Met konfyans dan Zeova e viv!
“Met ou konfyans dan [Zeova] avek tou ou leker; pa kont lo ou prop rezonnman.”—PROVERB 3:5.
1. Akoz nou tou nou bezwen ganny rekonforte?
NOU tou nou bezwen ganny rekonforte. Petet nou lavi i ranpli avek bann lenkyetid, dezapwentman ek traka. Petet nou pe soufer akoz nou annan en maladi, akoz nou pe vin pli aze ouswa akoz nou’n perdi en dimoun ki nou kontan dan lanmor. Serten parmi nou pe ganny mal trete avek lezot. An plis, bann dimoun otour nou pe vin deplizanpli pli vyolan. Anfet, sa “letan vreman difisil” i montre ki nou pe viv dan “bann dernyen zour” e ki sak zour nou pe vin pli pros avek sa nouvo lemonn. (2 Timote 3:1) Kantmenm sa, i kapab ki nou’n esper en kantite letan pour bann promes Zeova vin vre e petet pli ale nou pe fer fas avek plis difikilte. Alor, kote nou kapab trouv rekonfor?
2, 3. (a) Ki nou konnen lo Abakouk? (b) Akoz nou pou egzamin liv Abakouk?
2 Annou egzamin liv Abakouk pour trouv larepons sa kestyon. Menm si Labib pa donn nou bokou detay lo lavi Abakouk, son liv i vreman ankourazan. I tre probab ki sa Abakouk 2:2.
non Abakouk i vedir “May dan lebra.” Sa i kapab refer avek lafason ki Zeova i rekonfort nou, konmsi i pe may nou dan son lebra. Ouswa i osi kapab pe refer avek lafason ki nou nou tyonbo li for. Abakouk ti koz avek Bondye e demann li serten kestyon. Zeova ti enspir Abakouk pour ekri sa konversasyon, parski I ti konnen ki sa ti pou benefisye nou.—3 Sa konversasyon ant sa profet ki ti enkyet ek Zeova, i sel keksoz ki Labib i dir nou lo Abakouk. Me son liv i form parti “tou bann keksoz ki’n ganny ekrir dan lepase” dan Parol Bondye, “pour ki atraver nou landirans ek rekonfor ki Lekritir i donn nou, nou kapab annan lespwar.” (Romen 15:4) Ki mannyer liv Abakouk i kapab ed sakenn parmi nou? I kapab ed nou konpran ki savedir annan konfyans dan Zeova. Profesi Abakouk i osi asir nou ki nou kapab annan lape lespri malgre okenn problenm oubyen leprev ki nou fer fas avek.
PRIY ZEOVA
4. Akoz Abakouk ti enkyet?
4 Lir Abakouk 1:2, 3. Abakouk ti viv dan en letan vreman difisil. Bann dimoun otour li ti move e vyolan e sa ti fer li vreman sagren. Partou kot i ti gete, i ti vwar bann Izraelit pe tret zot kanmarad dan en fason ki kriyel e enzis. Abakouk ti mazinen: ‘Kan ki sa bann move keksoz pou arete? Akoz Zeova pe tarde pour fer en keksoz konsernan sa ki pe arive?’ I ti santi ki i pa kapab fer nanryen. Alor i ti sipliy Zeova pour fer en keksoz. I kapab ki Abakouk ti’n konmans mazinen ki Zeova ti nepli enterese avek Son pep ouswa ki I pa ti pou azir. Eski ou’n deza santi parey?
Nou pa devret per pour dir Zeova bann keksoz ki pe fatig nou ouswa nou bann dout
5. Ki nou kapab aprann avek liv Abakouk? (Vwar portre o konmansman sa lartik.)
5 Eski Abakouk ti demann sa bann kestyon akoz i ti’n aret annan konfyans dan Zeova ek son bann promes? Non! Abakouk ti pe demann Zeova pour ed li avek son bann dout ek problenm, ki montre ki i pa ti’n perdi lespwar me ki i ti ankor annan konfyans dan Zeova. Abakouk ti enkyet e konfize. I pa ti konpran akoz Zeova ti pe tarde pour azir e akoz I ti pe les li soufer sa kantite. Lefet ki Zeova in enspir Abakouk pour ekri konsernan bann keksoz ki ti pe fatig li, sa i montre nou en leson enportan. Nou pa devret per pour dir Zeova bann keksoz ki pe fatig nou ouswa nou bann dout. Anfet, i zantiman envit nou pour priye e dir li egzakteman sa ki nou santi. (Psonm 50:15; 62:8) Proverb 3:5 i ankouraz nou tou: “Met ou konfyans dan [Zeova] avek tou ou leker; pa kont lo ou prop rezonnman.” Abakouk ti aplik sa bann parol dan son lavi.
