwen rapel ki i annan zis de sours lenformasyon. Enn i Zeova e sa lot i Satan ek son lemonn. Lekel ki enfliyans ou? Larepons i, sa enn ki ou pran ou lenformasyon avek. Si nou aksepte bann nide sa lemonn, sa lemonn pou enfliyans nou fason panse e nou pou mazin e azir dan en fason egois. Alor i vreman enportan ki nou fer atansyon ki nou vey byen sa ki nou gete, lir, ekoute e mazin lo la.
21. Ki nou pou diskite dan sa lot lartik?
21 Dan sa lartik nou’n aprann ki nou bezwen evit bann nide sa lemonn pour nou ganny pwennvi Zeova lo bann keksoz. Nou osi bezwen medit lo bann panse Zeova pour nou kapab mazin plis parey li. Dan sa lot lartik, nou pou aprann ki mannyer nou kapab fer sa.
^ par. 5 An realite, menm sa dimoun pli endepandan i ganny enfliyanse par lezot dimoun. Par egzanp, ki swa nou pe mazin lo ki mannyer lavi ti konmanse oubyen senpleman lo ki nou pou mete, lezot dimoun i enfliyans nou, omwen en ptigin. Me nou kapab swazir lekel ki nou pou les enfliyans nou.