6. Akoz i enportan pour priye?
Psonm 65:2) Ler nou fer sa, nou pou vwar lafason ki Zeova i reponn nou lapriyer. Ler i rekonfort e gid nou, nou pou santi konmsi i’n may nou dan son lebra. (Psonm 73:23, 24) I pou ed nou konpran ki mannyer i vwar nou sityasyon, malgre nenport ki leprev ki nou fer fas avek. Enn bann pli bon fason ki nou montre ki nou annan konfyans dan Zeova i ler nou priy li.
6 Abakouk ti annan konfyans dan Zeova ki ti son Zanmi ek Papa e i ti pran linisyativ pour vin pros avek li. Abakouk pa ti zis enkyet konsernan son sityasyon e esey rezourd keksoz lo li menm. O kontrer, i ti priy lo son bann santiman ek lenkyetid. Sa i en bon legzanp pour nou. Zeova, sa Enn ki ekout lapriyer, i envit nou pour montre ki nou annan konfyans dan li par priy avek li e dir li kwa ki pe fatig nou. (EKOUT ZEOVA
7. Ki mannyer Zeova ti reazir ler Abakouk ti dir Li konsernan bann keksoz ki ti pe fatig li?
7 Lir Abakouk 1:5-7. * (Vwar not.) Apre ki Abakouk ti’n dir Zeova konsernan son bann lenkyetid, petet i ti’n mazinen ki mannyer Zeova pou reazir. Konman en Papa lanmour, Zeova ti konpran ki mannyer Abakouk ti santi. I ti konnen ki Abakouk ti pe soufer e pe sipliye pour ganny led. Alor Zeova pa ti repros Abakouk, me i ti dir li sa ki I ti pou fer byento avek bann Zwif enfidel. Anfet, i kapab ki Abakouk ti sa premye dimoun ki Zeova ti fer konnen ki bann Zwif enfidel ti pou ganny zot pinisyon tre byento.
8. Akoz Abakouk pa ti pe ekspekte sa larepons avek Zeova?
8 Zeova ti eksplik Abakouk ki I ti pare pour pran aksyon. I ti pou pini bann dimoun Zida ki ti move e vyolan. Ler Zeova ti dir ki sa ti pou ariv “dan zot letan,” i ti pe montre ki sa zizman ti pou ariv pandan ki Abakouk ti ankor vivan oubyen pandan ki bann Izraelit otour li ti ankor vivan. Abakouk pa ti’n ekspekte sa larepons ditou. Bann Babilonnyen ti kriyel. Zot ti pli vyolan ki bann Izraelit, ki omwen ti konn bann standar Zeova. Alor, akoz Zeova ti pou servi sa nasyon payen ki kriyel pour pini son pep? Sa ti pou zis fer pep Zida soufer plis ankor. Ki mannyer ou ti pou’n santi si ou ti dan plas Abakouk?
9. Ki lezot kestyon Abakouk ti demande?
9 Lir Abakouk 1:12-14, 17. Menm si Abakouk ti konpran ki Zeova ti pe al servi bann Babilonnyen pour pini bann move dimoun otour li, i ti ankor konfize. Me i ti annan limilite e i ti determinen pour kontinyen annan konfyans dan Zeova. Anfet, i ti dir ki Zeova ti ankor son “Ros.” (Deterononm 32:4; Izai 26:4) Abakouk ti konvenki ki Bondye i annan lanmour ek labonte, alor i pa ti per pour demann Zeova plis kestyon, parey: Akoz Zeova ti pou les keksoz an Zida vin pli pir e les son pep soufer plis ankor? Akoz i pa ti pou fer en keksoz toudswit? Akoz Bondye Tou Pwisan ti pou “reste trankil” e toler bann keksoz mal ki ti pe arive partou? Apre tou, Zeova i “Sen” e son “lizye i tro pir pour kontanple lemal.”
10. Akoz parfwa nou santi parey Abakouk?
10 Par ler nou kapab santi parey Abakouk. Nou ekout Zeova. Nou annan konfyans dan li e nou lir e etidye son Parol, ki ranforsi nou lespwar. Nou osi aprann konsernan son bann promes ler nou ekout sa ki son lorganizasyon i dir nou. Me kantmenm sa, petet nou pe mazinen, ‘Kan ki nou pou aret soufer?’ Nou kapab aprann avek sa ki Abakouk ti fer apre.
ESPER ZEOVA AZIR
11. Ki Abakouk ti determinen pour fer?
11 Lir Abakouk 2:1. * (Vwar not.) Sa konversasyon ki Abakouk ti fer avek Zeova ti donn li lape lespri. I ti fer li determinen pour esper Zeova azir. Abakouk ti repet son determinasyon ler i ti dir: “Dan silans, mon atann zour maler.” (Abakouk 3:16) Lezot serviter fidel Bondye osi ti kontinyen esper avek pasyans pour Zeova azir. Zot legzanp i ankouraz nou parski i montre ki nou osi nou kapab fer parey.—Mika 7:7; Zak 5:7, 8.
Nou devret esper avek pasyans pour Zeova azir e annan konfyans ki i pou soulaz nou soufrans dan sa moman ki i swazir
12. Ki nou kapab aprann avek Abakouk?
12 Ki nou kapab aprann avek determinasyon Abakouk? Premyerman, fodre ki nou pa zanmen aret priy Zeova malgre nenport ki problenm nou annan. Dezyenmman, nou bezwen ekout sa ki Zeova i dir nou atraver son Parol ek lorganizasyon. Trwazyenmman, nou devret esper avek pasyans pour Zeova azir e annan konfyans ki i pou soulaz nou soufrans dan sa moman ki i swazir. Si nou imit Abakouk, nou pou annan lape lespri e nou pou kapab andire. Nou lespwar pou ed nou annan pasyans e pour ere malgre nenport ki problenm nou annan. Nou annan konfyans ki nou Papa dan lesyel pou azir.—Romen 12:12.
13. Ki mannyer Zeova ti rekonfort Abakouk?
13 Lir Abakouk 2:3. Nou kapab asire ki Zeova ti kontan ki Abakouk ti deside pour esper Li azir. Bondye Tou Pwisan ti konn egzakteman douler Abakouk, alor I ti rekonfort son profet e reasir li avek lanmour ki i ti pou reponn son bann kestyon senser. I pa ti pou pran bokou letan avan ki Abakouk i ganny soulaze avek tou son bann lenkyetid. I ti konmsi Zeova ti’n dir Abakouk: “Zis annan pasyans ek konfyans dan mwan. Mon pou reponn ou lapriyer, menm si i paret ki i pe pran en ta letan.” Zeova ti fer Abakouk rapel ki I ti’n fini deside kan ki I ti pou realiz Son bann promes. Alor i ti ankouraz Abakouk pour kontinyen espere. A lafen dizour, son profet pa ti pou dezapwente.
Akoz nou determinen pour fer nou mye pour Zeova? (Vwar paragraf 14)
14. Ki nou devret determinen pour fer ler nou pas atraver bann leprev?
14 Nou osi nou bezwen esper Zeova azir. Nou osi bezwen ekout atantivman sa ki i dir nou. Apre nou pou annan konfidans ek lape lespri malgre nenport ki leprev nou pas atraver. Zezi ti ankouraz nou pour pa konsantre lo “letan ek lepok” ki Bondye pa’n koz lo la avek nou. (Akt 1:7) Nou bezwen annan konfyans ki Zeova i konn sa pli bon moman pour azir. Alor, nou pa devret abandonnen, me nou devret annan limilite, pasyans ek lafwa dan Bondye. Deplis, anmezir nou espere, nou devret servi byen nou letan e fer nou mye pour servi Zeova.—Mark 13:35-37; Galat 6:9.
ZEOVA I DONN LAVI BANN KI ANNAN KONFYANS DAN LI
15, 16. (a) Ki bann promes nou kapab trouve dan liv Abakouk? (b) Ki nou aprann avek sa bann promes?
15 Zeova ti promet: “Sa enn ki zis, pou viv par son lafwa” e ki “later antye pou konn grander [Zeova].” (Abakouk 2:4, 14) Zeova i promet ki i pou donn lavi eternel bann ki annan pasyans ek konfyans dan li.
16 Sa promes ki trouve dan Abakouk 2:4 i sitan enportan ki zapot Pol ti sit sa verse trwa fwa dan son bann let! (Romen 1:17; Galat 3:11; Ebre 10:38) Nou kapab asire ki malgre nenport ki difikilte ki nou pas atraver nou pou vwar bann promes Zeova vin vre si nou reste fidel avek li. Zeova i oule ki nou konsantre lo nou lespwar pour lavenir.
17. Ki Zeova i asir nou i pou fer si nou annan konfyans dan li?
17 Liv Abakouk i annan en bon leson pour nou tou ki pe viv dan sa bann dernyen zour. Zeova i promet pour donn lavi eternel avek tou dimoun drwat ki met konfyans dan li. Alor annou kontinyen ranforsi nou konfyans dan Bondye malgre nenport ki problenm ek traka ki nou annan. Sa ki Zeova ti dir Abakouk i asir nou ki I pou siport e sov nou. I demann nou pour annan konfyans dan li e esper avek pasyans pour sa letan ki i’n deza fikse pour son Rwayonm diriz later. Sa letan, later pou ranpli avek bann dimoun ere e anpe ki ador Zeova.—Matye 5:5; Ebre 10:36-39.
ANNAN KONFYANS DAN ZEOVA E OU POU ZWAYE
18. Ki lefe bann parol Zeova ti annan lo Abakouk?
18 Lir Abakouk 3:16-19. Sa ki Zeova ti dir Abakouk ti annan en gran lefe lo li. Abakouk ti medit lo bann keksoz enkrwayab ki Zeova ti’n fer pour Son pep dan lepase. Aprezan son konfyans dan Zeova ti ganny ranforsi. I ti asire ki Zeova ti pou azir byento! Sa ti rekonfort sa profet, menm si i ti konnen ki petet i ti pou bezwen kontinyen soufer pour en pe letan. Abakouk ti nepli annan dout. O kontrer, i ti annan lafwa total ki Zeova ti pou sov li. Anfet, sa ki i dir dan verse 18 i kapab enn bann pli gran lekspresyon konfyans ki nou vwar dan Labib. Serten spesyalis Labib i krwar ki i vedir: “Mon pou sot avek lazwa dan Senyer; Mon pou danse avek plezir dan Bondye.” Pa sa i en bon leson pour nou tou! Zeova pa’n zis donn nou bann zoli promes pour lavenir, me i’n osi asir nou ki tre byento i pou akonpli sa bann promes.
19. Ki mannyer nou kapab ganny rekonforte avek Zeova parey Abakouk?
19 Sa leson enportan ki nou aprann dan liv Abakouk i: Met nou konfyans dan Zeova. (Abakouk 2:4) Pour kontinyen annan konfyans dan Zeova, nou bezwen ranforsi nou relasyon avek li. Alor la sa ki nou bezwen fer. (1) Kontinyen priye e dir Zeova nou bann lenkyetid e sa ki pe fatig nou. (2) Ekout atantivman sa ki Zeova i dir nou dan son Parol e swiv gidans ki i donn nou atraver son lorganizasyon. (3) Reste fidel e annan pasyans anmezir ki nou esper Zeova akonpli son bann promes. Sanmenm sa ki Abakouk ti fer. Menm si i ti vreman enkyet ler i ti konmans son konversasyon avek Zeova, a lafen i ti ganny lankourazman e i ti zwaye! Si nou imit Abakouk, nou osi nou pou ganny rekonforte avek Zeova, konmsi i pe may nou dan son lebra. Ki pli gran rekonfor nou kapab gannyen dan sa move lemonn?
^ par. 7 Abakouk 1:5: “[Zeova] i dir: Gete sa ki pe pase parmi bann nasyon. Ou pou etonnen e sezi! [“Parski en keksoz pou arive dan zot letan ki zot pa pou krwar menm si zot in ganny dir,” NWT.]”
^ par. 11 Abakouk 2:1 (NWT): “Mon pou kontinyen reste lo mon stasyon e mon pou kontinyen debout lo miray. Mon pou kontinyen veye pour vwar ki i anvi mon dir. Ki mon pou reponn ler mon ganny reprimande.”